"Baptist Church of Mizoram-a Bialtu Pastor nupui thenkhatte’n Sorkar hna leh Hna dang fulltime-a an thawh avanga an Pasalte rawngbawlna tawiawm tha thei lo leh an post-ah pawh regular taka awmpui thei lo tun hma atang khan an lo awm tawh thin a. Pastor te zawk chuan leave emaw hotute phalna emaw la si lovin an Nupuite awmna lamah kalin an Bial an chhuahsan fo thin avang khan Bial/ABC chuan he agenda hi an siam ta thin a ni" tiin July 16 khan Hnamdamna chanchinbu editor Pu C.S.Chawngchhuma Chawngthu chuan a ziak a.
BCM Constitution hian pastor te mawhphurhna leh tih tur engemawzat a sawi a. Chu'ng zingah chuan "Quarterly Report dik tak, Co-ordinator hnênah a thehlût thîn ang" tih a awm avangin bialtu pastor te hian an rawngbawlna chanchin dik tak ziakin kum khata vawi 4 headquarter ah an thehlut thin a ni.
An tih ngei ngei tur zinga mi pakhat leh chu "A Bial chhûngah kum khatah ni 300 tal a awm tûr a ni. Rawngbâwlna avâng emaw hrisêl lohna leh rokhawlhna avânga Bial a chhuahsan dâwn chuan a enkawltu hnên atangin phalna a la hmasa tûr a ni" tih a ni leh a.
Pastor Quarterly Report form 2012-2013 atanga a lan dan chuan kum 1 chhunga biala ni 300 awm tling lo te hi an nupui sorkar hna emaw hna dang full time-a thawktute an ni lo tih kan General Secretary pawhin a hriat ngei a ni a. Ama sawi dan ngeiin "phalna neia biala nupui hruailo hi kan awm meuh lo, mahse hruai lo chu kan awm (hna hran nei emaw nei lo emaw)" tih a ni.
Hnamdamna editor-in "finfiah ngam vek" tia a sawi, "pasalte rawngbawlna tawiawm tha thei lo" a tih hi General Secretary-i'n "phalna neia biala nupui hruailo hi kan awm meuh lo" a tih nen hian a inkalh niin a lang.
Tin, "Pastor te zawk chuan leave emaw hotute phalna emaw la si lovin an nupuite awmna lamah kalin an Bial an chhuahsan fo thin" tih pawh hi General Secretary-i'n dik taka ziahluh Quarterly Report a rawn tarlan en chuan a inmillohna a awm. A chhan chu bialtu pastor te hian an hotute phalna la lovin an bial an chhuahsan a nih chuan an Quarterly Report ah "dik tak" nilovin dik zan lovin an ziak tihna a ni dawn a. 2012-2013 Quarterly Report hi General Secretary hian a rinhlelh thu a sawi hriat a la ni ngai lo. He'ng pastor nupuite awmna lama kala an bial an chhuahsan fo thina sawite hi Coordinator leh General Secretary ten an hre fuh lo a nih loh chuan Hnamdamna editor hian thu diklo a dawng tihna a ni ang.
Pastor nupui biala hruai chungchang "Pastor Bial leh ABC atangin Assembly agenda-ah a lo lut fo tawh thin a lo ni zawk" tih leh "Assembly-ah hian kum 1988 atanga kum 2008 chhung khan vawi 7 zet sawi a hlawh hman a" tih hi ngaihtuah chian chuan thil mak angreng deuh a awm.
BCM Constitution-in a sawi dan chuan Assembly-a thu thehlut thei te chu "Assembly Committee te, ABC leh ABC Executive Committee-te" an ni a. "Hna thar hawn leh hnaruak hnawhkhah thuah Finance Committee-in thu a thehlût thei ang a, thu hmanhmawh tûl zualah erawh chuan Administrative Working Committee-in a thehlût thei ang" tih a ni bawk. ABC, ABC Executive Committee, Finance Committee leh Administrative Working Committee bakin Assembly ah thu an thehluh theilo tih hi kan Constitution sawi dan a ni.
Pastor bialin Assembly ah thu a thehluh theih si loh chuan kan Constitution kalhin khawi pastor bial emawten Assembly ah thu an lo thehlut tihna a ni anga. Assembly chuan dan kalhin pastor bial thu thehluh chu an lo ngaihtuah tihna a ni ang.
"Assembly leh Pastoral Committee hian Pastor nupui hna neite (Kohhran rawih lohte) chu Kohhran rawih an nih loh avanga tihluihna a bantir thei an ni lo tih hriain ni 2.March.2015 khan an pasal Pastor te hnenah Assembly 2008 thurel hriattirna leh ti hlawhtling tura ngenna a siam ta a" tih hi "an nupuite an bang thei ngang lo a nih chuan amah pastor zawk chawl thei turin lo in ngaihtuah se tih a ni. An thutlukna chu 31st August 2015 ral hmain General Secretary hnenah rawn thlen leh rawh se" tia Pastoral Committee in a rel en chuan pastor te hnena Assembly thurel "hriattirna leh ti hlawhtling tura ngenna" niin a lang lo. A chhan chu 2008 Assembly thurel ang nilovin Pastoral Committee hian penalty a siam tel ta tlat a.
"An zawm thei lo a nih pawhin action lak a tumna engmah rel a la awm lo" tia Hnamdamna editor-in a ziah hi an nupuite an ban theih loh a pastor zawk bang tura thurel a nih si chuan action lakna a ni ber zawk awm e.
"Sorkar Minister te pawhin pastor in sawn apianga an nupuite khawih chet ngai hi an ning khawp mai" tih hi uluk deuhva ngaihtuah chuan kan sorkar hian kum 5 dana kan pastor thenkhat rawngbawlna a lo chak zawk nana an nupuite hnathawhna an siamrem hi an lo "ning" tak zet em? Ninawm khawpa sawn kual ngai hi kan pastor nupuite zingah engzat nge awm?
