BEIDAWNGA CHHUAHTIR LOH

July ni 21 khan IPS officer Pu C.Laldina chuan Aizawl Superintendent of Police mawhphurhna a la tan a. Hemi ni vek hian a pisaah a thawhpui tur police officer-te kawmin infuihna hunte a hmanpui a. Police station miin an panin an duh reng vanga kal a nih thin loh thu leh police an mamawh vanga kal an nih thute a sawi a. Mangang, tanpui ngai, danin a hum ngaite an nih thin avangin hawihhâwm taka lo buaipui nghal thin tur leh beidawnga chhuahtir lo turin a hote chu a chah a. Pu Dina hian mipui laka police te mawhphurhna leh tawngkam leh chetdan dik leh mawi pawimawhzia a hrechiang hle.

Tin, tunlai khawvelah media hmanga thu leh hla inhrilhhriatna a chak lehzual tawh avangin police lam bawhzui nghal tur ang chi te chu ti zung zung turin a chah bawk a. Dr.H.T.Sangliana chanchin Dr.Lalrinawmi Ralte ziak atanga kan lo hriatte pawh rilruah a rawn thar leh hle.

Maharahstra state-a Kolhapur district police hotute chuan tun hnai khan dan bawhchhiatna hremloha chhuak thin tihtlemnan leh dan bawhchhiate an phu anga tawka hrem an nih ngei theihnan hmalakna thar an buatsaih a. Times of India thuthar lakhawmtu Vivek Waghmode-a’n a tarlan dan chuan, ruahmanna tharah hian police station tin ten kum 3 chhunga criminal case an ziahluh langsar zual deuh deuh chi 5 an thlang chhuak anga. Tih zuzi mai mai theih lohna tur leh dan bawhchhiate an phu tawka hrem an nih ngei theihna turin dan lam hriate nen an tan ho dan tur an siam ang a. A hlawhtlin chuan state pumpuia hman a nih tur thu Minister Sarjel Patil-a’n a sawi nghe nghe a ni.

Minister hian a sawi dan chuan Investigation Officer in case a chhui naah evidence pawimawh zawng zawng te a lak ngei ngeina tur leh tihsual palh a awm lohnan uluk taka hma lak a ni ang tih a ni a.

Kolhapur SP Manojkumar Sharma sawi dan chuan, police ten case an chhuinaah awmze nei zawka hma an lak theihnan dan lam thiam (legal expert) te leh Law department lama official te leh police officer te chu inkawmna hun mumal tak buatsaihsak a ni ang a. Police officer ten dan lam an hriatfiah theih zawkna tur leh case an ziahluh leh chhuina kawnga tihsual leh dan zawmlohna ang chi te tihtlem an beisei a ni. Thuhretute’n an mawhphurhna tha taka an hlen theihnana police lamin thuhretute an chhawn dan tur lam pawh ruahmanna tharah chuan a tel a. SP hian a tum ber pakhat chu thil tisuala puhte’n dan hmang veka talchhuahna an zawn thinna kaw hrang hrang te tihpin a nih theihnan dan lam thiamte nena thawhho a ni a.

Police te hmalak tumna chu Kolhapur District Bar Association president Vivek Ghatke-a'n tha a tih thu a sawinaah police ten dan lam hriate an rawn tam a tangkai a rin thu a sawi a. Police IO te chu Indian Penal Code leh Indian Evidence Act zirchiang tura a hranpaa training pek ngei ngei tur a ti hial a ni.

Kolhapur District police te hmalakna hi MoS berin a tuipui avangin awmze nei tura ngaih a ni a. Tin, an police department pawh biakpawhna awlsam tak chiang takin an website ah an tarlang a ni. SP pawhin “manoj19@yahoo.com” tih ang vel email mai mai hmang lovin official email, sorkar domain zahawm leh computer hmanga thil khawihchhe ching – hacker – hovin an khawih mai mai theih loh tur email him (secure) hmel tak a hmang a. An website ah, phone number nen, chu'ng te chu chiang taka tarlan a ni.

Aizawl police hotu tharin police officer te a fuihna ang te hi, a nihna takah chuan, mipui rawngbawl sorkar hnathawk zawng zawng te hian an vawng reng tur a ni zawk a. Police te hi tun hma deuhva, “police ka nih hi, ka man mai ang che, min hlau lo'm ni?” tih ang rilru an pu vak tawh lo nain sorkar tharum thiltihtheihna hmansual hi a la awlsam em a, uniform ha tawh chu civil mi thenkhat pawhin kan la hlau nghal ringawt a. Kan thiamlohna ni miahlo thilah zawhna min zawt se, thenkhat chuan kan pawng hlauh ringawt bawk a.

Pu Dina’n a hote, hawihhawm taka, mipui lo dawngsawng thin tur leh beidawnga chhuahtir lo thin tura a fuihna hi hotu tharin thu tha a sawi satliah mai ni lovin Mizoram Police Manual 2006, Chapter 2/10 "Guidelines in Performance of Duties" hnuaia No.3 “Every Police Officer shall place duty before self, and remain calm and good humoured in any situation, however risky or provocative.” leh No 4 “Every Police Officer shall be sympathetic, courteous and considerate to all members of the public and be ready at all times to render necessary assistance to all without regard to their wealth or social standing” ah te hian a chuang reng tawh zawk a. Chiang taka a inziah avangin, police hawihhawmlo deuh emaw, thinchhe tak emaw, duhsak bik leh duhsakloh bik neia thil ti thin an nih chuan a diklohnaah thiamloh a chang thei nghal a ni.

Khawtlang nuam tehna ber pakhat chu, "Remna leh muanna a awm em?" tih hi a ni a. Itsikna leh tharum thawh hrehlohna khawvela cheng kan nih miau avangin police te hi ralmuang taka kan khawsak theihnan kan mamawh hle a ni. Police hna bulpui ber chu, Manual-in a sawi angin, dan bawhchhiatna (crime) leh khawtlang buaina (disorder) ven a ni a. Chu hna chu an thawh theihnan mipui pawhin kan thlawp that a tul hle a ni.

Police te hian dan bawhchhiatna zawng zawng hi an veng seng lova (“proton” vuah bike tlan ring ho an la hriat theih tlat!), khawtlang ralmuanna tichhe thei boruak thalo zawng zawng pawh an tudai vek seng lo.(April ni 4 zana Chief Minister chenna in hungna nam thlu tep mipui pungkhawm te kha kan la hria em? Police pakhat duty sawidan chuan khami zan khan mipui thinrim pungkhawm khan CM bangla kha an luhchhuah tep a ni. CM a awm loh avang leh lut pawh ni se sorkar/mipui thil neih an tichhia a ni ringawt dawn tia an hrilh leh tawp mai tura an ngenna te kha ngaithla lo ta tlat se revolution tenau emaw lianpui a chhuak thei reng khami zan khan!)

Buaina awm lo tura khawtlang boruak nuam tak min vawnsak leh dan bawhchhiatna awm thei ven hi kan police ten an tih zel theihnan leh an theih piah lama lo tanpui turin mipui kan pawhmawh hle a ni.

Dan bawhchhiatna sawi takah chuan kan ram sorkar hotu lu ber inhnamhnawihna, April 21 zana Aizawl khawchhung ngei a mi, MLTP Act in chiang taka a khap Foster’s beer nena a lanna thlalak chungchang kha SP kal chhuak ta sawi dan ang ni lovin Supreme Court in Nov 12, 2013 khan “Registration of FIR is mandatory under Section 154 of the Code, if the information discloses commission of a cognizable offence and no preliminary inquiry is permissible in such a situation” tiin FIR hi CrPC Sec 154 hmanga ziahluh ngei ngei tur a ti a. A chhan pawh kan MLTP Act 1995, Chapter V/58 in - “Every offence punishable under this Act shall be cognizable” tia a lo sawi vang a ni. Cognizable offence phei chu preliminary inquiry pawh lak miah loh tur zawk a ni.

June 4-a Aizawl Police Station-a lehkha thehluh a nih khan Pu Hawla an hlauh em em vangin police ten Supreme Court in dan a lo nemngheh pawh zah zo lovin FIR kha an lo register lo a nih pawhin SP tharin police ho zawm tur Police Manual tlawhchhana a hote a fuihna ang hian dan bawhchhiatna tilang chiang tak thlalak vang khan an tih tur hi an ti ngei tur a ni. An tih loh chuan SP fuihna ang nilovin, a thehluttu te chauh nilo, dan rorelna duh zawng zawng beidawngin min chhuahtir tihna a ni ang.

Sorkar hnathawk leh politician ten diklo taka an tih ni ngeia hriat thilah police te hian FIR an dawng ta nual, awmze neia kalpui si lovin. SP tharin a sawi ang hian, anmahni pan tute beidawnga chhuahtir loh hi an duh tak zet em tih hi kan Police te hian han inzawt nawn leh teh se.

DYNASTIC POLITICS

Mipui rorelna awmze nei tur tak takah chuan thil ti thei fal bik emaw chhungkhat laina inzawmna avanga thuneihna sawrbingna ang chi hi a thalo tih kan pawmtlangin ka ring a. Kan pawm chiah loh pawhin a mawi zan lo tih chu kan hriat tho ka ring.

Thuneihna lo tem tawh ten an sim theih loh - thuneihna neih zel tumna - hi kan Zoramah pawh hian a lo inphum ru ve reng em tih I han bihchiang dawn chhin ang aw! Sawi thui hmain, an hming ka rawn tarlan tuma te leh an inzawmna te hi mimal beihna ni lovin, kan dinhmun dik tak enchianna a ni tih erawh lo hre lawk ta ila. FIR chelek duh pawl an tam hmel si a.

 

Kan Chief Minister chu kan hria a. A nau chu Pu Lalthanzara (Patea) a ni a. Pu Zodintluanga chu Pu Hawla monu nuta a ni a. Chutiang zelin Pu Chalrosanga Ralte chu Pu Zodintluanga nau a ni leh a.

