H.C.VANLALRUATA KAWMNA

Pu H.C.Vanlalruata, Press Trust of India (PTI) Principal Correspondent leh Chief of Bureau, PTI Aizawl Bureau ni mek leh Vanglaini chanchinbua regular columnist ni bawk hi ka awmna atangin km 9000 dawn laia hlaah awm mah se, issue pawimawh tak tak zawhna remchang February 2014 khan ka nei thei a. A chhanna te a bengvar thlak hle.

Q: Pu Ruat, hun min pek avangin ka lawm e. PTI ah Principal correspondent i ni tih ka lo hria a, Mizoramah hian press mite zalenna (freedom of the press) hi a awm thain i hria em?

A: India ram hi khawvela Press zalenna berte zing ami niin ka hria a. Mahse, zalenna famkim hi chu a awm theilo a ni awm e. Mizoramah hian pawl thenkhat leh political party thenkhatin press mite zalenna an rapbet fo thin. Rambuai lai khan MNF te khan an ngaihdan nilo ziakte chu kut hial an lo thlak tawh thin a. Sorkar lam pawhin press mi tam tak an thuziah avangin tanin-ah an khung tawh. "Aw Thar' chanchinbu-a ka thawh (College ka kal laia thawk tan ka nia, newspaper a ka thawhna hmasa ber a ni) lai pawhin kan editor Pu Ngurchhina (L) chu an man zing ang reng a, kei pawh vawi 2 chu min ko.

Rambuai hnu-ah pawh hian political party thenkhat chu an thikthu a la chhe viau. Rambuai laia MNF an thikthu a chhia ang khan a bik takin Congress party hi remna awm hnu-ah an thikthu a chhia. Eptu-a an awm laia chanchinbumi an vau te, kut an thlakte leh thil dang an tih a awm nual.

Q: Senhri chanchinbu kha kan lo hriat danin sorkar hnathawk eirute puanzarna a ni a. Editor i nih chhunga Senhri-in hma a lak chhinchhiah tlak deuh te min hrilh thei em?

A: Nia. Senhri kartin chhuak kha Mizorama 'investigative journalism' a taka kalpuitu hmasa ber a ni a. Kan khawih hnem khawp mai. A langsar zualte chu -

1. Serlui 'B' Hydel Project (He thil hi SENHRI-in a ziah hnu-ah a hna hi tihtawp vek a, hluihlawn zui a ni.) 

2. Social Welfare-a nau chaw tha (nutrition) tih chingpen chungchang (hetah hian chhui chian a nih hnu-ah hnathawk an in suspend nual). 

3. Mizorama hnamdang sumdawngte'n income tax awlrukna atana Mizo nena tangruala thil an tih dan. 

4. Land Revenue and Settlement department-a Land Settlement Certificate (LSC) lem (a tana ram awmlo) an hralh dan. Hei pawh hi chhui chian a ni a, officer tiamin official thahnem tak suspend an ni. 

5. Magistrate pakhatin judgement order siamna atana thubuai neite hnen atanga thamna a lak dan. Hei hi ACB te'n chhui zuiin court thlengin an kal. 

6. Sports Minister-in US-a World Cup enna atana sorkar pawisa Rs 10 lakh a hman thu. A dang pawh a awm nual mai. Kan sawi seng mai lovang.

Q: Mizoram sorkar hrang hrang te news correspondent/journalist anga i lo hrawn tawh naah khawi sorkar kha nge langtlang bera i hriat? enge a chhan?

A: Chuti zawng chuan ka lo ngaihtuah ngai lem lova. Official Secrets Act-in ro a rellai kha chuan file leh sorkar lehkha pawimawh kha a ruka kan ruk chhuah vek a ngai a. RTI Act awm hnu pawh hian ni 30 min nghah tir an tum ve hrim hrim thovin a lang a. Mipui kan thangharh telh telh a, kan langtlang telh telh ni mai chauhvin ka hria.

Q: Mizote chanchin thehdarh kawngah 'facebook' te a lo awm tawh avangin kan pen chak tawh khawp a, enge chanchinthar thehdarhtuten an mawhphurhna lian ber nia i hriat?

A: Nia, tunah hi chuan Facebook etc a account nei tawh phawt chu reporter kan ni ta vek mai a nih hi. Chanchinthar thehdarhtute hi chuan mipui hnena thudik hriattir hi an mawhphurhna a ni a. Dawt an hrilh thiang lova, an ngaihdan an tilang thiang heklo. 'ABC of Journalism' an tih thin chu Accuracy, Balanced leh Clarity a ni tlat. Chhuah tur chin leh chin loh thliar thiam hi an mawhphurhna lian tak a ni a. Hetah hi chuan 'public interest a ni em?' tih hi tehfungah hmang i la a fuh tlangpui.

Q: Mizoram sum leiba cheng vbc 5000 chuang hi ngaihpawimawh chi niin i hria em?

A: Ngaih pawimawh ai mahin ngaihmawh em em tur a ni a. Chutih rualin hei hi chu pung chho ve zel tur a nihna lai a awm a. Ama'rawhchu kan Plan kaltlang emaw-a sum kan puk (market borrowing etc) reng rengah infrastructure ngaih pawimawh a, a rulh lehna tur thawk chhuak thei zawnga ruahmanna fel tak siam a tul a ni.

Q: AAP te hmalakna hi enge i hmuh dan? Mizoramah an boruak ang hi kan mamawh vein I hria em?

A: AAP te tih ang chi hi Mizoramah ti ve tura mi tak tak pen chhuak tur kan mamawh ngawt mai.

Q: MLTP Act dan bawhchhia te kan hrem theih laia PC Act dan bawhchhia te hrem an nih hleih theih lohna chhan ber hi enge nia i hriat?

A: Pakhatnaah chuan MLTP Act bawhchhia hi kan sorkar hotu lal ber ber zingah pawh an awm a, bawhchhe zan tin pawh an awm ngei ang, mahse hrem an tawk lem lo. Man chhuah pawh an ni lo. Chutihlaiin miretheite chu tanina lenglo khawp man an ni deuh reng. Lengpui Airport-a zin hawte bungrua endik a nih ngailoh atang hian a chiang mai awm e.

PC Act chungchang hi chu a dan a dang. Eirukna hi saphovin  'white collared crime' an lo ti mathlawn lovin lehkhathiam, sorkar hnathawk leh sorkara mawhphurhna pawimawh tak chelhte dan bawhchhiatna a ni ber a. Lehkhathiam, dan kalphung hria-in thiam theihtawpa an thup eirukna man chhuaha court-a thiamloh chantirna khawpa 'evidence' neih hi a harsa em em a. Chubakah politician thiltitheite hi chu mitin hlauh an ni a, thiltih tak tak a harsa thin a nih hi. A then phei chuan an hotute chhan na'n buaina hial siamah vau an lo ching ve bawk nen.

