LALTHANZARA BANNA LEH A KAIHHNAWIH - C.Lalrinchhunga

Kan Ex Minister (MLA) zahawm tak Pu Lalthanzara @Patea’n Sunshine Overseas Private Ltd-a share a neih thu leh Social Welfare Deptt-a High Protein Biscuit supply-tu, HP Modern Roller Flour Mills and HP Food Products a ta a lo nih reng thute, chumi kaihhnawihah chuan Section 9A, Representation of The People Act, 1951 bawhchhiatna awm nia ngai a Pu Laltanpuia Pachuau @Matana-in Election Commission-a complaint a thehluh chungchang hian tunlai Mizoram Politiks khawvel chu a chiahhneh hle awm e. Hemi chungchangah hi ka han tui hnih ve hlek teh ang.

Sunshine Overseas Company-ah hian Pu Patea hian share a nei ngei niin scroll.in chuan a tarlang a. He company hian Mizoram sawrkar PWD hnuaiah contract an nei nual a ni tih pawh kan hre theuh awm e. Scroll.in vekin a tarlan dan chuan, heng a share zawng zawng hi Pu Patea hian general election hma khan midang kutah a transfer nia tarlan a ni. Chutih laiin local media thenkhatten an tarlan dan chuan Pu Patea hian share a neih pawh hi a hre lo hrim hrim a, hetianga a tlangthan hnuah hian a hre ve chauh ni awmin tarlan a ni bawk. Sunshine Overseas hian Pu Patean share a neih hnuah chuan nasa takin an hlawkna a pung a. Kum khat (2011-2012) chhungin Rs 6.83 crore atangin Rs 24.16 crore ah a chho ta dawr mai niin tarlan a ni bawk. HP Modern Roller Flour Mills and HP Food Products Ltd chungchanga Pu Matana’n Election Commission-a complaint a thehluh dan chuan Pu Patea ta niin tarlan a ni a. He company hian MLA election hnuah pawh High Protein Biscuit supply turin Mizoram sawrkar (Social Welfare Deptt) nen contract an nei tih Assambly Session-a zawhna leh chhanna atangin hriat theih niin a sawi bawk a ni. Scroll.in hian he thu an tlangzarh hma hian kan CM leh Pu Patea hi insawifiahna hun an siamsaka, mahse engmah an sawi duhlo niin tarlan a ni bawk.

 

Zonet (Chanchin thar dt 19-8-2015) in a puan dan chuan Chief Minister Pu Lalthanhawla hian HP Modern Roller Flour Mills and HP Food Products Ltd hi Pu Patea ta ngei niin a sawi a, mahse hetiang High Protein Biscuit siamchhuaktu dang hi Mizoramah an awm loh avangin Social Welfare Deptt hian supply contract a pe niin a sawi a ni. Hei erawh hi chu Indian Constitution Article 191 hnuaiah hian action lak theihna a awm a ni tih chu a nemnghet ve thung a ni.

Hetiang hian Article 191-ah kan hmu; (1) A person shall be disqualified for being chosen as, and for being, a member of the Legislative Assembly or Legislative Council of a State...(e) if he is so disqualified by or under any law made by Parliament.

 

Constitution Article 191(1)(e)-ina a sawi hi Section 9A Representation of the People Act, 1951 kha a ni.

 

Heng kan MLA/Minister zahawm tak hekna-te hi thu dik a nih chuan a nghawng thui thei khawp dawn a. Article 191(1)(e) angin election a contest theih tawh dawn lova, Affidavit a false declaration a siam avangin criminal case awm thei a ni a, chumi piah lamah chuan Article 193 hnuaiah Assembly session-a a lo thut ve tawhna leh MLA a nihna anga committee pawimawh-a a lo telna zawng zawngah khan ni khat zelah Rs 500/- a chawi bawk ang.

Scroll.in atanga kan hmuh dan/ngaihruat theih dan chuan Mizoram kawngpui lo chhiat chhan zawng zawng pawh hi Pu Patea leh kan CM te niah a ngaih theih ta vek a. Sunshine Overseas Ltd hian diklo tak leh uchuak takin PWD changtu Chief Minister atangin duh sakna an dawng a, an contract thawhnan hian hmarua pawh nei lovin PWD ta an hmang a, Pu Patean share (Sunshine Overseas Ltd) a neih ve miau avangin ngampa tak leh inthlahdah takin hna an thawk a, chu chuan kawngpui tha min neihtir ta lo a ni.       

 

He inpuhna (i ti mai teh ang) avang hian Pu Patea chuan Minister a nihna atangin banna (resignation) CM hnenah a thehlut a. A banna chu pawmpui a ni a. MLA a nihna pawh Assembly Speaker awm lo mah se, Deputy Speaker Pu R Lalrinawma’n dt 20/8/15 khan a pawmpui ve ta a ni. Pu Patea hian a banna lehkha a a tarlan dan chuan Office of Profit ah inhnamhnawiha mi thenkhatten an puh vang niin a sawi a. Office of Profit (Constitution Article 191) leh subsisting contract (Section 9A Representation of Peoples Act, 1951) hi a ngaihpawlh ni ngei tur a ni.

Representation of The People Act, 1951 Section 9A ah hetiang hian kan hmu; . Disqualification for Government contracts, etc. A person shall be disqualified if, and for so long as, there subsists a contract entered into by him in the course of his trade or business with the appropriate Government for the supply of goods to, or for the execution of any works undertaken by, that Government.

Explanation. For the purposes of this section, where a contract has been fully performed by the person by whom it has been entered into with the appropriate Government, the contract shall be deemed not to subsist by reason only of the fact that the Government has not performed its part of the contract either wholly or in part.

A awmzia chu tupawh sawrkar nena contract kallai nei an nih chuan MLA/MP an ni thei lo tihna a ni a. Mahse hei hian hnathawh zawh vek tawh, sawrkar-in bill a pek mai lohte erawh chu a huam lo a ni. Section 9A leh Office of Profit hi thil hrang daih a ni tih pawh hi tun hnaiah chanchin bu hrang hrangah Lalnunmawia Pachuau in a ziah kha kan chhiar awm e.
 

