NURSE HNA LEH MIZOTE

May 6 khan Lungleia Mizoram Baptist Kohhran damdawiin Christian Hospital Serkawn hnuaia nurse zirna School of Nursing chuan nursing zirchhuakte puala hun "40th Batch GNM Graduation" an hmang a. Khuallian Minister Zodintluanga a ni. Khuallian chuan nurse zirchhuakte an pawimawhzia te, School of Nursing-a thawktute thawhrimna fakawmzia te a sawi a. Mizoram pawn, India ram pawn thleng pawha nursing zirchhuak te chu hna thawk ngam turin a chova. Mizoram sorkar hmalakna thar pakhat puangin Youth Commission kaltlanga Singapore-a nursing zir theihna program buaipui mek thu a sawi tel bawk a ni.

Mizoram sorkar hian uluk takin he nursing zirna hi a kalpui turah beisei ila. Singapore-a zir tur mi 80 a lak tum pawh an zir zawha hna an thawh theih dan tur thlengin sorkarin a ngaihtuahpui theih chuan thil tha tak a ni ang.

"Mizo nula leh tlangval rampawna nurse hnathawkte chu an hnathawhnaah fak an hlawh hle thin" tia Minister-in a sawi pawh a dik viau mai a.

Nurse hna hi Mizoten kan thawh ve theih hna chauh nilovin kan champion pui theih hna niin a lang. Kan awmna atanga darkar hnih vela hla Cooranbong vengah hian Aizawl Treasury Square veng Pu Zaluta (L) fanu Pi Lawmzuali a awm a. India ram a chhuahsan hma daih tawh atanga nurse hna thawk thin a ni. Australia-a a pem hnuah pawh nurse hna a thawk chhunzawm a. A taimak leh thawhrim vangin a thawhna damdawiinah, Pu Zodintluanga sawi ang hian, fak a hlawh hle.

2010 chho khan Minister John Rotluangliana fanu Lucy Pachuau pawh Melbourne khawpuiah nursing zir leh thawk pahin a awm a. Ram changkang ber bera nurse hna thawk tur hian Mizote hian kan tlin zan a ni tih hrechiangtu pakhat a ni ang.

2009 atang khan keipawh, damdawiina ka thawh avangin, nurse ho nen inhne hnai takin hna kan thawk hova. Nitin deuh thawa thawhpui chuan an hnathawh dan pawh a hriat ve theih viau mai.

Australia ah hian a tlangpuiin kum tin BSc Nursing kan tih ang chi nurse graduate degree nei thar mi 8000 bawr vel an awm a. Mahse, 3000 velin hna an hmu thei thin lo. A chhan chu ram pawn atanga nurse experience lo nei tawh hna rawn hmu - skilled migrant worker - ho vang a ni. Chu'ng zingah chuan Philippines atanga rawn kal thahnem tawk tak an awm a. Anni lo pawh khawvel hmun hrang hrang atanga rawn kal an awm.

Philippines atanga rawn kal ka han sawina chhan chu anni hnam hi Mizo te nen kan inan em em vang a ni. Nitin deuhthaw thawhpui chuan an zia te, an saptawng thiam dan emaw thiamloh dan te, Asian ni chunga sap ho zinga an thawh dan te, sap hovin an lo dawnsawn dan te ka hmu a. Anni ho ang hian Mizo te pawhin he eizawnna line hi kan bawh chi tak niin ka hria. UK ah pawh an thawk thla hnem a ni ang Queen Elizabeth-i pasal Prince Phillip-a’n Luton leh Dunstable damdawiina cardiac centre a hawn tuma Filipino nurse pakhat a chibai pahin UK damdawiin inenkawlnaah Philippines ram mipui chanve lawih tiruak pha khawp an awm a rin thu fiamthuin a sawi hial a.

Hmanni deuh khan ka thawhna damdawiin Chris O'Brien Lifehouse ah hian Philippines atanga rawn kal tlangval fel deuh mai Luigi-a ("Malian" tia han koh palh mai awl hmel zet!) hian hna a rawn zawm thar a. Philippines ah nursing zir zovin kum 2/3 nurse hna pawh a lo thawk tawh a. Australia-a a pa awm zar zovin a rawn pem a. Philippines-a a nursing degree chu Australia-a hman a nih theihnan eng engemaw a buaipuia. Min hrilh thenkhat ka han sawi chhawng dawn ange.

1) Ram dang atanga Australia-a nurse (BSc Nursing ang chi) hna thawk tur te chu Australian Health Practitioner Regulation Agency (AHPRA) in a pawm a ngai.

2) Australia ram pawn degree chu pawm a nih theihnan AHPRA-in a hriatpui college ah "bridging course" $10000 man vel zirchhuah a ngai a. Chu course chu chawlhkar 11 chhung awh a ni.

3) Bridging course zawh atanga chawlhkar 6-8 hnuah result puan a ni leh a.

3) Chumi hnuah Australia rama nursing degree zir zo te ang bawkin Registered Nurse angin an in ziaklut (register) thei.

Australia rama nurse hna thawk thei tura an in register tawh chuan hna an zawng thei a. Amaherawhchu hna thawk thei tura visa neih a ngai. Kum 3 lo thawk tawh tan erawh helaia visa daihrei ber chi Permanent Resident visa (USA-a green card tlukpui) an dil thei thung. Permanent Resident visa an dil theih chuan hna zawn a awlsam phah thei. A nih loh chuan hospital emaw khan an sponsor a ngai thin.

Chiang deuh zawkin AHPRA website ah hian a inziak bawk - www.nursingmidwiferyboard.gov.au/Registration-and-Endorsement/International.aspx

An hlawh hi mi tam takin hriat an duh thin a. New South Wales bikah sorkar leh nurse union te inremna anga nursing degree nei te kar khat hlawh hetiang hi a ni:

1st Year  -$1087.10

2nd Year -$1146.20

3rd Year - $1205.40

4th Year - $1268.90

5th Year - $1331.90 

6th Year - $1394.60

7th Year - $1466.20

8th Year and above - $1526.60

State dangah pawh hetiang deuh tho hi a nih hmel. Kar khata hnathawh hun chhung hi darkar 38 anga chhut a ni a. Zir zo hlimin darkar khata $28.60 an hlawh tihna a ni. A kum riatnaah chuan darkar khata $40.17 daih an hlawh pha thung. A thla biin sawi ta ila, nurse tharin thlakhatah $4348.40 a hlawh a. A senior berin $6106.40 atangin.

Australian Bureau of Statistics (ABS) sawi dan chuan Australia rama hlawh average hi thla khata $5700 vel a ni a. ABS tehna atang chuan nurse te hi hlawh sang tak nilo, mahse hlawh average emaw a aia sang hret a nih chu. Mi 300000 chuangin he hna hi an thawk a. Kum upa te enkawlnaa (aged care) thawk tur phei chu an mamawh belh deuh deuh a ni awm e.

Nurse hna hi Australia ah hian hna zahawma ngaih a ni a. An hlawh tan chhohna hi harsa lutuk lova chhungkaw enkawl leh in leh lo din theihna tling a ni. Hmeichhia leh mipa, tuai leh patil thlengin an thawk.

