KOHHRAN MITE TIH ATANA THIL BAWLHHLAWH

“BCM Pastor nupui sorkar hnathawk ban leh ban loh chungchangah Assembly 2016 Hnahthiala neih zawh takah chuan Pastor nupui 45 zingah 36 an inching fel tawh a, 9 an inching fel mek a, 4 an la inching fel thei rih lo a; inchin fel nan hian April ni 30 2016 thleng pawhsei leh a ni e” tiin Baptist kohhran upa Prof H Lalramnghinglova’n March 5 khan facebook ah a tarlang a. Assembly rorel palai 910 ten “(2008 leh 2015) Assembly rorel ang zela kalin bawhzui zel a ni” tiin a sawi bawk a.

He BCM 2008 Assembly Thurel 1.21 kalzel hi chanchinbu lamah pawh tarlan niin pastor nupui full time-a hnathawh phalloh chungchang hi “relfel duak” tawh angin Baptist kohhran headquarter-a thawktu pakhat chuan a sawi nghe nghe a ni.

Baptist kohhran hruaitute hian BCM chhungkuaa harsatna lian tak siamtu “Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal a ni lo ang” tia 2008 Assembly-a an rel hi UPC NEI, North Mizoram District Conference-in “Tun atang chuan pastor lak thar tur reng reng an nupuite'n hna nghet an nei tur a ni lo” tia March 3-a a rel ang khan thlak se chawplehchilhin a buai zel tur a tawp nghal thei a. A lo kalsual tawh pawh tihdik dan kawng a zawn theih a ni. Presbyterian kohhran pawhin hetiang deuh tho hian hman kumah an lo rel tawh a, UPC NEI te ang bawkin harsatna awm thei an sukiang a ni.

Kohhran dang tih dan entawn nih an duh loh pawhin Mission Vengthlang Baptist kohhran lamin Assembly-a siamthat a nih theihnana Assembly Executive Committee-a an thlen kha committee kaihruaitute khan agenda dang ang bawkin Assembly ah pu lutin sawihona hawng se 2015 Assembly ah khan rel fel a ni daih tawh bawk ang.

“Kum 2015 1st April atang chuan sawrkar hna leh hnadang full time a thawk nupuia nei te chu Pastor hna atan lak theih a ni lovang” tiin Mission vengthlanga Baptist kohhran lamin rawtna an siam a. Mahse, BCM President kalchhuak ta Rev C Ngurhnema leh General Secretary kalchhuak ta Rev H Lianngaia ten hnawl tha an tih zawk avangin Assembly ah ngaihtuah a ni ta lo a ni.

Hnahthiala Baptist kohhran rorelna sang bera palai 910 ten Mizoram Baptist Kohhran rawngbawlna leh inrelbawlna chungchang hrang hrang an ngaihtuah zingah pastor nupui chungchang hi ngaihtuah tel a ni a. Kohhran thuchhuakin a tarlan dan chuan “Pastor/Minister nupui full time-a hnathawk neite chungchang a Assembly 2008 thu bawhzuina thu kal zel report leh hmalak mek dan – April 2016 chhunga inchingfel tura tih chu pawm a ni” tih a ni.

2008 Assembly thurel, 2015 Assembly-a nemngheh thurel chungchangah hian a bawhzui dan chhiar theiha awm chin chauh en pawhin Mizoram Baptist Kohhran puipate pahnih chhuak ta te hian tihdanglam emaw tih tawp tumna awm ang ang te hi an tuipui lo tih chiang takin a lang a. Kohhran hi mi pahnih khat duhdana kal a ni lo tih hi hemi bikah chuan a dik a tih theihlohna turin document pawh engemawzat en theihin a awm a ni.

Rorelna kalsual tih hi hruaitute leh kohhran mi thahnemngai tak tak te’n an duh lo hle a. Mahse, Rev C Ngurhnema leh Rev H Lianngaia te kaihhruaina hnuaia BCM rorelna en chuan a kalsual nasa hle tih hi hai rual a ni lo thung.

Pastor nupui hnathawh phalloh tih hi a chhan ber nia kohhran hruaituten an sawi leh Rev C Ngurhnema’n 2007-a he agenda a pawmpui leh putluh ang chuan “Sawt zawk leh tangkai zawka rawng kan bawl theih nan, Bialtu Pastor chuan a thawhna hmunah a nupui a hruai ngei tur a ni” tih a ni a. Rev LB Khawpuimawia hi Rahsiveng bialtu pastor a nih chhung zawng khan a nupui, sawrkar hna full time-a thawk chu a bial enkawlnaah a hruai a. Assembly thurelin a tum ber hi a nupuiin sawrkar hna a thawh lai zawng pawhin a hlenchhuak a ni. Mahse, chutichung chuan a nupui hnathawk lai chu bantir turin tihluih a ni ta tho va. Nawrna nasa tak hnuaia an awm avangin bang turin thutlukna an siam ta a. Tichuan, BCM hotuten Serkawnah BCM Communications Director turin an ruat a ni. A nupui hian a hnathawh bang miah lo pawh ni se, a pasal hnathawhnaah awm chhunzawmin a pasal chu a rawngbawlnaah a zui zel dawn tihna a ni.