Q: YMA in dan bawhchhiaa hma a lakna tam tak hi an demawm i ti nge sorkar lam a chaklo em a, dem hleih theih pawh an ni lo i ti?

A: He thil hi a inbuktawk khawp maia; a chang chuan sorkar leh YMA hi an inlawm tawn nite pawh hian a lang thei fo mai.

Q: MPF te hmalakna hi enge i hmuh dan?

A: MPF hi Kohhran din a ni a, dik taka sawi chuan Presbyterian Kohhran-in kohhran tenau zawk thenkhat leh tlawmngai pawl lian deuh deuh thlung khawma an din a ni. Ka ngaihdan hi article hmangin ka ziak tawh a. India ram hi Democracy ram, secular sorkar a ni a; chumi rama state pakhat chu kan ni a. Democracy ramah chuan inthlan hi a pawimawh em em a, Democracy leh secular ram invuah India rama state pakhat Mizoram chhunga sakhaw pakhat inthlan chungchanga heti khawpa a inrawlh thuk hi a dik theiin ka hrelo. A dika kan hria a nih chuan Hindu ram din tum pawl Sangh Parivar an tih mai - RSS, VHP etc. te hian inthlan dan turah thuchhuah siam mai duhtawk lovin a takin inrawlh ta se kan pawm ve a ngai ngei ang.

Chuvangin engkima Kohhran inrawlh tumna hi tha ka ti lova, dik ka ti hek lo. A thuhrimin kum tam tak chhung chu Election Commission khuan inthlanna felfai ber state tiin min fak tawh a. Chumi piahlam kal chu a tul ka ti hranpa lova. MPF 'diktat' zawng zawng hi a tullo mai ni lovin mipui rorelna (democracy) thuthlung kalh a tam khawpin ka hria. An kuanglo an nawr a, an inrawlh lohna turah an inrawlhah ka ngai hmiah mai a ni. Election Commission in election model code of cunduct a siam duhkhawp lova MPF-in tihtur leh tihloh tur a siam belh teuh hi tul ka ti lo bawk.

Q: Thangtharte hian kan khawtlangah mawhphurhna laa tan la turin eng tiang zawnga ke pen nge tula i hriat?

A: Kei teh lul hi thangtharte kawhhmuh tur chuan ka tling tawklo khawp ang. Kan hlui tawh a, saptawng takin kan fate pawhin min hmu 'outdate' tawh. Chuti chung chung chuan kan ram tichhe bertu eirukna, hlemhletna ti te-a kan sawi corruption hi kan do tlat a, kan tireh theilo a nih pawha a zual pui tal kan tihtlem loh chuan kan ram leh khawtlang hmabak hi a thim khawp ang. A thiam thiam, a thluak tha tha dinchanna ni lo sawipuitu tha nei leh thuneitute hnaih apiang dinchanna ram chu ram ropui a ni theilo. Remchanna inang tlang (equal opportunity) awmna ram, dan rorelna hnuaia inkaihhruaina fel tak nei thei turin thangtharte'n tha thawh se tih hi ka duh ber a ni. Chumi hlen tur chuan sorkar dodal a tul thei a, politician, thuneihna pumhmawm duhte leh sorkar miliante do a tul thei. Engpawh huama kan beih loh chuan Mizo hnam hi a ding chhuak ngai lovang.

WORKERS COMPENSATION LEH INSURANCE

25^th August 2011 tuk khan ka nu leh pa te bike min leisak Kymco CK125 chu zing dar 6 velah hnathawhna panin ka khalh chhuak a. Ka tlanna kawng pangngai Wiggs Road-a ka tlan laiin car pakhat hi kawng peng pakhat atangin ka hmaah tak hian kawng cross zawngin a rawn tlan chhuak thut mai a. Break ka han tlawh nghal a, mahse ka ding zo ta lova. Ka hmaa car rawn chhuak chu a passenger thutna kawngkhar hnung dinglam zawk ka su ta chawrh a. A lehpek chu action movie stuntman ang maiin vanah ka invawrh a. Ka thal chiang hle.

Helmet ka khum chuan alkatra chhuata ka lu insawh chu min veng tha hle a. Jean kekawr leh ka nu second hand Made in Korea jacket dum lian ang reng tak min thin sak chuan ka vun pilh tur zual pawh min veng a. Ka khel veilam hi a belkang deuhva. Ka taksa veilam zawnga ka tlak avangin ka dar veilam a na deuh bawk a. Chutia kawnga ka let reng an hmuh chuan mi an rawn pungkhawm nghal a. Pa tlawmngai leh remhre tak, ka hriat ngai pawh ni lo, hian traffic kal vel a lo kawk kual zung zung a (Tlawmngaihna hi hnamdang zingah pawh hian a lo awm ngei e!).Che miah lo turin min ti nghal a. Ka hnathawhnaa manager min phone sak a. Ambulance min koh sak nghal bawk a.

Ambulance chu an station office a hlat loh avangin reiloteah an rawn thleng a. Stretcher-ah hreng betin ambulance chhungah chuan min zawn lut a, damdawiin hnai ber kan fanu upa zawk pianna Bankstown Public Hospital-ah chuan min hruai a. Nurse leh doctor ten min han exam nghal char char a. Pathian venhimna zarah engmah hliam na em em ka lo nei lova. Lehkha ziahfel tur hrang hrang te an ziah fel chuan min chhuah ve ta mai a.

Ka bike chu insurance company pakhat NRMA insurance policy hmangin ka lo insure hlauh a. A siam man aia a hralh hlutna a tam zawk avangin NRMA chuan a ‘write off’ a. Insurance policy-a a lan dan angin a hlutna zat chu min pe a. Chuta tang chuan Australia ramah hian bike ka khalh leh ta lo.

Ambulance hman hi man chawi ngai a ni a. Ka accident-naa a thiamlo zawk ka nih loh avangin car khalh tupa chawi a ni. A car comprehensive third party insurance an tih atangin $400 bawr vel chu pek a ni ang a, a khalh fimkhur loh vanga insurance claim pek a nih dawn avangin a lehpek zela a insurance leina man pawh a san phah hlek ang.

