ZORAM TODAY September 1-14 chhuakah khan "Office of Profit: Mithiamte'n eng nge an sawi?" tih a lang a. Chutah chuan MZU zirtirtute pahnih leh journalist pakhat kamchhuak tarlan a ni a. Political Science zirtirtu Asst.Professor C.Lallianchhunga thuhla atang hian “office of profit” leh “conflict of interest” chungchang hi I han en dawn teh ang.
1) “Pu Lal Thanzara hi bâng lo mah se, amah an puhna hi amah beitute tan pawha bawhzui hlei theih loh, Election Commission of India pawhin ngaihdan a lo siam ngheh tawhna chungchang a ni a,"
Pu Lal Thanzara MNF te’n "an puhna" hi Scroll reporter M Rajshekhar-a news report atangin a ni a. Company official document a hmuh atanga report a nih avangin a dika ngaih a ni. Sunshine Overseas-a Pu Lal Thanzara’n share a lo neih chungchang kha "bawhzui hleih theih loh" nilovin bawhzui awlsam tak zawk niin a lang. A chhan chu kha’ng document Pu Lal Thanzara hming lanna te kha hmuh theihin a awm vek a. Amaherawhchu, MNF hoten PC Act hnuaia an puhna a nihna zawnah erawh thiamloh a chan na tura police lam hmalak chu Pu Lal Thanhawla sorkarah phei chuan thil awl tak a nih a rinawm loh.
2) "Kum 2006-a Naveen Jindal-a kha Member of Parliament ni chunga hlawkna dang office pawimawh chelha puh a ni a, nihna pawimawh tam tak an tarlan zingah Vice President (Jindal Steel and Power Limited) leh Director (Jindal Power Limited) a tel a; hemi chungchangah hian Election Commission chuan heng mimal company-te hi sawrkar hnuaia awm an nih loh avangin ngaihtuah theih a ni lo, a lo ti daih tawh a."
He'ng entirna te hi Pu C.Lallianchhunga hian a rawn tarlang a, “office of profit” chungchang hrim hrim sawinaah chuan a tha viau. Indian Constitution Article 102 (1) (a) kan en chuan “office of profit” chungchanga thil chiang tak leh hrilhfiah dan azira chiang lo deuh pawh a lang a. A chiang chin han en ta ila --- central emaw state sorkar hnuaia hlawh neihna dinhmun luah chu "office of profit" a ni tih hi hrilhfiah dan awlsam ber pakhat a ni a. Chu chu he Article hian a sawi ber a ni. Jindal Steel and Power Ltd te khi India sorkar emaw state sorkar ta a nih loh avangin “office of profit” chungchang ngaihtuahnaah a tel lo hrim hrim a nih zawk chu. Election Commission hian "office of profit" hnuaiah ngaihtuah theih a ni lo a ti ngei ngei zawk tur a ni ang. Naveen Jindal-a'n MP ni chunga company hotu a nihna hi danah phalloh a ni lova. India sorkarah contract nei a nih erawh chuan Representation of the People Act, Sec 9A huam chin a ni thung. Chumi dan chuan “office of profit” chungchang ni lovin “conflict of interest” zawk a sawi a ni.
3) "Office of Profit chungchang hi Supreme Court-in kum 1971 khan Shivamurthy Swami vs Agadi Sanganna Andanappa case-ah thutlukna a lo siam tawh a, private company hi Office of Profit hian a huam lo a ni âwm e."
Hei pawh hi a chunga mi ang tho. Private company ah hian MP/MLA ten inhnamhnawihna an nei thiang a. Danin a khap hran lo. Sorkara contract/supply kallai "subsisting contract" a awm erawh chuan RP Act Sec 9A hian a phallo bur thung a ni.
4) "Tin, Election Commission hian ama thuin Office of Profit chungchang hi a ngaihtuah ngai lo va, India President-in India Danpui Article 102 (1-a) anga hêkna a dawn Article 103 hmanga a ngaihtuah dawnin Election Commission hi MP te chungchangah a râwn thin a"
Complaint a awm loh chuan President emaw Governor in anmahni thuin hma an la ngai lo tlangpui. An la ngai lo pawh ti ila, a sual lo mai thei. Election Commission pawh hian ama thuin thil a ti ngai lutuk lo niin a lang. Amaherawhchu, Pu M Lalmanzuala chungchangah khan complaint tu awma hriat a ni lova, Election Commission khan document a en a, danin a sawi angin action a la mai thung niin a lang. Governor inrawlhna a lang lo.
