Thursday, July 23, 2015

PASTOR RAWNGBAWLNA

BCM 2008 Assembly thurel inhnialna tam tak siamtu hi uluk deuhva in lo en chuan pastor nupui te an hna ban tir emaw an ban loh chuan pastor zawk "chawl" tura beisei lam ni lovin khawvel zawng zawnga Chanchin Tha hril hna kan thawhnaa Mizoram Baptist Kohhran pumpui leh pastorte rawngbawlna a lo "sawt zawk leh tangkai zawk" theih nan a ni a.

Kohhran thil tum ber leh kan inkaihhruaina dan leh Danpui kan chian loh avangin tullo tak tak thlengin kan inhnial a. Vawiin chu inhnial lam nilovin pastor rawngbawlna bik hi i han ngaihtuah ho dawn chhin teh ang.

2008 Assembly thurel anga kalpui duhten an sawi thin pakhat leh kha thurelin a sawilan "Bialtu pastor ten an thawhna hmunah an nupuite an hruailoh avangin rawngbawlna kawngah harsatna leh fel lohna tam tak a awm thin" tih hi a nihna takah chuan inpekna emaw rawngbawlna lama tlinlohna aiin inrelbawlna (administrative issue) lama thil fel tawklo niin a lang.

Inrelbawlna thila tualchhung kohhran thuneihna (local church autonomy) leh inkhaikhawm veka headquarter atanga rorelna (centralised administration) chungchang hi Rev.Dr.H.S.Luaia nen tum khat kan inkawmin a ngaihdan ka zawt a. Tuna kan kaldan - centralised administration - hi Mizo te tan tha zawka a hriat thu min hrilh a. Mizo nunphung leh rilru puthmang hrechiangtuten kohhran inrelbawlna leh inenkawlnaa a inkhaikhawm zawnga inrelbawl hi kan nihna enin a tha thawhkhat viau mai. Kan tlin dan leh a hlawk thei ang bera kan thawh thiam dan pawh niin a lang tun dinhmunah chuan. Amaherawhchu, hetiang reng lova kal hi thil thalo a ni lo mai thei. Sawt zawk leh tangkai zawka Pathian rawng kan bawl theihna tur kal dan thar hi khawvel hmun danga kohhran te tih dan enin zir tur a awm theiin a lang.

Mizoram Baptist Kohhranin Chanchin Tha hril rawngbawl hna kan thawhpui Australia ram Baptist kohhran te tih dan te pawh hi engemaw chenah a entawn theihin a lang.

"While we celebrate our unity as a movement of God’s people, we also celebrate our diversity. Each local Baptist church in our movement is autonomous, and responsible for setting its own vision, budget, programs, activities, and decision-making processes. Local churches choose to affiliate together as part of State Unions for fellowship, encouragement, equipping, accountability, mutual ministry and administrative support" tiin Australia ram puma Baptist kohhran inzawmkhawmna Australian Baptist Ministries chuan a sawi a. Pawl inzawmkhawm an nihna hian inrelbawlna tak takah chuan thu a sawi thui teh chiam lo. 

Tualchhung kohhran hian kawng engkim deuhthawah thuneihna a nei a. State tin ten Baptist Union an neihah pawh hian tel tul ti lem lo chu an tel chuang lo. Mahse, a tam zawk chu an tel niin a lang.

Heta an kohhran tualchhung rorelna hi BCM Assembly rorelna a sang ber ang hian kohhran inenkawlna thuah chuan a sang ber a. Budget a ni emaw, program siam a ni emaw, missionary lak leh chawm a ni emaw tualchhung kohhran rorelna kha kohhran kal dan chu a ni mai. Isua zirtir Petera ten kohhran an kaihhruai dan nen a inang viau.

Heta kan lawina kohhran Mortdale-Oatley Baptist Church (MOBC) www.mobc.org.au pawh hi chutianga Baptist Union zawm, amaha inrelbawl a ni a. Pastor rawih chungchangah pawh hian tualchhung kohhran thuneihna nei a nih angin pastor tur pawh kan thlang mai thin. Amaherawhchu, Baptist Union hriatpui (accreditted) minister an ni tlangpui.