Australia ah hian hna thawktuten tawhsual an tawh palha invenna workers compensation an tih mai hi a awm a. New South Wales ah chuan Workers Compensation Act 1987 leh Workplace Injury Management and Workers Compensation Act 1998 hian company leh hnathawk ruaitu te hi an mi rawihte an chetsual palha enkawlna turin insurance kaltlanga ruahmanna nei turin a phut a. Ka thawhna St.George Private Hospital ah hian workers compensation chu Australia rama insurance company lian QBE Insurance Group Limited hmangin kan nei a. 2011 kum tawp lam thleng khan New South Wales ah hian mahni in atanga hnathawhna (workplace) pan ten tawhsual an tawh palhin workers’ compensation in an huam vek ang tih a ni a.

Ka bike accident-na atanga rei vak lovah chuan ka dar veilam hi a na ta deuh a. Doctor ka entir a. Ultrasound leh x-ray ti turin min ti a. Engmah phei chu an hmu lova. Mahse, ka dar na chu a reh mai loh avangin tlema han sawizawi ngaiin an hria a. Physiotherapy min chawh a. A khat tawkin hun engemaw chen chu physiotherapy clinic (www.kogarahphysio.com.au) ah ka kal deuh tlut tlut a. Exercise chi hrang hrang min tih tir a. Ka tangkaipui viau.

Physiotherapy plan 2 lai ka ti zova. A vawihnihnaah chuan physiotherapist chuan hma ka sawn tur anga hmasawn lova min hriat avangin dar lam specialist pan turin min ti a. Tichuan, dar lam specialist Professor George Murrell-a ka pan ta a (www.georgemurrellshoulders.com.au). Ultrasound a han lak chuan ka dar tha/ti leh ka ban ruh inzawmna (ni berin ka hria) rotator cuff chu 80% vel lai a lo thler reng a. Physiotherapy exercise hmanga tih dam chi a lo ni lova. Zai loh chuan zual zel tur a ni a. Tichuan kan hotute ka hrilh a, hospital insurance company QBE chu an han be rawn a. 2011 a workers compensation danin hnathawhna pana kal te chetsual palhna a lo huam chiah chiah avangin ka dar zaina tur pawh chu min pawmsak ta a. QBE in min rawn angin doctor clinic chu ka han bia a, inzai hun tur min ruatsak a. Kumin January 28 khan ka rotator cuff thler chu min zai sak ta a ni. Min hrilh danin a thler lai kha thuizawm a ni a, ka dar ruh ah titanium thir tuiek theilo chiin hmun thumah kilh beh a ni.

A zai dan pawh keyhole surgery an tih mai ang chi a ni a. Kaw hnih an verh a. Kaw khatah camera an hawlh lut a. A kaw dangah zaina hmarua. Camera chuan computer screen ah ka dar chhung a rawn tilang vek a. Computer screen enin doctor chuan ka dar chu a khawih a ni. Zai lai chu camera chuan a lo record vek a. Min zai zawhah a video recording chu CD ah min pe nghe nghe a. Doctor nih ve lem loh chuan hriatthiam a har viau nain hetah hian en theih turin a awm e http://tinyurl.com/lw2tms4

Thla khat vel chu inah ban awrhin ka awm a. Ka hman thiam lam a ni lo hlauh va, a ziaawm viau laiin ban lehlam hman theih loh chu kan khawr duh hle.

Hnaa kal lova ina ka awm chhungin workers compensation insurance hnuaiah hlawh pek ka ni a. Compensation hnuaia damlo enkawl kan nih avangin hlawh pangngai aia tlem deuh hlek pek ka ni. Ina awm theih chhung a zova, danin a phut angin hotuten ka hna thawh theih ang hna awlsam deuh min pe a. Chu hna chu thla 4 vel ka thawk a. Chumi hnu chuan ka hna pangngaiah ka kir leh a. Zawi zawiin ka tha chho vel zel a. Tun thawhtan August 11 khan Professor Murrell-a chu ka han hmu leh a. Ultra sound hmangin ka dar chu a han en a, a dam that thu min hrilh a. Dam chiang tur erawh chuan thla 3 atanga thla 6 chhung a la duh tur thu min hrilh pahin min thlah ta a. A tuk tuklehah QBE insurance company-a ka case manager in min rawn phone a. Ka dar enkawlnaah harsatna ka neih leh neih loh te min rawn zawt a. Harsatna em em ka neih loh thu leh min zaitu doctor-in min zaina a dam that thu min hrilh te chu ka hrilh a. Min rawn biak takah chuan ka inzaina senso zat hriat ka chak avangin ka zawt mai mai a. A zat vel ni a min hrilh chu $5000 a ni. Hei bakah hian physiotherapy plan vawi 2 a senso $1000 bawr vel a ni ang a. A zavaia senso chu $6000 aia tam a ni ang. Kei erawh chuan cheng khat mah ka seng lova, hloh nei lovin min ruaitu ka thawhna hospital leh kan hospital insurance company te chuan an hnathawk ka nihna avangin sawibuai awm lovin ka chanvo zawng zawng min pe vek a ni. Keima sen tur ni ta se, India pawisa cheng nuai 3 chuang hu chu nasa taka ngaihtuah a ngai ang.

Insurance company rintlak kaltlanga hnathawktute enkawlna workers compensation hi a mamawhtute tan chuan thil tha tak a lo ni. Australia ramah hian kum 5 ka awm ve ta a, an inrelbawlna leh kalphung hrang hrang te ka hre chho ve zel a. Kan ramah pawh, kan tlin chinah, tih ve theih tur ka hmu nual mai.

NSW Workers Compensation chungchang hetah hian a kimchangin a en theih 

http://www.workcover.nsw.gov.au/aboutus/workerscompensation/Pages/default.aspx

NSW Ambulance service
http://www.ambulance.nsw.gov.au/

National Day Surgery, min zaina hmun
http://www.nationaldaysurgeries.com/nds_facilities/sydney/

FREEDOM OF SPEECH AND ETHNIC POLITICS

In 1975, Australia passed a law called the Racial Discrimination Act. According to humanrights.gov.au, "the Racial Discrimination Act 1975 gives effect to Australia's obligations under the International Convention on the Elimination of All Forms of Racial Discrimination. Its major objectives are to:

- promote equality before the law for all persons, regardless of their race, colour or national or ethnic origin, and
- make discrimination against people on the basis of their race, colour, descent or national or ethnic origin unlawful."

Section 18C of the RDA 1975 states:

"Offensive behaviour because of race, colour or national or ethnic origin
(1) It is unlawful for a person to do an act, otherwise than in private, if:
(a) the act is reasonably likely, in all the circumstances, to offend, insult, humiliate or intimidate another person or a group of people..."

Basically, the law in Australia says, "you can't insult or offend or intimidate people. It is a crime. You can be punished!"