Sunshine Overseas Ltd bikah chuan Pu Patea hian a share kha election hma khan lo transfer vek ta sela, he dan hian a phuar thei lova. Lo transfer lo teh reng pawh nise, subsisting contract chungchangah kha chuan ngaihtuah tur tam tak a la awm thei tho a ni. Mahse HP Modern Roller Flour Mills and HP Food Products Ltd chungchangah chuan Pu Matana’n Election Commission-a representation a siam ang chuan MLA/Minister a nih hnuah pawh Social Welfare deptt atangin High Protein Biscuit supply tur khan contract pek thar niin a lang a ni. Hei bakah hian CM zahawm takin a sawi anga Zonet chanchin thara tarlan a nih angin HP Modern Roller Flour Mills and HP Food Products Ltd hi Pu Patea ta ngei a ni a. Pu Patea MLA a nih hnuah pawh contract an nei a ni tih chu a chiang a ni. Chutiang a nih chuan Section 9A Representation of the People Act, 1951 leh Constitution Article 191 hnuaiah disqualify ngei tur a ni a. Constitution Article 193 hnuaia hremnate hi a chungah lek tur a ni ang. Mahse thutawp siamtu tur erawh chu Governor a ni a, Election Commission ngaihdan erawh a lak hmasak a ngai thung a ni. Banna (resignation) leh disqualification hi ngaihpawlh loh tur a ni a. Banna hi Speaker thutlukna a nih laiin disqualification erawh chu Governor thuneihna a ni thung.

Ka lo ngaihdanah chuan kan MLA zahawm tak banna thehluh hi pawm mai tur niin a lang lo. Hetianga puhna awm ni a langte hi chhui chian zawk chi a ni. Sawrkar leh media lamin an tarlan dan chuan Speaker hian MLA banna hi Section/Article 194 "The Rules of Procedure and Conduct of Business in Mizoram Legislative Assembly" hnuaiah a pawm a ni.
 

Pu Matana’n Pu Patea MLA/Minister a puhna hi a na mai lo khawp mai. A chunga kan sawi tak ang khian hremna lek theih a ni. Chutih laiin Pu Patea hian an puhna hi a pawm nge (?) banna a theh luh tak mai! A pawm lova, thubelhchian dawllo a nih chuan banna thehlut mai lovin chhuichian tir emaw House ah Privilege Motion, Scroll.in leh Pu Matana lakah hian put luhna hial chi zawk a ni. Chutih rualin court lamah pawh Pu Patea pawh hian an puhnate hi dawt ti a thiam lohna nei lova a insawi a nih rau rau chuan khua leh tui ten thudik chiang lehzuala hriat kan duh avang tal pawhin Scroll.in leh Pu Matana lakah hian case a file ngam tur a ni ang. A ngam lo a nih erawh chuan Mizoram mipuite hian Pu Patea hi dan lova MLA, dan bawhchhia (criminal), diklo taka contract pe/thawk a, Election Commission laka affidavit dik lo siam, ram hruaitu ni tlak lo tiin ngaihdan kan siam dawn a ni. Chutih rualin Pu Matana hian address loh tur zawk hi a address a nih hmel. Governor of Mizoram address a, copy pawh Election Commission leh Assembly Speaker pek tel tur a nih hmel zawk. A chhan chu Article 191 hnuaiah hian thu tawp siam theitu chu Governor a ni a.

Hei mai hi a la ni lo. Pu Patea puhna hi thu dik a ni ang a, Election Commission-in complaint a chhui chiana Constitution Article 191 hnuaiah disqualify a hlauh avanga banna a thehlut a, chutiang bawkin Deputy Speaker pawhin kha an puhna chuichian a nih lohna tur leh Pu Patea humhim duh vangin awlsam takin kha banna kha a lo pawm ta mai em ni (?) tih hi mipui ten kan ngaihdan a ni. Disqualify lova a banna pawm a nih chuan Bye Election-ah pawh a in candidate leh thei mai dawn bawk a ni. Hei erawh a chiang - ban avang ngawt hian khang action lakna tur kha engmah a dang ngawt thei lo tih hi a ni.

Chutih laiin tute emaw thudik hriatchian hma hauhva kan bialtu MLA tih vel avanga thuchhuah siam a, lo iak iak ve chhen hi chuan rorelna dik an hua niin ka hria! Dikna thup bova, sual tipunluntu mai an ni. Dikna duh an nih chuan puhna zawng zawng chhui chian anih hma chuan a pawng a puiin Bialtu MLA a nih vang ngawtin an lo chhan hlur tur a ni lovang. Sual titu chu ka pa/nu/unau pawh nise, kan Kristianna chhalin, hum kan tum ngawt tur a ni dawm em ni? Corruption a zung nena phoro duhtu kan nihna kha kan lantir tur na ni zawk ngei ang.

A tawpnan, Pu Matana chungah hian Mizoram mipuiten lawmthu sawi kan ba-in ka hria! Hmanah khan CM te nupa beer (zu) in avang khan FIR thehlutin a lo buaipui vak tawh a. Mahse evidence a tha tawk lova ngaiin police lamin action an la zui ta lova. Tunah Opposition Party (MNF,ZNP, MPC leh BJP) ten an duh em em (ti ila kan tisual lovang chu) an tih theih loh leh nachang an hriat loh, hetiang hian foreign atangin hma a rawn la a, Minister pakhat chuan a ban phah ta reng a ni. Pu Matana hian kan CM  leh Pu Patea hi a huat ngawt ka ring lova. Mipui aiawh an ni, an tihdiklo avang hian ram leh hnamin nasa takin kan tuar theih avangte leh mipui ten an chungah rinna kan nghah ang hi an hlen chhuah ngei theih nan hetiang hian a ti a nih ka ring tlat a ni. Opposition Party pali (4) te hian Pu Matana pawh hi intluklo a ni ber lawm ni? Ram leh hnam kan hmangaih dan hi Mizoram political party zawng zawng hian in bihchiang teh ang u. Hei lo pawh hi media leh PRISM lamin sawrkar leh official-te thiltih dikloh an chhui chhuak a. Politics field ah bawhzui nachang inhre ngai miah lova. Assembly Session-a auchhuah pui dum dum tura kan ngaih lai che u in a tawp leh ngawt zel a nih hi! Congress sawrkar hi a tha lo kan tihna a ni lo. Sawrkar chak leh thiltithei tak a ni! Mahse sawrkar khalh ngil turin Opposition party chak Mizo mipuiten kan mamawh a ni! Chutiang Opposition chu nih tum hram hram teh u! Chu ngei chuan ram hruaitu/sawrkarna chang tlak in nih leh nih loh in tarlang thei dawn a ni.

ZORAM POLITICS LEH THLANTLIN HRUAITUTE

(Chhinlung magazine-a Zoram politics leh kan thlantlin hruaitute chungchang ziak tura sawmna ka dawn ve avangin Bangalore Mizo Association Chhinlung editor leh a thawhpuite chungah lawmthu ka sawi duh a. He thupui lian leh pawimawh tak mai hi keini thangthar te hian kan ram politics dinhmun tih hmasawnnan party atchilhna bansanin, rilru thar nen I han ngaihtuahho dawn teh ang.)

