PRISM GENERAL SECRETARY S.L.NGURSAILOVA SAILO KAWMNA (FULL)

PRISM aiawhin Pu S.L.Ngursailova Sailo, General Secretary (Public Revenue) chuan PRISM hmalakna thar chungchanga zawhna te min chhansak a. Engtin chiah nge PRISM hi kalpui a nih zel dawn tih te I lo thlir ang.

Q1. A hmasain hruaitu thlanthar te lawmpuina leh duhsakna ka hlan duh che u a. Zawhna ka han zawh hmasak duh ber che chu, PRISM 2014 ah hian enge mipuiin kan lo beisei theih thil thar awm? 

A1. Kumin hian kan pawl kalphung kan her danglam nasa hle a. Tun hmaa General Secretary 1 chauh nei thin kha 12 nei turin ruahmanna kan siam a. Tunah hian GS hi 6 kan nei tawh. Tin, sorkar deptt hrang hrang hi awmze nei takin sector hrang hrang ah kan then a. Chu’ng sector te chu GS ten an enkawl. Shadow Cabinet angin kan kal. Sorkar hnathawk te, sorkar deptt ten thil diklo an tihin FIR kan thehlut thin a. Mahse a diklo tih an chhuichhuah ngei ngei te pawh hremna pek chu sawi loh suspend-na order pawh an pek that duh thinloh avangin hah taka FIR tih vak vak hi a tul ta lo deuha hriatna kan nei a. Court lama zualko mai zel hi tha kan ti ta zawk a. Tunah hian PIL (engemawzat) kan file tawh a, PIL pahnih file tur kan la nei bawk. Kumin atang chuan corruption issue bakah development issue hi nasa taka khawih kan tum bawk. TV programme hmangin mipui hmaah kan ram din hmun dik tak hi pholana kan ram hmasawnna tura kan mamawh te phochhuakin sorkar tha nei tura mipui te rilru chawk tho tura hmalak kan tum. Aizawl khawpui chhung bik atan Community Radio tih kan tum a, Labour Agency din turin kan inbuatsaih mek bawk. Tin, sorkar project lian pahnih pathum vel thlan chhuaha evaluation leh impact study neih turin kan rel bawk. Look West policy kan buatsaih dawn a, hemi atan hian Bairabi, Tlabung leh Chamdur phai te tlawh kan tum. Nakum Aizawl Municipal Council inthlanna lo awm tur atan Mipui Manifesto kan siam dawn a, hemi atan hian consultation vawi tam tak nei turin kan inbuatsaih bawk a ni.

Q2.Chief Minister Pu Lalthanhawla'n nikum Zotalk interview ah khan PRISM hi electoral politics a luh tumna nei ang deuh khan a sawi che u a. Corruption do pawl leh watchdog chauh ni lo hian inthlana MLA seat chuh ang chiin kal tha in ti em?

A2. Hei hi, thil mak deuh chu, kan zinnaah hian Zoram dinhmun zirchianna leh kan ram hmasawnna tura Mipui Manifesto kan siam leh kan ram siam that dan tur kan sawi hian electoral politics-a lut turin min beisei deuh zel a. Mahse keini chuan, "Chutiang lam chu kan la tum love," kan tih hian, "Tum rawh u," an ti leh bawl bawl thin a. "Mi tam takin corruption in duh lova mahse thuneitu ten an haw si lova engmah in ti tak tak thei chuang lovang, a ti thei turin hma la rawh u," te an ti bawk a. Ram siamthat duha tuihal mipuite hian ram tana tha tura ke an pen ngam hunah, chuta kan tangkai ve dawn a nih chuan, mipuite chu kan tlanchhiatsan miah lovang.

Q3. Mipui hian sorkar tha neih kan duh thu hi kan sawi lang fova. Eng ber chu nge "sorkar tha" chu ni ta ang? Enge a chhan te min hrilh thei em?

A3. Sorkar tha chuan mipuite mamawh dik tak a pe tur a ni a. Chutianga an mamawh dik tak nei lo nia mipuiin an in hriat chuan chu sorkar an hrawn mek chu sorkar tha a ni thei lovang. Sorkar thaah chuan mipuiten an chanvo an chang ngei thin a, hmasawnna chak takin a kal thin. Rethei leh hausa kar tih zim a ni a. hnathawkte an lungawi thin. Kan ramah hian hleihluak taka induhsakna a nasa em em a, contract tender lova inpek mai mai a tam. Uchuaka hnathawktute registered contractor an nih loh avangin an hna chhe mah se, hrem an har. Chu mai nilovin politician te an nih hlawm avangin hna viltuten dik takin hna an monitor ngam lo thin a ni.

Q4. PRISM in Mipui Manifesto-a in ziahlan sorkar sum kalralna tur ven theih dan ang te hi, tunlai kan sorkar sum neih lohzia en hian, sorkar hruaitute hian enchhin ta se a practical I ring tak tak em?

A4. PRISM hian Mipui Manifesto-a sorkar sum renchem dan tur kan ziak te kha thiltih theih ngei a ni a. Sorkar hian hmang ngam sela chuan anmahni an lawm ang a, mipui kan lawm bawk ang. Mahse hei hi tih a nih chuan minister/MLA nih an chak em emna chhan - hna pek hna sem te kha - a awm dawn tawh lova. Chuvangin an ti ve duh lo ang.

Q5. PRISM office thar tha tak mai thlalakah te kan lo hmu a. Hetiang office changtlung tak hi tunge enkawl deuh ber ang? In address te leh biakpawh theihna te min hrilh thei em? Office hman dan tur ang te min hrilh thei em?

A5. Kan office hi a lian a, a tha ta hle a. Office hmasa let 10 aia lian daih a nih hmel. Office lian leh tha kan duhna chhan hi TV programme leh Community Radio te tih kan tum vang a ni. Tin, PRISM hian consultation, seminar leh meeting lian tham hi kan neih deuh reng avangin Conference Hall hmannan hian sum tam tak kan seng tho a; hetianga TV programme te kan tih dawn phei chuan hmun danga ti turin kan sum neihin a tlin dawn loin kan hria a, in tha tak hi kan luah ta a ni. Office enkawl tur hian Office Assistant pakhat kan la a, kan office ah hian conference hall leh Special Room te hi man chawia hawh theihin kan nei a, hmang pawh an tam ve ta hle. Tin, Office a lo len a inrelbawlna te a len takah chuan Establishment hi Gen Secy pakhatin a enkawl bawk a ni.

Conference Hall hi hman man hi darkar khatah Rs.300 a ni a. Nilenga hmanin Rs 1500,  zanlamah darkar khatah Rs 500 a ni thung. Special Room hi darkar khatah Rs 500 a ni bawk. Projector hmang duh tan programme khat zelah hman man Rs.200 a ni. Tin, recording ti duh nghal tan darkar khatah Rs.1000 a ni. Choka ah ei leh in, chaw ei thlengin a order theih bawk. Kan address hi B-16, Sikulpuikawn Road, Upper Republic, Opposite Veronica K.Zatluangi Building a ni e.

Q6. General Secretary ten department/sector chanpual bik neia hma in lakna, kartin TV program-a chhuak tura kan lo hriat hi a kimchang deuhvin min hrilh thei em?