A lehlamah Pu C.L.Ruala chu engemaw laiin Pu Hawla te nen lo in then deuh mah se, tunah chuan an luangza leh tawh a. Congress party a senior berte zinga mi leh hmingtha ber pawl a ni. Pu C.L.Ruala nupuia nuta chu Pu John Rotluangliana a ni a. Tin, Pu Joseph Lalhimpuia chu Pu C.L.Ruala nu laizawnnu tupa a lo ni leh ta bawk a.

A dang pawh an awm nual mai thei a. Tun atan chuan kan tarlan hote atang khian engemaw han zirchiang dawn phawt ta ila.

Pu Patea chu MA (Political Science) degree nei a ni a. 2008-a MLA ni tura a in candidate hma chuan Zoram politics kalvelah hian a lo zirchhuah te hmangin mipui nawlpuiin ka hlawkpui theih tur chanchinbuah te emaw a ziah kan hre lem lo. Contractor a nih bakah khawtlang hruaitu a nih kha mi hriat dan a ni deuh ber a. MLA a han nih khan a u in a bul hnaiah dahin Parliamentary Secretary nihna a pe a. Chief Minister bulah awmin, a then phei chuan 'working CM' zawk a ni e te an ti hial a. Pu Patea hi Pu Hawla nau ni lo ta se, Congress party hian MLA ticket an pe kher angem? MLA a nih hnu pawh khan a u Pu Hawla ni lo ta se, CM puitu Parliamentary Secretary ah ruat a ni kher angem? Tin, tunah pawh hian Health Minister nihna hi pek a ni kher angem? Tin, a u hi a tar tan tawh a, a dawt leha Chief Minister nih tir tumnain Pu Hawla hian ruahmanna a siam mek em tih hi zawhna lian tak niin ka lo hria. A nih loh chuan a tha a. A nih chuan a tira kan sawi kha a la dik tluang zel tihna a ni.

Pu Zodintluanga (Mama) te unau han en ta ila. Pu Mama chu la thalai tak, hawiher pawh changkanga ngaih a ni. Amaherawhchu, Pu Hawla te nen an inzawmna vang ni lo ta se department lian tham leh pawimawh deuh deuh te hi a portfolio ah pek a ni kher angem? Tin, nikum inthlana Dr.R.Lalthangliana khing tura Congress party-in a ruat kha hriat theuh angin Pu Mama nau, Pu Chalrosanga Ralte (Mavala) a ni a. A tennis khelh thiam thinzia chu ka mit ngei pawhin ka hmu ve tawh a. Chhuanawm tak a ni. Mahse, mipui roreltu ni tur chuan Lunglei ho phei chuan a tling ta mai kha mak pawh an tih reng kha. Mipui aiawha roreltu ni tur chuan a la inpeihlo tih chu mi tam zawk ngaihdan a ni awm e. Pu Hawla te nen inzawmna nei lo ta se, ticket pek a ni angem?

Pu Joseph Lalhimpuia pawh, sawi tawh ang khan, Congress party hruaitu senior te zinga mi nephew tur ang a ni a. Politics lama a tel hma phei chuan MNF sorkarin a hnathawhna lama an duhsak avangin MNF lam awn turah te pawh ngaih a ni. Eng ang chiahin nge Congress leh a pa Ruala te pawhin an lo titipui kan hre ve tawh lova. Mahse, thil chiang nia lang chu Pu C.L.Ruala thisen zawmpui a nih vangin Pu Hawla leh MPCC hruaitute biak chhiat chu a ni lo phawt. Eng vangin nge dinhmun langsar pek a nih tih chuan a chhanna pahnih a awm thei ang a. Pu Liandala tupa, kan Lunglei MLA hi a hnathawhna lamah a taima em a. A hnathawh hrim hrimah chuan fak a phu hle a ni. Amaherawchu, sawi tawh ang khan a telna party leh sorkar hotupa Pu Hawla politics thianpa Pu C.L.Ruala te nau a nihna hi factor a ni lo chu a tih theih loh in a lang.

Pu C.L.Ruala hi Pu Sangzuala te ho nen Pu Hawla lam tang lo pawla kal hrang zinga tel kha a ni a. An inrem leh thei kha an zavaia tan thil tha tak a ni. MP atana candidate a nih hmasak zawk khan Mizo mipuiten mi viak tha zawk leh zuan zang zawk kan it tawh a. Mahse, party inkaihhruaina kalphung chuan a hnawl thei lo. MP ah kan thlang tling a, kum 5 chhunga parliament tha taka a kai pawhin thusawi honaah vawi 2  tel a, private member bill a nei lova. Zawhna 12 chauh a zawt a ni. Ama sawi angin parliament ah hian zu au chhuah vak vak chi chu a ni lo nain, mi tam tak ngaihah effective tak chu a ni lo a ni. UPA hi lo chak leh ta se, India ram Prime Minister tura an hual Tv.Rahul Gandhi-a support tur te zinga mi a nih hmel a. Chutiang zawnga thlir pawh chuan awmzia nei vak tawh lo tura ngaih chu a ni. Tunah, MP atan Congress in an vawrh leh hi Pi Sonia-i te chhungkaw tana venthawnawm loh tur, MPCC tana hnawksak lo tur nih vang ni ta se Mizoram mipui te tan enge hlawkna ni ta ang?

Heng ka han sawina chhan chu politics a thuneihna hi thil tithei, inzawmna nei te’n an thlah duh lova, an hun a liam pawhin a chhunzawm tur an ruat a. Mi zawng zawng lenna ni lovin thil tithei bikten thuneihna leh sum hmanga insawhnghehnan an hmang ni berin a lang. Chutiang chu lo ni ta se, khawvel hmun danga mi hnaisailo ho ten an chin ang hi kan ramah pawh hian kan lo ching ve reng tihna em ni ang?

“SAWISEL" RAWH

Matthaia 7:1-a Lal Isua zirtirna kan hmuh chu, “sawisel suh u, sawisela in awm loh nan,” tih a ni a. Mizo tawnga Bible an lehlin khan Pathian Thlarau Thianghlimin a letlingtute finna hmangin kan hnamin Pathian Thu kan hriat theihna tura tawngkam hriatfiah theih dan tur ber ziakin dah a ni tih kan pawm tlan a rinawm a. Amaherawhchu, a hunlaia awmze neih dan dang te leh a awmze nei thuk zawk tawngkam te bihchiana a thumal kan hman duh zawk te pawh a awm thei niin a lang, a awmzia ti fiah zual tur atan.

Vawiina ka rawn tarlan tum chu Matthaia 7:1-a kan hmuh “sawisel suh” tih leh Mizoten hemi chang thuken kan hriatthiam dan chungchang hi a ni.

Saptawng Bible lehlin pakhat New International Version (NIV) ah chuan he chang hi tihian kan hmu a, “Donot judge, for you too will be judged”. Heta “judge” a tih hi kan Mizo Bible ah chuan “sawisel” tih a ni a. Tunlai kekawr thuidan thar emaw hair style thar mawi lo kan ti a kan sawisel ang ni lovin engemaw issue chungchanga ngaihtuahna uluk tak hmanga thutlukna (judgement) leh ngaihdan siam lam a kawk zawk niin a lang.

Luka 7:40-43 kan en chuan Lal Isua’n tehkhinthu, tangka puktirtu laka leiba nei te pahnih chungchang hmangin Simona zawhna a zawt a. Leiba nei te pahnih ngaihdam an ni ve ve a. Tuin nge a ngaidamtu kha hmangaih zawk ang tia Isua’n Simona a han zawh khan, Simona chuan uluk taka a ngaihtuah hnuah a ba hnem zawktuin tangka puktirtu – ngaidamtu - chu a hmangaih zawk tur thu Isua a hrilh a. Chutah chuan Isua’n, “I tidik e” a tih thu kan Mizo Bible ah kan hmu a. NIV ah chuan heti hian kan hmu thung, “You have judged correctly”.

He “judge” tih tawngkam Matthaia 7:1-a kan hmuh leh Luka 7:43 a kan hmuh hi tawngkam thuhmun a ni a. A tobul lamah pawh thuhmun a ni awm e. Chuti a nih chuan, Mizo tawnga kan lehlin “sawisel” tih hian Matthaia 7:1 a Lal Isua thusawi awmzia hi a phawk chhuak zo lo deuh niin a lang. “Ngaihtuahna ziktluak hmang lova midang khawsak dan emaw awm danah ngaihdan lo siamin, ro lo va rel sak ve ngawt suh u” tihna te pawh niin a lang zawk mah awm e.

Matthaia 7:1 hnu lam kan chhiar zel phei chuan mahni mita khanchhuk awm thianfai hmasa lova mi mita hmawlhte awm va vei viau a dikloh thu kan hmu a. Chumi fello chu kan tih fel chuan mi mita khanchhuk awm kan thenfai tur chiang taka kan hmuh theih tur thu Lal Isua’n min hrilh a ni. Midang te sawisel hrim hrim hi tih loh tawp tur tihna a ni lo a nih chu. A ti tur phei chuan an ti ngei ngei zawk tur a ni ang.

Khawtlangah, kohhran, sorkar leh politics kalphungah kan nu leh pate min kaihhruai dan thangtharten kan ngaihtuahin, uluk taka bukin kan duhtawklohna te leh thalo kan tihna te, tha zawk nia kan hriatte kan sawi ta zeuh zeuh a. Kan nu leh pa te zahlohna nilovin, nakina keimahni khawvel hman tur insiam mekah mipui thattlanna tur nia hriat dik takah tehna fel tak hmangte’n kan lo teh thin a. Chutiang critical analysis te chu mi thenkhatin hrethiam lovin “enge a nih bik” tia lo tawngin, lo sawisel lo turin an tih ta ngawt thin a.

