CHIEF MINISTER HI A TAN LEH ZORAM TAN BANG RAWH SE

FIR register tura order pek tir tura Magistrate hnena kal kan tum lai takin Justice for Mizoram hovin min rawn be pawp a, he thil hi an ngaihpawimawh thu leh hmalakzui tlaka an ngaih avanga lo buaipui zui an duh thu min hrilh a. Aizawla awm an nih vang leh dikna duh vanga bawhzui an inhuam avangin lawm takin an kutah he thil hi ka hlan chu a ni ta rih ber mai.

Kha thlalak chungchanga accountability awm se tia thil ka lo tih ve vanga police hnena lehkha ka theh luh chungchanga hriatthiamloh awm te sawifiah lawk ila. Mizoram hi hmangaihtu tam takte ang bawkin ka hmangaih ve a. A tlukchhiat phallo leh a tlukchhiat dawn ai chuan lo ding ngam turah ka indah ve a. Kha thlalak ka han hmuh khan, emergency warning light a eng ang hian min lo barakhaih hle a ni. 

Kha thlalak kha police te hian an sawi duh lo a ni mai thei a, Aizawl khaw chhung ngei a lak a ni a. April 21 zana lak a ni tih April 22-a “…nizan thil thleng…” tia sawitu atangin a hriat theih. Thlalak siamchawp, beer can dah chawp anga sawi hi a dikloh a rinawm bawk. A chhan chu thlalak delete tura ngen te khan beer in an sawi lang tlat a. Delete tura an ngenna chhan pawh niin a lang. Khami hmun pawh kha police te hian an hre vek tawh a ni.

Chutiang khawpa chiang ni bawk si leh kan zu khap burna dan awmze nei lovin a lo khap thil a nih bawk si chuan vengmawng tlangval a ni emaw sorkar hotu lu ber pawh nise, permit an nei te a nih ngawt loh chuan dan anga man nghal tur a ni tlat a ni. Dan bawhchhiatna ni ngeia lang hi ka lo hmu si a, ka ngawihpui ngawt thei lo a ni.

Pu Hawla bei thin eptu party lam ten beihnan an hman ngei ka lo ring a. An inbei nasa thin bawk a. CM in hemi chungchangah awmze nei taka chhanna a neih a pawimawha ka hriat avangin Congress party hruaitu Pu David M.Thangliana pawh April 23 khan he thlalak chungchangah hian miin an beiha chhanlet dan tur sawipui a thaa ka hriat thu ka hrilh a. An buaipui zui thu min hrilh nghe nghe.

Thil serious tak a nih hi an hriatchian loh ka hlauh avangin Minister zinga facebook hmang thin Pu Zodintluanga pawh, “Mizoram chhung a nih a, an in hi alcohol content nei a nih a, doctor prescription an neih loh bawk chuan MLTP Act bawhchhia an ni ang. Ho viau angin lang mah se, jail tan theihna a ni reng mai. Public domain ah kha thlalak kha a awm tawh lehnghal a, beer can vanga court in Chief Minister hi thiamloh a chantir chuan a zialo duh khawp ang. Hmanniah New South Wales Premier (an Chief Minister) chu a zu bottle dawn chungchanga thudiklo a sawi vang ringawtin a bang tawp” tih thu ka hrilh nghe nghe a. Mi chhang zui lo. In chhungkhat leh thawkho an ni bawk a, he thu hi a lo sawizui pui ngei ka beisei.

Tin, Chief Minister fanu Lucy Sailo hi June 6 khan a pa hnena a lo sawi ngei atan (a duh chuan) he thlalak chungchanga Chief Minister-in chhanna dik leh awm (appropriate response) a neih a pawimawh thu ka hrilh a. Mahse vawinni thlengin Chief Minister emaw a nupui hian hemi chungchang hi vantlang hriatah an la sawi zui lo. Journalist te pawhin an zawhfiah hriat a ni lo. 

SP Pu Dinga hian June 4-a Aizawl police station-a lehkha ka thehluh kha June 27 khan CrPC Sec 154 “ang thlap” a nih loh vang tiin case a register loh chhan a sawi bawk a. June 9 ah chuan thlalak computer hmanga siamchawp a nih theih thu leh finfiah a theih loh vang tiin a sawi thung. 

Heng Pu Hawla chhanna (engmah sawi loh) leh Pu Dinga dan zawmlohna (Sec 154 hian chiang takin FIR register tur a nih thu a sawi a, Supreme Court pawhin ruling engemaw zat an lo nei tawh a ni) te hi dan bawhchhiatna nia lang chungchang ngaihtuahnaa chhanna (respond) Mizo mipuite min pek a nih chuan kan CM leh SP te hian an mawhphurhna an kengkawh zo lo tihna a ni. Politician tan chuan accountability laka inthiarfihlim hi a finthlak ber a. Police officer tan chuan departmental action a hlauhawmin ka hria. 