A6. Hmalak tum dan tlangpui chu kartin TV programme buatsaih a ni ang a, chumi a sawiho tur chhawpchhuah te chu:
i) Sorkar facility leh office accomodation entitlement, Bairabi hydel project, Chamdur phai atanga Tuichawng luia kal, rural connectivity, inter-state connectivity

ii) Targeted public distribution system.

iii) Loneitute hamthatna. Farm electrification leh farm road, NLUP.

iv) Aizawl Municipal Council tha awm theih dan tur. Aizawl leh khawpui danga solid waste management leh disposal system.

v) Hmun him lova in sak chungchang.

vi) Pseudoephedrine, Labour Welfare Board leh Fund

vii) Border Trade (Look West Policy)

viii) Aizawl property tax lak leh Stamp Registration.

ix) Aizawl Khawpuia kuttawh an awm lohna tur & Mizoram sorkar finance dinhmun.

Q7. Enge kan ram rorelnain harsatna a tawh lian ber nia in hriat? Enge a chhan?

A7. Kan ram rorelnain harsatna a tawh lian ber ni a lang chu inenkawlna tha felfai kan keng kawh ngam lo hi a ni. Administrative reform kan mamawh a, mahse sorkar hian a ti ngam lo. Financial management tha kan kalpui ngam lo bawk. Politician te hian ram siamthat aiin thuneihna neih an duh zawk a, hna lian leh te pawh sawi lovin an kutah an dah a, Minister/MLA hmu tura kal te an kal chhan ber chu hna dil leh posting a ni deuh vek.  A chhan chu contract hna te ber atanga a lian ber thlengin a pe theituah kan thlantlin hruaitute hi an insiam a, sorkar hna pawh a pe theituah an in siam bawk a. Officer deptt hotute dik tak a thil ti tura control an tan a harsa. Dan anga thiltih aiin politician leh an thurualpui officer te duh anga kal zel a nih thin avangin kan ram rorelna hian hmasawn aiin hnufual lam a pan zel zawk a ni. Sorkar hnathawk chuangtlai a ban ngam lo a, zirtirtu chuangtlai 7000 chuang pawh a ban ngam lo. Plan Budget atanga hlawh la sorkar hnathawk 20000 dawn an awm a, chu'ngte chuan kumtin Rs.600 crore chuang an mamawh a ni.

Q8. Dik taka thil tih hi mipuiin kan tlin lo leh fo thin a. Dikna kan duh si chuan a khawi laiah tak chuan nge tih dik ngai ta ang? Mipui kan dik hmasak nge pawimawh hruaitute?

A8. Mi diklo te hi a tam zawk an ni. Chu'ng mite chuan an hlawkna tur an chang reng a; remchang an hmuh veleh an man chat a, dik duhna an nunah a awm lova, hamthatna emaw sum leh pai emaw ram emaw an neih theihna tur dik lo taka tiha an chan theihna tur a awm chuan an ti mai thin. Heng hi system tha sorkar inrelbawlna tha in a phuar thei a, kaw tereuhte hmuh hmaih lo te tan khan kaw lian pui pui loophole a tam si a, system tha rorelna dik hmangin heng zawng zawng hi kan ti ping thei a, dik lo taka thil an tih theihna tur laia kha kan siam that a, langtlang taka sorkar a kal chuan mi diklo te hi an chep tual tual ang.

A tih dik ngaihna lai tak chu, sorkar inrelbawlna laiah hian a ni. Langtlang felfai awmze nei a sorkar hian inrelbawlna a kalpui chuan eirukna tam tak hi a rem duak nghal ang. Singapore te pawh khi tun hma chuan an corrupt ve tho, mahse Ombudsman an neih khan mi 2000 chuang an tan tir a. Tunah chuan system tha tak neiin khawvela ram corrupt lo ber te zingah an awm zel tawh a ni.

Mipuiin kan zir lo kan ti fo thin hi a dik lo. Ram hmasawnna turah hi chuan ram hruaitu te zawk hi an pawimawh. Ram hruaitu tha dik leh chak kan neih chuan mipuite hi mawlin changkang lo hle mah ila hma kan sawn zawt zawt ang. Khawvel ram hmasawn mek leh hmasawn tawh te hi mipui ni lovin ram hruaitu tha te avangin a ni zel zawk. Prime Minister Modi a hnuaiah hmasawnna nasa tak kan beisei, chu'ng beiseitu mipuite chu Manmohan Singh-a Prime Minister laia mipuite tho kha kan ni. Ram hmasawnna hi ram hruaitute hmathlir hnathawh theihna leh chaknaah a innghat.

Q9. A tawpnan, PRISM in rorelna dik leh tha kan ramin a neih theih nana hma a lakna hi engtinnge PRISM member ni kher lo te emaw ram pawn, tuipui ral thlenga Mizo awm ten an lo tawiawm theih ang che u?

A9. PRISM hma lakna ah hian khawvel hmun hrang hranga Mizo, ram siam that duh te tan a tel theih a. Tha leh zung, thiamna leh finna te thawh turin kan beisei em em vek a, tunah pawh hian thalai rual India ram state hrang hrang a awm te leh khawvel ram hrang hrang a awm ten PRISM rawn zawmin tunah pawh hian India ram khawpui deuh deuh leh Europe ram thenkhatah te Secretary kan nei a. Chu'ngte chu an awmna ram leh khawpui hmasawnna hnathawn dan te leh inrelbawl dan te lo zir a, kan ram tana hman tangkai theih ang te lo zir chianga hma lo la turin kan ti a ni.

10. Hun tha tak min pek avangin ka lawm e

10. Keipawh ka lawm e

AUSTRALIA RAMA MIZO MIKHUAL LO DAWNSAWN

India ram dan leh thupek kenkawh hna thawktu Indian Police Service officer te training na hmunpui Sardar Vallabhbhai Patel National Police Academy thiltum bulpui heti hian a inziak a: “The primary purpose of the Academy is to prepare leaders for the Indian Police, who will lead/command the force with courage, uprightness, dedication and a strong sense of service to the people.”

Dikna, huaisenna, inpekna leh mipui rawngbawlna thinlung nghet taka an hnuaia police te kaihhruai tura IPS officer te buatsaihna hmunpui ah hian an thupui ber pakhat chu khawvel inthlak danglam chak tak mila police ten hna an thawh theihnana officer te buatsaih a ni bawk a. Ministry of Home Affairs, Govt of India aiawhin National Police Academy Director Pi Aruna Bahuguna, IPS leh Australian Research Council Centre of Excellence in Policing and Security, Brisbane, Australia (CEPS) Director Dr.Melissa Bull te chuan July 28, 2014 khan Griffith University ah IPS officer te training program neihna tur inremna an ziak a. July 30, 2014 khan Mid Career Training Program Phase III tanna turin Charles Sturt University Faculty of Arts Acting Executive Dean, Assoc Prof.Tracey Green chu inremna ziahfel pui a ni a. Training program hi kar 6 a ni a. Kar 4 NPA ah, kar 2 dang Australia ram hmun hrang hranga neih a ni.

Sept 04 - Oct 17, 2014 chhunga neih MCTP Phase III ah hian Mizo pa pahnih Pu John Neihlaia leh Pu Joseph Lalchhuana pawh an tel a. Oct 5 khan Australia rawn lutin Brisbane ah hun an hmang hmasa a, Sydney an rawn pan kawngah Coffs Harbour zan khat riakin an tlawh a. Oct 11, 2014 khan Sydney rawn thleng thlain tunkar tawp lamah Australia khawpui Canberra ah ni hnih vel hun an hmang bawk ang.