Tuna kan pastor hi Scottish mi a ni a. Kan pastor a nih hma hian London ah pastor hna a thawk thin a. Kum 12 kalta vel khan Sydney ah rawn zinin MOBC-a a hmelhriatte kaltlangin thusawiah an sawm a. A hnu deuhvah pastor tura an duh thu an hriattir a. Heta an tih dan angin MOBC hruaitu pastor thlang turten an interview a. England-a pastor chu $30000 vel sengin an chhungin kan chah chhuak a. A kohna tak pawh a ni ang, kan pastor rawngbawlna hi kohhran mipuiin an hlut hle a. A rawngbawlna pawh a nung hle.

A thawhpui turin Assistant Pastor pakhat kan nei a. Thalai enkawl tur pastor, Pathian Thu a zirlai atanga kan rawih, nula fel tak mai kan nei bawk.

Kan pastor nupui chu English mi, nu fel tak, nursing degree nei a ni a. Kan veng bul hnaia sorkar damdawiin St.George Public Hospital ah nurse hna a thawk. Kan assistant pastor nupui pawh chutiang tho chu.

Sap ho khawsak dan hi hnathawk society a ni a. Hna thawk lova awm hi khua leh tui tha nihlohna a ni tih an chian avangin Kristian phei chu rim taka hna thawka, kohhran leh khawtlanga thawh (contribute) neia sum leh pai hlawhchhuah nei tura beisei an ni.

Kohhran thil tih neuh neuh hi kan ngah ve khawp mai a. Chutah te chuan kan pastor nupui te hian an tlin angin an theihtawp an chhuahin ka hria. Sunday school zirtir hna a ni emaw, nu ho thil tih a ni emaw naupang program huaihawt a ni emaw kan pastor nupuite hi an awllo hle, chhungkaw enkawl leh an hna thawk chung siin.

An pasalte awmnaa an kal zel theihna chhan chu Mizorama kan tih dan ang nilo, sorkar officer posting ang nilova tualchhung kohhranin anmahni enkawl atana an duh ngei; anni pawh chumi tura kohna dawng ngeia inhria an ni thin. An kalphung zawk avangin pastor in a nupui a hruai ngei tur a ni tih lam hi rel buai ngai lovin, automatic-in a in rel fel nghal a. A chang chuan an pastor duh ang an hmuh mai loh chang te a awm thin bawk.

He “harsatna” hi rorelna hmanga kan sukiang dawn a nih chuan harsatna tawk ve lo kan Baptist kohhran pui ten an tih dan ang hian rel ila, a fel nghal thei ang.

Rev.Dr.K.T.Chungnunga, Australia rama BCM in a tirh tuma a lo enkawl ber tu Rev.Clarrie Edwards-a’n 2007-a a ina ka thlen tuma min hrilh chu – BCM hian pastor tam zawk a chher a ngai – tih a ni. Pastor tam zawk hi kan kohhran hian ruai thei thuai thuai ila, pastor pakhatin kohhran pakhat zel a enkawl theih hunah phei chuan thlarau lam inenkawlna leh rawngbawlnaah kan chak sawt ang. An nupui te chu hna lo thawkin thawk lo se “harsatna leh fellohna tam tak” awm nia kan sawi te hi a bo vek loh pawhin a reh duakin ka ring.

Tuesday, July 21, 2015

KOHHRAN LEH ZU - ISUAN ENGTINNGE A TIH ANG?

Tunlai chu Zoramah zu huat a hluar hle mai, zu huat hmel fe fe pawh an tam hle. Kohhran thenkhat phei chuan zu zuar te an thunun a. Kohhran pakhat phei chuan a zuar lo thlengin an thunun hial a. Aizawla kohhran pakhat chuan an veng chhunga dan lova tun hma atanga zu lo zuar thin an enliam laiin sorkarin dan a siam thar hmanga zuar erawh an do thung a. A hmatawngah ram dang Kristianten a do anga do lo tih hrechiangtu pastor pension tawh a tang nghe nghe.

Tuna kan kalpui dan hrim hrim hi chu Muslim sakhaw hruaitu firfiak hote kal duh dan nen a inang hle. In awih loh chuan Muscat, Oman-a khawsa Pu Zuia khu zu zawt ula, chiang takin a lo hrilh thei ang che u.

