Thla hmasa ni 16 Zirtawpni khan Mizoram State
Commission for Women Chairperson Pi Vanlalawmpuii Chawngthu kaihhruaina hnuaia
ngaihtuah, Mizoram Baptist Kohhranin kum 2008 Assembly rorelnaa a lo pawm tawh
pastor nupui full-time a hnathawh khapna chu Mizoram Baptist Kohhran ngaihtuah
that leh tura ngenna order tihchhuah a ni a. He order ah hian a hmalama
Commission leh Mizoram Baptist Kohhran lo indawr tawhnaa kohhran lamin a
insawifiahnate awm mah se, kohhran rorelna hi hmeichhiate chanvo palzutna
leh tawrhna thlentuah Commission-in a hriat avangin rorel "fuh
chiahlo" ah a ngaih thu a lang a. Thutlukna siamah hian
"General Assembly ah a rang thei ang bera ngaihtuah tha leh turin Mizoram
State Commission for Women chuan Baptist Church of Mizoram (BCM) chu a ngenin a
beisei" tih a tarlang a ni.
Mizoramah hian kan buaina lian ber pakhat chu danin
ro a rel thinlo hi a ni a. Dan berin ro a relloh chuan a huai huai, a pawr
pawr, a tam tam rorelna ramah a chang thin a ni. Chu chu sorkar rorelnaah kan
hmu a, khawtlang rorelnaah pawh kan hmu a, kohhranah pawh chutiang tho chu a ni
tih hi a chhunga thawkten an hrechiang ber awm e. Inbih chian chuan dan rorelna
"rule of law" a awmlo a ni tih kan hmu thei ang Mizoramah hian.
Sawi ang khian kan khawsakhonaah leh kohhranten
rawng kan bawlhonaah dan berin ro a rel loh chuan thil a nih tur ang a ni thei
lova, hmangaihna dan hmanga ro kan rel loh phei chuan khawsakhona hrehawm tak
oppressive system ah tuma min awpbeh nilovin keimahni leh keimahni kan indah
tihna a ni ang. Chutiang chu mi pangngai leh Pathian tih te chuan theihtawpin
kan do tur a ni a, zalenna boruak duhawm tak hnuaia kan chenho theih hi
kohhranah phei chuan kan thlakhlelh tur ber te zinga mi a ni awm e.
Commission in order a tihchhuahah hian 2008-a BCM
Assembly Thurel 1.21(3)-na chu a rang thei ang bera ngaihtuah tha leh turin a
ti a, mahse BCM constitution atanga en chuan BCM Assembly-a thu ngaihtuah tur
thlen theite zinga mi a nih loh avangin BCM dan chuan thu tlinga ngaih loh tur
a ni. Amaherawhchu, Commission hi Mizoram State Commission for Women Act 2004
in civil court thuneihna a pek angin India ram khua leh tui hmeichhia te dikna
chanvo humhalh tura thuneihna pek a ni a, civil court thuneihna pek a nih
avangin a thu ngaihtuah leh thu tihtlukna (order) te hi court thuchhuak tluka
ngaih tur a nihna a awm awm e.
BCM hian dan a nei a, chu'ng te chu constitution ah
zam a ni. Constitution in a sawi dan chuan "Assembly hi Mizoram Baptist
Kohhran rorelna sang ber a nih avangin, thu ngaihtuah tul apiang a ngaihtuah
ang. A thu tihtluk chu Assembly hnuaia rorelna dangin a tidanglam thei
lovang" tih a ni a. Hei hi hriain Commission hian Assembly ah ngaihtuah
nawn leh turin a hriattir a ni.
Assembly thurel nisi, Assembly in a ngaihtuah
remchanglo a awm chuan constitution hian Assembly Executive Committee (AEC)
hnenah thuneihna a pe a. BCM constitution in a sawi dan chuan "Assembly
aiawha thu pawimawh ngaihtuah turin Assembly Executive Committee a awm
ang" tih a ni.
He Committee pawimawh tak hi BCM constitution vekin
a sawidan chuan "Assembly leh Assembly inkara thu ngaihtuah tul leh
pawimawhte a ngaihtuah ang" tih a ni a. "Assembly chauhin a ngaihtuah
theih, a tul avanga a ngaihtuah chuan Assembly-ah pawmpui turin a thlen ang.
Assembly-in ngaihtuah tura a pekahte chuan Assembly aiawhin thutawp a siam thei
ang. Assembly thu tihtluk tawhte chu a tidanglam thei lovang.
Tun hi Assembly rorel hun a nih loh avang leh
Commission in a rang thei ang bera ngaihtuah tura a tih avang hian kohhran
danin a sawi angin AEC hi a ngaihtuah tur chu a lo ni ta a, a tihdanglam erawh
kohhran danin a phalloh avangin tidanglam lovin a tikhawtlai thei thung a ni.
Assembly leha ngaihtuah turin. Chumi hma zawng chu he 2008 Assembly Thurel hi
hman (implement leh enforce) loh tura ngaih a ni. Assembly leh hma thlenga hman
zui a nih chuan Commission order hian awmzia tehchiam a nei lo tihna a ni ang.
Assembly Executive Committee (AEC) member te hi an
rual angreng a:
1) BCM Puipate
2) Head of Department te
3) Head of institution te
4) President kal chhuak
5) General Secretary kalchhuak
6) Executive Secretary te
7) Pastoral Coordinator
8) MTKP Organiser
9) MBKHP Organiser
10) BCM Office Superintendent te
11) ABC tin atanga member thlan 2
12) Pastor Bial tin atanga member thlan 2
13) Assembly thlan member 5
He'ng kohhran hruaitute hian Commission order hi
Assembly leha ngaihtuah that a nih theihna turin a rang thei ang berin an
ngaihtuah a ngai dawn tihna a ni. Kar thum dawn chu AEC hian he order
chungchang hi a la ngaihtuah lo nia hriat a ni.