Conservative columnist and host of Sunday show The Bolt Report, Andrew Bolt wrote an article in 2011 about fair-skinned Australians who identified themselves with their aboriginese heritage. In the article, he discussed the morality of those fair-skinned Australians identifying themselves only as aboriginese even though some of them look European and have fair skin. (In Australia, being aboriginese allows you to get a good deal of government welfare). There was huge public outcry and understandably, fair-skinned aboriginal Australians were offended and insulted and sued Andrew Bolt under the RDA Sec 18C. The court found the columnist guilty. His article was banned.

The conservative government of Tony Abbott campaigned to do away with this provision of the law that declares "offence" and "insult" a crime because of its belief in the freedom of speech, offensive and insulting as it may sometimes be. The Attorney General George Brandis and the Prime Minister spearheaded the government's proposal to amend the law but after much debate and opposition from MPs, ethnic communities and the left-leaning sections of the public, the government dropped its plan to seek the amendment. Guess what the main reason was: ethnic politics!

In Australia, there is a large and growing population of Muslim voters particularly in the western part of Sydney. Their votes are proving to be crucial for candidates to be elected. The vocal sections of the Muslim community tend to me be more anti-Western, pro-Islamic and hardline in their belief. Offending a Muslim would be easier than, say, a Christian, due to their relative sensitivity. The government of Australia, in its hope to be inclusive of all communities, especially the Muslim community, decided to drop the draft bill. According to the PM, the proposal to remove the 18C clause had become a "complication" in the Government's relationship with the Australian Muslim community. Fair enough. But is that good for the country?

One needs to ask whether the liberty of an individual or a community to be able to speak without being punished for every "offence" and "insult" taken should be the guideline of society or not. Should we let ethnic votes and politics dictate the course of government decisions, especially when it is in the national interest.

Personally, I'd take the insult and let the moron be reprimanded by society and preserve free speech.

“IF IT AIN’T BROKE, DON’T FIX IT”

Sikul tan hun sawn hma chungchang hi sorkar lam atanga sawi hmasa bertu hian a nghawng tur tam tak a ngaihtuah ngei chu a rinawm a. A ngaihtuah kim vek lo a nih pawhin sawi a hlawh hle ang tih a hrechiang ngei ang. Sorkar hian tih an tum anga an ti ta vek lo a nih pawhin Zoram pumpui titi chu a luah ta hrim hrim a. Hei aia buaipuiawm lian zawk ram leiba vaibelchhe sangnga chuang kan neih te hi kan sorkar hian chinfel dan tur mipui sawihovah te han chhawpchhuak ta zawk se chuan kan hlawkpui zawk ngei a rinawm.

Sikul tan hma leh tan tlai thatna leh thatlohna chungchang hi ngaihtuahnaah a la luh loh hrim hrim avang hian a tha emaw thalo ti turin rilru ka lo la seng ngai miah lova. Ka hre dik lo mai thei a, kan sorkar hian kum 5 chhung khan, “A kum 6-naah sikul tan hma tur kan ti ang,” tiin rilruah an lo pai ka ring chiah lo.

Hemi chungchangah hian sorkar hotu lam thusawi chhiar theiha awm chu Parliamentary Secretary Joseph Lalhimpuia thusawi te hi a ni deuh berin a lang a. Tun hnai khan Lunglei Congress Bhavan-ah zirna chungchang hetiang hian a sawi niin Pu Vanneihthanga Vanchhawng, LPS reporter chuan a sawi a: “Sorkarin education siam tha tura hma a lak naah hian kan nunphung thenkhat mil tur ringawta education hi kalpui chi a ni lova, education kalphung mil tur hian mipuite kan insiamrem a tul zawk a, kan mut hun leh thawh hun te, kan ei leh in leh kan thil tih dan thenkhat thlak danglam a tul a nih pawhin i thlak danglam ngam ang u.”

Report dangah chuan hemi zulzui tho hian, a tawpna tawngkam dang deuhvin, “…school education ruahmanna mil in kan mut hun leh thawh hunte, kan ei leh in (hun)te pawh mipui in kan thlak ve tur a ni” tiin ziah a ni a.

Mi pakhat chauh lovin kan sorkar hotu thusawi hi an report avangin kan khawsak phung kan thlak tur anga a sawi leh sawi loh hi hriat a har ang reng a. A thusawi lai video emaw voice record emaw thusawi ziaka dah a awm loh chuan eng ang chiahin nge tawngkam hman a nih hi hriat a har viau. Eng pawh chu ni tase, Parl.Secy-in a sawi awmzia chu kan hrethiam awm e. Sorkarin zirna kalphung tha tawk lo nia a hriat tihdanglam a tum a. Ram pum a nghawng dawn vangin mipui hnenah thil awmzia han hrilhfiah a tum a. Mipui rilru hmin loh pawhin tih tlang tho an tum a ni ber mai.

Sikul tan hma leh ban hma tangkaina tur hi a awm thei ngei ang, a thatlohna leh buaithlakna tur pawh a awm teuh tih kan hria. Chulam chu ka sawi tum a ni lova. Mipui laka sorkar rilru lam leh hmalakna an kalpui (tum) dan zawk hi a ni ngaihtuah chian ngaia ka lo hriat zawk chu.

Sikul kal hun chungchangah hian sorkar hotute zingah Education Parl Secy chauh lo pawh hian an ngaihdan te an sawi ka ring a. Tun atan chuan ani thusawi hi sorkar sawiah ngaiin lo en bik ta ila. “Kan nunphung thenkhat mil tur ringawta education hi kalpui chi a ni lo” tih leh “education kalphung mil tura” kan insiamrem a “tul” zawk thu a sawi hi thil nihphung letling hlauh niin ka hmu. Kan nunphung leh khawsak dan inherrem a tul tih hi chu khawvel changkang zelah kan tih ngei ngei ngai a ni tih kan hre vek anga. “Education kalphung” mil tura in her danglam tih erawh hi chu a awmzia chiah hriat a har hle. Parl.Secy hian, sawi ang khan midangin an report-naah chuan, “…kan mut hun leh thawh hunte, kan ei leh in (hun)te pawh mipui in kan thlak ve tur a ni…” tiin a sawi a. Kalphung chhe mek ni lo, sorkarin policy thar a siam mil tur ringawta mipui khawsak phung kan thlak ve tura ngaihna emaw kan khawsak phung thlak danglam “ngam” a tul anga ngaihdan an nei leh chumi ngaihdan hmanga kalphung her danglam lawih an tum hi mipui rilru leh duhdan zahlohna niin ka ngai. Sorkar hian mi zawng zawng ngaihdan a lak vek zel a tul loh laiin tuna a tihdan hi chu mipui rorelna democracy lungphum innghahna leh nihphung a kalh hle a ni. (A thuhrimah kan zing thawh hun leh zan mut hun min hrilh tur hian Congress sorkar hi engtik lai khan nge thuneihna kan lo pek reng reng?)