Politics hi Mizo te hian kan hmelhriat ve viau tawh emaw kan ti mai thei a, mahse political party hrang hrang thuchhuah te leh sorkar kalphunga mipui titi atang te hian politics kan hriatthiam dan a lo la chianglo hle tih nikum atang khan ka hmuchhuak a. Pianthar dan sawichhuak thlap thei piangtharna chang silo kan tam ang deuh hian mi tam tak chu kan au nasa hle. Chuvang chuan politics nihna leh a hman dan dik kan inzirtir thar te pawh a tul viauin a lang.

“Politics” tih hi Sap tawng a ni nain Mizo tawng ang maiin thingtlang kilkhawr berah te pawh kan hmang a. Sap ho pawh hian “politics” hi Thuthlung Thar bu ziahna tawng - Grik tawng - “politikos” tih atanga an lo lakchhawn a ni. “Khua leh tui te chungchang emaw khua leh tui te hamthatna chungchang” sawina a ni ber mai awm e.

Hmasanga hnam fing hmasa Grik hoten politics chungchang an han sawi khan an kawhtir ber chu mihring chengho inenkawlna leh inrelbawlna dan hi a ni. Inenkawlna dan hrim hrim phei chu Mosia hunlai pawha an neih tawh a nih avangin politics kan tih hian thil bawlhhlawh leh tenawma ngaih tur a ni lo tih kan hre thei awm e. Lal Davida hna pui ber kha mihring chengzaho enkawl leh an chunga rorel a ni a. Josefa hna pui ber pawh Aigupta ram enkawl a ni. Tunlaia a tlukpui chu Prime Minister a ni ang. Chutiang zelin zawlnei Daniala te, zawlnei Nehemia te leh Bible-a Pathian mi kan hmuh thenkhatte hi mihring chengzaho enkawlna politics-a inhmang mai nilovin thuk tak taka intatlut te an ni hlawm. Tunlai tawngkamin han sawi ta ila, politics-a zuang lut an ni ber mai. An politics khelh dan erawh a dang hle.

Kum zabi 21-naa kan hman ang politics hriatthiam dan dik neihnana Oxford Dictionary-in politics a hrilhfiahna pakhat hi a tangkai theiin a rinawm – “The activities associated with the governance of a country or area, especially the debate between parties having power.”

He dictionary-in a hrilhfiah dan chuan ram inrelbawlna kaihhnawiha hmalakna emaw thiltih reng reng chu politics a ni a. Kohhran emaw tlawmngai pawl te thiltih (activity) sorkar inrelbawlna nena inzawm reng reng chu politics a ni tel vek tihna a ni ber chu, ram inrelbawlna leh rorelna a nghawng avangin. Tin, kohhran chhungah pawh hian politics chu a awm ve hrim hrim bawk awm e.

Bible-a Pathian mi kan hmuh ten an rinna phatsan lova ram rorelnaa an tel theih chuan mi tha kan tih te leh kohhran mi thlarau mi kan tih te hian politics an ngaihven ve mai chauh nilovin, an tel theihna nia an hriat chuan thuk taka an tel hi thil tha tak a ni. Pathian tih leh dikna ngaina miten ram an hruai loh chuan ram a dam thei lo. Tin, “kuanglo nawr” tih kan sawi fo hi rinnaa mihuaisen kan han tarlan hote khi chuan an pawmloh thil a nih hmel. Kuanglo nawr han sawi takah chuan kan Governor hlui Shri A.R.Kohli-a kha kuanglo nawr nasa ber a ni thei ang. Governor tih tur India Constitution-a inziak nilo thil a tih hnemzia kha! Kohhran pakhatin Pathian Thuchah puanna maicham pulpit an chuankai tir te phei kha chu a fuhloh takzet. A chuankai tirtu te nen lam khan an thiamlo awm e.

Pathian mite pawh politics ah an leng vek kan tih rual hian phur nazawng telna chi erawh a ni hauh lo, Pathian Thu sawi chak leh sawi thei nazawng pulpit chantir a tha lo ang deuh hian. Politics chu bawlhhlawh taka chetna emaw inthiarfihlim ngaihna thil a nilo tih chiang turah inngai ta ila a tha awm e.

Mizorama politics kan hman ang chi hi tun hmain kan hmang ngai lo tih keini thangthar te pawh hian kan hre vek a. Mipuiin thlantlin hruaitute kuta ram rorelna dah ang chi nilo hian Lal leh Lal khawnbawlten ro an rel thin. Ziaka chhinchhiah a awm chiah lo nain Vailen hma Lalte rorelna hnuaiah khan Mizo mipuite kha lungawilohna avanga kawngzawh emaw chhiah chawi – fathang – tam uchuak tih vanga lungawilohna lantir ang chi te a awm lem lo niin a lang. Amaherawhchu, Mizo Union pian hnu khan Lal ban duhna politics a alh chak hle a. Lalte felloh vang nge vairam/khawthlang ram politics kan tem vir vang pawh a hriat tawh loh, hmasang atanga Mizoten inrelbawl dan – politics – kan neih chu zir pawh kan zir chianloh khawthlang ram politics tihdanin kan thlak ta thut a. Vai ho politics ze chhia kan la lut teuh leh nghal a. UT kan nih atanga chhutin kum 40 chuang kan hman hnuah pawh hian Zoram politics ke chheh hi a la bai nasa hle a ni. Speaker lo ni tawh thin Pu Rokamlova chuan Mizoramah hian politics hi “phakarna”-in kan tan a ti hial a ni.

Kan thlantlin hruaitute’n mipui rawngbawltu an nihna theihnghilha mipui chunga leng anga an tawng leh khawsak fo dan en hian kan politics thlen chin chu a hriat theih awm e. Mipui rawngbawlna aia mahni in leh lo din buaipui zawkte phei hi chuan politics hi an hmangsual nasa hle a ni.

MLA bik han thlur ta ila. MLA ni tura tehna hrang hrang hi a awm thei anga, duhdan hrang hrang hrutrual vektu leh keini pawhin kan lo tehna ber tur chu India ram dan sang ber Constitution hi a ni ang. Chu danpui Article 173-na chuan heti hian a sawi a:

"Qualification for membership of the State Legislature - A person shall not be qualified to be chosen to fill a seat in the Legislature of a State unless he (a) is a citizen of India...(b) is...not less than twenty five years of age..."

Bru emaw Chakma pawh nise, India ram khua leh tui, kum 25 aia naupang lo inthlannaa chak a nih chuan Mizoram sorkar rorelna sang ber Legislative Assembly-a roreltu Member ni turin an tling tawk tih hi Mizote kan behna ram danpuiin a sawidan chu a ni. He dan hi Mizoram-a Mizo nilo MLA kan neih nachhan pawh a ni a. Mizo nilo MLA kan nei hi thil ni miahlo tura dah tur erawh a ni lo. Kan politics kalphungin a kentel a ni tlat. (Israel ram parliament – Knesset – ah pawh khuan Arab mi an awm). India hnam nilo Mizote India ram rorelna inpui ber Parliament-a Member kan nih theihna pawh India Constitution vang tho a ni.