Ka thawhpuipa thin nurse pakhat pawh a nupui nen fa pahnih an nei a. In man tlawm lutuk lohna vengah in neiin an in loan rulhnan ama hlawh chauh an ring a. Chuti chung chuan khawsak sang lutuk lo, nghei bik lovin average middle income family angin an khawsa thei a ni.

A tlangpuiin nurse ho hian chhungkaw chawma in leh lo din theihna khawp an hlawh a. Registered Nurse ho phei chuan an hnathawhnaah kaisanna an ngah hle. Company/Hospital-a CEO thleng pawhin an invawrh thei.

A awlsam leh tawi zawngin kan han sawi a. Sawi hmaih pawh a awm teuh ang. Harsatna hrang hrang paltlang tur pawh a tam hle. A bikin saptawng chungchangah. Saprama hna thawka hlawhtling tak ni tur chuan saptawng thiam that leh kan Mizo rilru piah lama rilru sukthlek neih theih a pawimawh bawk.

RIPANS-a zir chhuak te khan rawn ti ve teh u khai!

MPSC, PU HAWLA LEH CONSTITUTION

April 11 khan Pu Lalthanhawla’n MPSC Chairman chu “hun eng emaw ti chhung (interim period) atan ruat lailawk” a nih thu New Serchhip YMA Hall-a Serchhip Block Congress hnuaia V/C candidate turte puanna inkhawmah a sawi a.

Chief Minister hian a sawi zelnaah, "Assam hun lai khan Assam Public Service Commission Chairman atan politician R Thanhlira, MP hman a ni a, politician tiin sawisel a ni lo. Mizoramah pawh MBSE Chairman-ah Rev.Dr Lalchungnunga dah a nih khan rawngbawlna tlansan tih a ni ngai lo," a ti bawk a. MPSC Chairman leh member ruar tharte miin an sawisel chu a hriatthiam loh thu a sawi niin chanchinbu lamah kan hmu a.

MBSE Chairman chungchang leh MPSC Member-a Reverend tanglai ruat hi an dinhmun a inanloh avangin Rev.Zosangliana tan hian heti zawnga Chief Minister in a thlavang a rawn hauh hi thil duhawm vak niin a lang lo. Tin, Assam hun laia Pu R.Thanhlira dinhmun leh 2015-a Pu Andrew-a dinhmun hi a inanloh bawk avangin Chief Minister in he controversy chungchangah hian mipui rilru a hmin lo hle.

MPSC chairman leh member ruat chungchanga “miin an sawisel” hi Pu Hawla hian a hriatthiamloh thu a sawi a. Amaherawhchu, thil nihna chik zawka zir chuan hriatthiamlohna tur awmin a lang lo. Rev.Zosangliana chungchangah chuan amah leh Pathian inkar thil a nihna vang leh Mizoram Presbyterian Kohhran leh India ram dan a kalh loh chuan sawisel lutuk theih niin a lang lo. Dikna tana a ding tlat a nih phei chuan kan la fak ngei ang. Miin an hriatthiam lohna lai nia lang zawk chu Mizorama kohhran pawl lian bera (Hei hi Mizoram tehna chauh a ni) hotu nihna pawimawh tak tak lo chelh tawh leh zu chungchangah phei chuan kohhran duhdan dinpui tlattu te zinga mi a ni a. Hetia zu khap burna dan hlipa a thlahdul leh zawrh lam policy kalpuitu sorkar hnuaia intulut anga a lang ta hi mipuiin mak an tiin an hrethiam lo ni berin a lang. Mipui hriata zu han do zui zel hi atan thil rem a ni chiah tawh lovang.

Tin, secularism chawilartu party sorkarin MPSC member-a sakhaw rawngbawltu – pastor – hrim hrim dah tumna a neih avang leh a lo pawmtu pawhin chu secularism spirit ngaihtuahna nilova a lo pawm hi India ram democracy kalphung a kalhna lai lian tak a awm. UPSC ah khuan BJP kaihhruai sorkar hian Hindu puithiam hrim hrim dah tum ta se Rev.Zosangliana ngenna phalsaktu Synod Officers’ Meeting-a Reverend hote hian duhlohna thuchhuah an siam hialin a rinawm.

"Synod-a thawk chungin MPSC member nih a rem loh avangin, Synod hruaitute thurawn angin chawlh ka dil ta a ni," tiin Rev.Zosangliana’n a sawi a. He constitutional body ah hian India ram dan siamtuten sakhaw rawngbawltute tan ruahhmanna an siamloh avangin Pu R.Lalzirliana’n pastor dah lo duh pawh nise constitution leh secularism kalphung a kalh avangin pastor/reverend nihna angin va tel kha thil rem a ni lova, “Rev” title va chhawm loh pawh hi MPSC member nih chhung chuan thil inhmeh zawk niin a lang. Mi tam takin Pathian tlanbosan ta anga an chhuah erawh hi chu a dik kher lo thei. Sawi tawh ang khan amah leh Pathian inkar thil a nihna a tam zawk a, tuna ngaihdan (judgement) lo siam lovin a pension thlenga hna a thawh danah dah ta zawk ila a tha awm e.

“MPSC-ah ka awm a nih pawhin dik takin ka ti ang” tiin a sawi a. Misual a ni lova, he office pawimawh takah hian dikna tungdingtu a nih theihnan beiseina nen lo thlir ila kan pastor tan hian a tha ang. Amaherawhchu, politics-a Rev/Pastor te inhnamhnawihna Mizoten kan hriat chinah duhthu a samlo thin em a, politics a lut pawh nilo sorkar hna thawk tur ringawt pawh hi kan lo ip nasa tih chu hai rual a ni lo. Nau anga a en Zonet Director Pu RK Lianzuala chu an ruat zan khan a mu miah lo!

MPSC chairman ruat chungchangah chuan miin an hriatthiamloh ai mahin dan hmaa buk a tlin leh tlinlohna lam hi Constitution zawm leh vawngtha tlat tura vawi 5 lai chhia lo chham tawh Chief Minister hian a ngaihpawimawh a tul zawk ang. Ama tawngkam haw ta lawk ila, “ringlo mi” hmaah vek chhia a chham leh nghal si a.

Pu Andrew-a piankum hi 1953 a nilo tih Mizoram Presbyterian Kohhran leh Pu KC Lalvunga te nupa in an nemnghet a. Chu an nemnghehna chu Synod archive ah tha taka vawn a nih thu MSU ten mipui hriatah an puang tawh a. A piankum tak tak hi 1951 a ni tih hai rual lohin Pathian leh Presbyterian kohhran hmaah ziaka dah a ni. A hnuah 1953-a piang angin lo indah nita se, anni hun laia thil tih dan (a dik tihna nilovin) kha kan hre theuh awm e. An zirtirtute zawkin an kum an ziah naupan sak thin. Chutiang zawngah chuan Pu Andrew-a chauh kan sawrbing dawn chuan a dik lovang. Chief Minister ngei pawh, Pu Vannneihtluanga sawi dan takin, a “chhul chhuah kum” leh a sorkar kum a in anglo.

Dan hi ro kan rel tir dawn chuan he thil hi enliam theihlohna lian tak a awm. MPSC Chairman-in March 30-a a office-a thuthar lakhawmtute a kawm tum khan 1969-a Australia an pem dawna a passport-a a pian kum pawh October 7, 1953 a nih thu a sawi niin Vanglaini chuan a ziak a.

