Indian Constitution Article 26-na nen a inmil tiin Kerela High Court-in April 1991 khan Sabarimala temple chhunga hmeichhia kum 10 atanga kum 50 inkar luh ve phalloh tih dan siam chu a nemnghet a. He temple enkawltu Travancore Devaswom Board chu an sakhaw dan kengkawh thei a nih thu hrilhin Kerela sawrkar pawh he temple dan hi zawm a nihna tura a tul anga hma la turin a hriattir bawk a ni.
1950-a dan siam Travancore-Cochin Hindu Religious Institutions Act chuan he temple inrelbawlna thuah hian Travancore Devaswom Board chu thuneihna a pe a. Temple puithiamten "hmakhawsang" atanga an lo tih tawh dan anga temple inrelbawlna an kalpui hi Indian Constitution Article 26-nain a lo sawi sakhaw zalenna nen pawh a inmil thlap tih chu Kerela sawrkar leh High Court ngaihdan a ni.
Kum 10 atanga kum 50 inkar hmeichhia te temple luh ve phal an nilo hi Indian Young Lawyers Association ukil thenkhatin tha an ti lova, dan mit atanga en phei chuan dik theiin an hre lova. Hmeichhia te zalenna Indian constitution pawhin a humhalh sak rahbehnaa ngaiin 2006 kum tir lam khan Supreme Court ah PIL an pu lut a. A tawi zawngin sawi ta ila, kumin kum tir lam khan Supreme Court in hearing a neih chhunzawm a. Temple board aiawha ding Senior Advocate K.K. Venugopal-a'n thiam takin sakhaw hruaituten tha an tih dana an sakhaw inrelbawlna an kalpui theih thu te leh hmakhawsang atanga thil an lo kalpui tawh dan te a han sawi a. Amaherawhchu, Supreme Court Justice ten uluk taka an ngaihtuah hnuah he temple dan hi fello an tihna lai an sawi a. Dan mit atanga en phei chuan hetiang sakhaw dan hi siam theih a nihna an hmuh loh thu an sawi a ni.
Hetia ukil thenkhatin Sabarimala temple an khing ta mai hi lo haw pawl tam tak an awm a. A inhnamhnawih ve lo Indian Young Lawyers Association President Naushad Ahmed Khan-a phei chu nasa taka vau a ni a. A chenna in hal an tum thu te leh vauna chi hrang hrang a dawng nual a. A nunna atana hlauhawm theia a hriat avangin PIL chu hnuhkir a tum a, mahse Supreme Court chuan a lo phal miah lo. Delhi Police hnenah IYLA President venghim turin a hrilh a. Court chuan he PIL hi ngaihtuah chhunzawm zelin Indian Constitution-in khua leh tui tin te zalenna leh dikna a humhalh sak rahbehna hi sakhaw danin a siam thei lo tih ngaihdan a nei a. Temple board ukil hnena a hrilh ber pawh constitution tlawhchhana he dan siam theihna a awm leh awm loh rawn phawrh turin a ni.
Indian Constitution hi nikum December-a Himachal Pradesh High Court-in a sawi angin India ram chhunga thuneitu zawng zawngte phuartu a ni a, pawl (society) te pawh chumi zingah chuan an tel thu a sawi bawk a. (“Constitution of India is binding upon all authorities throughout the country including societies” Solan District Truck Opersaots Transport Cooperative Society vs Harjinder Singh, SWP No.1841 of 2015). He dan hriatthiam dan leh ngaihdan hi tuna India ram court sang ber Supreme Court Justice Dipak Misra, Justice Pinaki Chandra Ghose leh Justice NV Ramana te ngaihdan a ni bawk a. Chuvang taka an PIL ngaihtuahah pawh sakhaw tihdan aia constitution in dikna a phut leh humhalh lama tang zawk an ni.
India constitution Article 26-na ah hian sakhaw thila zalenna kan neih te ziahlan a ni a. “Public order, morality leh hriselna” a tihbuai dawn loh chuan sakhaw tin te hian kan sakhaw inrelbawlnaah kan duh angin, tha kan tih angin dan leh dun te kan zam thei a ni tih hi India ram danpui sawi dan a ni.
He Article hian “every religious denomination or any section thereof shall have the right (a) to establish and maintain institutions for religious and charitable purposes” lo ti lo se Zoram kohhran ten mission field-a kan neih hmunah te khuan zirna in te kan din a remlo thei ang. Tin, kan ram chhungah ngei pawh nauhnuchham chawmna in kan din te, Pathian Thu zirna insang kan din te hi keini aia tam Hindu ho hian min rawn khap tum ta se lo dan har kan ti viau mai thei.