Public concern thila a mi kaihhnawihte thil tih dan emaw hmalakna emaw a dikloh a, a fellohna mipui lam atanga duhtawklohna leh tha tih lohna emaw ngaihdan sawi a nih hian Isua’n “lo judge suh u” a tih bawhchhiatna ni lovin, Simona hnena, “I judgedik e” tia a chhutdan leh hmuhdan dik chungchanga Isua’n a tidik a tih ang khan kan khawtlang, kohhran leh sorkar lam chungchangah hian judgement dik kan lo sawi thin a ni zawk e. (Hmuh dan diklo phei chu a awm thei teh meuh mai). Chuti nilo se, court a roreltute hian mi chungchanga a tawpa judgement an siamin Isua thupek bawhchhia an ni ang.

Entirna sawi ta ila, tun hnaia Pu Hawla EVM tichingpena puhna chungchanga Upa R.Romawia’n politics thila a kohhran upa nihna hmachhuana Pu Hawla a rawn fak ta chiam te kha thil fello taka ngaih a ni thei a. Chumi chungchang pawh sawichhuak an awm ngei a ni. A fellohna chhan chu politician pakhat thiltih dikloa puhna sawithiamnan kohhran upain thu a rawn nei daih kha a ni. Chu aia diklo lehzual phei chu secularism thupuia nei party MLA in sakhaw pakhat (Kristian sakhua) thupui bera a rawn nei kha a ni ang. Chakma emaw Bru Kristian lo ni ta ila, kan kohhran upa MLA thusawi kha ka tan chuan Narendra Modi-a Hindu sakhaw hmalakna ang tho a ni ang.

Lal Isua’n Simona “I tidik e” (ngaihdan dik leh fel takin thutlukna I siam e) a tih ang khan uluk takin public interest leh concern thil hi I chik ang u. Ngaihdan dik I siam ang u. I sawichhuak ang u. Kan sawichhuah loh leh sawisel loh vanga diklohna kal zel tur tam tak a awm.

5545.95

Good Friday leh Easter kan hmang a, kan rinna innghahna a nghehzia kan ngaithla nawn leh a. Kan thinlung a lawm thar a, kan rinna pawh tihngheh a ni a. Lal Isua thihna leh thawhlehna vanga ringtuten khawvel piah lam thleng pawha beiseina kan neih hi thlamuanna thuk tak min pe tu a ni. Kan rethei emaw kan hausa emaw, chu beiseina leh thlamuanna neitu tan chuan khawvelah hian hnehtu nun neiin kan damchhung ni te kan hmang thei a ni tih kan hria.

Kristiante hun pawimawh kan hmang zova, chatuan lam thil ngaihtuaha kan rilru vak vel pawh a la zo hman lo tihah chanchinbu lamin number dengkhawng tak mai min rawn hrilh ta thut mai a. He number – 5545.95 - hi kan hriat theuh angin Mizoramin leiba kan neih zat a ni a. A zat chu Rs.55,459,500,000.00 a ni. Chhut dan pakhatah chuan mi pakhatin Rs.50008.06 zel leiba nei ang kan ni.

Heng zat zat leiba hi engtia nei nge kan nih tih te, tute nge mawhphur tih te, ngaihmawh tur a ni em tih te leh engtia tih tur nge tih zawhna te hi vawi khata chhan mai theih a ni lova. A chhanna pawh tam tak a awm thei ang.

2010 bawr vel khan, hnam fing hmasa Greece ram chuan sum leh pai indaihlohna lian tak vang leh leiba inchherchhuan nasa tak avangin harsatna te lo tak a tawk a. An harsatna a puakkeh a ni zawk mah ang chu. An khawpui khawlaiah sorkar hnathawk te leh sum hlawh neia hna thawk tam tak te ni engemawzat an nuar a. Mipui nuar thinrim chuan tharum thawhna te a thlen a. Bank-a thawkten an thawhna bank te an hal a. Police te nena an in epnaah mi 3 an thi a. A thi zinga pakhat phei chu raipuar a ni. Boruak 'hot' dan tur chu kan hrethiam mai awm e.

Grik ho an thinrim nachhan leh khawlaia buaina te a chhuah hluai nachhan chu an sorkarin sum indaihlohna avanga ram enkawlna kawnga inhrek zawnga hma lak a tum vang a ni. Sorkar chuan sum a nei ngang lova, hmalam kal zel nan sorkar hnathawk hlawh te khawih a tum a, pension ho hlawh tih tlem a rawt a, tuialhthei lam pawh a man tih san a tum bawk a. Sorkar hnathawk ho nasa taka a nghawng dawn avangin an thin a rim hle a. Mipui nawlpui, sorkar hna thawk lem lo te pawhin an sumdawnna leh eizawnna te a nghawng theih dawn avangin sorkar hmalak dan chu an dodal nasa hle a. Khawlaiah an pungkhawm luih luih lai leh police lam te nena an in bei lai thla te kha kan mitah a la cham angemaw chu!

Lal Isua hun hma daih tawh pawha hnam changkang leh fing hmasa Grik ho hian sum leh paia harsatna lian tak hi engtia nei ta mai nge an nih tih chuan zankhat thil thua sum harsatna nei ta thut an ni lova. Kum tam tak, an sum leh pai neihin a tlin baka an lo khawsak vang a ni. A nihna takah chuan an lo puk lawk sum tam tak chu an chen nasa a. Sorkar hnathawk hlawh te an pun a, hlawh bakah hamthatna hrang hrang an insiam nasa bawk a. An leiba neih a pung tual tual a, 2008 bawr vela khawvel sum leh pai dinhmun harsatna (global financial crisis) a lo thlen khan an tuar ta a ni.

Sorkar chuan sum a neih loh avangin European Union lama ram hausa deuh te leh bank sum puk tir duh tur hnenah kut a dawh ta ringawt a. Mamawhna avanga pek a tul tak siah chuan sum puktir thei tu te chuan an puk tir ta a. Mahse, a thlawna pek a nih loh avangin a puktirtute chuan inrenchemna kawng dap turin an phut ta a. Chuta an phut te zinga pawimawh ber pakhat chu an leiba an titlem tur a ni tih a ni. Chutia sum petute berin an pek theihna kawng an phut chu tihlawhtling turin sorkarin sum a han hrek tan ta a. Sorkar hnathawk te a han nghawng takah khan an phul ta hluai mai a ni. A bak chu a tir lama sawi tawh ang khian buai luih luihin a zui a ni ber mai.

Hman deuh khan Lungleia buhfai phurtu motor lian neitute chuan an phurh man sorkarin a pek theih loh avangin an hna an chhunzawm theih loh thu an puang a. An hna a chawlhsan lailawk a. Sorkar hnathawk ten an hlawh an lak theih loh avangin harsatna an tawk thin bawk a. Mahse, engtin tin emaw inthlem lungawina nen boruak a sosang lutuk thin lem lo.

Kan hriat theuh angin kan ram hian kan mamawh kan thawkchhuak lova. Sum phei chu nei lo tak kan ni. Kan CM phei chuan “a sen a kawk” te a tih hial kha. 5545.95 chanchinbuin a rawn chhuah takah phei chuan kan dinhmun a chhiatzia a lang ta uar a. Sum nei miah lovin kan chen reng thei lo a ni tih chu ram danga lo ti chhin tawh te atangin kan inzir thei ang. Sorkar hian “pen-down strike” tih te aia turu zawk khawlaia buai luih luihna a thlen hmaa hma a lak loh chuan kan rin aiin sum leh paia harsatna hian min nghawng na ang. Sawi uarna ni lovin, law and order tluchhe duai zawng pawhin a ni thei.

AUSTRALIA SORKAR LEIBA LEH AN HMALAK TUMNA

Nikum September thlaa thlanthar Australia sorkar chuan May 13 hian Parliament ah budget hmasa ber a pharh dawn a. Budget-a lang tur pawimawh tak tak engemaw zat a thuphunga mipuite hriat theih turin chanchinbu lam ten an tarlang a. Tin, an sum enkawltu ber Treasurer Joe Hockey-a leh an Prime Minister Tony Abbott-a te pawhin conference, radio leh tv-a an thusawina ah te an tarlang bawk a. 

Kum 6 chhung kha Prime Minister pahnih Kevid Rudd-a leh Julia Gillard-i ten sorkar an kaihruai a. Thil tha tak tak tih an tum te leh hmalakna chhunzawm tlak nia lang bul an lo tan te a awm rualin, mi tam zawk ngaihdanah sum leh pai enkawl thiam lo leh tuna leiba – (debt) tluklehdingawn $667 leh (deficit) tluklehdingawn $123 – hnutchhiaha puh an ni a. Chutiang leiba thlentu nia an puhna chhan pawh an sorkar tirhin dollar tluklehdingawn $70 chuangliam hman tur an sorkar hmaa miten an hnutchhiah vang a ni. Kum 6 chhungin sorkar hmasa khan leiba nasa tak mai nei hman a ni. Leiba ngah taka awm chu thil diklo leh thalova a hriat avangin PM Abbott-a chuan, “Ngaihthah theih a ni lo. Hetiang zat leiba hian min zalen taka khawsa thei lovin min khuahkhirh a ni” a ti hial a ni. (“It cannot be ignored. Debts at that level, they control you.”)

Sorkar sum kalral zel venna tur hian kawng hrang hrangin ruahhmanna an siam mek a. Chumi rualin sum haikhawm theihna tur an ngaihtuah bawk a. An ruahhmanna pakhat chu deficit levy tih a ni. An PM ber hian inthlan hmain chhiah thar engmah an lak loh tur thu a lo puan tawh avangin tuna mi hi ‘chhiah’ a ni love chu a han ti a. A tihna chhan pawh kum 4 atan chauh ruahman a nih vang tiin a sawi. Mahse eptu lam chauh lo pawh an ner nasa hle. A thutiama ding lova an ngaih avangin. An tum dan chuan thla khata $6153.84 hlawhin chhiah a pek chungah thlatin $60 dang an pe ang a, $11538.46 hlawhin $116, $15384.61 hlawhin $308, chutiang zelin $30769.23 hlawhin $616. A bul tanna $6153.84 hlawh hi hriatthiam dan tur chuan zirtirtu senior ve deuh hlek tawh hlawh ang vel a ni ang. Chutiang hlawh pha chin atang chuan tan an tum a ni ber mai. 