Zu kan do dan a diklo tih avang hian zu hi a tha emaw fak tur tihna a ni chuang hlek lova. Mizo te hi zu in thiamlo hnam hrang hrangte zingah kan tel ve avangin zu in phalrai ang zawng phei chuan sorkar emaw kohhran hian policy neih chi a ni lovang. Zu in thiam berte zingah mi pahnih chauh han sawi ta ila - kan Chief Minister leh Pu M.Lalmanzuala. Anni lo pawh hi zu in thin zu an in avanga an mawhphurhna hlah lo leh tibuai lo tam tak an awm ngei ang. Entawn tlak ber zawk chu kan Lalpa Isua Krista kha a ni. Vawiin chu Isua zu in lam te I han ngaihtuah ho dawn teh ang.

Mizoram kohhran te hian Kohhran dintu leh a lu ber Isua Krista nun hi uluk deuhva en chuan mak tih tur deuh deuh kan nei ang. Sual neilo khan zu a in a. Zu a in mai pawh nilovin zu a in thin a ni tih ama sawi ngei atangin a lang. Ruih lam erawh a ti ngai lova, zu bawihah a indah reng reng lo bawk tih a nun atangin kan hre thei awm e. Amaherawhchu, kan Lalpa Isua kha Juda tlangval Juda culture zawm a nih angin zu in mi a ni ve tlat.

Number 6:1-5 kan en chuan heti hian a inziak a – "Tin, LALPAN Mosia a bia a, 'Israela thlahte hnenah sawi la, an hnenah, ‘mipa emaw, hmeichhia emaw pawhin eng emaw thutiam bik, LALPA tana inpekna Nazarit thutiam a tiam lai chuan, uain leh zu a nghei tur a ni; uaiin thur pawh, zu thur pawh a in tur a ni lo va, grep tui pawh a inin grep rah a tharlam pawh, pho vuai pawh a ei tur a ni hek lo. A intihhran chhung zawng chuan grep hruia mi a mu pawh, a pil pawh a ei tur a ni lo. Intihhranna thu a tiam chhung zawng chuan a lu pawh meh hauh loh tur a ni...”

Nazarit thutiam tiamtu zinga langsar zual chu Samsona leh Zawlnei Samuela te an ni a. Lal Isua unaupa (cousin) Baptistu Johana pawh kha a nu pum chhunga a awm lain a pa, puithiam Zakaria hnenah, “...uain leh zu reng reng a in lovang...” vantirhkohin a lo ti tawh a ni. Pathian tan inserhhrang an nihna angin Nazarit thutiam tiamtu te khan zu an in lova, Dr.Manmohan Singh-a te angin an sam pawh an zuah a ni. Sikh ho lu meh loh culture hi Bible ah a tel ve leh tlat bawk!
Zu hi Bible hunlaiah pawh a thatlohna tam tak an hre ngei a ni tih Bible kan chhiar chuan kan hre thei ang. Lalpa tana inserh hrang duh Nazarit mite en hian zu in loh hi Pathianin a thil duh ni pawhin a lang. (Pastor leh upa leh rawnbawltute zu in lo a that nachhan)

Baptistu Johana pawh a chhia leh tha hriatna a hman theih hma daih atangin chunglam zawkin zu in lo turin a serh hrang a. Zu in loh hi thatna tam tak a awm a ni ngei ang. Rev.Dr.Billy Graham-a te US President hlui George W.Bush-a te paw’n zu in loh an thlang a. Zu an inloh avanga rual an pawlohna reng reng hriat a ni lo. George Bush-a phei chuan a zu nghei kha duhthlanna a siam zinga la pawimawh ber pawlah a ngai hial a ni. A lehkhabu “Decision” ah khan a decision No.1 ah a zu nghei a tarlang nghe nghe. Pakhatnaa a dah chhan pawh zu a nghei kha a hnu zela a nun hriltu a nih thu a sawi hial a ni.

Zu hi fak tur emaw dem tur emaw sawimawi tur emaw sawichhiat tur a nih leh nih loh chu thuhran lo ni ta se. Kohhran lu ber Lal Isua nun atang hian zu hi I han en lawk dawn teh ang.
Luka 7:33, 34 ah khan Baptistu Johana zu in ngaihloh thu heti hian Lal Isua’n a sawi a, “Baptistu Johana chu...uain pawh a in lova.” A sawi zelnaah, “Mihring Fapa a lo kal a, a eiin a in a, nangnin, ‘En teh u, chaw heh mi, uain heh mi, chhiahkhawntute leh mi sualte thian saw!’ in ti si a” tiin zu a in thin ngei thu a rawn sawilang a. Lal Isua khan zu a in thin kha chapo pui emaw uannan a sawi lova. A rawn sawina background tak hi chu farisai hote’n amah chirhthehnana a zu in an sawisel thu a ni a. Congress party lamin an pute rorel dan diklo sawiseltute nasa taka, a chhe thei ang bera chhuah an tum thin ang hi a ni ber ang chu. Thudik hrula dawt leh tawngkam chhe taka mi va beihzui hi mi hnaisailo te tihdan a lo ni awm e.