Tin, “Bialtu Pastor ten an thawhna hmunah an nupuite an hruailoh avangin rawngbawlna kawngah harsatna leh fel lohna tam tak a awm thin a. Hetiang harsatna sut kian nan hian Pastoral Committee chuan a hnuaia mi ang hian inkaihhruaina a siam a ni” tia Rev C Ngurhnema’n 2007-a Pastoral Coordinator a nih laia agenda duan a pawmpui khan Assembly-a put luh tura duan a ni a. Put luh a ni a, pawm pawh a ni ta bawk a. Mahse, data rintlak tlawhchhana sawiho a ni lo.

“Biala nupui hruai loh” tih hi a chhan bul ber niin Rev H Lianngaia’n a hranpain a sawi bawk a. Chumi ruala chuan “pastor quarterly report form kum 2012-2013 atanga a lan dan chuan kum 1 chhunga Biala ni 300 awm tling lo te hi Sorkar hna/hna dang full time-a thawktute ni loin mi dang 2 an ni, a dang zawng chu reasonable cause neite an ni” tiin a sawi tel bawk a ni.

General Secretary kal chuak ta chhinchhiah dan chuan 2012 leh 2013 chhung khan sawrkar hnathawk nupui nei pastor te hi biala nupui hruai theilo an awm lova. “Phalna neia Biala Nupui hruai lo hi kan awm meuh lo, mahse hruai lo chu kan awm; (hna hran nei emaw nei lo emaw)” tiin pastor rual zingah a tarlang bawk a ni.

Chuti a nih si chuan 2008 Assembly thurel-in a sawi “harsatna leh fel lohna tam tak a awm thin” tih hi rel a nih atanga kum 5 hnuah ziak meuhva BCM General Secretary kalchhuak ta-in a tarlan dan chuan sawrkar hnathawk te atanga harsatna awm a ni lo tihna a ni a. “Sorkar hna/Hna dang full time-a thawk nupui nei thenkhat hi chu transfer leh Biala hruai loh case-ah chuan harsatna sawi lo, Committee rel anga kal mai in awm tih hi kan inhriatpui” a ti hial zawk a ni.

Sawi ang khan Rev LB Khawpuimawia te leh pastor dang te chu Assembly in a rel chhan ber an nupui te bial an enkawlnaah an hruai reng chung pawhin an nupuite hnathawh phal a ni ta chuang lova, anmahni pastor te chu ban ni hial zawk tura ultimatum nen kohhran hruaituten an nawr tlut tlut ta zawk a ni.

Tunah hian BCM-a thawk pastor pali chu he Assembly thurel anga an nupuiten an hnathawh an bansan tur thu kohhran hruaitute an hrilh theih loh avangin pastor hna thawk lo turin an chungthu rel a ni a. BCM website-in a tarlan dan chuan “hetiang hian an posting siam fel a ni ta a, April 2016 chhungin an post an zawm ang” tih a ni:

1. Rev Samuel Lalremsanga – Evan.Teacher, Baptist Mission School, Tuichawng.
2. Rev PC Vanlalmuana – Evan.Teacher, Baptist Mission School, Marpara
3. Rev. Lalremsiama Fanai – Evan.Teacher, Hermon Comp.H/S-Nghalimlui
4. Rev. John Lalrinawma – Evan.Teacher, Baptist High School, Putlungasih

Pastor te hi missionary hna thawk tura “post” an ni thin a. Mahse, tuna he’ng pastor pali te hi an pastor nihna anga mission field-a thawk lo turin kohhran hruaituten an rel a, hetianga rel hi Mizoram kohhran history-a thil thleng hmasa ber a ni awm e. (Pastor an nih tawh si loh chuan pastor hlawh la lovin ordained minister ni chungin Evan.Teacher hlawh an la tawh dawn ni awm tak a ni)

Prof H Lalramnghinglova’n he harsatna chinfel mek anga a sawi leh “rel fel duak” tawh anga midangin an sawi hi a la fel lo nasa hle zawk a ni.