Pu Andrew Lalherliana’n a piankum atana a hman hi 1953 a nih chuan 1969-a passport a dil khan kum 16 angin a dil tihna a ni a. India ram danah kum 18 hnuailam chu “minor” an nih avangin Pu Andrew-a 1969 passport kha a pa Pu K.C.Lalvunga (L) emaw a nu Pi Dari consent a ngai tura ngaih a ni. Tuna an tih dan ang lo hian khatih hun lai khan passport hranpa nilo, nu emaw pa te passport-a a hming belh a ni thin.

Australia rama a kal hma kum hnih khan Passport Act, 1967 chu India sorkarin a siam a. Clause 12-naah heti hian a inziak:

“Offences and penalties

(1)   Whoever…(b) knowingly furnishes any false information or suppresses any material information with a. view to obtaining a passport or travel document under this Act … shall be punishable with imprisonment for a term which may extend to [two years or with fine which may extend to five thousand rupees] or with both”

MPSC Chairman hian Australia a kal hmaa passport a siamtir khan a pa Pu KC Lalvunga, IFS khan Passport Act, 1967 Clause 12 (1) (b) hi a palzut a tihna a ni ta em ni ang?

A piankum atan 1953 a hman laiin 1989, 2003 leh 2008 MLA inthlanaah 1951-a piang angin a inziak lawi si hi Representation of The Peoples’ Act Clause 125A kalh a nih avangin Pu Andrew-a MPSC Chairman atana ruat a nih hi hriatthiamlohna tur a awm lo a tih ngawt theih loh a ni.

AAP MP candidate Pu M.Lalmanzuala chu a MP inthlan campaign sum ziah dan khirhkhiap tak chungchanga hriatthiamna a dil chung pawhin Election Commission of India-in election dan a zawm kim loh avangin a lakah hremna an lekkawh a. MPSC Chairman chungchangah hian election lamin an enliam chuan hleih neiin thil an ti tihna a ni ang.

Pu Andrew Lalherhiana hi Constitution Article 316- in a phut anga kum 62 hnuailam a nih loh chuan “I will bear true faith and allegiance to the Constitution of India” tia vawi 5 lai chhia lo chham tawh Mizoram Chief Minister hian “interim” appointment atan a kaihhruai party General Secretary hlui hi second khat pawh ruat turin thuneihna a nei lova. MSU emaw SOSA emaw PRISM emaw MTP te hian Chief Minister lakah hian FIR thehlut ta se rinaiin Mizoram sorkar hi a che buai thei daih a ni. Constitution kalh chiang tak thil niin a lang si a.

PIANKUM LEH ACCOUNTABILITY

MPSC Chairman Pu Andrew Lalherliana pian kum chungchang hi vantlang hriata pholan a nih takah chuan uluk taka kan ngaihtuah tlan a tul a. Ama chhungte ngei pawhin he thil hi public interest lian tak a ni tih hria a, a nihna anga an ngaihtuah thiam a pawimawh hle.

Justice GN Ray chuan Norms of Journalistic Conduct-ah chanchinbu ten mipui hriata thil an pholan dan tur innghahna heti hian a ziak a:

“As a custodian of public interest, the Press has a right to highlight cases of corruption and irregularities in public bodies but such material should be based on irrefutable evidence and published after due inquiries and verification from the concerned source and after obtaining the version of the person/authority being commented upon”

Pu Andrew –a hi amah ngaina tu tan chuan pa fel tak a ni ang. Amaherawhchu, a piankum chungchangah hian tan lam nei lova ngaihtuah nawn ngai a awm nual. "MPSC chairman atan hian min ruattute'n chawl tura min ti a nih loh chuan ban ka tum lo," tih hi document hrang hranga thil inchhinchhiah dan leh India ram danpui leh dan dang enin innghahna tlak niin a lang lo.

Kan hriat theuh angin Mizo Students’ Union (MSU) te’n hemi chungchangah hma lain Mizoram Presbyterian Kohhran lehkha hrang hrang vawnthatnaah Pu Andrew-a baptisma channa chhinchhiahna lehkha an va en hial a. Chutah chuan “March 30, 1952-ah thla ruk mi a nih laiin Pastor Thanga'n baptisma a chantir” tih an va hmuchhuak tih chanchinbu lamah kan hmu. Pu Andrew-a piankum dik tak hi 1951 a ni tih a nu leh pa te leh Mizoram Presbyterian Kohhran hian an chiang tura ngaih a ni a. A hnua a “official birthday” a lo dang a nih pawhin ama rualpui tam zawkten an piankum dik tak hmang lova official record-a an ziak ta ang hi a ni ve mai a tih theihna lai a awm. Amaherawhchu, dan nei kan nih avangin he “irregularity” hi enliam theih a ni lo a ni. MSU te dinna hi a dik avangin namnul ngawt theih a ni lovang. An ngenna hi MPSC Chairman hian a ngaihpawimawh loh chuan Kiran Bedi boruak aia thalo zawk a hmachhawn thei a ni tih a hriat a pawimawh hle.

Sawi tawh ang khan piankum dik tak leh official record in anglo hi Mizoramah mi tam tak, pastor zingah ngei pawh, an awm avangin thenkhat chuan he thil hi chai thamah pawh an ngai lova. “Mimal inbeihna” leh “intih hmingchhiatna” anga lo ngai pawl pawh an thahnem hle. “Tu pawi mah a sawi loh te chuan han chinleh vak a tulna a awm em ni?” tia ngai pawl pawh an awm awm e.

March 30-a Pu Andrew Lalherliana’n thuthar lakhawmtute a kawm hma khan chanchinthar ziaktu pakhatin a han bia a. Mizoram mipui nghawng thil pawimawh tak a nih avanga khawvel hmun hrang hranga Zofaten an ngaihven thu a hrilh a.  MPSC Secretary Pu Tamlal Lohar-a’n he piankum inanglo chungchang a sawifiahna kha a tawk loh thu hrilh a nihin uluk leh fel taka address a tulzia pawh hrilh hriat a ni. Sorkar lamin an sawifiah tura a beisei laiin sorkarin ama sawifiah tura a duh zawk avangin press conference a nei ta niin a lang.

MPSC Chairman chuan a office ah thuthar thehdarhtute a kawm a. MPSC Chairman ni tura India ram danpui constitution Article 316-na in a phut ang a tlin lo ni ngeia a lan hnu pawha insawithiamna lam hriat a nih tak avangin MSU leh dikna duh mi tam takin an ngaithiamlo hle a ni. MSU te chuan April 1 hma ngeia bang turin an phut ta a, "Kan hun tiam chhunga kan ngenna hi a hlawhtling lo a nih chuan Mizo mipui leh zirlaite aiawhin MPSC a zahawm chhunzawm zel theih nan a ṭul angin hma kan la ang," an ti a ni. A “tul” anga hma lak hi dan lam hremi te chuan PIL emaw FIR thehluh thaa an hriat thu an sawi.

Pu Andrew-a leh Pu Tamlal Lohar-a te sawifiahna hrang hrang hi uluk zawka en chuan thil inmillo a awm nual a. Mizoram State Assembly Secretary hlui Pu HL Chunga khan Oct 18, 1991-a "Mizoram State Assembly Who is Who?" ah "Born on the 7th October, 1951 at Aizawl Civil Hospital" tiin Pu Andrew-a chungchang a ziak a.