A kalh chian em em na chhan pawh hemi chungchangah hian sorkar hian zirtirtu hlun leh zirna field-a thawk te thurawn awmze nei a dawng lo a ni lova. Kalpui dan tura thurawn finthlak tak tak pawh an dawng ngei a ni. Mahse, “education kalphung” nia an sawi chu zawm ngei ngei turin tihtlang an tum ta thova. Anti-incumbency factor chi tuh hi pawi an ti lo a nih chuan politician mak tak an ni ang.

Helam atanga thlirna hi han zep ta lawk ila. Australia hi khawvela ram hausa berte zinga mi a ni a. Infiamna lam te, zirna lam te, research lam te leh thiamna hrang hrangah world record hawlh phain a khua leh tuite a enkawl tha a ni tih chu chhinchhiah vek a ni. 1915 atang khan khawvela lawmman ropui Noble Prize pawh 15 lai dawngtu a nei tawh a. Chu’ng dawngtute chu zirna lama a vawrtawp thleng te an ni. India khua leh tui leh India mi hi Noble Prize dawng 8 kan awm, Mother Teresa chhiar telin.

Australia ram hlawhtlinna leh hausakna bulah chuan an zirna kalpui dan hi a en loh theih loh ang. 1788-a Captain Cook-a’n Kumpinu sorkar tan he ram zau tak a hauh khan Australia ram hi ram palaileng ang vek a la ni ber a. Inkalpawhna kawng pawh awm mumal lo, a ram neitu hnam aboriginal hoten kangaroo leh ramsa dang kapa an tuallenna ram zau tak a ni ringawt mai. Mingo ho an rawn luh khan engmah lo atanga bul tan ang an ni. 1901 ah ram pum sorkar an nei ve chauh a. Mipui rorelna lungphum innghahna erawh an vawng tha hle. England ram thiamna leh hriatna leh tih dan tha te chu an “copy-paste” tawp a, kar lovah khawvel hriatin ram leh hnam ngelnghet tak an din thei a ni.

Kan chenna Sydney khawpui awmna state New South Wales (NSW) leh Melbourne khawpui awmna state Victoria (VIC) a sikul tan hun hi rilruah a rawn lang mai mai a. Australia-a state dang te nen pawh a inang viau. NSW ah hian a tlangpuiin zing dar 9 atang tlai dar 3 hi sikul kal hun chhung a ni a. Amaherawhchu, sikul hotuten an mamawh dan azirin darkar chanve vela tlai emaw hma deuhvin sikul tan hun hi an her danglam nual a. An tan hma chuan an bang hma a, an tan tlai chuan an bang tlai mai. Mahse zing dar 9 bawr vela tan deuh vek an ni. Chumi tan hun ang chu tun hma atanga sikul dintu ten mipui nawlpui khawsak phung nena inmil tura an siam a ni a. An tihtirh lai leh tun hun hi in ang tawhlo viau mah se tha an la ti a ni ang, thlak tumna a awm lo. Thlak tum ta se, policy thenkhat an tihdanglam dan enin, mipui an rawn nasa hle anga. A tawpah thutlukna siamin an thlak dawn a nih paw’n, vawilehkhata ti thut lovin hun engemaw chen notice an pe ngei ang. Chutiang chu mipui rorelna kalphung niin a lang a, a hrisel viau. Kum kha leh chen zing dar 9 bawrah sikul an lo tan tawh a. An chhiatpui lem lo. Sawi ang khan an fate chutianga sikul tantir chuan khawvela a berte zinga mi ah an in vawrh thei tho mai.

Baptist Higher Secondary School, Lunglei -a zirtirtu Dr.K.L.Biakchungnunga’n hemi chungchanga a sawi hi sorkar hian a diklo a tih theih loh chuan thil awmzia dik tak ni zawkin a lang: “Mizorama sikul kai hun sawn hmâ tih hi MLPC Act boruak chhilhna tura fing taka ruahman a nih loh vêk pawhin, a chhilhtu tha tak chu a ni hrim hrimin ka hria.”

Inthlan hmaa an sawi that ngam loh, inthlan hnua pawr taka an sawi zu khapna dan chungchang hi sorkar hian a kalpui felloh em avangin sawiselna boruak vai kiannan sikul tan hun chungchang hi a tha hle. MZP lamin an lo tuipui sa bawk si a.

US President Jimmy Carter-a Office of Management and Budget Director T. Bert Lance-a’n thufing angreng tak a sawi hi kan Zoram sorkar hian uluk takin lo ngaihtuah se, thil kalsual tur tam tak a veng theiin ka ring: "If it ain't broke, don't fix it. That's the trouble with government: Fixing things that aren't broken and not fixing things that are broken."

BEIDAWNGA CHHUAHTIR LOH

July ni 21 khan IPS officer Pu C.Laldina chuan Aizawl Superintendent of Police mawhphurhna a la tan a. Hemi ni vek hian a pisaah a thawhpui tur police officer-te kawmin infuihna hunte a hmanpui a. Police station miin an panin an duh reng vanga kal a nih thin loh thu leh police an mamawh vanga kal an nih thute a sawi a. Mangang, tanpui ngai, danin a hum ngaite an nih thin avangin hawihhâwm taka lo buaipui nghal thin tur leh beidawnga chhuahtir lo turin a hote chu a chah a. Pu Dina hian mipui laka police te mawhphurhna leh tawngkam leh chetdan dik leh mawi pawimawhzia a hrechiang hle.

Tin, tunlai khawvelah media hmanga thu leh hla inhrilhhriatna a chak lehzual tawh avangin police lam bawhzui nghal tur ang chi te chu ti zung zung turin a chah bawk a. Dr.H.T.Sangliana chanchin Dr.Lalrinawmi Ralte ziak atanga kan lo hriatte pawh rilruah a rawn thar leh hle.

Maharahstra state-a Kolhapur district police hotute chuan tun hnai khan dan bawhchhiatna hremloha chhuak thin tihtlemnan leh dan bawhchhiate an phu anga tawka hrem an nih ngei theihnan hmalakna thar an buatsaih a. Times of India thuthar lakhawmtu Vivek Waghmode-a’n a tarlan dan chuan, ruahmanna tharah hian police station tin ten kum 3 chhunga criminal case an ziahluh langsar zual deuh deuh chi 5 an thlang chhuak anga. Tih zuzi mai mai theih lohna tur leh dan bawhchhiate an phu tawka hrem an nih ngei theihna turin dan lam hriate nen an tan ho dan tur an siam ang a. A hlawhtlin chuan state pumpuia hman a nih tur thu Minister Sarjel Patil-a’n a sawi nghe nghe a ni.