BCM General Secretary kalchhuak ta Rev H Lianngaia’n May 30, 2013 khan corruption chungchanga kohhran aiawha thuchhuah a siamah heti hian a ziak a: “Thuneituten anmahni duhzawng leh hlawkna tura an thuneihna dik lo taka an hmang hi corruption a ni bawk. Heng thil te hi Mizoram Baptist Kohhran chuan tha a ti lova; Kohhran mite tih atan thil bawlhhlawh a ni.”

Kohhran mite tih atana thil bawlhhlawh hi kohhrana thuneitute hian an ti ni berin a lang.

CHURCH VS CONSTITUTION: WHOSE WILL SHOULD PREVAIL?

The Baptist Church of Mizoram is currently under consideration of the Mizoram State Women's Commission for the alleged violation of the Indian Constitution when it voted to prohibit all pastors' wives' to work full time back in 2008 and reaffirmed in 2015 at the church Assembly.

There has been numerous debates and discussions surrounding the issue with no apparent resolution. One of the arguments for the decision of the church is Article 26 (b) of the Indian constitution that says "every religious denomination or any section thereof shall have the right...to manage its own affairs in matters of religion." This right enshrined in the highest law of the land not only shields churches, mosques and temples from interference from the government or other entities hostile to them but also guarantees their freedom to do what they believe is according to their faith. Every person of faith should be thankful this is not North Korea!

The other argument is that pastors' wives have the right under Article 19 (1) (g) to "to practise any profession, or to carry on any occupation, trade or business" and that the church cannot violate the fundamental right of these women which is also enshrined in the same constitution save for their consent. The church can and may try to convince them to quit their jobs if it truly believes their employment in the government is causing their husbands (pastors) to hinder the ministry of the church. That would fall well under what is normal management of church affairs and it would also be constitutional. But the fact that the church resolution explicitly prohibited these women to work has become a legal and even constitutional issue, something the church never expected.

Last year, Human Rights and Law Network supremo Vanramchhuangi wrote an article suggesting the violation of human rights for the first time. Guess what the reaction was!

Can the church or for that matter any religion use the guise of religious practice and Article 26(b) to make any rule even if it clashes with the provisions of the constitution? According to the Supreme Court bench headed by Justice Dipak Misra, religious denominations have to have constitutional rights to do so. If and when religious rules clash with constitutional rights, the consent of the subject may save those rules from being dismissed. In other words, if people choose to conform to religious rules it is their freedom to surrender their constitutional rights. If these pastors' wives choose to stop working full-time, it is upto them. But if they prefer to keep their jobs and serve the church through their chosen profession, the church needs to find a constitutional ground or religious doctrine to back up its prohibition.

So far, there has been none.

USA ILLEGAL IMMIGRATION LEH MIZORAM FOREIGNER INFILTRATION

US Immigration and Nationality Act chuan US-a dan lova awm "illegal immigrants" maktaduai 11 bawr vel te chu dan bawhchhia an nih angin hrem theih a ti a. An lo awm rei tawh avanga an dan bawhchhiatna enliam theih a nilo ti pawl leh an lo awm rei tawh em a, fate pawh an nei diah duah tawha, mihring ve tho an ni a, chuvang chuan inthawn haw teh tawp loh dan emaw USA khua leh tui an nih theih ve mai dan ngaihtuah hi a ngilneihthlak tih changchawia sawrkar policy tih danglam duh pawl an awm a. Chu'ng zingah chuan President Obama pawh a tel a ni.

A duh pawla tel mai nilovin President Obama hian dan dinglai pehhelin he'ng dan lova USA a chambang leh lut ru te hi thawn haw loh an nihna turin "criteria" a siam a, President thuneihna an tih "Executive Action" hmangin chu a "criteria" hlenchhuak te chu ngaihdam leh USA khua leh tui tha tak an nih chhoh theihna tura rahbi siamsak a tum a. Amaherawhchu, foreigner dan lova USA-a lut te han ngaihdam tawp leh cham hlen tir mai dik lova hria State sorkar 26-in Supreme Court ah President thil tih chu "illegal a ni" tiin an khing a.