Lal Isua khan zu a in thin a, a in thin chu hriain farisai hote khan amah beihnan “zu in” ti mai nilovin “zu heh” tiin an lo sawi darh chiam tih kan hmu thei ang. An puhna hrang hrang phei chu a chhe hle. Zu hi Lal Isua khan a haw lova, a do bawk lova. Chuvang chuan Zoram kohhrante hian kan Lalpa hnung zuia kan zu huat leh do hi kan tihtawp a tul.

Tlawmngai pawl lian ber YMA thiltum leh dinchhana inziak - “Kristian nun dan tha ngaihsan” tih hi Kristianna dintu Isua Krista nun atanga kan tan dawn chuan zu heh leh zu ruih nilo nunphung ti buailova zu in hi kan ngaihsan a ngai dawnin a lang.

Isua’n zu rui lova zu a in thin chuan Kohhrante leh YMA hian zu khap lam nilo zu in leh zu ruih loh 
lama ke pen turin mawhphurhna lian tak kan nei.

Tun hnai khan Kohhran thenkhatin an kohhran rorelna kaltlangin zu zuar leh zu in theihna permit nei te an chungthu an rel sak a. Sawi tak ang khan kohhran pakhat phei chuan a zu zuar lo chenin an thunun a. A thawhlawm te pawh dawn loh tur hialin an rel a ni awm e!
Zu hi a thalo thei hle a, a hnathawh hi a huatthlalaawm hle tih chu mi zawng zawngin kan pawm a rinawm. A zu heh ber paw’n!

Amaherawhchu, kan entawn tur ber Lal Isua’n zu hi a lo in thin chuan kan do thiang lovang. Amah anga zu kan in thiam hlawl lo a nih chuan entawn tur tha tak tak an awm reng tho mai. 
Zu in duh chuan in se, insum erawh a Pathian Thu a ni tih hria se. A Fapa thisena a lei, khawvel lak ata a koh hran he Krista taksa hi chuan buaipui tur dang I buaipui ang u. Zu phei chu Lal Isua’n, “Pathian Rama a thar” (Marka 14:25) a in leh tur a la sawi ta deuh deuh zawk a nih hi. Mizoram Kohhran te leh YMA ten kan do em em hi vanah Isua’n a la in dawn a. He leia lo do chi a ni lo.