Australia hi 2009 bawr vela khawvel pumpui sum leh pai dinhmun tlakchhiat rupna dawlzo berte zinga mi a ni a. Amaherawhchu, sorkar hmasa ten sum tam tak an lo khawl vanga in enkawl thei ni a ngaih a ni. 2009 kha Australia-a ka chhuk thlak kum a ni a. India ram qualification nen phei chuan hna a vang khawp mai. Hna hi 300 dawn chu ka dil hman ka ring. A tawpah, min duhsaktu min sawisak vangin, a hnua hna ka hmuhna manager pa office ah phuahchawp deuhvin ka va interview hram a. Hna chu ka hmu ta mai a. A thawventhlak duh hle. A hnuah remchang zawk leh kan in bul hnai zawka thawh theihna a rawn in hawng a, ka hna tharah chuan inzirchawpin ka thawk chho ta zel a. Ka thawhpui pa pakhat chu Nepal atanga rawn kal, MA Accounting zir zo a ni a. A thiamna lamah hna  a hmu thei lova, hospitalah 4th grade ang vel hna thawk a ni. Hna neih hrim hrim kha a hlu khawp.

Ka thawhpui sap leh sap lo te hi enge an ram sum leh pai dinhmun chungchanga an ngaihdan te leh engtinnge sorkarin hma la se an tih tih te hi ka zawt mai mai thin a. Kan supervisor pakhat, sorkar tanpui ni lova mahnia inenkawl fel a pawimawh tih ring bur mai nu taima zetin a sawi pakhat chu, “a chhawr leh hmang tangkai tak tak lo ho hnenah hian sorkar hian tanpuina te hi pe tawh lo se” tih a ni. Doctor pakhat chuan, "nakina rulh tur tho chu kan fate rulh tir aiin keini rulh a dik zawk," a ti a. A tul chuan thawhtu te zinga tel a hreh loh thu min hrilh bawk a.

Abbott-a sorkar hian inhrek leh sum thawhbelh zawngin hma lak a han tum a. Eptu lam chu, hmana zu thlahdul reng si, tuna han duh lo der vel ta MNF te ang deuh hian, an rak chul a. An sorkar leiba hnutchhiah a ni tih pawh an hre reng chungin an han au bengchheng vel ta thin a. Abbott-a sorkar hian sorkar leiba rulh nana 'chhiah' a tih duh loh, 'levy' a tih hi chhiah chikhat tho a ni tiin sawisel a hlawh nasa hle a ni. Tin, an party MP te leh anmahni lamtang tam tak te pawhin inthlan thutiam bawhchhe lo turin an duh thu an sawi uar hle.

Sorkar hian a sum senna hi en tha se, tihtawp theih leh tihtlem theih ang ang te titiawpin titlem se tih hi a chhanna ni bera sawi a ni a. Abbott-a sorkar hian leiba nasa tak hi harsatna lian tham tling a ni tih an hriatchian hle rualin a chinfel dan turah tunlai hian an buai mek a ni. Lakluh leh hmanral inzat (balanced budget) emaw hmanral neih tlem zawk hi a kawng hmang bulpui ber chu a ni awm e, ram tinah hian.

5455.95, NLUP LEH CM HAWLA

Mizorama Kohhran pawl lian ber (lian in ti em em) Presbyterian kohhran member dan zawhkim I ni emaw, a lian ber dawttu Baptist kohhran (dik inti em em) member puitling I ni emaw, anni pahnihin an dah san tehchiam loh kohhran pawl danga member rinawm tak I ni emaw ‘Biakmawia pawl’ pawh ni la, sum tello chuan I che tak tak thei lo tih I inhriat ka ring. Mi tam tak anga sorkar rinchhana ei I zawng a nih phei chuan kan ram sum dinhmun chau tak hi I ngaihtuah hle turah ka lo ngai a. Pu ber pawhin “a sen a kawk” a ti a nih kha. Sorkar rinchhan tum lem lo, mi taima awmkhawm Zion-a leh a ho te anga work ethic neilo tan phei chuan “MFC” (Mizoram Financial Crisis) sum leh paia harsatna hi kan state hian tawng ta thut se, che buai fe fe chu kan tam khawpin a rinawm. Greece ram buaina pawh kan hriat kha.

Tun tuma rawn tarlan leh ka tum chu kan ram sum dinhmun leh a kaihhnawihte bawk hi a ni a. A ninawm duh khawp mai tir'u, sum lama harsatna sawi reng hi chu? Mahse, in bihchian hian “punk pawisa neilo” an sawi ang maiin, a sen a kawh tawh hnuah pawh, kan la khauphar thawven bawk si a. Kan vaibuai hma hian I han in beng harh dawn teh ang u khai!

Mizoram politics bihchiang peih pawl tak Pu K.L.Rochama’n, “…Assembly hran neia sorkar kan neih tan 1973-74- a Mizoram Budget chu Rs 5.99 Crore a ni a 2013-14 ah chuan Rs 5000 Crore a lo pel ta…mipui za zela 90 te chuan kan thal phak lova, a theifal 10% ten an thal zo zel niin a lang. Hei vang hian mirethei kan rethei tawlh tawlh mihausate eibang nawi in chin kan hmanhlel a, mihausate lung tihawi loh hlauvin rethei zawkin hausate kan intlawnsiak ta a ni. Thil vanduaithlak tak chu- miretheite hian mihausa tlem tein kan chanvo min chhuhsak avanga lungawilohna tih lan dan kan thiam tlat lo hi a ni.

“Mizoramah economic justice a awm loh avangin social justice pawh a bo tan a. Thawmhnaw tha neih loh avangin biak ina inkhawm ngam lo thalai an pung tual tual. An chan chhiat lutuk avangin thudik an tan ngam lo va. NLUP leh therhlo dang chan loh hlauvin zahawmna pawh chaw vawikhat eiah an hralh duh ta a ni…” tiin kan dinhmun a sawi a.

Pu Rochama sawina engah leh sorkar record ngei atang pawhin kan thawhchhuah pun vang ni lova, kan sum dawn pung hi mi zawng zawngin kan hre vek anga. Kum liam ta khan Mizoram sorkar chuan vaibelchhe sangnga chuang a dawng a. Chu chu US dollar tluklehdingawn khat dawn a ni a. Dawn tawp atan chuan a tam hle. Hmanthat loh atana uiawm tak a ni. "A theifal 10% ten an thal zo zel" a nih phei chuan Pathian Thu hmanga in thawi dam chi pawh a ni lo.

Kan Chief Minister-in kumin Independence Day khan a thusawinaah, “…Mizoram State thanna chu (GSDP) za zela 11 lai a ni a, he hlawhtlinna chhuanawm tak hi NLUP vang liau liau a ni. Kum 2010-2011 chhunga per capita income cheng 50,956 lai a tling pha hian, kan State-in ei leh bar kawngah hma kan sawn mek zel …” tih a sawi tel a.

Kan ram dinhmun zirchiang peih pawl tak PRISM Secretary Zodinsanga chuan Chief Minister-in ha hipa a sawi ang chungchangah May ni 9 khan heti hian pawl thuchhuakah a ziak a:

“Mizoram sorkarin NLUP hmanga nasa taka kuthnathawktu te chawikan tuma hma a lak laia kuthnathawktu te thawhchhuah tlem tial tial tur anga sorkar ngeiin a tarlang hi Prism chuan a pawi kan ti a. Hei hian NLUP kalpui dan thlak a tul zia a tarlangah kan ngai.

Kan state sorkar ngeiin a chhut danin kan state sum thawhchhuah (GSDP) hi pung zel tura ngaih niin current price in kum 2011-12-ah cheng nuai 7,19,782 te, 2012-13-ah cheng nuai 8,05,309 leh 2013-14-ah cheng nuai 9,12,836 ni tura chhut a ni a; hei hi base year-a 2004-05 hmanga constant price-a chhut chuan kum 2011-12-ah cheng nuai 5,15,792 te, 2012-13-ah cheng nuai 5,36,990 leh 2013-14-ah cheng nuai 5,62,658 te a ni.

Hetia GSDP than dan tur chhut anih lai hian sector hrang hrang than dan uluk taka kan en chuan kuthnathawktu (Agriculture & allied activities) te sum thawhchhuah hi a pung chak lo bik a, chu mai ni lovin tun hnai kum thum chhung, NLUP ngawrh taka kalpui a nih lai ngat phei hi chuan, a tlahniam tura chhut a ni ta hlauh a…

“…Service Sector thawhchhuah hi a pung nasa bik tih a lang a. Service Sector-ah rau rau pawh sorkar hnathawk (public administration) a la thang chak fal hle…”

A kip akawiin kan hrethiam vek lo a ni mai thei a. A awmzia ber chu sorkar chhinchhiahna ngei atanga enin kan Chief Minister in kan state ei leh bar kawnga hma kan sawnna nia a sawi leh kan per capita income sang a sawi khi kuthnathawktuten an hlawhchhuah hnem tak lam ni lovin, sorkar hnathawkten hlawh an lak a lo pun tak lam ni zawkin a lang. Sorkar hnathawk hlawh pung hi ram hmasawnna tehna a nih loh avangin Chief Minister hian economics a hrethiam lo niin a lang.

NLUP sawi takah chuan he program hi pa pakhatin heti hian a hrilhfiah a: “Ka pa in kumtin pawisa min pe thin a, kumtin a ti pung ve thin. Kuminah Rs 1000 min pe a, nakumah 1300 min pe dawn a. Tichuan Rs 1300 hmanna tur ka lo ruahman ve a. Pheikhawk – Rs.500, kekawr – Rs.500, Kawr – Rs.300 lei nan ka hmang ang ka ti a. Tichuan, ngaihpawimawh deuh ka nei a. Lehkhabu Rs. 700 man lei turin ka chah ta rup mai a. Ka pain Rs.1300 bakah Rs 700 lehkha bu leina ka pe ang che min ti a. Tichuan, lehkhabu chu a lo thleng a, Rs.1300 ka neih sa atangin ka lei ta a. Mahse, ka pa chuan, ‘A dang ka pe thei lo che Rs.1300 ah khan lehkhabu leina pawh a tel vek,’ a rawn ti ta mai si a. Tichuan, ka lo hmang tawh si. Kekawr leh kawr kha ka lei loh phah ta ringawt.