Facebook kaltlanga an rawn kal tur kan lo hriatin kan Mizo IPS officer te chu kan be pawp a, an thlennaah kar hmasa inrinni zan khan kan fate nen kan Mizo mikhualte chu kan han hmu a. A tuk an hunawl neih chhun a nih avangin zinmite tlawh thin hmun thenkhat tlawhin kan chhuak hova. Chaw chhun ei turin Sydney chhak deuhva awm Pi Lawmzuali leh a pasal Ian Barrett-a ten min sawm a. 

Pi Lawmzuali hi nurse a ni a. A pa chu Pu Zaluta, Treasury Square veng a ni. Mizo nu diktak, mikhual duat em em mai chi a ni a. A pasal sap pa gentleman tak mai Ian-a nen min lo dawngsawng hneh hle. Chaw ei pahin kan inkawm a, Pi Lawmi’n hmanlai chanchin a sawi a. Kan mikhualten an lo zawm thei bawk a. Treasury Square ram tha lai taka a nu leh paten inhmun an neih dan te leh khatih laia D.C. Barkataki-a’n  kawng ana awm lo zawk tura a duh vanga rangva tel 3 peka a thlang deuh ram thlang tura a tih te leh a nu in DC ngenna hnial a, an thlan/pek tawh ram a sawhsawn loh tlat dan te min hrilh a. Kan hlim thlang hle. Kan nu leh pa te rual ho bulah mah ni se, naupang chhia ang lovin min kawm a. Hun tha tak kan hmang thei a ni.

Chawhnu lama bazar hlek leh Sydney Opera House tihte tlawh kan duh avangin Pi Lawmi te inah chuan kan awm rei thei vak lova. Chaw ei khamah thla te kan han la sawk sawk a, Pi Lawmi’n an thenawm German pa Helmut-a hmanhmawh takin a han kova. Anin kan zavaia lanna turin thla min han laksak a. Kan inpeih fel veleh Pu Ian-a’n a Volkswagen Golf car in an veng hnaih ber rel station Morriset Train Station ah min va thlah a. Kan haw lam chu kan puar deuh bawk a, kan nu leh Pu Joseph Lalchhuana te chu an muthlu nasa hle. Pu John Neihlaia nen kan mutthluk ve lem loh avangin kawngtluan deuhthawin kan titi a. Kal chhung darkar 2 pawh reilo angin a hriat.

Pu John-a leh Pu Joseph-a te hi dan leh thupek kenkawhna lama tawnhriat ngah tak an ni ve ve a. Mizo society tan mai nilo, an hnathawhna hmuna mite tan mi tangkai tak tak an ni.

Sapram police te hnathawh dan leh felfai zawk leh hlawk zawka mipui rawngbawl hna an thawh dan te an rawn hmuhpui a. Sapram police te hi a tlangpuiin an efficient viau. A chhan bulpui pakhat nia lang chu an hna chak taka an thawh theihnan dan hlui leh chak tawklo te an tihchak vang a ni. Tun hmaa khawtlangin harsatna a tawh thin mila dan siam te chu kum 30/40 hnuah a lo rintlak reng tawh lova, chuvang chuan anni paw’n a tul dan azirin an dan awmze nei (relevant) lutuk tawh lo te an tidanglam hlawm a ni.

Tlaiah kan mikhualte chu Sydney Harbour Bridge leh Sydney Opera House te kan tlawhpui a. Ni tlak hma deuh khua la en lai siin kan thleng phei hman a. Boruak a nuam bawk nen, han hawi thawven vel a nuam hle.

Chaw ei hmain an hotel thlenna lamah inphihfai turin kan let hova. Zing dar 9 atanga chhuak tan kan nih avangin room nuam taka han hahchawlh chu a nuam duh hle. Kan ti nek nek a, chaw ei tura kan chhuah meuh chuan dar 10 a lo pel duai tawh a. China Town ah kalin Korean restaurant ah kan chawl a. Duhzawng kan han lam sap sap a, Pu John-a chuan octopus ei chhin a duh a. Octopus note leh bawngsa chhum kan lam sak a. A han ei vel chu tui a tih ai mahin a octopus ei hmasak ber a nih avangin nuam a tih hmel hle. Kan ei puar peng pawng tihah kan in thlah fel a. Anni an hotel lamah an phei a, keini Central rel station ah puar ulin, mutchhuak angreng tak siin kan phei a. In kan thlen chuan zanlai a lo pelfel tawh a.

Sydney ah hian Mizo tlawhtu kan nei ve leh zeuh zeuh thin a. Min rawn tlawh ve chang hian heta Mizo lo awm ten kan remchan danin lo dawnsawn kan phur ve thei hle. Tin, Canberra leh Melbourne lamah te phei chuan awm nghet pawh an thahnem zawk a. Chhan engvang pawha rawn zin tum te chuan facebook kaltlang te hian min rawn be pawp thei thin ula, awlsam zawka in rawn cham chhung lo ruahmanpui theih dan te pawh kan nei thei ang. 

Canberra ah hian Pu K.C.Lalvunga fanu Pi Zami te chhungkua an awm a. Ani hi Canberra mai ni lo, Australia hmun hrang hranga Mizote hmakhua ngai tak leh a theih phawt chuan, Pi Lawmi te ang thova, mi lo tanpui hreh lo a ni.

Pu John-a leh Pu Joseph-a te zankhat riahna khua Coffs Harbour ah pawh hian Pu Bualhranga fanu Dr.Zoremchhingi te chhungkua an awm bawk a. Anni pawh mi inhawng leh inphal tak an ni a. Tul thila be pawp duh tan chuan Pi Zami te, Pi Lawmi te leh Dr.Chhingtei te hi an inhawng em em a ni.

Mizote hi kan inzarpharh ve zel a. Kan hnam min phuartu hi kan ram pawnah pawh a lo nghet hle. Chumi rual chuan, Australia miten khawvel inher danglam mila an dan hlui neih te an tuaithar (update) zel ang hian keini pawhin kan hawiher te, kan ngaihdan te leh kan duhdan te kan tuaithar a tul. Hmasawn tur chuan min bukrittu kan thlauhthlak ngam a, ram danga hnam dang ten hma an lo sawn bik dan kan en ngam a tul hle a ni.

DIK TAKA RAM LEH HNAM CHHAN

“Sorkar leh MZP-te'n inremna an siam” tih Sept 26-a chanchinthar lama kan lo hriat khan ngaihtuah chianin makna deuh a awm. MZP te thil phut – Chakma leh hnamdang te seat pek tawh sut leh STEE Entrance Rules-a “indigenous” tih awmzia hrilhfiah tura sorkar an ngenna – hi tuna kan sorkar hrawn hian a ti thei dawnin a lan loh vang a ni.

Seat pek tawh te kha Category-1 kalha lo pek pawh nise secularism leh hnamtin te intluktlanna vawngtu nia insawi Congress (party) sorkar hian, "thih leh thih" a ti te a nih ngawt loh chuan, a sutlohna chhan tur a tam zawk a. Tin, kan dan siam kalh chiang tak a nih rualin sut kher loh hi keimahni tan zawk a thatna pawh a awm thei mai thei a ni.

H&TE Minister in “indigenous” tih tawngkam a hrilhfiah thei lo leh Law department lamin an la hrilhfiah lo leh zel hi thil mak tak a ni bawk. A chhan chu Art & Culture department hnuaia Tribal Research Institute (TRI) in lehkhabu a buatsaiha “Chakma Chanchin” tih kan en chuan heti hian a inziak a:

“Mizoram lei, Chakma hoten an rawn rah hmasakna ber chu 1872 A.D. khan a ni”

TRI thiltumte 5 zinga a hmasa berah chuan, “Collection of factual information about...history…” tih a ni a. Uluk taka lehkhabu an buatsaih hi 25^th Oct 1866-a, Patna khuaa piang Robert Henry Sneyd Hutchinson-a’n, “An Account of the Chittagong Hill Tracts” tih a ziak tlawhchhan a ni a. Hemi lo pawh hi Chakmate Mizoram mi an nihlohna tihchianna document dang a awm nual a ni awm e.