MLA ni tura thlantlina puante chuan Constitution Schedule 3 part 8b-a thutiam lakdan tur inziak angin state rorelna inpui Legislative Assembly-a lakluh an nih hmain thu an tiam tur a ni tih Constitution Article 188-nain a sawi a. A thu inziak dan chu hetiang hian a ni:

"I, A.B., having been elected (or nominated) a member of the Legislative Assembly (or Legislative Council), do swear in the name of God/solemnly affirm that I will bear true faith and allegiance to the Constitution of India as by law established, that I will uphold the sovereignty and integrity of India and that I will faithfully discharge the duty upon which I am about to enter.”

Minister te chuan Schedule 3 part 5 hmangin hetiang hian thu an tiam:

“I, A.B., do swear in the name of God/solemnly affirm that I will bear true faith and allegiance to the Constitution of India as by law established, that I will uphold the sovereignty and integrity of India, that I will faithfully and conscientiously discharge my duties as a Minister for the State of (Mizoram) and that I will do right to all manner of people in accordance with the Constitution and the law without fear or favour, affection or ill-will.”

MLA emaw Minister/Chief Minister ni tura India ram danpuiin tlin theihna dan a siam hlenchhuak te hi India ram danpui vekin thutiam pawimawh tak mai an lak phawt loh chuan MLA emaw Minister/Chief Minister an nih a remti lova. Intih puithuna nilovin dan hmanga intiamkamna, hruaitu ni tura mipuiin kan thlantlin ten an hming ziak thlapa thu an tiamna a ni.

Chu’ng kan MLA te chu lo pawngpaw sawisel emaw kan party an nih vanga lo tan em em te hian awmzia a nei tehchiam lova. An lo hmelchhe deuh a nih paw'n India Constitution in hmelchhiat vanga MLA nih phallohna a sawi loh avangin pawmloh nachhan tur a awm lo. Hausa leh rethei thliarna a awm loh avangin mi a hausak vang ringawtin MLA nih theihna dan a awm chuang lova. Tin, MLA lo ni tawh fapa emaw fanu an nih pawhin Constitution hian an pate dinhmun luah thin luah ve ngawtna dan a siam hran bawk lova. Party President emaw Chief Minister duhsak nih vang ringawtin MLA nih theihna tura dan tesep engmah duan a awm lo a ni. Lal thlahte pawh MLA seat hauhsak an nilo.

MLA te hian MLA an nih dawna rinawm taka an mawhphurhna lak tur hlenchhuak tura intiamna thu an chhiar chhuah - "...I will faithfully discharge the duty upon which I am about to enter..." – avang hian danin a phut anga hnathawh tur an thawh ngei ngei a ngai a, an lo tih loh hian dan an bawhchhia tihna a ni. Rinawm taka mawhphurhna hlenchhuak tura thutiam an lak hre reng chunga an bawhchhia a nih phei chuan anmahni thlangtlingtute nena rinawmna thuthlung an siam chu nasa takin an bawhchhia tihna a ni. Nupa inuiresan te pawh a tehkhin theih awm e. Bialtu MLA hnathawk thalo deuh bial ngaia an din ngam thinloh nachhan te pawh hi mipuiin candidate an rin tawh loh vang a ni thei ang.

Minister emaw Chief Minister ni tura thutiam an lakah hian thil pathum pawimawh deuh deuh a awm a. A mal te tein I han bihchiang dawn chhin teh ang.

1) "I will bear true faith and allegiance to the Constitution of India as by law established" leh "I will uphold the sovereignty and integrity of India" tia thu tiam an nih avang hian India ram pumkhatna tichhe tur lamin thil an ti tur a ni lo tihna a ni ber mai. Chief Minister-in Zofest khawmpuia, “Mizote thinlungah independence beiseina nung reng se” tia a sawi khan MZP te leh khami tuma kalkhawmte ngaihthlak duhzawng a ni tih a hriat avangin India ram "sovereigty" leh "integrity" tungding tlat tura thu a tiam pawh CM khan a dah tha a. A khawiah zawk nge Chief Minister hian a rinawmna a lantir dawn tih zawhna lian tak a awm thei awm e. India ram thendarh a nihlohna tura thu tiamtu hian India ram thendarh ngei ngaihna tur Mizote independence hi a sawi a rem lo a ni.

Tin, Member of Parliament thutiam pawh lo la tawh, tuna Mizoram rorelna inpuia eptu intelkhawm pawl hotu MLA Pu Vanlalzawma'n Oct 24, 2013-a, ZORO buatsaih UNO Day-a, "Zo hnahthlak hnam hrang hrangte pawh international boundary-in min dang eng ang mah se, inzawm khawm kan duh tlat chuan min dang reng thei lo ang...India ram hi tun ang hian eng chen a kal dawn a hriat loh a, a la keh darh lo ang tih sawi theih a ni lo" tia a sawi te pawh kha mahnia ro inrel ram nih duhna rilru atang chuan a dik thlap mai thei, mahse MLA (leh MP) ni tura thu lo tiam tawh tan chuan khatianga tawngchhuah kha India ram danpui kalhna a ni tih kan hmu thei awm e.

2) "I will faithfully and conscientiously discharge my duties" tia Minister leh Chief Minister ten thu an tiam hian an hna chanpual rinawm tak leh ngaihtuahna fim tak hmanga dik taka thawk tura thu an tiamna a ni a. “Conscientiously” tih lai hi a pawimawh hle. Chhia leh tha hriatna thiang tak hmanga hna thawk tura intiamna a tawngkam a ni tlat a.

Nikum 2013 kum tawp lam khan Mizo Zirlai Pawl ten Mizoram state quotaa Mizo/Zo hnam te duhsak hmasak bik kan nih theihnan Higher & Technical Education leh Art & Culture Department minister chu "indigenous" tih hrilhfiah turin an phut a. An phut chhan pawh Mizo hnam chauh hi Mizoram leilung fatea an pawm avang leh "indigenous" tih tawngkam sawibuaina a awm vang a ni. Higher & Technical Education department minister chuan dictionary hrilhfiahna leh a department hnuaia Tribal Research Institute lehkhabu chhuaha Chakma te Mizoram lei an rawh rah hmasak ber 1872 a nih thu hre reng chungin Law and Judicial department te hrilhfiahah a ti ta hlauh a. Law & Judicial department hian vawiin ni thlengin mipui hriatah an la hrilhfiah lo niin a lang, a har loh tehreng nen.