Minister hian a sawi dan chuan Investigation Officer in case a chhui naah evidence pawimawh zawng zawng te a lak ngei ngeina tur leh tihsual palh a awm lohnan uluk taka hma lak a ni ang tih a ni a.

Kolhapur SP Manojkumar Sharma sawi dan chuan, police ten case an chhuinaah awmze nei zawka hma an lak theihnan dan lam thiam (legal expert) te leh Law department lama official te leh police officer te chu inkawmna hun mumal tak buatsaihsak a ni ang a. Police officer ten dan lam an hriatfiah theih zawkna tur leh case an ziahluh leh chhuina kawnga tihsual leh dan zawmlohna ang chi te tihtlem an beisei a ni. Thuhretute’n an mawhphurhna tha taka an hlen theihnana police lamin thuhretute an chhawn dan tur lam pawh ruahmanna tharah chuan a tel a. SP hian a tum ber pakhat chu thil tisuala puhte’n dan hmang veka talchhuahna an zawn thinna kaw hrang hrang te tihpin a nih theihnan dan lam thiamte nena thawhho a ni a.

Police te hmalak tumna chu Kolhapur District Bar Association president Vivek Ghatke-a'n tha a tih thu a sawinaah police ten dan lam hriate an rawn tam a tangkai a rin thu a sawi a. Police IO te chu Indian Penal Code leh Indian Evidence Act zirchiang tura a hranpaa training pek ngei ngei tur a ti hial a ni.

Kolhapur District police te hmalakna hi MoS berin a tuipui avangin awmze nei tura ngaih a ni a. Tin, an police department pawh biakpawhna awlsam tak chiang takin an website ah an tarlang a ni. SP pawhin “manoj19@yahoo.com” tih ang vel email mai mai hmang lovin official email, sorkar domain zahawm leh computer hmanga thil khawihchhe ching – hacker – hovin an khawih mai mai theih loh tur email him (secure) hmel tak a hmang a. An website ah, phone number nen, chu'ng te chu chiang taka tarlan a ni.

Aizawl police hotu tharin police officer te a fuihna ang te hi, a nihna takah chuan, mipui rawngbawl sorkar hnathawk zawng zawng te hian an vawng reng tur a ni zawk a. Police te hi tun hma deuhva, “police ka nih hi, ka man mai ang che, min hlau lo'm ni?” tih ang rilru an pu vak tawh lo nain sorkar tharum thiltihtheihna hmansual hi a la awlsam em a, uniform ha tawh chu civil mi thenkhat pawhin kan la hlau nghal ringawt a. Kan thiamlohna ni miahlo thilah zawhna min zawt se, thenkhat chuan kan pawng hlauh ringawt bawk a.

Pu Dina’n a hote, hawihhawm taka, mipui lo dawngsawng thin tur leh beidawnga chhuahtir lo thin tura a fuihna hi hotu tharin thu tha a sawi satliah mai ni lovin Mizoram Police Manual 2006, Chapter 2/10 "Guidelines in Performance of Duties" hnuaia No.3 “Every Police Officer shall place duty before self, and remain calm and good humoured in any situation, however risky or provocative.” leh No 4 “Every Police Officer shall be sympathetic, courteous and considerate to all members of the public and be ready at all times to render necessary assistance to all without regard to their wealth or social standing” ah te hian a chuang reng tawh zawk a. Chiang taka a inziah avangin, police hawihhawmlo deuh emaw, thinchhe tak emaw, duhsak bik leh duhsakloh bik neia thil ti thin an nih chuan a diklohnaah thiamloh a chang thei nghal a ni.

Khawtlang nuam tehna ber pakhat chu, "Remna leh muanna a awm em?" tih hi a ni a. Itsikna leh tharum thawh hrehlohna khawvela cheng kan nih miau avangin police te hi ralmuang taka kan khawsak theihnan kan mamawh hle a ni. Police hna bulpui ber chu, Manual-in a sawi angin, dan bawhchhiatna (crime) leh khawtlang buaina (disorder) ven a ni a. Chu hna chu an thawh theihnan mipui pawhin kan thlawp that a tul hle a ni.

Police te hian dan bawhchhiatna zawng zawng hi an veng seng lova (“proton” vuah bike tlan ring ho an la hriat theih tlat!), khawtlang ralmuanna tichhe thei boruak thalo zawng zawng pawh an tudai vek seng lo.(April ni 4 zana Chief Minister chenna in hungna nam thlu tep mipui pungkhawm te kha kan la hria em? Police pakhat duty sawidan chuan khami zan khan mipui thinrim pungkhawm khan CM bangla kha an luhchhuah tep a ni. CM a awm loh avang leh lut pawh ni se sorkar/mipui thil neih an tichhia a ni ringawt dawn tia an hrilh leh tawp mai tura an ngenna te kha ngaithla lo ta tlat se revolution tenau emaw lianpui a chhuak thei reng khami zan khan!)

Buaina awm lo tura khawtlang boruak nuam tak min vawnsak leh dan bawhchhiatna awm thei ven hi kan police ten an tih zel theihnan leh an theih piah lama lo tanpui turin mipui kan pawhmawh hle a ni.

Dan bawhchhiatna sawi takah chuan kan ram sorkar hotu lu ber inhnamhnawihna, April 21 zana Aizawl khawchhung ngei a mi, MLTP Act in chiang taka a khap Foster’s beer nena a lanna thlalak chungchang kha SP kal chhuak ta sawi dan ang ni lovin Supreme Court in Nov 12, 2013 khan “Registration of FIR is mandatory under Section 154 of the Code, if the information discloses commission of a cognizable offence and no preliminary inquiry is permissible in such a situation” tiin FIR hi CrPC Sec 154 hmanga ziahluh ngei ngei tur a ti a. A chhan pawh kan MLTP Act 1995, Chapter V/58 in - “Every offence punishable under this Act shall be cognizable” tia a lo sawi vang a ni. Cognizable offence phei chu preliminary inquiry pawh lak miah loh tur zawk a ni.

June 4-a Aizawl Police Station-a lehkha thehluh a nih khan Pu Hawla an hlauh em em vangin police ten Supreme Court in dan a lo nemngheh pawh zah zo lovin FIR kha an lo register lo a nih pawhin SP tharin police ho zawm tur Police Manual tlawhchhana a hote a fuihna ang hian dan bawhchhiatna tilang chiang tak thlalak vang khan an tih tur hi an ti ngei tur a ni. An tih loh chuan SP fuihna ang nilovin, a thehluttu te chauh nilo, dan rorelna duh zawng zawng beidawngin min chhuahtir tihna a ni ang.