NLUP hi Plan sum Finance Commission in a pawm huangchhuangah khung a nih leh si avangin hmasawnna kan lo ruahman ve tam tak te a hnu fum phah a ni” tiin.

EVM rigging scandal puhna chu a puhtute lam thu a chauh em avangin thutlinga lak hleih theih pawh a ni lova, NLUP kalpui dan leh kan ram sum dinhmun a tihchhiat dan te leh chumi chung pawha kan dinhmun tha em em anga sawi te erawh hi chu US energy company lian tluchhe rup Enron hotupa Ken Lay-a’n an company a tlukchhiat mek laia engkim tha vek anga a sawi te nen khan a in ang hlein ka lo hria a. Scandal lian tak a nihna hi, a evidence pawh term hmasaa Finance Minister Liansailova ngeiin Mizoram Assembly House-ah special package a nih loh thu a lo sawi atang te khan kan hrethiam thei awm e. He policy avanga kan ram leiba zuang ta pawh sorkar report atangin a chiang hle. Chuvang a ni ang, chanchinbua kan hmuh hmaa kan ram leiba chungchang Zotalk interview ah “…vaibelchhe 5000 vel lai leiba kan lo nei ta reng mai a. chu chu phurritah i ngai em?” tia zawh a ni khan kan Chief Minister khan a hriat ngeia lang kha, “chutiang zat kan neih ka hre lo” tiin a chhana a ni. A zat tak chu, April ni 22 thleng kha chuan vaibelchhe 5545.95 a ni. (Thu diklo hi a diklo a ni tih hria a, thudik anga sawi a nih hian 'dawt' a ni a. Zawhna: CM hian dawt a sawi nge thudiklo a sawi palh?)

PRISM Secretary Zodinsanga’n NLUP chungchang a rawn ziahnaah hian a thupuiah “NLUP KALPUI DAN THLAK A TUL” tiin a rawn dah a. Chief Minister leh kan politics kalpui dan thlak a tul zawkin ka lo hria.

BENGHAZI LEH A KAIHHNAWIH

Benghazi hi Libya ram khawpui lian ber dawttu a ni a. Col.Muammar Gaddafi-a sorkar paihthlak hnu, New York khawpuia World Trade Centre beih a nih ni champha September 11, 2012 khan U.S. sorkar palai inpui chu ralthuam nasa tak keng mi 125-150 velin an bei vak a. Chutah chuan U.S. Ambassador J. Christopher Stevens, Foreign Service Information Officer Sean Smith, leh CIA contractor and Navy SEALS ni thin Tyrone Woods and Glen Doherty te chu thah an ni a. US Consulate hi tlai thim atanga a tuk zing thleng beih a ni a. Mi sawm dang an hliam.

Consulate beih a nih lai kha US President Barack Hussein Obama’n term hnihna chuh tura a inbuatsaih lai a ni a. A campaign au hla ber pakhat chu firfiaka che thin terrorist pawl Al Qaeda leh an thuihruaite hneh tak rah beh an nih thu kha a ni a. Thah chimih an nih tawh thute a sawi hial a. Chumai ni lovin, tlan chhe mek ang ten a sawi bawk a.

Khatih lai vel khan Mosolman zawlnei Mohammed-a leh Mosolman sakhua deuhsawhna film ho ang reng tak mai kha internet ah thehdarh a ni a. Khawvel hmun hrang hranga Mosolman ho an thinrim hle. Kha Mosolman sakhaw deuhsawhna film chhuah a nih hma khan Al Qaeda leh an sangawizawnpuite chuan World Trade Centre beih ni denchhenin US Ambassador awmna Consulate te chu beih an tum thu report dawn a ni a, beih ni ta se an invenhim zawh loh tur thu te State department headquarter lam pawh hrilh an ni a. Sept 11, 2012 a rawn thleng ta chiah a, an hlauhthawn ang ngeiin firfiaka che ho chuan Consulate building chu an bei ta a. Ralthuam chak tak tak hmang mi za chuang chuan US Ambassador Stevens-a leh a thawhpui mi pathum te chu an tihlum ta a ni. Christopher Stevens-a ruang phei chu, zawhtein a sazu man a thih hnu pawha a duh duha a chaih kual ang mai hian, firfiak ho chuan khawlaiah an chaih phar lai video internet lamah hmuh theihin a la awm.

President Obama berin Al Qaeda chu ‘thah chimihin an awm tawh’ (decimate) a tih leh ‘an tlanchhe mek’ (they are on the run) a lo tih laia firfiaka che pawl terrorist hoten ruahmanna mumal tak maia US Consulate an han bei leh US Ambassador hian thah tak si ah chuan a campaign auhla ber kha thu rintlaklovah a chhuak tan ta a. Damage control an tih mai, sorkar mualphona thupnana ngaih theih ngei turin ‘Foreign Minister’ Secretary of State Hillary Clinton-i chuan kha inthahna thlen atanga ni thum ni ah thuthar lakhawmtute hnenah, ‘he Mosolman film hi kan dem takzet a, US sorkarin inhnamhnawihna chhete mah a nei lo’ a ti a. A ni ngani Pathianni tukah US Ambassador to UN Susan Rice-i chuan cable news tv engemawzat hmaah inlanin US Consulate beih a nih chhan kha Mosolman deuhsawhna film duhlotute hnathawh angin a sawi a ni. Tin, White House thupuangtute pawhin chutiang chuan an sawi nual bawk a.

June 21, 2013 khan PRISM ang deuhva sorkar khalh ngil tum pawl Judicial Watch chuan Freedom of Information Act (FOIA) tlawhchhanin US Department of State lakah “FIR” a thehlut a. April 18, 2014 khan US sorkar chuan a tawlh a tawlh hnuah Judicial Watch in a document a dil te chu a tichhuak a. Chutah chuan White House Dy. Strategic Communications Adviser Ben Rhodes-a’n Susan Rice-i hnena email a thawn, tv hmaa sawi tura a tihte zingah kha Mosolman sakhaw deuhsawhna video sawi uar tur leh sorkar policy hlawhchhamna lam a nih loh thu sawi tura tihna a chuang kalh mai a. Sorkarin hriat tur tul ang zawng zawng an pholang vek tawh an tih hnua thu pawimawh tak tak thup ngeia lang te “RTI” hmanga haichhuah a nih takah chuan eptu lam party phei chuan investigation kimchang nei tura special committee din an nawr chhuak a, House Speaker John Boehner-a’n May 2 khan a puang ta a ni.

He special committee hi politician te zingah tullo ti an tam a. Thu mu hnu hmanga sorkar tihbuai tumna tih ten an sawi a. Mahse, Benghazi US Consulate beiha thi te chhungte ngei pawhin thudik an hriat duh thu an sawi a. Politics a inbeihna nasa tak karah thudik hriat tumin tunlai hian US politician thenkhatte chuan hna a thawk mek a ni.

Kan ramah hian issue thenkhat chinfelloha riral ta mai mai a tam hle. Sorkar tihdikloh emaw tih loh chiang tak ni a lang pawh a awm ta nual. Thudik hi a hrisel a nih chuan American hovin an tih ang khuan thudik hailan kan tum ve hlawm dawn em ni ang?

FOSTER’S BEER LEH A PHOLAN

Date: 21st April 2014
Place: Aizawl

Foster’s beer tia kan lo sawi hi Foster’s lager tih zawk tur a lo ni awm e. Kan hotunu pakhat beer in thin ka zawt a, Australia ah hian Foster’s tak hi a lo lar vak tawh lo a ni awm e. Mahse, a lar laia in thin te chuan an la in zawm reng tiin min hrilh.

Kan hriat theuh angin kan sorkar hotu lu ber leh a nupuiin Mizoram chhunga an thiante in ni ngeia langah, inkawm hlim pahin Australian brand Foster’s beer an in ho nia ngaih theih turin internet khawvelah chuan thlalak hriathlawh tak tlangzarh a ni a. Beer hi kan zu khap burna danin a phalloh a nih vangin lo kawl emaw lo in an awmin, Burma ram atanga dan lova rawn pem lut Phunchawng pa a ni emaw Zarkawt tlangchhipa lal thuta thu pawh nise, man theih an nih thu kan dan buah a chuang a. Kan dan mak tak mai - alcohol pai tlem zawk beer khapa, a pai tam zawk Zawlaidi khap leh si loh – chu Kohhranin Bible zirtirna dik kan zirchian peih loh leh duh loh avangin khawvela society zalenlo ber pawl Saudi Arabia ram ang maiin kan ramah kan la hmang lui ta tlat a. A khaptu ber pawhin a khap zawh loh, Kohhran hruaitute thenkhat pawhin an mimal ngaihdanah chuan (zirtirna dik an pawm avangin) khap an thlawp loh, a mantu tur te ngei ngei pawh man ngaia awm fo, chhantu nei tha lo erawh chu a rang a ranga tanin lama khung ni lawi si! A list a sei duh khawp. Chulam chu duh tawk phawt ila. Ka han sawi tum chu he dan hi dan awmze nei lo a ni tih hi a ni.

Chutih rual chuan dan dinglai a ni tlat bawk si a. Kan duh emaw duhlo emaw kan siamthat hma chu kan zawm a la ngai dawn tlat, a tu a te pawhin. Zawm lo hrem tawk tawh te khan bawhchhiat ngawt a theih loh in hriat chian kha.

Zu chungchanga ka ngaihdan hi Bible ka zirchian leh khawvela kan mihringpui dang te society, tun leh hun kal tawha mi, ka zir chian hnuah ka thlak a. Khap bur pawi ti lo kha khap loh bur ka duh zawk ta hle. A chhan pawh legal issue vang te, moral issue vang te, administrative issue vang te a ni hlawm. Tin, a aia sual rapthlak zawk a hring hi ka duhloh chhan lian tak a ni bawk.