Tin, a hnu deuhvah, sorkarin a hrilhfiah tawh leh tawhloh Sports Minister zawh a nihin, "...indigenous chu hrilhfiah ngai an awm lo a, Supreme Court of India in a hrilhfiah dan hi fimkhur tak in kan thlirho zawk mai a ni" tiin a chhang a. Supreme Court in indigenous chungchang a sawi lah chu Mizorama indigenous chungchang kan buaipui nen a inang miah lo lehnghal a.

Kan thlantlin hruaitu Higher & Technical Education leh Sports & Youth Services department minister te hian an hmaa tla, rel fel leh tihchian tur chu politics bawlhhlawh ngaihtuaha avangin ngaihtuahna fim tak hmanga dik taka ti ta lo chuan an ngawihsan ta zawk a. Vawiin thlengin kha Zoram buailuaina boruak kha chinfel a la ni ta lo zel a ni. Higher & Technical Education minister-in dictionary leh Tribal Research Institute lehkhabu hmanga indigenous tih tawngkam a hrilhfiah theih reng, mahse a hrilhfiah tak si loh avang te, Sports & Youth Services minister in thupui pehhela zawhna a chhan vangte hian an thutiam "faithfully and conscientiously discharge my duties" tih chu an bawhchhia tihna a ni.

3) “I will do right to all manner of people in accordance with the Constitution and the law without fear or favour, affection or ill-will” tia thu an tiam hian hlauhna emaw, duhsakna emaw, ngainat bikna emaw huatna tellova Constitution leh dan dang te zawm thlapa mi zawng zawng chunga thil dik ti tura an intiamna a ni a. Kan thlantlin hruaitu minister te hian duhsak bik vanga tute emaw contract hna an lo pek te hian an thutiam leh India ram danpui an bawhchhia a, thuneihna an neih theihna danpui leh a thlantlingtu mipui te chu an zahlo tihna a ni.

Nikum MP inthlan campaign laia Chief Minister in UDF MP candidate eizawnna company North East Consultancy Services (NECS) leh Mizoram sorkar inzawmna chhutchah a nih tur thu a sawi khan “ill-will” vang ni ngeiin a lang a. Mizoram sorkar hian NECS nena an inzawmna a titawp tak tak a nih chuan Chief Minister-in a thutiam a bawhchhia tihna a ni ang. An la chhuchatlo a nih pawhin khatianga Chief Minister in thu a sawi kha a thutiam spiritbawhchhiatna lian tak a ni ta reng reng.

Sawi tawh tawh ang khan keini’n kan lo teh thinna te hi Constitution-in a ngaipawimawh tehchiam lova, missionary emaw evangelist emaw kohhran upa thlang tur kan ni lo bawk a, “Constitution leh danin a phut an hlenchhuak em? Inthlannaa tlinga puan ni turin India ram election danin a phut angin an khawsa em? Representation of The People Act Section 100-na an bawhchhia em? Mipui rawngbawl duhna thinlung an nei em? An thutiama ding mi an ni em?” tih te hi kan zawhna ni ta zawk se MLA tha kan thlangchhuak theiin a rinawm.

Kan thlantlin hruaitute hi thudik ngaina tlat mi an nih leh nih loh kan hriat a pawimawh hle bawk awm e. National Urban Health Mission (NUHM) hnuaia consultant hna thawk tur laknaah eptu MLA pakhatin Health Minister chu he hna lak dana thil diklo ti ah a puh a. November 24, 2014 khan Assembly session-ah Health Minister chu NUHM consultant laknaa Interview Board chairman hnena SMS hmanga tih tur hrilh angin a sawi a. Health Minister hian puh a nih darkarah ni lo, a tuka Assembly session-ah sawifiahin, SMS thawna puhna chu thudiklo tiin SMS a thawnloh thu a sawi a, SMS thawna puhtu pawh chu SMS a thawn ngei a ni tih hai lang turin a phut nghe nghe a ni.

Constitution Article 194/2-na hian MLA te hi Assembly session-a an thusawi reng reng court-a khinbuai theihlohna a siam sak a. Heti hian kan danpui chuan a sawi – “No member of the Legislature of a State shall be liable to any proceedings in any court in respect of anything said...” Health Minister hian hna lak chungchanga SMS thawn hmanga dan bawhchhiaa puh a nih khan darkar engemawzat hnu a tukah SMS a thawnloh thu a sawi a. A puhtuin a puhna tihchianna a neih ta lo bawk nen, a phatu phatna chu mipui court ah chuan pawm angin a awm ta a. A “fifty-fifty” leh ta a ni.

Health Minister khan thudiklo lo sawi ta se, a thusawina hmun leh hun avang khan SMS a thawnloh thu a sawi hrim hrimah kha chuan court ah engtinmah a chungthu ngaihtuah theih a ni lo.

Kan thlantlin hruaitute hian thudiklo, thu belhchian dawllo leh dawt hlang an lo sawi thin avangin he SMS scandal ah pawh hian mipuiin thudik kan hre ta chuang lova, a puhtu puhna pawh hi a dik leh dikloh finfiahna mipuiin kan hmu ta chuang lo a ni.

Famkimlo mipuiten mihring famkim hruaitu atan thlan tur kan hmu dawn ngai lova, amaherawhchu heng kan politician ram hruaitute hian mipui thatna tura an thawh theih dawn loh chuan, ram ropui America dintute’n an chunga lal hrawt Kumpinu sorkar laka an inlakhranna thupuan – Declaration of Independence – a an ziahlan hi keini Zofate pawh hian kan dikna a ni tih kan pawm a tha hle ang.

“We hold these truths to be self-evident, that all men are created equal, that they are endowed by... their Creator with certain unalienable Rights, that among these are Life, Liberty and the pursuit of Happiness.--That to secure these rights, Governments are instituted among Men, deriving their just powers from the consent of the governed, --That whenever any Form of Government becomes destructive of these ends, it is the Right of the People to alter or to abolish it, and to institute new Government, laying its foundation on such principles and organizing its powers in such form, as to them shall seem most likely to effect their Safety and Happiness.”

Europe-a Lalte rorelna zalen lo tak leh mipui mimir tana dinchhuahna awm hleihtheihlohna tlansana ram thara bul thar zu tantu te leh a hnua zu zawmtu te khan mihring zawng zawng hi Siamtuin intluktlang vekin a siam a ni tih an pawm nghet bur a. Chu mai nilovin, Siamtu chuan pianpui dikna chanvo hrang hrang mipuite chu a pe tih an pawm bawk a. Chu’ng dikna chanvo zingah chuan nunna te, zalenna te, nun hlimna tura hmalakna te a ni. Chu dikna chanvo pathum pawimawh tak tak te chu thuneihna hrang hrang hmanga laksak theih a ni tih an hriatchian avangin sorkar chu chu’ng dikna chanvo vawnghim tura din a ni a, amaherawhchu a rorelsaka te hriatpuina tellovin sorkar chuan thuneihna a hmang thei lo tih an sawi chiang hle. Sorkar an din chu mipui dikna leh chanvo humhalh zawng nilo, a tichhe zawnga a kal chuan thlak danglam emaw tihtawp veka sorkar thar din leh chu mipui dikna a ni tih an sawi chiang hle bawk. Famkimlo hle mah se, chu sorkarna lungphum ril leh nghet tak avang chuan USA hi khawvela ram chak leh ropui berah a inhlangkai thei a ni.