5) "MLA te chungchang pawh Article 191 (1-a) hmanga hêkna Governor-in a dawn chu article 192 hmanga thutlukna a siam hmain Election Commission rawtna a ngaichang thin a, Election Commission rawtna ang hian India President leh State Governor te hian thutlukna an siam thin a ni."
Governor hian Election Commission rawtna a ngaichang mai nilovin rawtna fel tak an siam tlawhchhana order a siam theihnan Election Commission hi a rawn ngei ngei zawk tur a ni a. Governor -in ama ngaihdana thutlukna siam ngawt thei a ni lo. Election Commission hian dan lam khawih pawl an nei a. Chuta mi te chuan dan leh dun an lo en vek thin a ni. Pu Lal Thanzara laka complaint pawh kha an dan lam khawih pawl hnena pek a ni.
6) “Hengte vang hian Office of Profit chungchanga Pu Lal Thanzara beihna hi amah beitute tan pawh bawhzui hleih theih loh a nihna lai a awm chungin Pu Lal Thanzara chuan mipui court lamah he buaina hi a rawn theh chhuak a."
MNF lamin an beihna chauh nilo hi Pu Lal Thanzara hian a hmachhawn tih a inhria a. High protein biscuit supply chungchangah RP Act Sec 9A chiang takin a kalh tih Assembly document leh RTI document atangin a lang. Chumi avang chuan disqualify theih (subject to disqualification) a ni a. Inhnukdawk zawk tura hrilh pawh a ni. Sawi fo tawh angin Sec 9A hi “office of profit” sawina nilovin “conflict of interest” chungchang zawk a ni a. “Office of profit” ang zawnga Congress party in a sawi zel hi a issue tak tak zawk “conflict of interest” Sec 9A in sawi ber sawi bo tumna niin a lang. “Office of profit” anga puh a nih chuan Pu Lal Thanzara hian thiamlohna a nei kher lovang. A chhan chu Sunshine Overseas hi sorkar company a ni lova. Share a lo neih erawh kha chu chhui chian ngai thil a ni thung. PC Act hnuaiah ni lo RP Act hnuaiah bawk puhna tur a awm chiang zawk ang. PC Act hnuaiah pawh thiamloh chang thei (potentially guilty) a nihna lai tur a lian hle, mahni leh mahni hna inpe a nihna lai a awm tlat a. Tin, HP Food Products pawh sorkar ta a nih loh avangin “office of profit” lam a kawk lova, Sec 9A bawkin a sawi “conflict of interest” chungchang zawk a ni.
7) "Opposition party-te’n nge amah leh a awmna party-in hlawkna tel ber dawn tih pawh kan hre thuai ang. Awlsam taka Council of Minister leh MLA atanga Pu Lal Thanzara bâng hi Opposition party leh a bàn nana hmalatu mi thahnemngaite hian hlawhtlinnaah an ngai a nih chuan an ring sual viau maithei bawk a ni.”
Eptu lam hian a issue hi an man tawk lo niin a lang, document chiang tak a awm chung pawh hian. An tana hlawkna tur political advantage an la thiam lem lo. Dan ang thlapin ACB ah nilo CBI ah te emaw court ah te kalpui nghal vat se chuan Pu Lal Thanzara tan hian a hlauhawm thei khawp ang. ACB SP hi Pu Lal Thanhawla te nena inhre tha tura ngaih a ni a. Pathianni tuka an inkhawm tlan chuan Sunday School kai ho tura ngaih an ni. Mizoramah hian mahni Sunday School kaipui te man tir tura hmalakna chak tak hi a awm a rinawm loh.
Pu C.Lallianchhunga’n “office of profit” chungchang Pu Lal Thanzara kaihhnawiha a sawi hi “office of profit” hrim hrimah chuan a fiah angreng a. Amaherawhchu, Zoram Today in Aizawl North III bialtu banna chungchanga an zawhna a nihnaah University-a political science asst professor in he issue-a thil awmzia dik kim a sawilo hi a vanduaithlak angreng. Tin, Sec 9A chungchanga Supreme Court judgement leh Social Welfare Department lehkhaa Pu Lal Thanzara biscuit supply chungchang te hi uluk deuhvin chhiar se a sawi dan zawng a dang daihin a rinawm.