R.H.S.Hutchinson-a kha Princess Victoria's (Royal Irish Fusiliers) 5th Battalion-a Lieutenant a ni a. A hnuah Bengal Police Department zawmin, District Superintendent a ni. Chakmate chungchang a lo chhinchhiah atanga kan hriat theih chu Chakmate hi 1872 hmain Mizoram leilung an rah hriat a la ni ngai lova, chuvang chuan Mizoram leilung fate emaw Mizoram indigenous tih theih an ni lo a ni. Chu chu Mizoram sorkar pawhin a lehkhabu chhuah hmangin a lo sawi chiang tawh vek zawk a. Pu Romawia’n Chakmate Mizoram indigenous an nih leh nih loh a sawi thei lo hi thil mak a ni. Art & Culture minister a ni leh nghal a.

Chakmate'n “hmasang” atanga Mizorama awm tawh anga an insawi hi 1872 kha “hmasang” kan ti dawn a nih ngawt loh chuan thu belhchian dawl niin a lang thei lo. Hemi chungchangah hian Chakma Law Forum President D.K.Chakma hnenah kar hmasa ningani Oct 2 khan an email chakmalawforum@gmail.com ah tlawhchhan tur document rintlak an neih leh neih loh zawh a ni a. A zinkual lai a nih avanga mumala a la chhan hman loh thu a sawi.

(Pu Romawia tih loh) Mizo mipui nawlpuiin R.H.S.Hutchinson-a ziak kan pawm a. Chakmaten hei hi an pawm ve chuan Mizoram leilungfa nihna hi an chanvo a ni thei lo a ni. Chakma Law Forum hotupa chuan “an thil thlirdan” sawipui an duh viau a. Mahse, helai thuah hian Tribal Research Institute innghahna anga thudik rintlak (factual information) a nih loh chuan historian te ngaihdan leh thlirdan hrang hrang te hi innghahna tlak a ni lovang.

Oct 6, 2014 khan Congress hruaitute zinga mi Pu David.M.Thangliana’n Vanglaini chanchinbuah Chakmate chungchang leh a kaihhnawih a rawn ziak a. Congress pa a nihna anga a thlirna chu mi tam tak tawmpui loh a nih theih laiin thil pawimawh deuh a rawn tarlang a. Ngaihtuahzui atan a pawimawh hlein a lang.

Bhanu Choudhury vs State Of Mizoram And Ors. 26 September, 2000

MZP ten an nawrchhuah STEE Entrance Rules siam a nih hnu lawk khan Silchar val Bhanu Choudhury chuan he Mizoram quota chungchangah hian Mizoram sorkar a khing a. High Court in a ngaihtuah hnua a judgement siam hi kum 14 Mizoram sorkarin a bawhchhia tihna a ni.

High Court judgement-a kan hmuh chu, “In the light of the discussion held in the body of the judgment, we find that the new Rules of 1999 to the extent as contained in sub-rule (3) of Rules 5 providing that selection shall be made from Category I first. In case sufficient number of candidates are not available from Category, I remaining seats shall be filled up from Category II and III and likewise, is held to be ultra vires and is struck down. It is, however, clarified that it would not affect the admissions which have already been made so far in pursuance of which children are already taken up their courses of study.” (indiankanoon.org)

Chakmate, Mizoram indigenous an nihlohna atanga a dik thlap laiin Zofate tan chauha kan lo induhsakbik hi India ram danpui kalh a ni, an rawn ti a ni ber. An tlawhchhan danpui pawh Dr.C.Lalawmpuia leh a thian doctor 34 ten doctor hna lak chungchanga Mizoram sorkar an khin tuma court-in Mizoram sorkar thiamloh a chantirna lai pakhat Indian constitution Article 16-na tho kha a ni.

India ram danpuiin Fundamental Right pasarih a pawmte zinga Right to Equality (intluktlang vek kan nihna chanvo) ah hian Article 16-na hi a tel a. Amaherawhchu, he dikna (right) hi khua leh tui te tan chauh a ni. Khua leh tui leh ram dang mi (foreigner) ten an chanvoa an neih dikna (right) chu Article 21-na Right to Life and Liberty hi a ni a. He dikna hi Saikhumphai chungchangah khan sorkarin a tihtur a tih loh chiang tak avangin Zo hnahthlak mi engemaw zatin an hloh vek tep a ni.

Chulam chu hun dangah sawizau ta ila. Kan han sawi tum ber chu kan STEE Entrance Rules siam hi kan siam hnu lawkah High Court in Mizoram sorkar chu khatianga dan siam theihna thuneihna a neih loh thu chiang takin a lo sawi daih tawh zawk a. Kum 14 teh meuh Zoram mipuiin kan lo hre lo a lo ni!

Mahni tawnhriat han zep ta zeuh ila, 1998 khan Mizoram quota hi remchangah hmangin Bangalore bul Devangere khuaah Civil Engineering zir nan ka hmang ve a. Ka thian 6 dang ten tha taka kan state quota an hman zawh laiin, Kiran Bedi fanu ang maiin ka zirlai chu zir zo lovin ka tawpsan a. Ka seat chan kha ka khawhral ta ringawt a nih chu. Kan zirna college-ah chuan kan kal hmaa kal pakhat Aizawl khua, Gurkhali tlangval fel deuh mai hi a lo awm a. Khatih lai khan STEE Entrance Rules siam a la ni lo bawk a, tuna kan harsatna ang hi a tawk lo niin a lang. Tin, ka hriatzui zel dan chuan Mizoramah a haw chho leh a, a thiamna chu Mizoram chhungah a hmang zui a ni.

Congress leh MNF party te hian vote an duh tlat avangin Chakma issue hi awmze neia chinfel tumna an nei tak tak dawn lova. MNF President phei chuan July 16 khan Lawngtlaia Chakma engemawzat MNF party-a a lawmluhnaah Autonomous District Council 3-te “dinhmun ṭha zawk leh thuneihna sang zawk pek an nih theihna atan theihtawp an chhuah dawn” thu a sawi a nih kha!

Congress sorkar tan chuan an tlin theihna a nih tlat avangin Chakma te hi a ngam ngai dawn lova. "Zo ethnic" tan bik tia STEE Entrance Rules-a dah an tum te pawh hi kan ram leh hnam hmingchhiatna a thlen thei tih hre rengin pawiti lovin an kalpui hmiah hmiah a ang hle. Chuvang chuan Chakma vote hlau ve lo ho ten kan ram leh hnam thatna leh humhalhna tur hi, dikna nen, huai taka kan kalpui a tul takzet a nih hi. Kan dik erawh a tha ni mai lovin a tulin a tul.

SHOULD WE REVISE OUR HISTORY?

On the 14th August 1947, the representative and administrative head of the British India government in the Lushai Hills (renamed Mizoram) Superintendent L.L.Peters held a meeting with 50 accredited leaders of the Mizo (Lushai) community. Among them, five were Chiefs - Lalbuanga, Lamhliara, Ch. Ngura, Lianbuanga and Liansailova.