Zu hi thil thalo thei tak a ni tih chu kan hre vek anga. Mahse, amah lawng lawng chuan thil thalo emaw sual a ni lo. Hmansual theih tak erawh a nih vangin Bible pawhin fimkhur turin min hrilh chiang hle a. A ruih ching phei chu Pathian Ram an luah loh tur thu chiang takin Bible ah kan hmu. Mahse, zu hi sual a nih tlat loh avangin Lal Isua pawh khan a in ngei a, a ruih erawh kan hre lo. A thilmak tih hmasak ber pawh zu tihpun a nih kha.

Bible a zu (wine) hi Mizo tawngin ‘uain’ tiin tawngkam thar kan letlingtute khan an hmang a. Zu ti lova uain tih a nih chhan chungchanga Rev.Dr.V.L.Zawnga ngaihdan chuan Mizo ten tun hmain grep (grape) atangin kan siam ve loh vang leh Mizote in thin zu nen a in an loh avang tein wine kha “zu” ti lovin “uain” tia dah a ni. Zu kha ringtu tharte khan khawvel lama hnukkir leh tu ah an ngai a, a tawk tea an in theih tlat loh avangin Kristianna nena inthlunzawm tir theih loh ah an ngai a ni awm e tiin a ngaihdan a nei bawk a. Pu Zawnga hi kum 83 a ni tawh a, an naupan laia Mizoten zu kan in dan hre phak a nihna angin a hmuh dan chuan Mizo te kha zu in thiam lo kan ni awm e. Hei hi Pu Manzuala’n kan thlahtuten an in thiam anga a sawi thin nen a inkalh deuh chuan a lang a. Mahse, kan Zosap missionary Pu Buanga leh Sap Upa te hian heti zawng hian an sawi ve tlat bawk si a: "Drink is one of the curses of this land. The Lushais do not know what moderation is where rice-beer is concerned, and the only course open for the converts is to abstain from it altogether" (BMS South Lushai Report, 1905; Missionaries; J.H Lorrain& F.W. Savidge)

Zu in kan thiam hunlai te pawh chu a awm thin a ni mahna. Mahse, vawiina kan ruihchhiat thin dan en hian kan inthiam lo tih loh rual chu a ni lo. Kum 100 kaltaah khan Pu Buanga leh Sap Upa ten kan in thiamloh zia leh in tawh chuan ruih tum deuh zel anga kan chanchin an ziak hi a dikloh a rinawm lem loh a. Anni kha zu in lo an ni a, mahse a tir chuan khap duhna an neih loh thu chiang takin an ziak. Mahse, kan khawsazia an enin ringtu hmasa te remtihnain khap an ti ta a ni tih hi an report ah hian chiang takin an ziak lang bawk a ni. Chhinchhiah tur erawh chu, “zu hi sual a ni” an tih vanga khap a nilo tih hi a ni. Khami hunlai pawh khan England ah zu hi khap a ni lova. Hriat chinah an la khap ngai lo bawk a ni. Zu in ngai lo chuan in loh, in thin te chuan chin tawk neia in hi a Pathian Thu ber awm e.

Bible hian kan taksa hi Pathian Thlarau Thianghlim chenna a ti a. Pathian hian he tawihthei taksa pawh hi hauh viau a ni. A thikthu pawh a chhe viau. Zu hian kan taksa hi a tibawrhbang thei a. Tibawrhbang khawpa in phei chuan Pathian an chawimawi hlei thei thin lo a ni (an piangthar lo tihna ni lovin). Chulo thil dang kan taksa tichhe thei chu vaihlo a ni tih kan hria. Pu Hawla te nupa phei chu hemi kawngah hian an fakawm em em a ni. Mizo ringtu hmasa zu khap duh ho kha, rual u te sawi ka hriat dan chuan, vaihlo heh tak an ni hlawm. Amah pawhin a zep lova, Rev.Dr.Zairema phei kha chu mei a heh a ni ang, “Kan Bible Hi” tih lehkhabu phek hmasaa a thlalak dahah phei kha chuan an Bible lehlin laia meizial a pet lai kha a chuang kuau mai. Baptist pastor pakhat ka hriat pawhin bial kohhran mipui te zinga rawngbawlna hmanraw tangkai tak a ni tiin a zu lui tlat! (Tunah a zu tawh lo mai thei) Ka han sawi tum ber chu zu bakah hian kan taksa tibawrhbang thei thil dang kan chaw lut hnem thei hle tih hi a ni. Bible hian zu hi a khap lova, kan chhia leh tha hriatna thiang tak hmang turin min ti zawk a ni. Chu chu Kohhran te pawhin kan hriatnawn a pawimawh hle.

Chutih lai chuan zu hi phalrai chi a ni miah lova. A nih lohzia chu a zalen kan tihna ramah te pawh hian an khuahkhirh hle loh chuan mihring nun a tichhe vek thei tih an hrechiang a; in dan, zawrh dan, in phal zat etc, khawng takin an kengkawh a ni. Pu Zira’n, “zui ruih kan phal dawn lo” a tih kha Mizo khawtlangah chuan thil theih loh hul hual a ni ang. A ruite hrem lohin an chhuak lovang a tihna a nih chuan, thuhran.

Hman zan chu Aizawl pa pakhat nen kan ti ti a. Zu in chungchang kan sawi tel a. A fapa hnena thurawn pek tur tha ber enge ni ang tiin, kei a fapa rual chu min zawt a. Min zawh takah chuan, “Tlangval a ni a. Zu in lo turin duh viau mah la, a in dawn chuan I khap sak thei chuang lova. Zu in lo tura I duh leh in lo tura amah I beisei thu kha chiang takin hrilh tawp mai la, a rilruin a vawn ngei ka ring,”tiin ka chhang ta ngawt a. Ka chhanna kha a ngaihthat thlak loh tih chu ka hria a, mahse kha bak kha chhanna a awm theiin ka hre mang tlat chuang lo a ni.

Zep thu a awm lova, kan ramah chuan ukil ho te, journalist ho te, officer te leh contractor te pawh hian zu hi an in deuh thup a. MLA te pawh in an awm nual tih hi ka hriatdan a ni. MNF sorkar laia an MLA te kha hemi lamah chuan an fakawm. Uniform ha, dan kengkawhtu te ngei ngei pawh an rui thin a ni awm e.

Mimal khawsakdan leh duhthlanna hi a tha emaw a thalo emaw dan – legislation – hmanga lo siam that tum hi thil atthlakah ka ngai a. A hlawhtling lo tih kan hre reng chung leh suahsualna a ti punlun zawk tih kan hmu reng chung pawha Kohhran hruaitute leh Pathian Thu a zira zirchhuak meuh intelkhawm pawl ten khap tura sorkar an la nawr leh khapburna dan thlak tura sorkar hmalakna an dodal hi thil vanduaithlak tak a ni. Hman hmanah khan lo thlak tawh ilang chuan kan CM te nupa pawh hi Foster’s beer vang mai maiin an buai tawp lovang. Dan kan la paih si lova, RV leh Phunchawnga nula tlangval hawklak zu in te nen man an ngai ve ta vek dawn a nih hmel. Facebook vela an tih dan takin - Hairehai!

INTERVIEW WITH LALCHHUANZUALI RALTE

YWCA, India aiawha July 20-25 chhunga neih 20th International AIDS Conference (Melbourne) rawn hmang leh AIDS dona kawnga an hmalaknate leh thil pawimawh pholang tura rawn kal Aizawl Venghlui nu Lalchhuanzuali Ralte kawmna tawite -

(Matana Pachuau - MP, Chhuanzuali - CZ)

MP: Melbourne-a I rawn zin chhan min hrilh thei em?

CZ: International AIDS Conference-a tel turin ka lo kal a , World Young Women Christian Association hmingin India ram aiawhin ka lo kal a, Interfaith Conference ah closing plenary leh faith and culture tih topic ah presentation ka nei bawk a ni

MP: HIV/AIDS dona leh hemi lama hmalaknaah hian engvanga tel nge I nih?

CZ: HIV/AIDS dona ah ka tel na chhan bul ber leh a dona kawngah ka tel theihna chhan chu HIV kai ngei ka nih vang a ni a. HIV vanga harsatna tawkte tan hma ka lak theihna turin Pathianin he natna hi ka kai phal a ni. Tin, kan ram chhunga HIV kaite dinhmun en hian hma la lo theilo ni hian ka in hrebawk a ni.

MP: Mizorama HIV darhna chhan te min hrilh thei em?

CZ: Mi tam tak chuan mipat hmeichhiatna hian a ti darh an ti mai thei, a dik chiah a. HIV  kai tam zawkte hi mipat hmeichhiatna vanga kai kan ni a , mahse kei chuan kan rama HIV a darh chakna chhan chu endawngna leh thinhrikna hi a ni ka ti. A chhan chu HIV kai tih kan inhriat hian rilruah mahni inkiltawihna, midang te endawng tura inngaihna kan nei a. In tuamdam ahnekin thinhrikna chu kan hlauhthawn ang ngeiin kan tawk a. Kan inpuan ngamloh phah a. Tin, mi thenkhat phei chuan min an endawng avangin midang kai duhna rilru hial te an lo put phah a. Thenkhatin miin an endawng vangin enkawlna la turin an kal ngam lova, an taksa a chhiat hma phahin thi kan lo tam phah a. Hei vang hian HIV hi kan ram ah a huangtau ta bik a ni.

MP: HIV darh zel vennan engtinnge mimalin hma a lo lak ve ang?

CZ: HIV darh zelna tur venna kawngah hian mitinin tih thei kan nei theuh a, thalai ten HIV kailo tura an lo invenna ringawt pawh hi hma lakna kawng pakhat chu a ni in ka hria. Tin, a darh zel tur venna tur chuan mitin, chhungkaw tinte hian kan chungah a thleng vek thei a ni tih kan rilru ah kan inpawm a, a kaite dinhmun tur va hriatthiampuina hi a pawimawh. I endawng loh chuan a kai darh lo ang a, I endawng loh chuan a hrisel bawk ang , HIV chungchang hi mitinin a kaite hlauhawm lohzia leh HIV hlauhawm zia hi kan sawi tam a pawimawh. A bikin kohhran hruaitu te leh khawtlang hruaitu te, nu leh pa te paw’n kan fate zirtirna kan pek hi a pawimawh a ni.