2008 Assembly inthlana affidavit a siam ah Pu Andrew-a hian "I, Shri ANDREW LALHERLIANA...aged about 57 years" tiin a ziak bawk a.

March 16-a MPSC Secretary Pu Tamlal Lohar-a thuchhuah a siama document zawng zawngah a pian kum October 7, 1953 tih vek a nih thu a tarlan kha thu diklo a ni tih kan hre thei awm e. Document “zawng zawngah” 1953-a piang tiin a inziak tlat lova.

Tin, "Kum 2003 MLA election-ah a ṭhiante MLA nomination form a fill-up tirah October 7, 1951 tiin an lo ziahsak a, an lo thehluh tawh avangin kum 2008 thleng a pu a, remchang hmasa ber 2008/2009 khan Assembly identity card-ah siam diktir a ni," tia Pu Tamlal-a’n a sawi pawh kha 2008 affidavit-a amah Pu Andrew-a ngeiin kum 57 vel a nih thu a ziah avangin thu diklo a ni tih kan hre bawk awm e. Assembly ID card lo “siam diktir” tih kha Pu HL Chunga’n document tlawhchhana Pu Andrew-a piankum a ziahlan leh 2008-a amah Pu Andrew-a ngeiin affidavit-a a kum ziah enin ID card diklo siam a tih theih hial zawk ang. Pu Andrew-a leh Pu Tamlal-a te sawifiahna hian zawhna chhan si loh a siam belh nual a ni.

The Passport Act, 1967 Clause 12 (b) a inziak a leh baptisma channaa kum inziak kha thil inkalh niin a lang bawk.

“Whoever... knowingly furnishes any false information or suppresses any material information with a view to obtaining a passport or travel document under this Act ... shall be punishable with imprisonment for a term which may extend to [two years or with fine which may extend to five thousand rupees] or with both.” - The Passport Act, 1967 Clause 12 (b)

1969-a Australia an pem dawna a passport-a a pian kumah khan October 7, 1953 tih a nih chuan Mizoram Presbyterian Kohhran official document-a a kum inziak kha a diklo tihna emaw 1951-a piang tih inhriain 1953-a piang angin passport dilna a thehlut tihna a ni.

Pu Andrew-a piankum MLA inthlan dawna 1951 anga vawi 3 aia tlemlo ziahlan a nih khan The Representation of the People Act, 1951 section 125A(ii) bawhchhiatna niin a lang bawk.

“Penalty for filing false affidavit, etc.—

A candidate who himself or through his proposer, with intent to be elected in an election...gives false information which he knows or has reason to believe to be false...shall...be punishable with imprisonment for a term which may extend to six months, or with fine, or with both.”

MPSC Chairman hian, "Min ruattute'n bang tura min ti a nih erawh chuan second khat pawh inngaihtuah loin ka bang ang," a ti a. Document fello nuai leh dan bawhchhiatna ni thei in hailang a awm tih hriat tawh chuan a “ruattute’n bang tura” an tih nghak lovin amah zawk hian moral issue a nihna leh legal issue a nih theihna zawn atangin insaseng zawk se thil tha ber tur niin a lang.

Pu Andrew Lalherliana hian thil fello a lo awm tih a pawm a, puitling taka mawhphurhna a lak ngam a tul. Mizote hi a lehlamah chuan kan rilru a tha angreng a, "Ka lo ti dik tlat lo mai" tiin inhnukdawk se kan fak lehling hial zawk awm e.

ARTICLE 320 LEH RP ACT 125A BAWHCHHIATNA LEH SAKHUANA RAWN INRAWLH

Pu Tamlal Lohar-a’n Pu Andrew Lalherliana pian kum Oct 7, 1953 tia a sawi leh a piankum ziak inanglo chungchanga, “Kum 2003 MLA election-ah a ṭhiante MLA nomination form a fill-up tirah October 7, 1951 tiin an lo ziahsak a, an lo thehluh tawh avangin kum 2008 thleng a pu a, remchang hmasa ber 2008/2009 khan Assembly identity card-ah siam diktir a ni” tia thuchhuah a siam khan MPSC Chairman tura ruat hi 2003 atanga 2008/09 thleng chauh he piankum “diklo” 1953 hmang angin a sawi a. Pu Tamlal-a sawi hi a dik a nih chuan MNF sorkar term hnihna chhung chauh kha Pu Andrew-a hian a thiante tihsual vangin a piankum diklo a hmang tihna a ni.

Amaherawhchu, Pu Andrew Lalherliana hian 2003 hma pawhin 1951-a piang angin a lo inziak daih tawh a. "Mr.Andrew Lalherliana was born on the 7th October 1951" a inti a ni. Mizoram State Assembly website-a PDF file an upload pakhatah pawh chiang takin a inziak a ni. Mak angreng deuh chu he website link hi tun hnai mai khan hawn theih loh in a awm ta daih a. Pu Andrew-a pian kum 1951 tih inziahna sorkar website meuhva a lang kha tihlan duhlo an awm pawh a ni mai thei.

http://www.mizoramassembly.in/gazette.aspx?filename=E:%5CAssembly%5CGazette%5CGN%5CGZGN32%20Issue_036.pdf

Pu Andrew-a hi 1951-a piang a nih chuan tunah hian kum 63 leh thla 6 vel a ni a. India ram danpui Article 316-na chuan state Public Service Commission member chungchang heti hian a sawi:

“A member of a (State) Public Service Commission shall hold office for a term of six years from the date on which he enters upon his office or until he attains … the age of sixty two years, whichever is earlier: Provided that …a person who holds office as a member of a Public Service Commission shall, on the expiration of his term of office, be ineligible for re appointment to that office.”

1951-a piang a nih chuan danin a phut ang a pha lova. Kum 1 leh thla 6-in a pel a ni mah zawk ang chu. A nih loh a, MPSC website-in a tarlan anga 1953-a piang a nih chuan Chairman nihna hi kum chanve vel a chelh thei dawn a ni.

Pu Andrew-a pian kum chungchanga Pu Tamlal-a sawifiahna hi dikah lo ngai ta pawh ni ila, thil buaithlak deuh mai a inhailang a. Chu chu India ram inthlan chungchanga dan bawhchhiatna awm thei a ni. The Representation of The Peoples’ Act 1951-a Section 125A-naah chuan affidavit diklo ziah chungchanga hremna heti hian a chuang a:

“Penalty for filing false affidavit, etc -

A candidate who himself or through his proposer, with intent to be elected in an election (ii) give false information which he knows or has reason to believe to be false...in his nomination paper...shall be... punishable with imprisonment for a term which may extend to six months, or with fine, or with both”

Pu Andrew-a hian 2003-a affidavit a thehluh khan kha lehkha kha ama’n hming a sign hnan a. A hming a sign hma khan a thianten a pian kum 1951 anga an lo ziah chu a en nawn leh lo a nih pawhin a hming sign tu a nih avangin ama mawhphurhna a ni ta tho tho a ni. Pu M.Lalmanzuala chu election dan ang thlapa thil a tih loh avangin hrem a ni a. Pu Andrew-a pawh hian a tih dikloh anga a sawilan hi Election lamin enzuiin RP Act Section 125A-na hmangin thil a ti tur ni awm tak a ni. Pu Andrew-a hian ukil tha tak a neih loh chuan ho teah thla ruk lungin a tang thei tlat. Ho te ti ila, danin chiang takin a sawi avangin a ho vak hran lo.