BCM PASTOR TE LEH AN NUPUITE CHUNGCHANG- 3

Nizan chu kan kohhran (BCM) headquarter office-a thawk pakhat, u anga ka en thin avanga ka nel ve ngam deuh nen kan inbiaknaah a lo ngaihven em em lem loh leh a sawi chak em em pawh ni lova ka hriat, kan kohhran pastorte leh an nupuite chungchang ka sawipui a.
Thil engengemaw kan sawi a. Serkawn boruak tlangpui min hrilh bawk a.
A khawi lam lam hi tanna tur sawi chuan an tanawm ve vena lai a awm thei a. Amaherawhchu, a hnena ka sawi ber chu pastor nupuite chungchanga kan kohhran rorelna sang ber 2008 Assembly-in a rel kha kan dan kalh a ni tih leh legal consequence nei a ni tih a ni. Tin, khami rorelna diklo atanga kal dik ta lo zel hi ti dik turin kan kohhran hruaituten mawhphurhna an neih thu ka sawi bawk a.
Min hrilh pakhat chu "Matana mai mai hi..." tih lam zawnga lo ngai te pawh a ni awm e. An lo thlirna zawn atang chuan a hriatthiamawm ka ti tho mai. Ka tawmpui kher lo nain.
Kan ngaihdan a inang lo tih ka hria a. A ngaihdan ka tawm loh avang emaw ka ngaihdan a tawmloh avang khan, Congress mi dukdaklo hovin an lamtanglo a chhe thei ang bera beih an ching ang ni lo hian, tha takin kan ngaihdan kan sawidun thei a, a lawmawm ka ti hle.
Hmanni deuh khan hemi chungchanga zawhna awm pawimawh tak tak chhanna hriat a tul avangin, thil dangah pawh miin an lo tih thin tawh angin kan HQ lam internet kaktlangin ka zawt a. "Sawi a hun tawh lo" tiin min chhang.
Min chhangtu hi ka thian tho a ni a. A lawmawmloh ka ti nain kohhran mipui tam tak leh hruaitu te rilru a nih thu mi hrilh a. A dinhmun chu ka hriatthiampui tho mai. A chhan chu kohhran thawktu a nihnaah hotu lu ber ten sawiho hun tawh lova an ngaih chuan sawihona lo hawn leh kha a tan thil rem ber pawh a ni chiah lovang. A hnuah telephone in kan inbia a, tha tak chuan ngaihdan inang lo bawk chu kan sawi dun leh a. Ka hrilhhriat duh erawh min lo ngaihthlak sak avangin ka lawm hle.
Pawi deuh chu kan kohhran chhungkuaah boruak thalo tak maiin min chiah a, pawl ang deuh reuh kan awm ta phawk mai hi a ni. Inhmangaihnaa rawng in bawlsak tawnna thlarau phei chu a bo hlauh tawhin ka hmu. Hei hi ti dik leh turin min hruai tura kan ruat, kan thlan hruaituten mawhphurhna lian tak an nei tih an hriat a pawimawh hle. Hruaitute an ni miau a.
Kan boruak hi a thalo tih mai pawh a tawk tawh lova, a bawlhhlawh tel tawh tih kan hriat a pawimawh hle bawk awm e. A lehlam lehlam atanga tawngkam chhuak phei chu sawichhawn leh tlakloh khawpa mawilo a ni. A hre hnem phei chuan sawi tur in hre teuh zawk ang.
Kan dinhmun hi, saptawngin, a "toxic" hle a tih loh theih loh. Lehlamin engemaw sawi se, a lehlamin anmahni do zawngin an ngai tlat tawh a. A khawi lam lam pawhin an ngaihdan leh duhdan sawi se, insual ngam khawpin kan thin a rim a ni tawh ber e.
Sawiho a hun tawh lo anga ngaihna leh sawi ve thiang lo awm anga ngaihna hi thil hriat dan diklo a ni tih leh ngaihdan puitlinglo a ni tih kan hriat a tha hlein ka lo hria.
Tin, kan ngaihdan a inanloh avanga kan ngaihdan tawmpuilo te va hmuh diklohna lian tak hian Pathian aw min hriat tir thei lo niin ka lo hre bawk a. Tun ang zela kan kal chuan Setana aia sual zawk intih te emaw sarcastic taka tawngtai tlem, tawngtai tam mamawh tih te'n kan insawi mai mai dawnin a lang!
He'ng boruak thalo zawng zawng lo irhchhuahna hi chi hrang hrang a ni thei anga, ziaka kan hmuh theih thutling hmasa berah chuan 2008 Assembly Thurel 1.21 kha a ni ang.
Kha kan thurel kha uluk deuhva kan en chuan keimahni danpui chiang takin kan kalh a. India ram danpui chiang takin kan kalh bawk a. A hnu zela bawhzuina rorel hrang hrangah phei chuan thil nihphung, kan danpui leh inkaihhruai dan kan pawngsual a ni a ber mai. Kum 5/6 kaltaa rilru te kum 5/6 hnua meeting ah ziaka kan dah theih chuan kum 100 kaltaa kohhran ngaihdan kha vawiin ah kan siam chawp thei anga. Kum 2000 kaltaa Isua ngaihdan pawh kan ziak chawp thei ang.
Kan rorelna diklo nghawng avangin kan inhliam nasa ta lutuk a. Zawhna a siam hnem ta lutuk bawk si a. Thil thalo lian zawk a hrin hmain tihdik thuai a pawimawh hle.
A tihdik dan awlsam leh tih theih awm chu kha kan Assembly thurel diklo tihtawp a ni. Chumi tur chuan kan GS hmasa ten Assembly thurel an bawhzuiloh thenkhat ang chiah khan bawhzui theihloh a nihna kohhran mipui hnenah hrilhin he harsatna kan insiam hi an titawp thei a. Chu chu an mawhphurhna lian tak pawh a ni.
Rorelna dik hi luipui angin luang rawh se. Chu chuan kan rawngbawlna leh pastor te rawngbawlna a tichak zawk ang.

