Melbourne Mizo Association buatsaihin April 15 khan mi 200 bawr velin Melbourne khawpuiah Khuallian Pi Lalrindiki Khiangte hovin Chapchar Kut hlimawm tak an hmang a. Sydney-a Mizo awm te kan va tel ve thei lo nain Pi Daduhi London haw leh tur Sydney-a zankhat rawn riak chu remchangah lain kan lo kawm thei a, inhmelhriatna leh inkawmna hun tha tak keini lam pawhin lo nei ve thei a, kan lawm hle. A u Pi Zami'n a rawn kalpui a, Sydney Mizo tlangval zuanzang leh tlawmngai Patea pawhin khaw fan leh airport inthlah thlengin a lo buaipui a. A lawmawm hle.
Thawhlehnia an rawn thlen tlaiin office buai tak karah Consul General Pu Vawna leh a thiannu Pi Rosy te pawhin an rawn tawiawm a. Sydney Opera House kawtah inkawmna hun tha tak kan hmang thei a, kan hlimtlang hle. Zan lamah a thalai zual chhangchhe lo deuh chin te nen inkawmna neih chhunzawm a ni a. Zaihona lam neih theih a ni ta chiah lo naa hun hlimawm tak hman a ni
Pi Daduhi Sydney rawn tlawh remchangah lain heta Mizo awm tena pawl kan siam Sydney Mizo Network (SMN)-in interview-na tawite kan nei a. A chhanna te a chhinchhiahtlak hle.
SNM= Sydney Mizo Network
DDI = Daduhi
SMN: Chibai Pi Daduh. Sydney-a Mizo awmte min rawn tlawh a, kan lawm hle mai. Khawvel ram hrang hranga Zofate awmnaah Pathian fakna hla leh hnam hla te sain hun I hmang tawh thin tih kan hria a, tun tumah Australia rama Zofate min rawn tlawh a, Melbourne leh Sydney-a I cham chhungin eng te nge chhinchhiahtlak deuhva I hriat min hrilh thei em?
DDI: Ka cham rei lo bawk a, chhinchhiah tlak vek ni mai hian ka hria. Melbourne bik ah chuan an tanhona leh thawhhona nasa tak khan ka rilru a khawih khawp mai. Program engkim a felfai nuam lutuk. Chuan Sydney ah pawh Mizo thalai bright tak tak ka hmuh khan a thlamuanthlak ka ti nasa. Changkan dan diktakin in changkang a ni. Pa te zara inla high ve tawp in ang lo 😀
SMN: Mizo te hi Pathianin min hmangaih bik ang tein kan in sawi thin a, ramhuai hlauva thingbul lungbul be thin hnam hi Pathian hian engtinnge mal min sawma I hriat dan tawi tein min hrilh thei em?
DDI. Pathian chuan mihring zawng zawng min hmangaih a, kan lo hmangaih let ve chiah hian malsawmna kan lo dawng thin. A khawngaihna kan tan a tawk em em a ni. Missionary lo kal te zara Pathian kan lo hmel hriat ve hi chu khawvel zawng pawhin kan lo changkan phah teh e! Kristian nih kan thlang hi kan duhthlan tawh zawng zawnga la tha ber a ni awm e.
SMN: I pasal fanaute nen ram changkangah awmin tunah pawh khawvela ram hausa leh ram changkang ber pawl Australia ram I rawn tlawh a, he'ng hnam changkang zawkte'na an inrelbawl dan leh a bikin chhungkua an enkawl danah te hian Mizo te'n an tih dan tha engte nge kan entawn ve theiha I hriat?
DDI. Mizo te hian naupang hi chance kan pe lo riau in ka hria, Sap ho hi chu han in hmuhkhawm ni te hian an fate an introduce thlap a, titi naah pawh an telh vek a. Naupang paw'n a idea leh engkim a sawi ngam. An ngai pawimawh thiam bawk. Confidence neih pawh a awl ka ring. Mizo te hi chu awmkhawm naah "naupang te te tawng loh tur" tih te hi kan in zirtir dan a ni tlat a. An lo puitling a, confi chu a har ngawt ang.
SMN: Khawsak nawm zawknan leh dinhmun that zawknana Mizoram leh India ram pawna vak chhuak leh inbengbel thei te hi kan vannei hlein a hriat a, he'ng ram pawna awm te hian Mizoram tan enge kan tih ve theiha I hriat?
DDI. Advice leh ram tha zawka an tih dan sawi tam hi a tha in ka hria, E.g. I han tih thin ang te hi 😊
SMN: Hun tha tak min pek theih avangin kan lawm e. Sydney Mizo Network hmingin duhsakna kan hlan duh che a, I zin kawngah Pathianin vengin awmpui che rawh se.