Pu Andrew-a hi 1951-a piang a nih chuan, sawi tawh ang khan, danin a phut ang a pel tawh a. Oct 7, 2013 thleng chauh kha MPSC ah a tel thei a ni.

India ram constitution-a Public Service Commission chungchang chuanna Article 320 Clause (3) ah chuan heti hian a inziak a:

“Functions of Public Service Commissions

...The State Public Service Commission...shall be consulted

(a) on all matters relating to methods of recruitment to civil services and for civil posts;

(b) on the principles to be followed in making appointments to civil services and posts and in making promotions and transfers from one service to another and on the suitability of candidates for such appointments, promotions or transfers;

(c) on all disciplinary matters affecting a person serving under the Government of India or the Government of a State in a civil capacity, including memorials or petitions relating to such matters;”

MPSC a thawk tur te hi sawisel bo an nih a tul takzet tih kan hre thei awm e. A thianten form an lo fill up diklo tih theory hi document dang enin thudik niin a lang lova. Sawi tawh ang khan, hetiang a nih phei chuan thla 6 thleng lungin tan theihna a ni. 

A piankum 1951 a nih chuan MPSC Chairman tura Pu Lalthanhawla sorkarin a ruat hi danin a remti lova. A ruattu te hian dan an hriatloh vang nge an hre lutuk zawk a, Chairman dinhmun pawimawh tak luah ngei tur hian an mi duhzawng tak dah an duh? A enga pawh chu ni ta se, dan ngaihpawimawhlohna lian tak chu a ni ta reng reng a ni tih kan hmuthiam thei awm e..

Pu Andrew-a hian a pian kum hi a chiang ber anga. Hetia inhnialna insiam hi ram rorelna atan a tha lova. MPSC tan phei chuan a thalo lehzual. He thil chinfel dan awlsam chu Chairman thar atana ruat hian a hre ber awm e. Duhthlan tur a tam tehchiamin a lang lo – Thla 6 lungin tan emaw banna thehluh a ni deuh mai. Zahawmna hum duh tan chuan a hnuhnung zawk hi a thlanawm zawk hle ang. 

Pu R.Lalzirliana’n MPSC ah pastor dah tulin a hre bawk a, Rev.Zosangliana Colney MPSC Member atan ruatfel a nih veleh Chairman atan a awm leh ber anga. Pastor zu do thinin do ve lo sorkar hnuaiah lalthutthleng pakhat a luah meuh chuan politics leh sakhua chu kan chawhpawlh chiangkuang viau ang.

PASTOR NUPUITE LEH SORKAR HNA

"…Kei pawh tha ka ti. Pastor pasalah an nei a nih chuan rawngbawlna kha an ngai pawimawh hmasa tur a ni...” tiin Mizoram Baptist Kohhran rorelnaa an pastor nupui sorkar hnathawkte thawk chhunzawm lo tura tih chungchangah Lungleia sorkar officer pakhat chuan facebook group pakhatah a comment a. A sawi zelnaah pastor nupuiten sorkar hna an thawh duh kher nachhan tur a hriatthiamloh thu leh “Pathian tana an pasalte lo support & rawngbawlpui kha an hna tur a ni tawp mai!" nia a hriat thu a ziak tel bawk a.

Hetiang ngaihdan hi rawngbawlna leh economy hriatthiamlohna vang ni berin a lang. Chuti chung pawha mi tam takin an pawm bawk si avangin kohhranten ti zawng hian I han ngaihtuah dawn chhin teh ang, Mizoram Baptist Kohhran chauh lo paw’n.

"Pastor pasalah an nei a nih chuan rawngbawlna kha an ngai pawimawh hmasa tur a ni".

Tualchhunga pastor te rawngbawlna kan tih hi saptawnga “ministry” tih nen hian a intluk a. Rev William Williams-a te, Rev JH Lorrain-a te, Rev FW Savidge-a ten an pian leh murna sapram kalsana Chanchin Tha hrila an rawn kal vang vang ang kha chu kohhran rawngbawlna tawngkam hmanah chuan “mission” tih a ni. Chutiang rawngbawlnaa telte chu “missionary” te pawh kan ti bawk. China ramah khian kei pawh Pathian khawngaihna leh Kohhran te duhsakna vangin missionary rawngbawl hna kum 2 ka thawk ve tawh a. Chuta kan team hotupa chu Reverend/pastor a ni a. A nupui professional background chu nurse lam hna a ni. An inneih dawnin kan team hotupa nupui chuan a pasal tur rawngbawlna avangin a nurse hna chu a kalsan a. A pasal pastor nen chuan Pathian rawngbawlin kohhran enkawl hna an thawk a. Rei tak pastor hna an thawh hnuah kum 10 chhung missionary rawngbawl hna thawk turin an inpe a. An pahnih hnihin chu rawngbawl hna chu English zirtirtu angin an thawk dun a. An nupa kaihhruaina hnuaiah Mizo pawh 5 lai chu mission rawngbawl hna kan thawk a. A then kan thawh hun a zova, a then full time-a mission hna thawk chhunzawmin an awm bawk a.

Kum 3/4 kalta khan kan team hotupa te nupa chuan an mission rawngbawl hna an thawk zova. Tunah hian kan team hotupa chuan kohhran enkawlin pastor hna a thawk leh a. A nupui erawh chuan a pasal neih hmaa hna a lo thawh thin nurse hna chu a thawk chhunzawm leh a. Hna thawka sum a hlawhchhuah loh chuan kohhranin pastor hlawh chauh an pek atangin an inenkawlna/khawsakna man a daih lo a ni. Nikum kum tir khan kan chhungkuain chawlhkar 2 chamin kan va thlen chilh a. Kan hotupa nupui hian a pasal kohhran enkawlna leh rawngbawlna hi a ngaipawimawh hle a, kawng tinrengin a pasal rawngbawlna a tawiawm a ni. Pastor nupui ten full time-a hna an thawh hian an pasalte rawngbawlna an ngaipawimawh lo emaw an thlawp tha lo tih ngaihdan hi ngaihdan dik niin a lang lo. Thlawp that loh chu sawi loh nasa takin pastor rilru hahna tur te an venpui a. An thlawp tha hle zawk a ni.

Tin, he ngaihdan hi kan pastor leh thuhriltute ngei ngeiin an lo sawi thin, “Eng hna pawh thawk ila, Pathian rawng kan bawl thei a ni” tih nen hian a inkalh tlat bawk a. Sum melh ran mi chu awm tak mah se, pastor nupui an nih avanga an pasal pastor rawngbawlna tibuai hi sawi tur an tam lovang. An sum thawhchhuah thawhlawma an pek phei chu Pathian Ram tana a tangkai em avangin kohhranin lawm takin kan la pawm zel a ni.

Ministry tih hi Oxford dictionary chuan heti hian a hrilhfiah a: The spiritual work or service of a Christian or a group of Christians, especially evangelism. Kohhran puipa ni mekte leh lo ni tawh zawng zawng ten “a nilo” an tih miah loh tur chu he thlarau lam hna hi khawvel thil – sum – tellovin a thawh theih loh tih hi a ni ang. Sum hi pawimawh ber a nih loh laiin Pathian berin he’ng kan thawhchhuah sum te a hman si chuan chu sum hnar lo danchan tum ngawt kha a “logic” hriatthiam a har khawp.