The reason for the historic meeting was to determine the destiny of the Mizo people because they knew that the British were quickly departing India and the leaders of the community believed in the principle of self-determination. The Mizo people, historically, never had any sense of togetherness with India, a country they were being slowly wedded to. The leaders of the community made it clear to the British India government, through its representative in Aizawl, that their destiny must be in their hands as it had always been.

Superintendent L.L.Peters and Assistant Sainghinga officially signed the resolution.

Resolution No 2.(iii) clearly indicated the right of the Mizo people to determine what they would want at a later stage -

"Resolved that if the Lushais are to enter Indian Union their main demands are...that the Lushais will be allowed to opt out of the Indian Union, when they wish to do so subjected to a minimum period of ten years."

The 50 representatives of the Mizo community were clear and the British representative understood in no uncertain terms that for the Mizos, it was not a question of "If" but a question of "when" they would want to assert their sovereignty at a later stage. A copy of the "Proceedings of meeting of the accredited leaders, Lushai Hills" is available on http://www.zogam.org/documents.asp?article=documents_212.

The officially binding recognition of the wishes of the people of Mizoram signed by the sole representative of the British India Government L.L.Peters deserve a sincere recognition and reconsideration as the political turn of events after 10 years of the signing completely ignored the resolution.

Notwithstanding the fact that the government of India signed a Memorandum of Settlement with the then underground Mizo National Front government on the 30th June 1986, I see no reason why the 14th July 1947 resolution signed by the representative of the British India government should not be honoured.

Perhaps the time is ripe for serious historical revisionism. After all, we the Mizo people lived in self sufficiency under the rule of the sovereign Chiefs. Today, we have money given (literally)  to us by the Indian government along with all the trappings of being part of India, a nation we never belonged to. Perhaps it is time we retraced our roots and rediscover our identity and destiny. Perhaps we should revise our history. Should we?

RORELNA DIK LEH CHAKMATE

Mizo rilru dik tak atang chuan Mizoram leilung fate ah hian Zo hnahthlak nilo hnam te hi telh theih niin a lang lova. Congress pa Pu Lalthanhawla pawhin politics ngaihtuahna tel miah lova a ngaihdan a han sawi chuan a puak pawp a nih kha.

May 14, 2011 khan Chakma pawl hrang hrangten thuchhuah intawm “joint statement” an siam a. An thuchhuahah chuan Chief Minister Lalthanhawla an dem hle. An dem chhan pawh Aizawl Post chanchinbu April 28, 2011 chhuaka Pu Hawla thusawi lo lang vang a ni.

Chakma pawl thuchhuahin a dem em em chu Pu Hawla’n Chakma te Mizoram leilung fate an ni lo a tih nia an sawi a ni a. Mizoram tan an hnawksak tia a sawi nia an sawi phei chu Chakma NGO te hian an helh hle a. Hnam tlem zawk te dikna leh chanvo zahsak turin Chief Minister an ngen hial a ni.

He thu hi Mizoram Chakma Development Forum (MCDF) newsletter The Chakma Voice global edition 2012 phek 19-naa MCDF te activity report 13-na “Joint Statement against Mizoram CM, Mr.Lalthanhawla” tih hnuaia lang a ni a. Pu Hawla thusawi hi Pu Laldenga thusawi nen a in anglo hle. Congress hruaitu pakhatin facebook-a Pu Laldenga’n Assembly House-a thu a sawi nia a rawn tarlan hetiang hi a ni:

"Engpawh ni sela, kan zuk hriat a chu keini major community te hian keimahni zinga Mizoram-a lo awm reng reng minority te hi helai ah Pawi leh Lakher an ni emaw, Gurkhali an ni emaw, Chakma an ni emaw khalai a native anga kan lo pawm a, constitution chunga kan lo dah a election rule a kan lo chhun luh tawh te lo enkawl a, chhawmdawl a, an nun kawnga kan kaihhruai hi chu Major community hian kan tih tur a ni. He House pawh hian kan tih tur a ni tih kan ring theuh in ka ring” (Assembly House proceedings record)

“Native” tih te, “ram leilung fa” tih te leh “indigenous” tih te hi awmze thuhmun an ni a. Chuvang chuan an thusawi atanga tehin Pu Hawla hian Chakma te hi Mizoram indigenous ah a pawm lova, Pu Denga khan Mizoram indigenous ah pawm mai tha a ti ni berin a lang. A letling angreng khawp!

Pachhunga University College Asst Professor Lalthlamuana Ralte thuziak “Mizoram Chakmate leh zirlai pawl hmalakna” ah heti hian Chakma te history a lang a:

1872 - Mizoram an rawn luh chhinchhiah hmasak ber. British sipai puakphur 500 an ni a. An zavaiin an haw leh vek. Mizorama mihring awmzat chhinchhiahnaa an lan hmasak ber 1901-ah an zavaiin 198 an ni.1931 ah 836. 1941 ah 5088 (a hma aia punna 508.6%). 1961 ah 19377.1971 ah 23236. 1981 ah 39638. 1990 bawr vel phei kha chuan 80000-100000 an ni awm e.

Chakma te hi 1872-a Mizo ten ram kan luahah sap sipai hovin an rawn luhpui chauh a nih chuan anmahni insawi dana “hmakhawsang” atanga awm tawh han tih theih chi niin an lang lova, Mizoram “native” emaw “indigenous” tih theih an ni lo a ni. MNF rawn chhuah meuh kha chuan an lo insawhnghet hman tawh viau a, Pu Laldenga pawh khan tihngaihna tak hrelovin Mizoram leilung fate anga lo pawm ve mai thaa a hriat thu a sawi ni berin a lang. Kan mihringpui te chunga ngilneihna leh lainatna lantir hi Bible zirtirna nen pawha inmil a ni a. Chumi zawnah chuan Pu Denga thusawi nia tarlan hi a dik thlap a. India ram constitution leh Universal Declaration of Human Rights nen pawh a inmil hle a ni.

Amaherawhchu, hrilhfiahna dik takah chuan Chakmate hi Mizoram “native” an ni thei lova, STEE Category-1 hnuaia (Mizo) “indigenous” tih theih an ni lo a ni. An pi leh pu te atanga Mizorama lo khawsa tawh Gurkhali te Mizo/Mizoram indigenous an nih loh ang bawka chiangin Chakma te hi Mizo/Mizoram indigenous an ni lo a nih chu. Pu Hawla sawi hi a dik. Tin, MZP ten STEE entrance rules an buaipui laia an president, tuna MLA ni mek Pu Lalruatkima pawhin “indigenous” tih tawngkam dah a nih khan tuma’n Mizote lo chu rilru ah an dah lo niin a sawi bawk a ni.

Mizo mipui, a bikin thalai te, thin khei ta ber chu H&TE Minister R.Romawia’n Chakmate Mizo indigenous ang maia a sawi leh Law department in “indigenous” tih tawngkam an hrilhfiah duh lo hi a ni awm e. Pu Sawta pawh, hemi thuah hian hotu leh hruaitu chak nihna a lantir loh vangin, demna tur amah leh amah a insiam niin a lang. Thla khat chuang ngawih reng ai chuan Supreme Court case “Kailas & Ors vs State Of Maharashtra Tr.Taluka ... on 5 January, 2011” ruling, Chakmate pawhin an tlawhchhan, point 34-na “…The mentality of our countrymen towards these tribals must change, and they must be given the respect they deserve as the original inhabitants of India” tih hmang hian Chakma te dinhmun hi hrilhfiah ve ta mai se. Mizo rilru chuan a pawm miah lovanga,  mahse India ram danin chu hrilhfiahna chu a pawm avangin hrilhfiahna dang a la awm hma chu sorkar pawhin a hmang thei a ni. India sorkarin Mizoram chhunga Scheduled Tribe (ST) 15 a pawm zingah Chakmate hi No.1-a ziahlan an ni a. Chakmate ST an nih chuan Supreme Court ruling tarlana “original inhabitants” (indigenous/original inhabitants/ram leilung fate) nihna an hauh hi tlawhchhan neilo a ni lo tihna a ni.