President thupek danah chuan illegal immigrant maktaduai 4 vel thawn haw lohna te a tel a. Chu'ng ho chu an fate USA a piang tawh nu leh pate an ni hlawm. (USA a mi a pian hian dan lova lut pawh ni se USA khua leh tui an ni nghal a ni)

Nimin khan US Supreme Court in President Obama thupek an khinna chu a ngaihtuah a. US Justice ho pawh an ngaihdan a inanglo hlawm hle. June thla tawp hian thutlukna siam tura beisei a ni.
Conservative lam awn party te chuan he'ng dan lova USA-a awm te hi dan an bawhchhiat avangin pawngpaw inngaihdam huk, amnesty an tih ang chi ngawt chu tha an ti lo va, a then phei chuan thawn haw vek an duh thu an sawi hial a ni. A liberal lam awn party leh politician te erawh chuan "Lal Isua pawhin mi chanhai te a lawm, he'ng kan mihringpui te hi kan kuangkuah tur a ni" tih thupuia hmangin nghet taka din lam an sawi ngai lova. Conservative lamin liberal lam chu vote zawngah an puh a, liberal lamin conservative lam chu ngilneihna leh khawngaihna neilo ah an puh ve thung a. An inhnial luih luih reng a ni ber mai. A tlangpuiin Republican party hian dan khawng taka kenkawh an duh a, Democrat lamin amnesty an uar.

Pachhunga University College Asst Professor Lalthlamuana Ralte thuziak “Mizoram Chakmate leh zirlai pawl hmalakna” ah khan heti hian Chakma history a lang a:

"1872 - Mizoram an rawn luh chhinchhiah hmasak ber. British sipai puakphur 500 an ni a. An zavaiin an haw leh vek. Mizorama mihring awmzat chhinchhiahnaa an lan hmasak ber 1901-ah an zavaiin 198 an ni.1931 ah 836. 1941 ah 5088 (a hma aia punna 508.6%). 1961 ah 19377.1971 ah 23236. 1981 ah 39638. 1990 bawr vel phei kha chuan 80000-100000 an ni awm e."

Mizoramah hian Pu Muantea sawidan ang leh MZP leh YMA ten an chhinchhiah dan atang chuan dan lova rawn lut Chakma tam tham tak an awm niin a lang a. He'ng Chakma, Mizorama cheng te hi ram dan bawhchhiaa Mizorama an awm a nih chuan "illegal immigrants" an ni. Electoral roll-a chuang theilo tur an awm tihna a nih chu.

Chakma voter tamna bial Thorang bial hi han en lawk ila. Inthlan hnuhnung ber khan bialtu MLA Pu Zodintluanga hi Thorang bial chhung mipui vote 5113 a hmu a. Amah dawttu Pu Joseph Lalzawmliana vote 3255 a hmu a, a pathumna Pu Ellis Lungtiawia'n vote 281. NOTA vote 169 a ni.
Thorang bialah hian voter zat 12349 an awm a. Mizoram Assembly biala vote neih tlemna ber a ni. 2013 inthlana vote tla zawng zawng kha 8818 a ni a. A percentage chuan 71.40% a ni. Mipui vote thlak thei 3531 zetin vote an thlak lova. Chu chu a percentage chuan 28.6% a ni.

Pu Mama hi a bial mipui vote thlak zaa 57.98 in an bialtu MLA atan an thlang a. A dang zawng zaa 42.02 in an duh lo. A pumpuia en chuan 57.98% nilovin 41.40% voter chauhvin Pu Mama hi an vote a ni. Amah vote lo tute hi a tam zawk an ni tihna a nih chu.

Thorang bialah hian Mizo nilo an awm nual a. A bikin Chakma te hi 15-20% bawr vela ngaih an ni. A tlangpuiin Congress party an vote thina ngaih a ni. Chakmate hian MNF emaw Congress party nilo party dang vote chu 5% vel chauh an nia rin a ni bawk.

Illegal immigration lam chu han sawi leh ta ila, USA-a a maktaduai tel teh meuh "ngaihdam" duhtu pawl khuan an hmuh lawk chu voter an ni dawn tih a ni a. Chuvang chuan dan an bawhchhe chung pawhin "dan bawhchhia" tih tawngkam te hi an hmang ngai lo.

Mizoramah hian he'ng Chakma foreigner ngei nia lang te hi an awm si chuan Congress sawrkar leh political party dang te pawh hian dan loa awm an nih angin dan lekkawh an tum tur nge ni anga USA-a Democrats ho angin "hmangaihna leh lainatna" lantirin nakina voter tur atan an "ngaihdam" dawn? Electoral Roll ah hian India khua leh tui chauh danin a phut angin telh tuma hmalakna a awm em? Foreigner lo awm ta se, zawnchhuaha paih tumna a awm em? Mizoram sawrkara Minister chakber hian amah vote tlingtute zingah India ram khua leh tui nilo lo awm ta se, engtia tih nge a tum? Kan hnam hi politician lalna leh thuneihna thlahlel ho hian an hralh zel kan phal dawn em? Chakma te hi kan mihringpui an ni a, kan pawng huat ngawt a diklo, chumi rual chuan ram leh hnam tana hlauhawm thei khawpa thil an tih hi kan phal tur a ni em? Chu politics tenawm tak chu tunge do dawn?