Bible chuan sum tam tak aia hmingthat a thlanawm zawk thu a sawi a. Australian ho pawhin an in that duh tawh loh Foster’s beer vanga hmingchhiat ai chuan Mizoram history-a chuang reng turin accountability la ngama Chief Minister nihna atanga bang ngam hruaitu nih hi a thlanawm zawk hle ang. Pu Hawla hi mi puitling a nih chuan a bang ngam tur a ni. A ban ngam chuan a zahawm ka ti hle zawk ang.

CM BEER SCANDAL CHUNGCHANGA AIZAWL S.P. HMALAKNA

Chief Minister te nupa beer inlai nia lang thlalak chhuichiana dan anga rorel a nih theihnan June 4 khan Aizawl Police Station ah lehkha thehluh a ni a. June 9 khan Press Trust of India thuthar lakhawmtu hnena Pu L.R.Dingliana Sailo, Aizawl Superintendent of Police in, police ten preliminary inquiry an nei an tih hnua, a sawi dan chuan kha thlalak atang ringawt khan Chief Minister te nupaiin dan bawhchhiain beer an in ngei a ni tih a finfiah theih loh tih a ni a. Chu baka a sawi chu kha thlalak ang chi kha computer hmanga siamchawp pawh a ni thei tih a ni. http://bit.ly/1lEGdBz

Hemi chungchangah hian Chief Minister te nupa hian vantlang hriatah engmah an sawizui hriat a ni lova. Mi thenkhat erawh chuan Chief Minister nupui hi zu in ngai lo a nih thu an sawi.

A nihna takah chuan kha thlalak khan engmah a tichiang chuang lova. SP sawi ang hian tunlai khawvelah computer hmangin a thiam chuan CM telna ni miah lovah pawh tel ang chiahin an lantir thei a. Foster’s beer pawh kha an duh chuan thiam takin an dah chawp thei a ni. French President hlui Nicolas Sarkozy a holiday thlalak pakhatah pawh a kawng bawr lo pawng deuh an nawhreh daih kha.

June 9-a SP thusawi kan lo chhiarah khan thlalak siamchawp a nih leh nih loh finfiahna a lang lova. Finfiahna hrim hrim hi thil har lo tak niin a lang. Finfiah dan awm thei chu –

1) Forensic exam: India rama IT company lian pakhat HCL a thawk Mizo pain min hrilh dan chuan thlalak hi computer hmanga tih danglam a nih chuan a endikna khawl hmangin a chhunhan (pixel) khat pawh tihdanglam a nih leh nih loh a hriat theih vek a ti a. Chutiang khawpa thiamna a lo san tawh phei chuan Mizoram police te hian kan Chief Minister te nupa mualpho taka an lanna thlalak hi a siamchawp a nih leh nih loh an finfiah a pawimawh hle. Chutiang ti thei te zinga mi pakhat chuwww.forensic.co.in hi a ni ang. A thiamna hman thin tute pawh an theuneu lo hlawm khawp - Dubai Police, F.B.I., Govt of India, Maharashtra Govt, Australian Federal Police te an ni nawk mai.

2) Thuhretu: A finfiah theihna hmasa zawk hi Mizoramah kan thiamna leh kan khawl neih ten a la pha lo emaw phaia zu thawn buai harsa kan ti a nih pawhin awlsam tea finfiah dan a awm a. Chu chu ‘witness’ te zawh mai kha a ni. Pakhatnaah chuan kha thlalaka lang ngei te kha zawt ta se, police hian thudik an hre thei nghal ang. Chief Minister an zawt ngam ngang lo a nih pawhin a thla latu ngei an finfiah tawh kha zawt ta se, chiang takin a lo hrilh thei ang. Mawl taka lo chhut pawhin thudik hriat theihna awlsam tak a nih hmel.

SP in a sawilan - thlalak authenticity - an tih mai, thlalak siamchawp nih leh nih loh hi hriat chinah vawiin thlengin forensic exam hmang emaw thuhretu te tawngka atanga police ten an finfiah thu mipuiin kan la hre lova. Police hnena kha thlalak chhui chiang tura ngenna lehkha thehluh a nih atanga kar hnihnaah thil mak deuh hriat a ni thung. June 18 khan kha thlalaka inhnamhnawih pakhat chuan khami zan khan zu nilovin theitui chiah an in/sem thu leh kha thlalak kha tu emawin a lo siamchawp a nih thu a sawi a. Thlalak original ah phei chuan Foster’s beer kha a awm lo hrim hrim tiin a sawi bawk a ni. Hei hi finfiah theih a nih chuan kan Chief Minister te nupa tihmualpho tumtu an awm tihna a ni anga, chu mite chu police ten a rang thei ang berin an zawn a pawimawh khawp ang.