Sorkar hnathawk leh politician ten diklo taka an tih ni ngeia hriat thilah police te hian FIR an dawng ta nual, awmze neia kalpui si lovin. SP tharin a sawi ang hian, anmahni pan tute beidawnga chhuahtir loh hi an duh tak zet em tih hi kan Police te hian han inzawt nawn leh teh se.

DYNASTIC POLITICS

Mipui rorelna awmze nei tur tak takah chuan thil ti thei fal bik emaw chhungkhat laina inzawmna avanga thuneihna sawrbingna ang chi hi a thalo tih kan pawmtlangin ka ring a. Kan pawm chiah loh pawhin a mawi zan lo tih chu kan hriat tho ka ring.

Thuneihna lo tem tawh ten an sim theih loh - thuneihna neih zel tumna - hi kan Zoramah pawh hian a lo inphum ru ve reng em tih I han bihchiang dawn chhin ang aw! Sawi thui hmain, an hming ka rawn tarlan tuma te leh an inzawmna te hi mimal beihna ni lovin, kan dinhmun dik tak enchianna a ni tih erawh lo hre lawk ta ila. FIR chelek duh pawl an tam hmel si a.

 

Kan Chief Minister chu kan hria a. A nau chu Pu Lalthanzara (Patea) a ni a. Pu Zodintluanga chu Pu Hawla monu nuta a ni a. Chutiang zelin Pu Chalrosanga Ralte chu Pu Zodintluanga nau a ni leh a.

A lehlamah Pu C.L.Ruala chu engemaw laiin Pu Hawla te nen lo in then deuh mah se, tunah chuan an luangza leh tawh a. Congress party a senior berte zinga mi leh hmingtha ber pawl a ni. Pu C.L.Ruala nupuia nuta chu Pu John Rotluangliana a ni a. Tin, Pu Joseph Lalhimpuia chu Pu C.L.Ruala nu laizawnnu tupa a lo ni leh ta bawk a.

A dang pawh an awm nual mai thei a. Tun atan chuan kan tarlan hote atang khian engemaw han zirchiang dawn phawt ta ila.

Pu Patea chu MA (Political Science) degree nei a ni a. 2008-a MLA ni tura a in candidate hma chuan Zoram politics kalvelah hian a lo zirchhuah te hmangin mipui nawlpuiin ka hlawkpui theih tur chanchinbuah te emaw a ziah kan hre lem lo. Contractor a nih bakah khawtlang hruaitu a nih kha mi hriat dan a ni deuh ber a. MLA a han nih khan a u in a bul hnaiah dahin Parliamentary Secretary nihna a pe a. Chief Minister bulah awmin, a then phei chuan 'working CM' zawk a ni e te an ti hial a. Pu Patea hi Pu Hawla nau ni lo ta se, Congress party hian MLA ticket an pe kher angem? MLA a nih hnu pawh khan a u Pu Hawla ni lo ta se, CM puitu Parliamentary Secretary ah ruat a ni kher angem? Tin, tunah pawh hian Health Minister nihna hi pek a ni kher angem? Tin, a u hi a tar tan tawh a, a dawt leha Chief Minister nih tir tumnain Pu Hawla hian ruahmanna a siam mek em tih hi zawhna lian tak niin ka lo hria. A nih loh chuan a tha a. A nih chuan a tira kan sawi kha a la dik tluang zel tihna a ni.

Pu Zodintluanga (Mama) te unau han en ta ila. Pu Mama chu la thalai tak, hawiher pawh changkanga ngaih a ni. Amaherawhchu, Pu Hawla te nen an inzawmna vang ni lo ta se department lian tham leh pawimawh deuh deuh te hi a portfolio ah pek a ni kher angem? Tin, nikum inthlana Dr.R.Lalthangliana khing tura Congress party-in a ruat kha hriat theuh angin Pu Mama nau, Pu Chalrosanga Ralte (Mavala) a ni a. A tennis khelh thiam thinzia chu ka mit ngei pawhin ka hmu ve tawh a. Chhuanawm tak a ni. Mahse, mipui roreltu ni tur chuan Lunglei ho phei chuan a tling ta mai kha mak pawh an tih reng kha. Mipui aiawha roreltu ni tur chuan a la inpeihlo tih chu mi tam zawk ngaihdan a ni awm e. Pu Hawla te nen inzawmna nei lo ta se, ticket pek a ni angem?

Pu Joseph Lalhimpuia pawh, sawi tawh ang khan, Congress party hruaitu senior te zinga mi nephew tur ang a ni a. Politics lama a tel hma phei chuan MNF sorkarin a hnathawhna lama an duhsak avangin MNF lam awn turah te pawh ngaih a ni. Eng ang chiahin nge Congress leh a pa Ruala te pawhin an lo titipui kan hre ve tawh lova. Mahse, thil chiang nia lang chu Pu C.L.Ruala thisen zawmpui a nih vangin Pu Hawla leh MPCC hruaitute biak chhiat chu a ni lo phawt. Eng vangin nge dinhmun langsar pek a nih tih chuan a chhanna pahnih a awm thei ang a. Pu Liandala tupa, kan Lunglei MLA hi a hnathawhna lamah a taima em a. A hnathawh hrim hrimah chuan fak a phu hle a ni. Amaherawchu, sawi tawh ang khan a telna party leh sorkar hotupa Pu Hawla politics thianpa Pu C.L.Ruala te nau a nihna hi factor a ni lo chu a tih theih loh in a lang.

Pu C.L.Ruala hi Pu Sangzuala te ho nen Pu Hawla lam tang lo pawla kal hrang zinga tel kha a ni a. An inrem leh thei kha an zavaia tan thil tha tak a ni. MP atana candidate a nih hmasak zawk khan Mizo mipuiten mi viak tha zawk leh zuan zang zawk kan it tawh a. Mahse, party inkaihhruaina kalphung chuan a hnawl thei lo. MP ah kan thlang tling a, kum 5 chhunga parliament tha taka a kai pawhin thusawi honaah vawi 2  tel a, private member bill a nei lova. Zawhna 12 chauh a zawt a ni. Ama sawi angin parliament ah hian zu au chhuah vak vak chi chu a ni lo nain, mi tam tak ngaihah effective tak chu a ni lo a ni. UPA hi lo chak leh ta se, India ram Prime Minister tura an hual Tv.Rahul Gandhi-a support tur te zinga mi a nih hmel a. Chutiang zawnga thlir pawh chuan awmzia nei vak tawh lo tura ngaih chu a ni. Tunah, MP atan Congress in an vawrh leh hi Pi Sonia-i te chhungkaw tana venthawnawm loh tur, MPCC tana hnawksak lo tur nih vang ni ta se Mizoram mipui te tan enge hlawkna ni ta ang?