Kan Chief Minister-in, “...tupawh hi kan accountable a ni tih hriat reng a ṭul a ni” tia a lo sawi kha kan thlantlin hruaitute hian an ngaihpawimawh a tul hle, an theihnghilh changin keini a thlangtlingtute hian kan hriatnawn tir thin tur a ni ang. An theihnghilh hmin der a nih phei chuan US Declaration of Independence -a kan mihringpuiten an lo tarlan ang hian sorkar hi kan thlak/titawp tur a ni a, a thutiama ding sorkar awmze neiin kan thlak thin tur a ni. An sawi thin politician te tum ber chu inthlanna tlin tih hi a dik a nih chuan kan thlantlin hruaitu te hian tlin zel an duh dawn a, buka teha a tlinglo chu kan lo hnawl thei a ni. Chutianga kan tih ngam chuan kan Zoram politics hi a felfai sawt anga, hruaitu tura kan thlantlin te pawhin mipui tan tak tak hna an thawk thei ang.

FIRST BLOOD

Rambo-a film First Blood kha in la hria em? Vietnam indonaa Special Force Unit sipai rothap John Rambo-a leh Hope khaw Sheriff thinram William Teasle-a te pahnih thu inhmulo atanga puakdarh a ni ber a. A changtute an thiam a, a story line a tha bawk a, han en leh pawh hian mit leh beng a la tlai hle. Tin, khatih hun laia US sipai indona atanga kir leh te rilru leh an dinhmun a phawk tha hle bawk awm e.

Vietnam indona a zova. Sipai te an haw a. Rambo-a chu sipai bang, civil mi a ni a. Indonaa a hmuh leh hriat zawng zawng te, ram leh hnam tana nun thapa amah leh a thiante inpekna hmusittute leh diriamtute tawngkam te chuan a rilru a tibuai hle a. Special Force Unit-a a thianpa Delmare Berry-a tlawh tumin an khuaah a va zin a. Hlim taka a thianpa hmuh beiseia an in a va thlen chuan a nuin indonaa chemical weapon Agent Orange vanga cancer-a a thih thu a lo hrilh a. A thiante an thih zawh tak vek avang chuan an Unit member awm chhun niin a rilru a hnual hle a. Tih tur ber pawh hre lova kawnga a kal mai mai lai chu Hope khaw Sheriff William Teasle-a'n a hmu fuh a. Rambo-a chu “ram hmangaih kawr” hain nelawm loh zet hmel a pu a. Sheriff nen an in bat fuh ta lova. Chuta tang chuan boruak a sosang ta a ni.

Sheriff William-a hi Hope khuaa dan leh thupek kengkawh tu ber a ni a. A khua a hre hneh hle. Mi thar, a bikin, kawhmawh bawl tum ni awm te phei chu a hre thei hle bawk a. Buaina chawh chhuak ching te vai a, lock up lama khung khawm tur zawng ang maiin Rambo-a chu hmusit angreng takin a kal tumna te a zawt a. Rambo-a chuan chutia Sheriff-in a han ti vel chu a ei lo nasa mai a. Bung takin a chhang a. Sheriff chuan a engamah hmain Rambo-a chu misual dan bawhchhia ang maiin a ngai a. Kawhmawh bawla khawi khawiah emaw a kal lohnan a kalna tur a tih lamah a motor chuan a va thlah a. Sherriff chuan Rambo-a hnenah Hope khua ralmuang taka vawng tura thuneihna a neih thu te inti lal angreng takin a sawi a. Rambo-a chuan engahmah a ngai lova. A ning deuh a ni ang, “Engah nge hetia min tih teh vak a, I pawi ka sawi em ni?” tiin a zawt a. Sheriff chu a thin a sa phat a. Rambo-a chuan Sheriff William-a inhrosa chu engahmah a ngai duh lova. Chutia zawhna pawh a chhang tha duh lo chu Sheriff a thinrim em em a, Pu F.Lalremsiama ang deuhvin a tek chhuai chhuai a ni ber. An inchhan dan chu hetiang hi a ni:

Rambo: Is there a law against me getting something to eat here?

Sheriff: Yeah! ME!

Rambo: Why are you pushing me?

Sheriff: What'd you say?                               

Rambo: I said why are you pushing me? I haven't done anything to you.

Sheriff: First of all, you don't ask the questions around here. I do. Understand! Second, we don't want guys like you in this town, drifters. Next thing we know, we got a whole bunch of guys like you in this town. THAT'S WHY! Besides, you wouldn't like it here anyway. It's just a quiet little town. In fact you might say it's BORING. But that's the way we like it. I get paid to keep it that way.

Inhnialin awmzia a neilo tih a hria a. Rambo-a chuan ngawih a chuh a. Sheriff-in a thlah theih thleng a thlah a. Hmusit takin inbual fai a mamawha a hriat thu te a hrilh a. Khaw lam panin a let leh a. A han hawi let chuan Rambo-a chu a kal tumna lam nia a sawi nilo zawngin a rawn kal chhak chhak mai a hmu a. A thin a rim ta em em a. Misual ang maiin manah a vau ta a. A pistol a lek a, misual dan bawhchhia angin hand cuff nen a man ta ngawt mai a.

Police station ah a hruai a. Misual angina a hming ziahluh tura tih a ni a, a fingerprint te lak an tum a. A rilruah iniamlohna a nei si lova, dan ang thlapa misual anga man a ni tur leh a ram tana nun thapa ral a lo beihna te, a lo tawrhna te chu mumang thalo ang maiin a ngaihtuahnaah a rawn lang uar uar a. Police hovin an han biak pawh chuan chhan chakna reng reng a nei lo. Chutia nawrluiha a awm chuan a ti kawlh tawlh tawlh a. Police ho lah an che na tulh tulh bawk nen. An inkar boruak a sosang sawt hle. Deputy Sheriff Art Galt-a phei chuan, “I am starting to dislike you… a lot!” tiin a khabea police tiang tin chungin a huat thu a hrilh a.