Amaherawhchu, history kan en chuan hmakhawsang atanga lo awm tawh anga an insawi hi a dik lova, ST an nih kan pawm theih laiin Mizoram leilung fate (indigenous) status erawh pek theih an ni lo a ni. Australia ah hian indigenous hnam chu Aboriginal ho leh Torres Strait Islander ho an ni a. Chhuan tam tak lo awm ve tawh mingo ho hian chu status chu an chuhpui lo, a tir atanga awm (indigenous) an nih loh avangin.

“Kailas & Ors vs State Of Maharashtra Tr.Taluka” case hi Scheduled Tribe hrim hrim chungchangah chuan a tha viau a, mahse Mizorama Chakmate chungchanga tlawhchhan bera hman a nih dawn chuan Chakma te tan pawh thil buaithlak niin a lang. A chhan chu an tobul ngaihtuah tel a ni tlat lova. 1872 hmaa Mizorama awm ngai lo an nih si chuan “original inhabitant” nihna pek ngawt theih niin an lang lo. Chumai bakah a hnu zela Bangladesh atanga rawn pem lut ngei nia hriatte phei hi chu The Foreigner Act, 1946 hmanga an chungthu ngaihtuah ngei tur zawk niin a lang.(Mizoram sorkar kan neih tawh te zingah he dan hmanga Chakma foreigner man I hre tawh em?)

Tuna kan buainaa Chakma zirlai 38 leh hnamdang 3 seat chang tawh zir mek te hi kan STEE rules tehna atanga zir thei tur an nih miah loh laiin, ngaihtuahna puitling tak hmang nih kan duh chuan seat pek tawh te hi sut leh tura nawr chi a ni lo. Official-a a sawi rik pawh kan sawirik vaih chuan sorkar mualphona lian tak a ni thei a, Mizo mipui beidawnna leh thinurna a thlen thei bawk a ni.

Mizoram sorkar hian a tih tur dik tak nia lang chu Chakmate Mizoram “indigenous” an nih loh an hotupa berin April 2011-a a lo sawi tawh nemngheh leh tun atanga Mizo te chanvo humhalh hmasak a ni. (Ka hnamdang nupui pawh hian Mizoram sorkarin Mizote a duhsak hmasa lo hi mak a ti hle!) Mizo mipui rilru a tihnat avang leh a hna a thawhthat loh em avangin Minister R.Romawia hian a nihna hi ama thuin chawlhsan bawk se, a tan leh Congress sorkar tan hian thil tha tak a ni zawk ang. A bak chu beisei lo law law zawk ila, kan hahdam a ni mai.

MIZO NATIONALISM LEH A KAIHHNAWIH

Mizo nupui pawh nei lo hian Mizo nationalism chungchang hi ka lo sawi ve ngawt thin a, thinlungah pianna hnam rilru a thih miau loh avangin zawi zawia kan hnam nekchepna awm thei leh awm mek thil te hi a sawichhuah loh theih thin si loh a. Kan rawn auchhuahpui ve leh ngawt thin a nih hi.

“Greater Mizoram” tih thupui ang chi hi tun dinhmunah chuan buaipui thei turin kan tlin lovin ka hmu a. A chhan pakhat pawh Mizoram chhunga cheng Zo hnahthlak ngei ngei te hi kan inlungrual tawk loh em vang a ni. 2006 khan Lawngtlaia pastor pakhatin YMA leh YLA tih tawngkam vang ringawt pawha inkhawih mai theihna a lenzia min hrilh ka la hria. Tawngkhat hmang inkarah pawh English ho leh Scot ho thenkhat ang maiin kan rilru a hrang hle tih a hriattheih. Saiha district ah phei chuan tawng hrang lehzual Mara tawng hman vangin rilru pawh a inanglo lehzual ngei ang. Mara tawng hi “Mizo” tawng kan tih mai nen hian danglam viau angin ka lo ngai a. Mahse, high school-a ka thianpa pakhat history Assistant Professor chuan research a tihnaah kan tawng bul inanna a tam thu min hrilh a. Kan inhlat tehchiamlo ni awm tak a ni. Amaherawhchu, hnam khat anga khawsak ho kan thiam tawklo viauin a lang lawi si a. Tan lakna tur a tam hle.

Hman deuh khan Dr.H.T.Sangliana’n, “Kan Hnam Hming ‘Mizo’ leh kan ‘chi’ te hi” tih thupui hmangin article a ziak a – “Vawiin ni thlengin, kan zingah, “MIZO” tih kan hnam hming atana kan pawm ta hi, a awmzia enge ni tihah leh, Mizo chu kan ‘hnam’ hrang hrang, Sailo, Pawi, Hmar, Paihte, Ralte, etc, min pawt khawmtu mai chauh a ni, tih ang rengtea chiang lo kan la awm nuaih niin a lang.

A mawl thei ang berin han sawi ila. Tunhmain Lusei/Lushai tiin kan chhehvel hnamten min hre thin a. Mahse, kan hranghlui thil chhut chiang lehzualtuten, ‘Lusei tih hian min phuar pumkhat zo tawk love, kan zinga chi hrang hrangte in angkhat leh intiat tlang veka min phuar khawm turin, kan hming atan “MIZO” tih i hmang tawh zawk ang u’ an tih tak avanga kan hnam hmingah MIZO hmang ta kan ni.

Kan ramhi tlangram leh thengthaw tawk, ‘ZO’ tawka kan hriat avangin tha kan ti tlang a, ‘MIZO’ tih chu kan ram chhunga awm zawng zawngte min huam vektu koh hming atan kan lo pawm ta a ni. Tichuan Mizo hi kan hnam hming lo ni tain, tun hma a kan hnam tia kan lo sawi thin Sailo, Pawi, Lakher(Mara),Paihte, Hmar, Ralte, etc te chu kan “CHI” tiin kan lo sawi ta zawk a ni. Mizoah hian Mizoram chhunga cheng zawng zawngte kan leng vek tur a ni a. A leng veloa in ngai leh ni ve lova in ngaite chu an chawh thlawnin an buai thlawn mai dawn a ni. Chutiang bawkin, a inti Mizo apiang kan Mizo anga, a inti Mizo lo apiang an te telh telh mai dawn a ni”

Dr.Sangliana hi Hmar hnam a ni tih kan hre theuh awm e. A sawi tum hi a chiang reng a, mahse Mizo tiha tel ve lova inngaite an “chawh thlawn” mai anga a sawi lai tak hi, a tawngkam a fuh chiah lo bawk a, thenkhatin an lo la na hle. Mara tlangval pakhat phei chuan na angreng takin a rawn chhang let a, “chawh” nih a pawi tihloh zawk zia ang zawng khan a rawn ziak tain ka hria. Kan chibing nihna te hian “Mizo” hnam anga lungrual thap thap tur hian nasa takin min la daidang niin a lang. A tam zawk lahin a tlem zawkte kuangkuah kan thiam tawk lo fo bawk thin nen. Kan ram pawna kan “unaute” phei chu kan tawngkam mawi lem lo takah te hian kan thinlunga kan pawm zan lohzia a langin ka lo hre thin.