“Pastor nupuiten sorkar hna an thawh duh kher nachhan tur ka hre lo”

Nulain pasal a neih hmain Pathianin a nunkawng a zawh tirna hnaah tui takin a lo thawk thei a. A nuna a pek, a pasal kha pastor a nih vang ngawtin, rawngbawlnaah pawh a lo ngaih theih, a tui em em na hna chu thawk zawmlo ngawt tura beisei a dik thei dawn em ni? Rawngbawlna lam chu a ni lo naa nu pakhat lehkha zirsang tak ka hriat chu a pasala chhungten a thiamna lama hna a thawh chak em em an sawi hnawm sak zel a. A tawpah phei chuan an nupa inthenna chhan lian tak a tling hial a. An nupa inthen hnu chuan a thawh thiam zawng leh nuam tih zawng thawkin zalen takin a hun a hmang ta a. Hna a thawh avanga hlawkna chhar tam tak kum tinin Zoram hmun tin atanga fuan khawm Aizawl khawpuiah hian an awm nghe nghe.

“Pathian tana an pasalte lo support & rawngbawlpui kha an hna tur a ni tawp mai a ni!”

"Support" tih hi hrilhfiah a nih loh chuan a chiang lo hle. He sorkar hnathawk hlawh petu Mizoram sorkar tunlaia a buaina ber chu sum leh paiah a ni a. Kohhran pawh hi a tak takah chuan sum ah kan hnianghnar tehchiam lo. Pastor, hlawh tamlo tak, kohhran mipuiin nasa taka kan phut lawi si te hian sum leh paia lo tanpui theitu nupui an neih te chuan a tha hle zawk dawn lo'm ni? Chhungte leh thenrual tha ten an remchan dana pastor te an lo sih chhuah chang te hian an lawm theihzia hi!

Tin, mimal nun, chhungkaw nun hi pastor te leh an nupui te hian an nei ngei ngei tur a ni a. Kan pastor te hi mihring ve bawk an nih avangin an tlin loh thleng thlenga thawk turin kan beisei tur a ni lovang. Holiday chawlh pawh mumal takin kan siamsak ngei ngei tur a ni. Pastor nupui te hian hna an thawk lo a nih pawhin an pasalte anga kohhran rawngbawlnaah kan phut chuan thil diklo hulhual a ni bawk ang. A chhan chu kohhranin hlawh kan pe ve tlat lova. An pasalte rawngbawlna an tawiawm hi Pathian avanga an inpekna liau liau a nih avangin an chhungkaw enkawlna aia an pasal pastor te rawngbawlna dah hmasa tura kohhranin kan phut a nih chuan kan tisual hle tihna a ni ang.

Sum tello hian a khawsak theih loh tih kan hre theuh a. Sum hi sual a nih loh avang leh kohhran rawngbawlnaah mi inpe te leh an rawngbawlna chak taka kaltirna tur sum thawkchhuaktu tam zawk kan mamawh avangin pastor nupui sorkar hna thawkte hi Mizoram Baptist Kohhran hian a bantir a nih chuan pastor rawngbawlna tihchak tumna nia sawi hi pastor rawngbawlna tichautu zawk a ni thei ang.

Tin, he thilah hian Mizoram Baptist Kohhran hruaituten an thlir telloh nia lang chu, kohhrana hlawh la nilo Mizoram sorkar emaw Central sorkar hnathawk te hi All India Service (Conduct) Rules 1968 in a phuar a. Sorkar hnathawkte lo ban emaw bantir hi Mizoram Baptist Kohhran emaw Mizoram Presbyterian Kohhran Synod pawh ni se, an thuneihna piah lam a ni. Sorkar “kuanglo nawr” kan sawi thin a. He hmalak tumna hi kuanglo nawrna chiang tak zawk chu a ni awm e. Sorkar hnathawkte ban theihna tura India sorkarin dan a siamah hian pastor nupui an nih vanga ban theihna a awm tlat lo. Hindu puithiam nupui an nih vang pawhin ban tir theihna a awm chuang lo.

A tawp berah chuan rawngbawlna kan tih hi kohhran hruaitute leh kohhran mi te hian kan bih chian a tulin a lang. Tin, pastor nupui te dinhmun leh an tih tur pawh hi kan hrilhfiah chian a pawimawhin a lang. Sum chungchang pawh kan inzirtir leh a tul awm e. Sum nilovin sum ngainat zawk hi Bible in sual tinreng bul a tih a ni a. Dik taka sum thawkchhuakte hian thil an tisual lo. Tihsual ahnekin thil tha tak an ti a ni. A lo itsiktute an awm a nih chuan chu’ng mite chuan Pathian hmaah thil an tisual zawk a ni ang. Bible zirtirnaah itsikna hi milem biakna a ni miau si a (Kol 3:5).

HINDI LEH DI LO

Aizawl City College Joint Students’ Union (ACCJSU) General Conference vawi 1-naa Chief Minister thusawi DIPR website-ah heti hian a lang a:

"Tuna central sorkar chelhtu BJP phei chuan lehkha an rawn thawnte hi Hindi a ziak vek te a ni tawh thin tiin, hengte hi reilote a zirlaiten an tawn tur anih avangin saptawng leh Hindi hi thiam nal tura hmang hnem turin a fuih a ni."

English thiam that a pawimawhzia hi kan Mizo khawtlang piah lama chet tlat hian a chiang hle a. Kan Chief Minister in English thiam nal tura hmang hnem turin zirlai kalkhawmte a fuih hi a tha ka lo ti hle. A chhan chu, kan hriat theuh angin, a tlangpuiin Mizo te hian English hman hi kan khawr ru deuh a. A ziak leh chhiar thiam vek pawh hian han tawngchhuah dawn tak chuan engemaw zei loh rukna riau kan nei leh thin. Kan tlangmi pui Naga ho te erawh chuan han in sumrukna nei em em lovin an hmang ngam mai a. South India lama kan thiante phei chuan a rik dan dik leh dik lo pawh ngaihtuah lovin an tawng ang maiin an hmang pawp pawp a. An innuihzat hi ka la hre fuh lo. Ka hriattheih chinah Mizo te chauh hi he hnamdang tawng – English – hmang diklo innuihzat kan nih ka ring. Khawvel hnam dang zingah Mizo ten English thumal han lam diklo kan innuihzat anga innuihzat hi ka la tawng fuh lo.

English ho hian an tawng hi khawvel insumdawn tawnna tawng berah leh sorkar leh sorkar indawrna tawngah te an lo hman nasat tawh avangin an tawng thiam hi kawng tinrengin a hlawkthlak a. Mizoram Baptist Kohhranin China rama missionary a tirh theih nachhan ber pawh English vang a tih theih ang. Kan Chief Minister in Aizawl college zirlaite hemi zawna a fuih pawh hi a dikin a awm hle.