A tawi zawngin sawi ta ila, Rambo-a thinin a tuar ta lova. Police rawng lutuk leh kut thak tak mai inluling chu a beilet ve ta a. Police station atang chuan a tlanchhuak a. Police zawng zawng an buai ta luih luih a. Tlangah a bibo a. Helicopter in an zawng zel a. Deputy Sheriff Art Galt-a’n helicopter atang chuan a zu hmu fuh a, police protocol-a man tum lam pawh lang tawh lovin kah hlum a tum ta a. Rambo-a chuan self-defence in lung tumin helicopter chu a vawm a. Chutia lunga a han vawm takah chuan pilot-in helicopter a han ti che lawih a, Deputy Sheriff Galt-a silai load lai invuan nghet hman lo chu a tla palh ta a. A hnuaia lung khawkrawkah chuan insawhin, ka pawh chhawn lovin a thi ta der mai a. Chutia police officer thihna meuh a thlen takah chuan chanchinthar lamah te a darh zau zel a, Rambo-a chu misual tuatthat angin a thang ta huai huai a. Sheriff thinrim chuan search party a buatsaih a, Veerapan-a an zawng ang maiin sipai rual National Guard an thawkchhuak ta mup mup a.  Temporary command centre te an din a, umchhuak tura ruahhmanna an siam mek lai chuan Colonel Samuel Trautman-a  rawn lang ta a.

Col.Samuel-a hi Rambo-a commander thin a ni a. Rambo-a a hrechiang em em a. Police ten an chhaihkawlh avanga a hlauhawm zualzia a hriatchian avangin Sheriff William-a chu thurawn pe turin Army headquarter pakhat atangin a rawn kal vang vang a. Sheriff thinrim thurawn ngaithla duh tawh lo nen chuan heti hian an in chhang a:

Sheriff: Okay, Colonel. Now, you got us all scared to death. What do you and the Special Forces think I oughta do about your psycho out there?

Colonel: Let him go.

Sheriff: Do WHAT?

Colonel: For now. Diffuse the whole situation. Diffuse him. Provide a little gap and let him slip through it. Then put out a nationwide APB. In a couple of weeks, you’ll pick him up someplace, working in a car wash…Nobody else will get hurt

Sheriff: I do my own work. I don’t figure the best way to do that is to close my eyes and hope he gets picked up in Seattle.                      

Colonel:  If you send your people in there, they’ll get killed.                               

 

Hemi youtube link ah hian Sheriff William-a leh Colonel Samuel-a te in chhang vel a en theih. https://www.youtube.com/watch?v=5sW1U-Y0hLg

Sheriff tlawmngai tawh si, thinrim bawk si chuan misuala a ngaih Rambo-a chu man ngei a tum a. Colonel Samuel-a’n tharum hmanga beih chuan an hneh loh tur thu leh boruak tih daih dan tha ber chu chhuah tawp hrih a, police report All-Points Bulletin (APB) ram pum huap siam a, boruak a daih hnuah khawi lai motor silna velah emaw awlsam tea man theih a nih thu a hrilh a. Sheriff William-a tang laklawh chuan tlawmah lain rum taka beih chu a ti lui ta tlat a. Colonel Samuel-a, Rambo-a hrechiang em em tu leh hetiang boruak chinfel dan tha hrechiang tu thurawn chuan awmzia a nei lova. Saptawnga, “all hell broke loose” an tih ang maiin indo tenau a chhuak ber a. Buaina tur pawh nilo awlsam taka thil chinfel theih kha Sheriff William-a inlulinna leh a hote rawng lutuk vangin an buai phah ta hrep a. A lai laklawha Colonel Samuel-a’n thurawn fel tak a pek te kha pawm se chuan buaina lian tak Hope khua khan a pumpelh ngei ang.

Pu RK Lalhluna chuan, "[BCM] Pastor ten Assembly thu awiha an tih theih tawk chinah chuan lungawi tum tlang ila, an ti thei lo a nih pawhin i hrethiam hram hram ang u. An tih theih bak chu an ti thei ngang lo a ni mai. Assembly rorel hi tihhlawhtlin loh tamtak a awm. Persia Lal dan anga nghet a ni lem lo" tiin Mizoram Baptist Kohhrana harsatna lian tak chungchangah thurawn practical tak mai a ziak a. Kohhran Neitu pawhin he harsatnaah hian thurawn min rawn pe dawn se, hei bak hi min pek a rinawm hran loh.

Thinram Sheriff William Teasle-a leh a pawlten tharum hmanga dan lekkawh an tum khan chhiatna tam tak a thlen a, thinnel Colonel Samuel Trautman-a chuan awmze nei takin thil a thlir thung.

KOHHRAN RORELNA DIKLO, TIHDIK DAN LEH TIHDIK PAWIMAWHNA

July 27 khan Vanglaini chanchinbu ah Mizoram Baptist Kohhran General Secretary thuziak, pastor nupui hnathawh chungchanga Baptist kohhran mipui te hrilfiahna kaihtawi tarlan a ni a. Vanglainiin he thu a chhuah hma July 23 khan Mizoram Baptist Kohhran website www.mizobaptist.org ah General Secretary thuziak hi a kimin tarlan a ni tawh bawk a.

Kohhran pakhat thuhla sensitive tak Mizorama chanchinbu darhzau berin a rawn tarlan hi July thla tir lama Human Rights and Law Network hotunu Pi Vanramchhuangi’n Lunglei chanchinbu thenkhata hemi chungchang article a ziah atangin ngaihven a hlawh zual hle a. Social media lamah te phei chuan inhnialna a siam belh hnem hle. July thla tir lam bawk khan Lungleia chanchinbu thenkhatin hemi thuhla hi chanchintawi angin an chhuah a. Zoen chanchinbu chuan heti hian July 8 khan a tarlang - “Kum 2008-a BCM Assembly neihin a lo rel tawh angin, tunah hian Pastor nupui 17 te chuan an hna an chawlhsan tawh nia thudawn a ni. Kumin August thla thleng hian Pastor nupui hnathawh nei zawng zawngte chu an hna chawlhsan tura ngen an ni. Hemi hnu lamah chawlhsan lo an awm a nih chuan Pastoral Committee-in a ngaihtuah tha leh dawn nia hriat a ni...” Chanchinbu lama mipuiin an lo chhiar theih tura thudawnna hi Baptist kohhran office pui nia hriat a ni.

BCM Constitution leh document hrang hrang ka hmuh theih ang ang te bihin, kohhran puipate, kohhran upa te, kohhran-a thawk te, pastor thenkhat leh kohhran puipa lo ni tawh te atangin thu kal lam leh haw lam keipawhin ka hriat belh a. Kohhran danga an tih dan te pawh ka hriat belh bawk a. Hrilhfiahna mumal tak a awm loh avangin thil awmdan dik zawk hi kohhran mipuiin kan hriat a pawimawh hlein ka lo hria a. Mipui vangtlang hriat theih tura thu chhuah a nih takah chuan fim taka kan zavaia ngaihtuah ho law law hi a hrisel zawkin a lang.