Tin, thiamloh chantirna rilru kan put thin hi kan paih bo a pawimawh tawh bawk. Kan inchhungah rul lo lut ta se, a lo luhna kan ngaihtuah lo. A thah dan kawng ngawt kan zawng thin ang hian kan inchhung leh kan kai ve lohna tura kan inven a pawimawh tawh zawk a ni.

MP: Kohhran, pawl leh sorkar in enge a tih theih? Engte nge an tih mek?

CZ: Kohhran hian a hmalam kha chuan hmalakna an nei meuh lova. A kaia te ngei pawh Pathian hremna a ni tiin kan ngaihthah thin a nih kha. Mahse, a kai te hi kohhran mipui te ngei kan ni tih an pawm hnu hian hma an rawn la chho zel a. (Synod) Social Front ngei paw’n HIV awareness Kohhran tin ah nei turin a ti ta nghe nghe a ni . Tin, HIV positive te tan a (Durtlang) Hospital Grace Home chu sorkarin enkawlna a tih tawp hnu phei chuan Synod in rawn fund-in, ram dangin an neih tawh lo laiin keinia ah chuan Synod zarah kalpui zel a la ni. Sorkarah chuan DepAntiretroviral therapy (ART)ment of AIDS Control awmin an ni hian mainstreaming ah leh media IEC campaign lamah te hma an la nasa hle. HIV damdawi Antiretroviral Therapy (ART) hi ramdang tam zawkah chuan a lei a lei ngai a ni a. India ramah erawh chuan a thlawna sem a ni. Amaherawhchu, treatment lamah hi chuan tih loh tak tak an nei a ni.

MP: HIV hrik hi engvang pawhin miin lo kai palh ta se, enge a tih hmasak ber tur? Beiseina a tawp nghal tihna a ni em?

CZ: Miin HIV a kai chuan hmasa berah Antiretroviral Therapy (ART) ah a inziaklut ang a, counselling te a dawn hnu ah taksa ralvengtu a la ngah nge ngah lo test sak thin a ni a. 350 aia a taksa ralvengtu a hniam chuan Antiretroviral Therapy (ART) a ei a ngai dawn tihna a ni. Antiretroviral Therapy (ART) hi a damna ni lovin HIV in kan taksa ralvengtu a ai chhe tur a dang chauh a ni. Tin, HIV kaite hian rilru dahhniam mai lova kan tan beiseina a awmzia hi kan hriat a pawimawh takzet a. Damdawi ei ringawt lovin rilru a hrisel tel hi thil pawimawh tak a ni.

MP: UNAIDS Global Report 2014 tarlan dan chuan khawvelah India ram hi HIV pai tam 3-na niin, mihring 6% in HIV an pai a. Mizoram hi enge kan dinhmun?

CZ: Mizoramah hian kan kai belh zel a, India ramah pawh a kai tam lamah (za zela chhutin) 3-na kan ni. Thlatin mi 100 aiia tam kai an la awm belh zel a ni.

MP: International AIDS Conference ah hian Mizo dang engzat nge rawn kal ve? Tute nge an hming?

CZ: Mizo dang Lalruatfeli nen kan ni a. Ani hi UNAIDS sponsor in a lo kal.

MP: Enge Australia ram I hmuh dan?

CZ: A hmasa berah chuan faina a ni a. Tin, Mizo tam tak aiin tlawmngaihna an ngah zawk em aw ka ti. AIDS Conference ah hian thalai rual volunteer an tam hle, hlawh pawh nei lovin. An polite em em bawk. "Sorry", "Thank you",  "Excuse me" tih tawngkam hi hman an hreh lo. Traffic rules an zawm tha bawk.

MP: Eng hawi zawngin nge I Mizo pui te I han cho duh?

CZ: Kan hmalak dan kan activities hi chu a in ang thup mai a. HIV positive mahni nihna in pawm tak tak, Pathian vang ni si lo an tam. Keini HIV positive Pathian neitu te ngat phei hi chuan hmalam kan pan ve a hun tawh tak zet a ni. Tunge ka nih? Enge hmabak tih tur ka neih? tih hi kan hriat a ngaih niiin ka hria.

MP: Sawi tur leh zawh tur tam tak a la awm thei anga, remchang dangah kan la inzawt leh zawk mai dawn nia. I chhanna te a hlu hle mai.

CZ: Tehreng mai.

MP: Hun chep tak karah hun min pek theih avangin ka lawm e.

CZ: Kei pawh le.

“CHUTIANG ZAT KAN NEIH… KA HRE LO”

Khawvela Mizoten ram kan neihchhun Mizoram enkawl hna thawk tura rawih, kan chhiahhlawh hnathawk ni tura mipuiin kan thlante leh an thiam leh tlinna vanga mipui rawngbawl hna thawk tura dinhmun pawimawh chelhtuten ro an relna rah hi, a chhia a thain, Mizoram pawn atang pawh hian a chiang viau mai a. A tha lai kan hai der tlat emaw a chhe lai kan enliam lui tlat te a nih ngawt loh chuan hmuh loh theih loh a ni.

Kan sorkar hotupa ber Foster’s beer scandal chungchangah police ten Criminal Code of Procedure Section 154-in a phut angin hma an la lova. Ram rorelnaa kut lo thlak tawh party te’n dan palzutin a awm tih an hriat chiang tak pawh an ngaimawh lova. Kan tlawmngai pawl lian hotute pawh, an do nasat em em thilah an ngam loh zawng a inhnamhnawih chuan an reh diak a. Sorkar khak a tul pawha khak ngam tura din Ethics Committee pawh, an term a tawp tih vang ringawtin, an reh diak bawk a. Dan hmaah hian mi zawng zawng kan intluktlang nge tluktlang lo tih leh sorkar hotute hian dan an bawhchhiatin an chungah dan chu lek a ni ve dawn nge dawn lo tih tarlanna a nih laiin thil diklo hailangtute chu misual ang zawka chhuah an ni hlauh thung a. Minister pakhat fanu phei chuan, “Australia atanga rawn inla fing, inla dik leh fel inti em em mihring kha. Sim rawh” tiin mi zawng zawng chhiar theih turin facebook group pakhat-ah a ziak hial a ni. Kan ramah hian dan ni lovin thuneihna inpe chawp mimal leh a sangawizawnpuiten ro an rel ni berin a lang. Hei hi ram tan a hrisel lova, mipui rorelna – democracy – duang chhuaktute duan dan ang lo a ni.

Foster’s beer hrim hrim hi chu a ho hle a. Mahse kan state danin a khap a nih tlat avang leh CM beer scandal chungchanga dan leh thupek kengkawhtuten thil an tih danah dik lova lang lian deuh deuh a awm tlat avang hian a serious sawt hle a ni. Kan nitin khawsak leh ei leh bar lam te a nghawng nghal mai loh avangin hun remchang danga ziah zawmah lo dah ta phawt ila. Kan ram pum nghawng mek sum leh pai dinhmun thalo tak leh leiba chungchang hi tun dinhmunah hian issue No.1 ah dah a tul hle. A mipui mimir lo fatu ve vak theihna a nih loh avangin kan aiawha rorel tur te hian fel taka thil an tih a pawimawh takzet a ni.

Engtia hmalak tur nge tih chu mithiam engemaw zat kan neihten min hrilh thei ang a. Chu lam ni lo, kan sorkar hotupa ber hian kan ram leiba leh sum dinhmun chungchanga a ngaihdan te hi I han ngaihtuah ho dawn teh ang. Nikum Assembly inthlan hma Zotalk interview-a sorkar leiba chungchang Chief Minister zawh a nih khan mak deuh maiin a chhang a:

Sangzela Tlau: Ka hriatsual loh chuan vaibelchhe 5000 vel lai leiba kan lo nei ta reng mai a. Chu chu phurritah i ngai em?

Lalthanhawla: Chutiang zat kan neih ka hre lo.

Chief Minister-in leiba vaibelchhe 5000 chuang kan neih a hriat loh thu a sawi atanga thla 8 velah Vanglaini chanchinbuin April 21 khan Mizoram sorkar leiba zat vaibelchhe 5545.95 chu chiang takin a tarlang a. Vanglaini hian sorkar document atanga a hmuh ni ngeia ngaih a ni.

June 13 khan Finance Minister-in he leiba zat hi Congress Bhavan-a thu a sawinaah a sawi lang a. June 27 khan Chief Minister-in Finance Minister Arun Jaitley-a a hmuhnaah kan state leiba zat hi a sawilan thu kan hmu bawk a. Hriat chinah chuan, kan sorkar hotuten June 13 leh June 27-a Mizoram sorkar leiba zat an sawi hi mipui vantlang hriata an sawi hmasak ber a ni.

August 2013 thlaa sorkar leiba chungchang Chief Minister-in “chutiang zat kan neih” a hriatloh thu a sawi khan zawhna lian tak awm ta chu, “Mizoram sorkar hotu lu ber hian kan leiba chungchang, thla 8 kaltaa zawh a nih khan leiba zat hi a hrelo tak tak nge inthlan hmachhawn a nih vangin a pehhela, a hre lo der?” tih hi a ni.

Sorkar hotu lu ber hi thil zawng zawng hre vek tura beisei theih a nih loh laiin sum dinhmun leh leiba zat te chu hre ngei tura ngaih a ni. A hriat theih dan tur pawh sum lam khawih tura ruat, a cabinet a thu, Finance Minister leh chumi lam enkawl tur Finance Secretary te hian an department chan a nih angin Chief Minister hi an hrilh hre ngei tura ngaih a ni a. Amaherawhchu, a lan dan chuan Pu F. Vanlalruata, Finance Secretary leh Pu Lalsawta, Finance Minister te hian nikum August Zotalk interview-a Pu Hawla kawm a nih hma khan kan ram leiba zat – vaibelchhe 5545.95- hi an hrilh lo niin a lang.