Saturday, July 18, 2015

BCM PUIPATEN ZAWHNA AN CHHAN NGAITE

BCM Assembly 2008 Thurel No.1.21;page 20

Pastor Biala Nupui hruai chungchang:

Bialtu Pastor ten an thawhna hmunah an nupuite an hruailoh avangin rawngbawlna kawngah harsatna leh fel lohna tam tak a awm thin a. Hetiang harsatna sut kian nan hian Pastoral Committee chuan a hnuaia mi ang hian inkaihhruaina a siam a ni.

1. Sawt zawk leh tangkai zawka rawng kan bawl theih nan, Bialtu Pastor chuan a thawhna hmunah a nupui a hruai ngei tur a ni.

2. Hrisel lohna (health ground) avanga harsatna neite chuan Pastoral Committee-ah thlen theih a ni ang.

3. Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal a ni lo ang a. Kohhranin Pastor/Minister nupui service mamawh tak takna a nei a nih chuan, a mamawhtu Department chuan Pastoral Committee-ah a dil thei ang a, Pastoral Committee chuan a thutlukna chu Executive Committee ah a thlen ang.

Assembly thurel 1.21 sub number 3 hian kan Constitution Bung 3-na leh Indian Article 19 (1) (g) a kalh lova kan ngaih chuan heng a hnuaia zawhna te hi kan kohhran puipaten an chhan a tul a ni:

1) 2008 Assembly thurel 3-na ah hian 2015 hnu lamah pastor nupui te full time-a hna thawh phalloh tih chauh a lang a. 

Nov 2014 Pastoral Committee in "an nupuite sawrkar hna leh hna dang full time a thawkte an bantir theilo a nih chuan anmahni zawk chu chawl tura ngaih an ni" tiin 2008 Assembly thurel "tum dan" a belh hi engvanga 2008-a Assembly minute-a lang lo nge a nih? Assembly thurel hi Pastoral Committee in a ti danglam em? A tih danglam chuan Assembly thurel ang lo a nihna angin a valid lo tihna a ni em?

2) 2008 Assembly thurel 3-naa "Kohhranin pastor/minister nupui service mamawh tak takna a nei a nih chuan, a mamawhtu Department chuan Pastoral Committee-ah a dil thei ang a, Pastoral Committee chuan a thu tlukna chu Executive Committee-ah a thlen ang" tihah hian pastor/minister nupui Kohhrana thawkte chungchang chauh tan ngaihhnathiamna provision a lang a. Kohhrana thawk nilo te tan ruahmanna siam a ni lo hi eng vang nge? Kohhrana thawk nilo ten anmahni ruaitu hnen atangin Kohhrana thawkten an tih theih angin Pastoral Committee-ah thlen ta se, an service chungchang tawptir mai lo tura ngaihtuah a ni angem? 

3) 2004 Pastoral Committee minute No.3 hi Assembly thurel dan nena inang lo a nih vangin minute No.4 hi bawhzui theih a ni lo tihna a ni em?

4) 2004 Pastoral Committee minute No.3 hi Assembly thurel tumdan bawhzui theihna niin minute No.4 ang hian Service Rules Bung 10-naa KOHHRAN-A THAWKTUTE TIH LOH TUR LEH THUNUNNA, THAWKTUTE TIH LOH TUR LEH THUNUNNA hman tur ni ta se, thununna 5-na hman hma hian thununna dang - zilh, hnathawhna hmun sawn, hlawh pum emaw a then pek te hi hman hmasak phawt a ni dawn em?

a) Zilh
b) A hnathawhna hmun sawn (transfer)
c) A hlawh pumin emaw a then emaw pêk loh
d) Hna hniam zâwka dah
e) Chawlh lailâwk tìr
f) Service tihtâwp
g) Compulsory pension pêk.