Mizo hnam leh nationalism chungchang hrim hrim ngaihtuah hona chu Zotalk tv program-a kan mithiam rualte titi kha a tha hle. Youtube ah en theihin a awm leh nghal a, (http://bit.ly/1qXJSi0) a bengvarthlakin a tangkai hlein ka lo hria.

“Mizo” tih hi a insawhnghet tha thawkhatin a lang a, a aia huapzo tawngkam kan duhtlan zawk te a awm a nih loh chuan “Mizo” hnam zawng zawng te hian pawmtlang thei vek ila kan hlawkpui ber tur niin a lang. Chumi hnam hming  hnuaiah chuan a hnambil ten tha kan tih angin kan hnambil thil te kan vawng thei reng tho anga. Mahatma Gandhi-a thlirna ang deuh khan “Mizo” hnam pangpar huan mawi tak angin kan awm theih a beisei awm.

Tunlaiin kan ramah hnam rilru a sosang nasa hlein a lang, facebook vela mi tam tak sawi atangin. A tipuaktu pakhat pawh Pu R.Romawia’n Mizoram sorkar quota-a Chakma leh hnamdang zirlai ten technical lam zirna seat an hmuh chungchangah, "Chakma-te hi Mizoram mi an nih leh nih lohna leh, tribal an nih leh nih lohna kan hmu zo lo. Chakma-te STEE category-a dah an ni hi dan lo a nihna kan hre lo," tia a sawi vang pakhat a ni awm e. A sawina chhan pawh MZP ten Mizoram quota-a Chakma leh hnamdang zirlai te seat pek tawh sut leh tura sorkar an nawr vang a ni.

1992 khan Pi Kiran Bedi-i’n Mizoram quota-a Lady Hardinge College, Delhi-a a fanu MBBS zirna tura admission a hmuh sak a, a insawithiamna pawh tuna Pu Romawia sawi ang deuh tho hian dan ang thlapa thil tih a nih thu a sawi a nih kha.

Chu aia dan pel thui zawk ka hriat chu Mizoram quota-a Assam-a MBBS zir a awm, tun hma deuh tawhah thil thleng. India khua leh tui ni lo a ni hial mai thei lehnghal. Mahse, Pi Kiran Bedi fanu MBBS zirzo ta lo ang lovin tha takin a zir zova, damlo tihdam hna te a thawh zui tak avangin a thaa ngaih theih te pawh a ni mai thei.

Kan fanu te hi Australia-ah an pian avangin an hming tawpah Mizo hnam diktak “Pachuau” awm mah se, India ram khua leh tui an ni lova. Dan ah chuan Mizoram tribal leh indigeneous an ni lo. Pawl 12 an zawh hnuah, remchang lak tumin Mizoram quota MBBS emaw engineering seat rawn beisei ve ta ila, thil dik lo a ni ang. An entitle loh thil a nih vangin. Pi Kiran Bedi-i khan Mizoram quota kha keini tribal (indigeneous) ho tana India ram sorkarin a buatsaih a ni tih hre tura ngaih a ni a. Mahse, a fanu tribal leh indigeneous nilo tan khan a hmuhsak a. Danah a dik theihna lai tur a hmu a nih pawhin a diklohna lai a lian zawk hle ang.

Chakma te leh hnam dang Mizorama chengte hi kan mihringpuite an nihna ang leh Kristianna in min phut anga kan dawngsawng tur a nih lai hian kan Mizo hnam tana pawi theiah chuan chiang takin ramri kan kham tur a ni ang. Pawi deuh chu tuna MZP ten indigeneous chungchang an rawn pholan hnuah pawh sorkar department hotu lu ber Pu R.Romawia’n chhanna mumal a pe thei tlat lo hi a ni. Buai nuai an cho tih chiang takin an sawi tawh hnu pawha thu chiang leh mumal sawi thei lo khawpa politics in a tihbuai hruaitu te hian kan hnam tana ramri kham a tulzia a tilang hlein ka lo hmu.

MNF te hi an tlak hnu khan thumum nei hlei theilo khawpin an mawng an sawhna a. An thuchhuah siam thin hlawkthlak lohzia hretu kan nih hlawm ka ring. Mahse, kar hmasaa “Congress party lakah YMA a tawlhthluk hlau” (http://www.vanglaini.org/tualchhung/24942) tih an sawi erawh kha chu ngaihtuahzui tlak deuh a ni. CYMA hruaituten dan tlawhchhan pawh nilova, buaina leh harsatna lian tak thlen thei “Chakma chhiarpui” neih an tum kha a mawlmang viau naa, an duhna rilru chu a hriatthiampui awm hlein ka lo hria. Vanduaithlak chu, an hruaituten hma la tura sorkar an ring kha a ni.

Chakma te hi pawng huat tur an nih loh laiin kan hnam tana thalo khawpin dinhmun kan pe hi chu thil tha niin a lang lo. IAS officer pakhat ka hriat chuan kan politician te hian hma an la duh lo niin a sawi a. “Chakma Minister hnuiah chuan Principal Secretary ka ni duh miah lo Zoramah hian” a ti tawp bawk a ni. Thenkhat chuan a lutuk an ti mai thei a, mahse khawilai emawa ramri kan kham ngamloh chuan kan tlawm duai duai chu a nih ber hi. 

"...WHEN THE GOVERNMENT FEARS THE PEOPLE, THERE IS LIBERTY..."

America khawmualpuia chengte inrelbawlnaa British lalpa King George III-a’n mipui zalenna nasa taka a rahbehna chuan "colonist' an tih ho chu a cho chhuak a. A hunlaia khawvela sipai chak ber British sipaite chu America khawmualpuia cheng revolutionary hote chuan an nun thapin zalenna sualin an bei a. An hneh a. Ram thar United States of America chu an din ta a ni.

USA dinna lungphumte chu mihring awmkhawm inrelbawlnaa leh rorelna nghet berte zinga mi niin an “hnampa” ten uluk taka an duan a ni a. Pathian hriatna thuk taka innghat an ni nghe nghe.

An danpui Constitution buaipuitu te zinga an rinpui ber Thomas Jefferson-a kha mihring zalenna leh sorkar thuneihna hmansual awmzia hrethiam a ni a. Mahni kea ding, ram inrelbawlthar an nih puanchhuahna Declaration of Independence tawngkamah hian rorelna innghahna lungphum nghet tak tak a awm a, a chhinchhiah tlak hle: “We hold these truths to be self-evident, that all men are created equal, that they are endowed by their Creator with certain unalienable Rights, that among these are Life, Liberty and the pursuit of Happiness - That to secure these rights, Governments are instituted among Men, deriving their just powers from the consent of the governed, That whenever any Form of Government becomes destructive of these ends, it is the Right of the People to alter or to abolish it, and to institute new Government, laying its foundation on such principles and organizing its powers in such form, as to them shall seem most likely to effect their Safety and Happiness.”