Pu Sawta hian April 21-a chanchinbu lamin kan leiba zat an tarlan kha a hriat hmasakna a nih chuan kan sorkar hotu te hian an hna an thawk thalo chauh pawh ni lovin, an thawk chhe hle tihna a ni bawk ang.

Kan leiba zat hi sem rualin Mizorama mi tinin Rs. 50,008.06 zel leiba nei ang kan ni tih a ni a. Sing nga neilo hi kan awm nual a rinawm, kan MLA leh MLA nih tum hoten an ngah hle laiin.

August 2013 khan Pu F.Vanlalruata emaw Pu Lalsawta’n kan leiba neih tam tak hi Pu Hawla an hrilhhre lo tak tak a nih pawhin sorkar hotupa ber chuan ama thahnemngaihnain a hre tur ni awm tak a ni. Mahse, a pha bawk si a.

Zotalk Interview kha in lo en leh chuan Pu Hawla’n interview tu zawhna a chhan khan, “chutiang zat kan neih ka…” a han ti a. Fan raihin “... hre lo” tiin a zawm a. A sawi lai hmel en phei chuan hre reng si, hre lo anga lan tum a ang hle. Leiba vaibelchhe 5000 vel phurrita a ngaih leh ngaih loh thu zawh a ni a. Phurrita a ngaih thu emaw ngaihloh thu pawh chu sawi lova “chutiang zat” kan neih a hriatloh thu a sawi ta daih khan thil pahnih ngaihtuah theih a awm:

1.Kan leiba hi MNF sorkar kaihhruaina hnuaia leiba tlingkhawm ni mah se, kum 5 chhunga Congress sorkar in a belhchhah vang a ni a. 2014-15 a kan leiba phei chu cheng vaibelchhe 2288.35 nia tarlan a ni. Pu Hawla chauh pawh nilo; socialist, progressive, left of centre, fiscal conservative ni lo politics ngaihdan vuantu te hian, mak deuh mai chu, leiba neih hi “changkanna” ah an ngai tlat a. Lakluh mila khawsak tih thupui an vawn loh avang leh sorkar sum senga engkim mai tih tumna rilru hian a baa lak theihna tur a zawng ruai a. Rulh tumna nei bawk silova mipui sum an hman hiau hiau avangin (car manto kha I la hria em?) phurrita lak chu a hnai lo hle a ni. Minister rual zinga a langsar zual deuhte hi han zawt mah la, kan state leiba tam tak hi rulh tumna rilru an nei kher lo mai thei. Mineral bottle te atang chuan inkhawl ngah a har hmel a. Ba rulhna tur phei chu kan khawl hlawhtling lovang. Anni ang rilru hi khawvel pumpuiah sorkar mawhphurhna hriat dan diklo politician te kalsualna lian tak a ni. MNF sorkar kha sum dehchhuah leh enkawl thiam taka sawi tur an ni chuang lo nain, Pu Zorama’n Congress sorkar financial administration-a an chakloh a sawi hi a dik viau. Inthlan hnai taka leiba tam tak neih zep kha Congress tan chuan thil tih rem tak a ni.

2. Pu Hawla’n kan state leiba vaibelchhe 5545.95 chungchanga zawhna kha “kan nei lo” tiin a chhang miah lova, “kan neih ka hre lo” tiin a chhang a ni. Hei hi dan lam buknaah a hima a lan laiin mipui bumna tura tawngkam hman dik tak niin a lang. A chhan chu khatih lai khan mipui vantlangin sorkar thuchhuah emaw chanchinbu report emaw atangin kan leiba zat kan hre lova. Pu Sangzela khan vaibelchhe 5000 vel tia a hriat kha a dik laiin Pu Hawla sawi emaw, Pu Sawta sawi emaw mipuiin kan la hriat tlat loh avangin tam tak chuan kan lo ngaithla liam mai mai niin a lang. Thudik sawi lova mipui han ‘bawl’ mai kha Pu Hawla khan pawi a ti miah lo.

Chief Minister-in kan leiba chungchanga zawhna pawimawh tak a chhan loh danah khan kan ram phurrit a ngaihsaklohzia a lang a. A hnua sum inremchem chungchanga mipui leh eptu lam party ten an sawiselna a chhanlet dan atang phei chuan sawisel phakloha in ngai, duh duh ti theia in ngai, amah chhawrtu mipuite hmusit tak a ni tih a lang chiang hle bawk a ni.

Pu Hawla hian hetianga a tih zel chuan, a rinaiin thangthar ram siamthat duhtute hi a ngam lovang.

CHIEF MINISTER HI A TAN LEH ZORAM TAN BANG RAWH SE

FIR register tura order pek tir tura Magistrate hnena kal kan tum lai takin Justice for Mizoram hovin min rawn be pawp a, he thil hi an ngaihpawimawh thu leh hmalakzui tlaka an ngaih avanga lo buaipui zui an duh thu min hrilh a. Aizawla awm an nih vang leh dikna duh vanga bawhzui an inhuam avangin lawm takin an kutah he thil hi ka hlan chu a ni ta rih ber mai.

Kha thlalak chungchanga accountability awm se tia thil ka lo tih ve vanga police hnena lehkha ka theh luh chungchanga hriatthiamloh awm te sawifiah lawk ila. Mizoram hi hmangaihtu tam takte ang bawkin ka hmangaih ve a. A tlukchhiat phallo leh a tlukchhiat dawn ai chuan lo ding ngam turah ka indah ve a. Kha thlalak ka han hmuh khan, emergency warning light a eng ang hian min lo barakhaih hle a ni. 

Kha thlalak kha police te hian an sawi duh lo a ni mai thei a, Aizawl khaw chhung ngei a lak a ni a. April 21 zana lak a ni tih April 22-a “…nizan thil thleng…” tia sawitu atangin a hriat theih. Thlalak siamchawp, beer can dah chawp anga sawi hi a dikloh a rinawm bawk. A chhan chu thlalak delete tura ngen te khan beer in an sawi lang tlat a. Delete tura an ngenna chhan pawh niin a lang. Khami hmun pawh kha police te hian an hre vek tawh a ni.

Chutiang khawpa chiang ni bawk si leh kan zu khap burna dan awmze nei lovin a lo khap thil a nih bawk si chuan vengmawng tlangval a ni emaw sorkar hotu lu ber pawh nise, permit an nei te a nih ngawt loh chuan dan anga man nghal tur a ni tlat a ni. Dan bawhchhiatna ni ngeia lang hi ka lo hmu si a, ka ngawihpui ngawt thei lo a ni.

Pu Hawla bei thin eptu party lam ten beihnan an hman ngei ka lo ring a. An inbei nasa thin bawk a. CM in hemi chungchangah awmze nei taka chhanna a neih a pawimawha ka hriat avangin Congress party hruaitu Pu David M.Thangliana pawh April 23 khan he thlalak chungchangah hian miin an beiha chhanlet dan tur sawipui a thaa ka hriat thu ka hrilh a. An buaipui zui thu min hrilh nghe nghe.

Thil serious tak a nih hi an hriatchian loh ka hlauh avangin Minister zinga facebook hmang thin Pu Zodintluanga pawh, “Mizoram chhung a nih a, an in hi alcohol content nei a nih a, doctor prescription an neih loh bawk chuan MLTP Act bawhchhia an ni ang. Ho viau angin lang mah se, jail tan theihna a ni reng mai. Public domain ah kha thlalak kha a awm tawh lehnghal a, beer can vanga court in Chief Minister hi thiamloh a chantir chuan a zialo duh khawp ang. Hmanniah New South Wales Premier (an Chief Minister) chu a zu bottle dawn chungchanga thudiklo a sawi vang ringawtin a bang tawp” tih thu ka hrilh nghe nghe a. Mi chhang zui lo. In chhungkhat leh thawkho an ni bawk a, he thu hi a lo sawizui pui ngei ka beisei.

Tin, Chief Minister fanu Lucy Sailo hi June 6 khan a pa hnena a lo sawi ngei atan (a duh chuan) he thlalak chungchanga Chief Minister-in chhanna dik leh awm (appropriate response) a neih a pawimawh thu ka hrilh a. Mahse vawinni thlengin Chief Minister emaw a nupui hian hemi chungchang hi vantlang hriatah an la sawi zui lo. Journalist te pawhin an zawhfiah hriat a ni lo. 

SP Pu Dinga hian June 4-a Aizawl police station-a lehkha ka thehluh kha June 27 khan CrPC Sec 154 “ang thlap” a nih loh vang tiin case a register loh chhan a sawi bawk a. June 9 ah chuan thlalak computer hmanga siamchawp a nih theih thu leh finfiah a theih loh vang tiin a sawi thung. 

Heng Pu Hawla chhanna (engmah sawi loh) leh Pu Dinga dan zawmlohna (Sec 154 hian chiang takin FIR register tur a nih thu a sawi a, Supreme Court pawhin ruling engemaw zat an lo nei tawh a ni) te hi dan bawhchhiatna nia lang chungchang ngaihtuahnaa chhanna (respond) Mizo mipuite min pek a nih chuan kan CM leh SP te hian an mawhphurhna an kengkawh zo lo tihna a ni. Politician tan chuan accountability laka inthiarfihlim hi a finthlak ber a. Police officer tan chuan departmental action a hlauhawmin ka hria. 

Bible chuan sum tam tak aia hmingthat a thlanawm zawk thu a sawi a. Australian ho pawhin an in that duh tawh loh Foster’s beer vanga hmingchhiat ai chuan Mizoram history-a chuang reng turin accountability la ngama Chief Minister nihna atanga bang ngam hruaitu nih hi a thlanawm zawk hle ang. Pu Hawla hi mi puitling a nih chuan a bang ngam tur a ni. A ban ngam chuan a zahawm ka ti hle zawk ang.