“Every religious denomination or any section thereof shall have the right (b) to manage its own affairs in matters of religion” tih hian kan rinna leh sakhuana in min hrilh anga tha kan tih dana ro kan in rel hi a humhalh tlat bawk a. Chuti nilo se, Hindu firfiak te beihna lakah hian invenna tha kan nei lo thei a, Pathian awm ringlo leh Kristianna haw hrim hrim dan hre bawk si te hian kohhrante hi min tibuai hrep thei a ni. Sakhuana thilah chuan kan sakhaw hotuten Bible an en vang vanga tha an tih dan hi kan kal dan tur chu ni berin a lang.
Amaherawhchu, he Article hian chiang deuhva a sawi chu “in matters of religion” tih a ni a. Hei hi Justice Misra pawhin a tlawhchhan pakhat a ni. Sabarimala temple chungchangah pawh hian sakhuana thil a nih loh emaw constitution in a phalloh chuan luh phalloh tih hi dan siam theih a nih loh thu a sawi a. Temple ukil lamin hmakhawsang atanga tih dan tia a han sawi pawhin hmakhawsang atanga thil tih thin dan a nih leh nih loh finfiah theih a nih loh thu leh hmeichhia te dah hniamna (discriminate-na) a nihna avanga constitution in a phalloh thu a sawi ber. April 11 khan he PIL hi ngaihtuah leh a ni a, Supreme Court Justice hovin an thutlukna ber chu constitution-in a lo humhalh mihring dikna te nena inmil zawng chauhva dan siam tur a nih thu a ni. Hmeichhia te tana rorelna diklo (injustice) awm thei hi thil lian tham tak a nih thu an sawi bawki. ("We will now only be guided by the rationale under the Constitution. The gravity of this petition is that gender justice is endangered")
Supreme Court in dan a hrilhfiah dan chuan sakhaw hruaituten dan an siam thei a, mahse chu dan chu dan awmze nei India ram consititution value nena inmil tur tih a ni ber. Hei hian a lantir chu sakhaw hruaituten dan an siamin khawvel danin a phuarlo anga ngaihloh tur tih leh rorelna diklo (injustice) hmanga dan siam hi constitution phalloh a ni a, court in a paih thei a ni.
Mizoram Baptist Kohhran 2008 Assembly chuan “Bialtu Pastor ten an thawhna hmunah an nupuite an hruailoh avangin rawngbawlna kawngah harsatna leh fel lohna tam tak a awm thin” tiin “hetiang harsatna sut kian nan” hian “Bialtu Pastor chuan a thawhna hmunah a nupui a hruai ngei tur a ni” tiin a rel a. Chumi tihhlawhtlin nan chuan “Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal an ni lo ang” tiin a rel ta bur mai a. Indian Constitution Article 26 (b)-na in kohhran inrelbawlnaah Baptist kohhran te zalenna hi a humhalh laiin Baptist kohhranin a rawih nilo sawrkar hnathawk te 2015 atanga bang tura a tih hi Baptist kohhran tih dan emaw Bible-a pastor nupuite chungchanga tih dan tur emaw a nih loh avang leh Indian Constitution Article 19 (1) (g) palzutna a nih avangin harsatna lian tak a thleng ta a ni.
He thurel kal zelah hian BCM hotute hian an ti dik lo tih hi an inhre duhlo lui a nih chuan court a inrawlh a ngai dawn niin a lang a, National Commission for Women hotu pakhatin thurawn a pek anga hemi chungchang ngaihtuah mek tu Mizoram State Women’s Commission hotute nena tha taka an sawiho duh erawh chuan mualpho lutuk lovin thil a kal thei ang. A engpawh chu nise, BCM hian 2008-a a lo rel, a sub-number 3-na bik te hi a tihtawp emaw a sut emaw a rel bo chu a ngai dawn ngei a. Pastor nupui zawng zawng hian an hna hi bansan vek pawh ni se, he Assembly thurel leh a bawhzuina avang hian Pathianin mihring zalenna a pek, India ram danpui pawhin a lo humhalh rahbehna hi a dik chuang lova. Kohhran thiamloh chan theihna lian tak a la ni ta reng reng a ni.
Baptist Kohhran puipa kalchhuak ta te khan BCM constitution leh India ram constitution an ngaipawimawh lova, harsatna lian tak a awm phah a. Tuna puipa thar te hian Pathian leh kohhran hoten mawhphurhna an pek anga BCM leh India ram dan an ngaihpawimawh chuan tihdam rawngbawlna an tan thei. Chumi zawnga kohhran an kaihhruai loh erawh chuan BCM hian hun thim tak a kaltlang dawn tihna a ni ang.
Baptist Kohhran puipa kalchhuak ta te khan BCM constitution leh India ram constitution an ngaipawimawh lova, harsatna lian tak a awm phah a. Tuna puipa thar te hian Pathian leh kohhran hoten mawhphurhna an pek anga BCM leh India ram dan an ngaihpawimawh chuan tihdam rawngbawlna an tan thei. Chumi zawnga kohhran an kaihhruai loh erawh chuan BCM hian hun thim tak a kaltlang dawn tihna a ni ang.