Kohhranin ro a rel sual thei lo anga ngaihna leh kohhran leh hruaitute rorel chungchanga miin awmze neia thil an hmuhdan sawi thiang lova ngaihna hi kum za tam tak kaltaah khan Kristianna in bu a khuarna Europe khawmualpuiah a lian thin hle a. Mizo kohhran te hian chu ngaihdan diklo chu kan lo la tawm nasa hle tih he thupui kan sawihona atang hian a lang bawk awm e.

Kohhran hmangaihlo leh sawichhe duhten kohhran diklohna lai an hmuh fuh changa duh tawka kohhran an diriam hian kohhran mite chu kan rilru a lo na thin a. Amaherawhchu, kohhran hi mihring awmkhawmin kan siam a nih avangin vanah lo chuan a famkim ngai dawn lo tih kan hria. A chhungah Pathian Ram lo thleng tura kan duh chuan Pathian Ram ze pakhat - rorelna dik - hi kan dah pawimawh tur a ni ang.

Nov 28-29 2007 BCM inenkawlna hnuaia Pastoral Committee chuan pastor rawngbawlna tihchak zawk nan, "kum 2015 hnu lamah chuan Pastor/Minister nupuite chu Sorkar hna leh hnadang fulltime a thawh phal a ni lovang..." tiin resolution a siam a. BCM rorelna sang ber Assembly-a ngaihtuah turin a kum lehah agenda-a telh a ni a. 2008 Assembly chuan pawmin, Pastoral Committee in theih ang angin a bawhzui ta a.

A tawi zawngin sawi ta ila, pastor nupui hna thawhlai nei ten an hna an bansan loh emaw an pasal ten an bantir loh chuan pastor zawk chu bang turin Nov 2014 khan rel a ni a. August 31 thleng inngaihtuahna hun pek an nih avangin he ultimatum leh deadline hian Baptist kohhran inrelbawlna a chawk buai ta vek a ni ber mai. Pastor te demna leh a chhe thei ang bera sawina tawngkam, a lehlam lehlam atangin, a chhuak nasa hle a. A then chu sawichhawn tlak loh khawpa mawilo te a ni hlawm.

BCM hotute tana lawmawmloh angreng deuh chu Pi Vanramchhuangi’n human rights issue a rawn sawi kha a ni a. Tin, kohhran puipate nena inkawmna awm lova article dengkhawng tak a ziak kha a thu lak dan a khingbai hlea hriatna lian tak a awm bawk a. Kohhran leh Pathian rawngbawlna huangchhungah hian human rights issue hi a diklo zawnga lak chuan a huatthlalaawm bawk a, Baptist kohhran mi leh sa tam tak ngaihdan a ni lo hle.

Amaherawhchu, Pi Vanramchhuangi’n human rights chungchang a rawn sawi hma daih hian BCM Danpui (constitution) ah mihring dikna hi humhalh ngai a nih thin avanga humhalh tura ziak meuhva dah a lo ni tawh zawk a. BCM thiltum te zinga chuang a ni nghe nghe. Mihring dikna chu kohhran mai pawh nilo sorkar meuhvin humhalh tula a hriat, ram Danpuia ziaka a lo dah a ni a. Chu’ng mihring dikna te zingah chuan khua leh tui mi tupawhin a hna thawh duh zawng a thawh theihna tur a tel a ni. Pastorte leh an nupuiten an thawh awm tak thawk tura rilru an siam hian lo khap a theihloh a nih ber chu. Phaia kan Mizo chhungkaw awm thenkhat zingah hian an fate thenkhatin pastor nih duhin inbuatsaih ta se, RSS emaw VHP emaw Bajrang Dal emawin, “Hindu ramah I awm a, pastor hna thawh kan remti lo” ti ta se human rights bawhchhiatna lian tak a ni ang. Khap niin lungawilovin tu emaw court ah kal se, a lo khapsaktu tan thiamchanna tur a awm lo. Court thubuai hlauh vang nilovin, Mizoram kohhran te hian hetiang hian ro an rel ngai hriat a la ni lo. Mizoram Presbyterian kohhran chuan a remchang dawn lova an hriat avangin hetiang lo deuh hian a rel a. Harsatna lian tak Baptist kohhranin a tawh ang hi a pumpelh niin a lang.

BCM hotute hian pastorte rawngbawlna tihchak a tulzia hi kohhran dang hotute ang bawkin an hria a. Kawng hrang hrangin ruahmanna an nei thin a. Assembly in thu a tihtluk tak pawh hi pastor rual enkawltu committee thuchhuak a ni nghe nghe. Harsatna awm ta erawh chu Assembly in Danpui kalhin ro a lo rel palh hi a ni. Dan kalha rorel hi sorkar rorelnaah chuan court lamin a hrilhfiahin a titawp (invalidate) thin a. Kohhranah erawh hi chuan chutianga rorelna han khak thla zawngin tih a ni ngai lem lo. Rorelna bawkin a thlak emaw a titawp emaw a siam danglam thin a. Zuzi-a kal tir te pawh a awm bawk. Tuna mi erawh hi chu a nghawng a thatloh em avangin BCM Danpuiin Danpui hrilhfiah tura thuneihna a pek Assembly Executive Committee inrawlhna tur ni te paw'n a lang.

“Kum 2015 hnu lamah chuan Pastor/Minister nupuite chu Sorkar hna leh hnadang fulltime a thawh phal a ni lovang” tia Mizoram Baptist Kohhranin pastor rawngbawlna tihchak zawkna tura ruahmanna a lo siam hi thahnemngaihna a nih rualin, BCM Danpui leh India ram Constitution kalh a nih avangin, rorelna tihhlawhtlin theih a ni lova. Rinna lam thu ni lo, inpekna lam thil nilo, inrelbawlna lam fel tawklova ngaihtuah liau liauah Mizoram Baptist Kohhran chuan tunah hian harsatna lian tak mai a tawk ta a. Social activist lam te pawhin an rawn ngaihven phah ta hial a ni.

Rorelna diklo vangin a hnua bawhzuina rorel te pawh a dik ta lo zela. Rorelna fello leh diklo hi tihdik dan kawng hrang hrang a awm thei. Kan lo ti diklo a ni tih kan pawm rual rualin a tihdikna lam chu Pathianin a kohhrante hi a kawhhmuh ngei ang. Thupha chawina tur a awm a nih paw’n thupha chawi hi chaklohna lantirna a nih loh avang leh chakna lantirna zawk a nih avangin hreh lo ila. Baptist kohhran hi rorelna lamah kohhran dang te thil tha lama kawhhmuhtu ah a tang thei zawk a ni.

Rorelna dik chu luipui angin luang sela, rorelna fello in Pathian kohhran chhungah hmun chang suh se!