English ang em ema pawimawh nilo mah se, Hindi thiam pawh hi India ramah na na na chuan a hlawk thlak hle a. Sikul lamah te ka lo zir tha peihlo mai pawha, Dr.VR Ralte thiam ang chanve chanve tal pawh hi thiam ila ka ti hnuhnawh hle. Vairam kal changa auto rickshaw pu sual deuh han hauh hrep nan te hian a tha a. Pu Hawla sawi anga lehkhathawn zawng zawng sorkar chelhtu BJP hotuten “Hindi a ziak vek” an hman phei chuan Hindi thiam tha nih chu sorkar leh sorkar indawrnaah pawh a tangkai khawp ang. Hindi vek hian Central sorkar hian Mizoram sorkar hi thu rawn thawn thin ta tak tak se, kan buai duh khawpin a rinawm.

Tawng chungchangah India constitution Article 343 (1) heti hian a inziak a, "The Official Language of the Union government shall be Hindi in Devanagari script. Unless Parliament decided otherwise, the use of English for official purposes was to cease 15 years after the constitution came into effect, i.e. on 26 January 1965." India ram danpui an duan tirh khan Hindi hmangtu lam thu a tlang zawk avangin 26 Jan 1980 thleng official language ah hman phawt tura tih a ni a.

Official language-a Hindi hman (chhin) hun, kum 15, a ral dawn khan Hindi hmang velo ho te ngaih a thalo khawp mai a. Maharashtra, Tamil Nadu, Punjab, West Bengal, Karnataka, Puducherry and Andhra Pradesh ah te phei chuan hnam rilru a chawk chhuak nasa hle. PM Nehru-a khan boruak thalo awm thei thlirin Official Languages Act, 1963 hmangin official thila English hman tel a nih theih tur thu a dah a. Kha dan siamah khan "mai thei" (may) tih tawngkam hman a ni a. Dan lam hrilhfiahna ah hian “may” tih hi “shall” tih ang tluka hman tura ngaih a ni tlangpui a. Mahse, kha dan pass ah khan Hindi hmang duh lam tam vang emaw English legal term hman dan hrechiang lo tam vangin English hmanloh lam kha a lian ta zawk a ni.

Prime Minister Lal Bahadur Shastri-a’n, PM Modi-a ang deuhva Hindi a han uar deuh khan, Hindi duhlo Tamil politician leh a hnua Tamil Nadu Chief Minister C. N. Annadurai-a'n postpone tura a ngenna a hnawl a. Tamil Nadu ah nasa takin buaina a chhuah phah a. Mahni inthat hiala Hindi duhlohna lantir te pawh an awm. Congress party a khi a, South India mi Union Minister pahnih an bang a, PM Shastri-a chuan official language-a Hindi chauh hman chu a tilui ta lo a ni.

Official Languages Act, 1963 pawh chu 1967 khan siamthat a ni ta a. English chu Hindi nen official language-a hman tur tiin India rama Hindi official language-a hmang velo state ten an state rorelna inpui (Assembly House) a Hindi chauh hmang tura an pass hma loh chu tihdanglam loh tur a ni ta a ni. Tin, he dan thar hi tidanglam tur chuan Lok Sabha leh Rajya Sabha ah pass ve ve a ngai bawk avangin Hindi chauh official language-a hman hi a har khawp ang.

NDA sorkar hotu thenkhat Hindi hman duh zawkte hian Hindi hi official-a hman duh mah se, India ram danah English hman telna tura ruahmanna a awm tlat avang leh keini Mizo te hian Hindi hi kan hman ber a nih dawn ngailoh avangin CM-in Central sorkar atanga lehkha rawn kal reng reng Hindi vek ni tur anga a sawi hi Tamil hovin an duhloh aia nasa in kan duhlo kan ti thei a ni.

Mizo IFS officer pakhat ka hriat chu a pui angreng khawp. English thiam Hindi thiam thalo a ni a. Hindi a do hran lo. Mahse a thiamloh avangin a hmang lem lo. India ram pawna an post naah Hindi-a lehkhathawn chhiar chhuah tur te an dawng thin a. "Kan tawng a ni lo; ka thiam lova, hmang dawn lo" a ti hmiah zel!

“Delhi ah pawh hian Hindi hmang peih lo fe fe chu vai ho zingah hlei hlei hian an tam” tiin a sawi bawk a. Foreign rama a awm laia Hindi a ziak a chhiar duhloh chungchang ka zawh chianin, “Chhiar duh loh a ni hlei nem, chhiar thiam loh zawk alawm” tiin min chhang.

A sawi zelnaah phei chuan kum engemaw zat a service ve tawh chhungin tuma’n Hindi thiam turin an la tilui ngai lo a ni awm e. A sawi dan takin duhloh lam pawh a ni chiah lo. Thiam loh lam a ni. A ngaihdan chuan Hindi kan thiamlo chung chung Hindi-a lehkha te min thawn luih tlat chuan kan sawi chhuak ngam tur a ni a ti a.

Hindi hi pawng huatna chhan tur a awm miah lova, thiam kan tam poh leh kan hlawk a ni zawk. Mahse, inbarhluih ang zawng emaw “thiam lo chung chung” Hindi-a min biak an tum dawn chuan kan pawmloh thu kan hrilh ngam tur a ni ang. Pu Hawla sawi anga NDA sorkarin "lehkha an rawn thawnte hi Hindi a ziak vek te a ni tawh" a tih hi thudik pawh lo ni ta reng se, English in, "Kindly send us in English, we donot understand Hindi" kan ti thei a ni.                                                                                                                                                                                                                                                                              

AUSTRALIA RAMA SIKUL ZIRNA LEH A BEHBAWMTE

Kan awmna state New South Wales sorkar dan Education Act 1990, Section 22-na ah chuan heti hian a inziak a:

“ Compulsory schooling-duty of parents

(1) It is the duty of the parent of a child of compulsory school-age to cause the child:

(a) to be enrolled at, and to attend, a government school or a registered non-government school...”

He danin a sawi ber chu naupangin kum 6 a tlin tawh chuan a nu leh paten sorkar sikulah emaw sorkara inziaklut sikulah an kaltir tur tih a ni a. Kum 5 an nihin sikul an tan tlangpui a. Kan fanu upa zawk pawh sikul kal rual a nih ve tawh avangin February ni 2 khan KG class a tan a. Nikum lama preschool a kalnaa a thil zir avangte leh in lama a nuin a lo zirtir avang tein school a han kal chu rinaiin a harsat lo hlein kan hria.

Sikul hi zing dar 9:20 ah an tan a, tlai dar 3:20 ah an bang leh a. New South Wales ah hian sikul tan leh ban hun hi a tlangpuiin dar 9.00 am leh dar 3.00 pm a ni a. Mahse, sikul zawng zawng tan hun leh ban hun a inang vek lo. Sikul tin hotuten a tul dan azirin tan hun hi an ruat a, mahse zing dar 9 bawr velah a ni tlangpui.

Sorkar sikula fate kal dawn chuan mahni veng chhung sikula kaltir tur a ni a. Thenawm veng huam chhung bul hnai tea khawsa tan lo chuan veng dang sikul tha tih vanga admission va dil an pawm lem lo. Entirnan tihian han sawi ta ila, Durtlang veng nu leh paten Dawrpui veng Primary School-ah an fapa sikul kal tir duh ta se, an veng huam chhung a nih loh avangin admission a hmu lovang. Chhinga venga cheng chu ni se, veng thenawm an nih avangin Principal-in hriatthiamnain a lo admit thei.