Mipuiin kan hriat dan ang lo taka thil awmdan zawk nia sawi tak hi police te hian an hre tawh ngei tura ngaih a ni a. A chhan pawh a sawitu ngei hi police ten an biak pawh tawh vang a ni. Kha thla lakna hmun pawh police ten an finfiah tawh a, Aizawl khawpui chhunga mi ngei a ni. MLTP Act in a huam chin a nih chu.

Thlalak siamchawp tia sawi (claim) hi finfiah ngei a pawimawh hle. Awlsam tea finfiah theih a ni nghe nghe. Kan Chief Minister te nupa hian an hriatchian dawn avangin police te hian mipui hnena thudik hrilh tur hi tlang takin zawt mai ta se, hetia thudik hriat hleih theih loh hi kan chingfel vat thei ang a, thupui pawimawh dangah kan kai thei ang. A nih loh pawhin kha thla lakna phone ah khan a original thlalak chu a awm ngei ang.

June 9-a SP in FIR register a nih dawn loh thu a sawi saptawng chanchinbu atanga kan lo chhiar khan thubuai ziahluh awm ta lo chu engmah tihzui loh in a tawp anga ngaih a ni a. Amaherawhchu, June 18 thleng pawh khan police te hian ‘investigation’ an la nei bawk si a. Thubuai ziahluh a nih loh leh zialfel mai a nih tawh chuan eng ber nge an la chhui kha hriat a har ta hle.

He thu kal velah hian police lam hian an hmalaknate mipui lam min hrilhhriat lem loh avang leh dan anga kalpui nilova a lan avangin June 27 khan Aizawl SP hnenah lehkha (email) thawn a ni a. June 4 atanga chhiarin, a ni 24-naah, June 27-a email thawn atanga darkar 5 leh minute 45-ah SP chuan heti hian FIR thehluttu a rawn hriattir a ni:

SP(A) Letter No. CB/Misc/2014/510 Dated Aizawl, the 27th June, 2014

To,

Laltanpuia Pachuau

Subject : Email hmanga complaint thehluh chungchang

Ka Pu,

I email dated 28.5.2014 a Mizoram Chief Minister Pu Lal Thanhawla'n MLTP Act bawhchhia ni a i puh chungchanga complaint i rawh thehluh kha ngun leh uluk taka chhui zui a ni a. A hnuaia tarlan ang hi thil awmdan a ni e.

1. Mizoram Police Manual 2005 Rule 494(6) a tarlan danin, telephone leh telegram message a complain / FIR thehluh hi a dawngtu O/C chuan GD entry a siam ang a, a verify ang tih a ni a. Tunah hian CrPC Section 154 hi tunlai thiamna ICT mil a amendment siam a la ni lova, chuvangin e-mail hmanga i complain rawn thehluh hi Mizoram Police Manual Rule 494(6) a a tarlan telegram leh telephone (e.mail) hmanga complain thehluh anga ngaih a ni. Chuvangin Police Station ah general Diary a ziak lutin verify/enquiry tih mek a ni.

2. E.mail hmanga complaint thehluh hi tun dinhmunah chuan FIR anga register mai theih a ni lova, CrPC section 154 ang thlap a FIR thehluh a nih loh avangin register theih a ni lo.

I Rintlak,

sd/-
Superintendant of Plice
Aizawl District, Aizawl.

Mizoram police te hi kan chhuang thin viau a. Amaherawhchu an kuta awm thil thenkhat mipui rilru hmin lo deuhva chhuak a lo awm tawh thin avangin hetianga police lamin thu an kaltir thin dawn a nih chuan 22 Sept 2006-a Supreme Court of India in police reform chungchanga judgment a lo siam Central, State leh UT sorkar te zawm tura a lo tih hi kan ramah pawh hian bawhzui vat a tul dawnin a lang. Supreme Court thuchhuak dik taka kan bawhzui chuan kan tangkaipui ber turte zinga mi nia lang chu Police Complaints Authority din hi a nih hmel.

Kan DGP thin Pu Lalrokhuma Pachuau hnathawhna Karnataka ah chuan 23 Sept 2013 khan Karnataka Police (Amendment) Act 2012, bawhzuiin State Police Complaints Authority (SPCA) member tur pahnih an ruat phawt a. An bawhzui zel dan chu Pu Rotea emaw Dr.H.T.Sangliana zu zawt ila, min lo hrilh thei ngei ang.