Mihring zawng zawng intluktlang veka siam kan nih hi sawifiah nawn ngailo thil chiang sa a ni tiin chiang takin an ziak a. Chu’ng mi intluktlang te chu anmahni Siamtuin lakhran theihloh dikna (rights) a pek thu a chuang leh a.  Chu’ng te chu: nunna, zalenna leh hlimna te a ni. Chu dikna chanvo pathum chu anmahni awptu British sorkar khan nasa taka a rahbeh sak avangin an inrelbawlna tharah chuan sorkar ngilnei leh mipuite dikna zahsak siam ngei turin a tir te atangin an fimkhurin an uluk hle a ni. Chu’ng dikna te chu humhim a nih tlat theih nan sorkar din a ni e, tiin an ziak a. Chu sorkar chu thuneihna tawpneilo nei nilovin a rorelsakate remtihna leh hriatpuina atanga chauha thuneihna nei tur a nih thu ziak meuhvin an dah a ni. Mipui diknate rapbeta an chunga inluling sorkar a lo inherchhuak a nih chuan chu sorkar chu herdanglam emaw nuaibo turin mipuiin dikna an nei a ni tiin an ziak tawp mai bawk a. Chutiang sorkar thalo nuaibo a nih hnuah sorkar thar din lehin, a tira mipui duhdan ang rilru pu sorkar chu din leh tur a ni. A thuneihna te pawh mipui remtihna leh hriatpuina zela hman tur niin chu sorkar chuan a tum ber chu mipui hlimna leh himna a ni tur a ni.

Sorkar emaw lal thuneihna hmansualnain mipuite dikna leh zalenna rahbehna nasa tak a thlen thei tih an hrechiang hle a. Ram thar, sorkar thar an siamah chuan an duhloh sorkar rorelna awm thei tur lakah a tir atangin an inveng nghal a tih theih ang. Chumi thurin avang chuan vawiin thleng pawhin ram zalen leh khua leh tui ten zalen taka an khawsak theihna ram an la ni ta reng a ni.

"When government fears the people, there is liberty. When the people fear the government, there is tyranny" tih thusawi hi Thomas Jefferson-a sawia ngaih a ni a. Jefferson-a khan Europe rama lalten mipui laka an thuneihna nasa taka an chelek thin te a hrechiang hle. Chutianga mipuiten an lalte an hlauh chuan an diknate palzut sak a ni nasa thin hle a. Mipui chu an zalen lova. Hlau reng rengin an khawsa thin a ni tih a hmuhchian avang leh roreltuten mipui an hlauh erawh chuan mipui an zalen a ni tih a hriat chian avangin he thu hi USA dintu tam zawkte ho khan an vawng tlat a ni.

Sorkarin mipui a hlauhin zalenna a awm a, mipuiin sorkar a hlauh erawh chuan sorkar awpbehna hrehawm leh rawng tak a awm a ni tih hi Jefferson-a thuvawn pakhat a ni.

Sawi tawh ang khan America ram dintute khan mipui awpbehna hrehawm tak chiang taka an paihthlak avangin mipui zalenna an dah pawimawh em em a. Chu zalenna chu Siamtu’n mihringte chanvo a pek a ni tih an vawng tlat bawk a. Chu ngaihdan chu Natural Law an tih atanga ngaihdan lo kal a ni. Natural Law chuan Pathian hi phuartu awmlo mi zalen a nih angin a mi siam hringfate pawh hian Ama anpui angin zalenna kan nei a. Kan zalenna neih chu min chhuhsak turin kan phalna leh hriatpuina tel lovin midangin emaw pawlin emaw sorkarin emaw thuneihna a nei lo tih a ni. Tulna avanga thuneihna kan pek te pawh kan hriatpuina leh remtihna chauhva thuneihna kawl an nih avangin uluk takin an hmang tur a ni a. An hmangsual thiang lo tih a ni.

Khawvelah hian mihring inrelbawlna sorkar chi hrang hrang a lo awm tawh a. Hriat theuh angin Mizote paw’n tuna kan hman ang chi, vote hmanga roreltu tur thlan chhuah ang kan hman hma chuan kan hnam inrelbawlnaah lalten ro an rel a. (Upa thenkhat chutiang lalte rorelna hre pha an la dam nual.) Selam khaw lal Bengkhuaia’n Alexandrapur-a thingpui huan enkawltu John Winchester-a lu an tan saka, a fanu Mary Winchester-i (Zoluti) an lak atang khan kan Mizo history chu a dang ta vek a ni. Sorkar inrelbawlna kalphung dang hmang sap hovin min rawn awp a. A tawi zawngin sawi ta ila; India ramah min rin lut a, 1947-a India ram an chhuahsanin inrelbawlna an hnutchhiah mipui rorelna – democracy – chu kan pu te hovin min hmanpui zui ta a. Lal ban an ni a. Mizo Union a ding a. Vawiin hi kan thleng ta a ni.

Vawiina Mizoten inenkawlnana kan hman hi mingo hovin an chunga lal hrawt thin lal nunrawng tak tak te laka thisen tam tak senga an sualchhuah a ni a. A tichhuaktute ho khu chuan an hmang thain an hmang tangkai viau. Mingo ho zingah pawh British ho leh an thlahte ho hian an hmang tha lehzual emaw tih turin khawvela democracy chak tha ram chu UK, USA, Canada, Australia, New Zealand te an ni hlawm.

April 21, 2014. Aizawl

Mizo te hian vai ho ai pawhin mipui rorelna hi kan la hmelhriat lo lehzualin a lang a. Mipui te hian kan dikna leh chanvo te hi kan hre lo hle a tih theih. Entirna pakhat chauh han sawilang ta ila, kan ramah chuan Kohhranin taima taka tawngtaina nena a buaipui peih loh – zu leh a kaihhnawih – chu sorkar thuneihna hmangin khapna dan a nawr chhuak a. Kum 20 dawn kan hlawhchhampui a. Mi tam takin an chhiatpui bawk a. Chu zu khapna dan tlawhchhanin mipuite chu kan zalenna leh kan chanvo rahbeh leh palzut sak kan ni a. (Zu in lo pawh Vairengte gate ah kan zanlai kan muhil tha lai min tih harh vek thin hi) Chutih laiin thuneihna changtu (a chanvo  ni miah lo) Chief Minister Lalthanhawla chu an thiante inah danin a khap zu nen chuan zalen takin an khawsa lai thla a rawn lang a.  Chu thlalak ina a lantir – dan bawhchhiatna – chhuichianga dan anga ro rel a nih theihnana hma la tura ngenna phei chu awihawmloh khawpin a kalkual a ni. Chutah tak chuan a nia mipui zalenna rahbeha a awm nasatzia a lan chian em em chu. Europe rama lalten dan chunga lenga an inchhal leh chu dinhmun tinghet tura sorkar leh sipai tha chakna hmanga mipui te a vaubeh ang maiin vawiin niah chuan Mizoramah hian kan sorkar hotu ber hi patlingpui pui paw’n an hlau ta. Hetiang dinhmun kan thleng ta hi thil pawi tak mai a ni a. Mipuiin kan dikna chanvo kan hloh a, hlauhnain kan khat ti ila sawi uarna hlek phei chu a ni ang.

Pathian hian A Fapa Isua Kristaah zalenna min pe a, kan Mizo khawtlangah lal kan ban fel tawh a. Vawiina kan chunga roreltu thuneihna tawplo nei anga mipuiten kan ngai hi Pathian Thu nen pawh a inmil lova, a duangchhuaktute mipui rorelna kalpui dan tur an tih nen pawh a inmil lo a ni.

Sorkarin mipui a hlauhin zalenna a awm a, mipuiin sorkar a hlauh erawh chuan sorkar awpbehna hrehawm leh rawng tak a awm a ni tia Thomas Jefferson-a’n a lo sawi hi a dik a nih chuan hnam zahawm leh zalen nge nih kan duh roreltu thalo leh thildiklo titu pawh dem ngam lo khawpa rahbeha awm tih hi I inzawt nawn leh teh ang u.