Keini pawh kan veng chhung sikul nilo, thenawm veng Oatley West Public School ah kan dil a. Veng in ri-na awm kan nih vang pakhatin admission kan hmu hlauh a. Kohhrana kan thian thenkhat fate sikul kalna a ni bawk a, kan lawm hle.

Australia ah hian sorkar sikula zirna hi a “thlawn” a ni a. Amaherawhchu, sikul uniform man te, excursion fee te, voluntary contribution leh sikul program hrang hrang man pek ngai a tam hle.

New South Wales hi sorkar sikul zirna nei lian ber a ni a, education department tarlan danin 2011/2012 khan zirlai pakhatah sorkar sum $15718 zel sen a ni. Naupang pakhat zirnaah Rs. 766,123.62 ang zel sorkarin sum a seng tihna a nih chu. Private sikul fee hi $20000 bawr vel a ni.

Thudang daih han sawi kai lawk ila, kumin February ni 7 khan Melbourne veng pakhat sikul  Croydon Public School ah chuan Pu Lalnunmawia Fanai, Melbourne Mizo Association President leh mi thahnemngai dang te hmalakna zarah Mizo naupang ten Mizo tawng an zir tan ve tlat mai. Pu Valtea sawi danin, “Victoria School of Languages (VSL) chuan Melbourne Mizo Association dilna chu ngun takin a ngaihtuah a, zirlai tur an tlem deuh dawn avangin zirtirtu 1 tan chauh hlawh an pek theih thuin an chhang a.  Mahse, ‘A tan nan chuan a pawi lo e’ tiin Febuary ni 7 atang khan kan zir tan ta a ni. A thiam leh thiam rih lote pawh hmun khatah zirtir an ni dawn a. Year 1 atanga year 12 thleng an zir ang a, an zirlai hi sorkar accredited a ni bawk.

Tunah hian Croydon Primary school-ah Inrinni apiangin zing dar 9 atanga dar 12 leh a chanve thleng an zir tawh dawn a ni.  VSL hian senso tam zawk chu tum mah se, zirlaite hian kum 1 atan $ 50 an chawi ve dawn a ni.

Zofate zingah Halkha, Falam leh Teddim chuan [anmahni tawng] an zir tawh a, keini hi 4-na kan ni.  Zirtirtu hi MMA chuan 2 min thlang a, kan inken ve ve hnuah Pu Rosiama hian a chelh dawn ta a ni.  A hman loh changin ka lo zirtir ve thin ang.”

Melbourne awmna state Victoria sorkar hian hnam tlem zawkte hmakhua ngaiin mahni tawng zirtirna kawngah hma a lakpui nasa hle a ni.

Tunlaiin Mizoramah sikul tan leh ban hun thlak danglam tura sorkar thuchhuak ang deuh hian Sydney ah pawh nikum lam khan boruak a awm ve deuhva. New South Wales state chhunga sorkar hmalakna tanpui tura agency Infrastructure NSW chuan nikum kum tawp lam khan sikul tan hun sawn danglam tura rawtna a siam a. Rawtna a siam chhan ber chu sikul naupang zirlai zat pung tur thlirin traffic a khawih nasa dawna an hriat vang a ni. NSW Education Minister pawhin a hnawl vek lova, cabinet lam pass tur erawh chuan sawihona a la awm lutuk lo. Infrastructure NSW chuan sikul tan hma a nih chuan traffic jam a nep dawnin a sawi a. Teachers’ Union erawh chuan he rawtna hi rawtna thaah an ngai lova, zirlai zat pung tura chhut a nih chuan sikulah ekbeng lova sikul building sak belh mai thain an hre thung.

Sorkar chhut dan chuan 2031 ah hian zirlai 173,000 chuang neih belh an inbeisei a. Chu chu 23%-a punna a ni dawn a ni.

NSW Premier ( an Chief Minister) Mike Baird-a’n thlan tlin a nih leh chuan electric thir ban enkawlna privatise an tum atanga sum hmuh theih an beisei $20 billion atangin education sector ah $1 billion dah a nih tur thu a puang nghe nghe a ni.

Sikul tan tih danglam hian traffic jam a tih ziaawm theih dawn laiin nasa takin nu leh pa te a tihbuai dawn avangin Education department lam chuan fimkhur takin thuchhuah an siam a:  "(any changes to start and finish times) would need to ensure that the changed schedule is of benefit to students and caters for all family needs and situations,”an ti a ni

Mipui rorelna kan tih democracy hi an hman thatna ramah chuan sorkar hian thil tih ngei ngei tul a nih loh chuan mipui duhdan, a bikin nu leh pate ngaihdan, a ngaipawimawh hle a. A nghawng turte ngaihdan hi uluk takin a ngaichang a, a zahthiam hle. Zah lova thil a tih tlang pawp chuan mipuiin hremnan an vote tling duhlo khawp.

Kan ramah chuan sorkar hian mipui hi a pu (master) a ni tih hrelovin a chungthlak fova. Sikul tan hun sawn chungchangah pawh hian a ni tho. Sorkar hotu lam thusawi chhiar theiha awm chu Parliamentary Secretary (Education) Joseph Lalhimpuia thusawi te hi a ni deuh berin a lang a. Nikum August thla khan Lunglei Congress Bhavan-ah zirna chungchang heti hian a sawi niin Pu Vanneihthanga Vanchhawng, LPS reporter chuan a ziak a: “Sorkarin education siam tha tura hma a lak naah hian kan nunphung thenkhat mil tur ringawta education hi kalpui chi a ni lova, education kalphung mil tur hian mipuite kan insiamrem a tul zawk a, kan mut hun leh thawh hun te, kan ei leh in leh kan thil tih dan thenkhat thlak danglam a tul a nih pawhin i thlak danglam ngam ang u.”

Report dangah chuan hemi zulzui tho hian, a tawpna tawngkam dang deuhvin, “…school education ruahmanna mil in kan mut hun leh thawh hunte, kan ei leh in (hun) te pawh mipui in kan thlak ve tur a ni” tiin ziahlan a ni a.

MSU erawh chuan he sikul tan hun tihdanglam tum chhan ber nia a sawi chu Infrastructure NSW-in traffic ngawr ngawr thlira rawtna an siam ang deuhvin Aizawl traffic jam tih nepna tur niin an sawi. Thuchhuah heti hian an tarlang: “Kum 2012, September ni 24 a Co-ordination Committee on Traffic Management meeting, Transport Minister Office a neih chuan agenda 14-na ah school timing chungchang hi an ngaihtuah a, ‘School Education hnuaia School timing ngaihtuah ho meeting chuan tha in a hria a, meeting leh ah Director School Education sawm nise. An Department ngaihdan pawh rawn keng tel turin hriattir ni bawk se’ an ti a”

MSU te thuchhuah hi a dik a nih chuan Pu Joseph Lalhimpuia leh kan sorkar hotu dangte hian thudik an sawilo niin a lang. Sikul tan hun sawn hian thatna reng reng a neiloh vang nilovin Aizawl traffic jam chinfel tum vanga Zoram pumpui nu leh pate khawsak dan thlak dawrh hi thil fello tak niin a lang. Sorkarin thudik sawi lova thudang hmanga mipui a hrual tumna phei hi chu mipui zahlohna a ni e.