Heng ka han sawina chhan chu politics a thuneihna hi thil tithei, inzawmna nei te’n an thlah duh lova, an hun a liam pawhin a chhunzawm tur an ruat a. Mi zawng zawng lenna ni lovin thil tithei bikten thuneihna leh sum hmanga insawhnghehnan an hmang ni berin a lang. Chutiang chu lo ni ta se, khawvel hmun danga mi hnaisailo ho ten an chin ang hi kan ramah pawh hian kan lo ching ve reng tihna em ni ang?

“SAWISEL" RAWH

Matthaia 7:1-a Lal Isua zirtirna kan hmuh chu, “sawisel suh u, sawisela in awm loh nan,” tih a ni a. Mizo tawnga Bible an lehlin khan Pathian Thlarau Thianghlimin a letlingtute finna hmangin kan hnamin Pathian Thu kan hriat theihna tura tawngkam hriatfiah theih dan tur ber ziakin dah a ni tih kan pawm tlan a rinawm a. Amaherawhchu, a hunlaia awmze neih dan dang te leh a awmze nei thuk zawk tawngkam te bihchiana a thumal kan hman duh zawk te pawh a awm thei niin a lang, a awmzia ti fiah zual tur atan.

Vawiina ka rawn tarlan tum chu Matthaia 7:1-a kan hmuh “sawisel suh” tih leh Mizoten hemi chang thuken kan hriatthiam dan chungchang hi a ni.

Saptawng Bible lehlin pakhat New International Version (NIV) ah chuan he chang hi tihian kan hmu a, “Donot judge, for you too will be judged”. Heta “judge” a tih hi kan Mizo Bible ah chuan “sawisel” tih a ni a. Tunlai kekawr thuidan thar emaw hair style thar mawi lo kan ti a kan sawisel ang ni lovin engemaw issue chungchanga ngaihtuahna uluk tak hmanga thutlukna (judgement) leh ngaihdan siam lam a kawk zawk niin a lang.

Luka 7:40-43 kan en chuan Lal Isua’n tehkhinthu, tangka puktirtu laka leiba nei te pahnih chungchang hmangin Simona zawhna a zawt a. Leiba nei te pahnih ngaihdam an ni ve ve a. Tuin nge a ngaidamtu kha hmangaih zawk ang tia Isua’n Simona a han zawh khan, Simona chuan uluk taka a ngaihtuah hnuah a ba hnem zawktuin tangka puktirtu – ngaidamtu - chu a hmangaih zawk tur thu Isua a hrilh a. Chutah chuan Isua’n, “I tidik e” a tih thu kan Mizo Bible ah kan hmu a. NIV ah chuan heti hian kan hmu thung, “You have judged correctly”.

He “judge” tih tawngkam Matthaia 7:1-a kan hmuh leh Luka 7:43 a kan hmuh hi tawngkam thuhmun a ni a. A tobul lamah pawh thuhmun a ni awm e. Chuti a nih chuan, Mizo tawnga kan lehlin “sawisel” tih hian Matthaia 7:1 a Lal Isua thusawi awmzia hi a phawk chhuak zo lo deuh niin a lang. “Ngaihtuahna ziktluak hmang lova midang khawsak dan emaw awm danah ngaihdan lo siamin, ro lo va rel sak ve ngawt suh u” tihna te pawh niin a lang zawk mah awm e.

Matthaia 7:1 hnu lam kan chhiar zel phei chuan mahni mita khanchhuk awm thianfai hmasa lova mi mita hmawlhte awm va vei viau a dikloh thu kan hmu a. Chumi fello chu kan tih fel chuan mi mita khanchhuk awm kan thenfai tur chiang taka kan hmuh theih tur thu Lal Isua’n min hrilh a ni. Midang te sawisel hrim hrim hi tih loh tawp tur tihna a ni lo a nih chu. A ti tur phei chuan an ti ngei ngei zawk tur a ni ang.

Khawtlangah, kohhran, sorkar leh politics kalphungah kan nu leh pate min kaihhruai dan thangtharten kan ngaihtuahin, uluk taka bukin kan duhtawklohna te leh thalo kan tihna te, tha zawk nia kan hriatte kan sawi ta zeuh zeuh a. Kan nu leh pa te zahlohna nilovin, nakina keimahni khawvel hman tur insiam mekah mipui thattlanna tur nia hriat dik takah tehna fel tak hmangte’n kan lo teh thin a. Chutiang critical analysis te chu mi thenkhatin hrethiam lovin “enge a nih bik” tia lo tawngin, lo sawisel lo turin an tih ta ngawt thin a.

Public concern thila a mi kaihhnawihte thil tih dan emaw hmalakna emaw a dikloh a, a fellohna mipui lam atanga duhtawklohna leh tha tih lohna emaw ngaihdan sawi a nih hian Isua’n “lo judge suh u” a tih bawhchhiatna ni lovin, Simona hnena, “I judgedik e” tia a chhutdan leh hmuhdan dik chungchanga Isua’n a tidik a tih ang khan kan khawtlang, kohhran leh sorkar lam chungchangah hian judgement dik kan lo sawi thin a ni zawk e. (Hmuh dan diklo phei chu a awm thei teh meuh mai). Chuti nilo se, court a roreltute hian mi chungchanga a tawpa judgement an siamin Isua thupek bawhchhia an ni ang.

Entirna sawi ta ila, tun hnaia Pu Hawla EVM tichingpena puhna chungchanga Upa R.Romawia’n politics thila a kohhran upa nihna hmachhuana Pu Hawla a rawn fak ta chiam te kha thil fello taka ngaih a ni thei a. Chumi chungchang pawh sawichhuak an awm ngei a ni. A fellohna chhan chu politician pakhat thiltih dikloa puhna sawithiamnan kohhran upain thu a rawn nei daih kha a ni. Chu aia diklo lehzual phei chu secularism thupuia nei party MLA in sakhaw pakhat (Kristian sakhua) thupui bera a rawn nei kha a ni ang. Chakma emaw Bru Kristian lo ni ta ila, kan kohhran upa MLA thusawi kha ka tan chuan Narendra Modi-a Hindu sakhaw hmalakna ang tho a ni ang.

Lal Isua’n Simona “I tidik e” (ngaihdan dik leh fel takin thutlukna I siam e) a tih ang khan uluk takin public interest leh concern thil hi I chik ang u. Ngaihdan dik I siam ang u. I sawichhuak ang u. Kan sawichhuah loh leh sawisel loh vanga diklohna kal zel tur tam tak a awm.