5) He inthununna danin a sawi, "Hnathawktu thawk tha duh lo, hotute thu awih lo leh awm tha duh lo chu a thawhna hotuin a zilh hnu pawha a la sim duh loh fo chuan Committee-ah a thlen ang.  Committee chuan a awm dân chu tha lo ngeia a hriat chuan a hnuaia thununna chi hrang hrangte zînga mi hmang hian hnathawktu chungah action a la nghâl ang" ah hian pastor leh an nupuiten an harsatna an rawn thlen Committee in genuine case tlinga a ruat loh avang hian he'ng pastor te hi "hnathawktu thawk tha duhlo, hotute thu awih lo leh awm tha duhlo" an ni kan ti em?

6) Chutianga hnathawktu awm tha duhlo lo ni ta se, danin a sawi angin zilh an ni tawh em? Zilh an nih chuan engtinnge zilh an nih? An harsatna rawn sawi te hi nungchang thalo zilh sim theih ang sim theihloh harsatna ni ta se Committee in engtin nge a tih ang?

7) Pastoral Committee Nov 2014 Minute No.3-a pastor te "chawl tura ngaih an ni" tiha "chawl" tih hi Constitution Bung 10 No.12 in "suspend" a tih nen a inang em? Suspend tura ngaih ni ta se, Pastoral Committee in suspend na tur thupek a pe dawn tihna a ni em? Suspend hun hi eng anga rei tur nge? Eng tlawhchhanin nge a hunchhung tur rel a nih ang? Suspend chhungin pastor quarter an luah thei em?

8) Kan Kohhran constitution in Pastor mawhphurhna leh tihturte a tih 26 zingah hian tihlawhtling thei lo pastor engzat nge awm? An nupui te full time-a hnathawh vanga tihlawhtling theilo engzat nge awm? A tihlawhtling theilo te chu engtinnge Pastoral Committee in a an chungchang a ngaihtuah?

He'ng zawhna bakah hian Kohhran inrelbawlna pawn lam thil kan Assembly leh Pastoral Committee thurelah a awm niin a lang:

1) Pastor nupui sorkar leh hna dang hnathawk te hi Kohhranin kan rawih an nilo tih kan pawm chuan Assembly thurel "Sawrkar hna leh hna dang Full Time a thawh phal a ni lo ang" tih hian awmzia a neilo tihna a ni em?

2) Pastoral Committee minute-a lang, "an nupuite sawrkar hna leh hna dang full time a thawkte an bantir theilo a nih chuan..." tihah hian a ruaitu nilo pastorin an nupuite bantir turin kan beisei tihna a ni em? An nupuite tihluinain bantir ta se, pastor te chu dan kan bawhchhiat tir a ni theiin Pastoral Committee in a hria em?

3) BCM Constitution Bung 3 MIZORAM BAPTIST KOHHRAN TIHTUMTE (OBJECTIVES)-a "mihring dikna (Fundamental Rights) humhalh" ("defend human rights") hi kan Kohhran danpui constitution a chuang a nih si chuan pastor nupui sawrkar emaw hna dang thawk te bang tura an pasal te kan phut hian humhalh kan tum an human right kan bawhchhiat sak a ni em? Kan kohhran hian kan rorelna sang berah kan danpui kan kalh em?

4) Article 19(1)(g) Constitution Of India "Protection of certain rights regarding freedom of speech etc 

All citizens shall have the right (g) to practise any profession, or to carry on any occupation, trade or business" tih ah hian India khua leh tui zawng zawng Fundamental Right zinga an hna thawh theih emaw thawh duh zawng an tihbuai loh a an thawh phalsak kan ni a. Chu Fundamental Right chu kan Kohhran Constitution thiltum ah pawh humhalh kan ziak lang a ni. 2008 Assembly thurel hian India ram Constitution a kalh a. Hei hi Kohhranin kan thuneihna piah lamah ro kan lo rel tihna a ni. Keimahni Constitution ngei pawh kan kalh avangin 2008 Assembly thurel kha a ding (valid) thei lovang. Chuvang chuan Pastoral Committee in bawhzui theihna chhan a neiin a lang lo.

Friday, July 17, 2015

BCM PASTOR TE LEH AN NUPUITE CHUNGCHANG - 2

Ruatfela Nuin, "dan rorelna hma a insawifiah a tul hma hian, Pathian rawn chunga an inngaihtuah nawn leh a tha hlein ka hria" tiin pastor nupui hnathawk te bang tura tih chungchangah Baptist Church of Mizoram hotute a ngenna dengkhawng tak article hmangin a tarlang a, BCM hotu thenkhat tan chuan a kuanglo nawrtu dik tak a ni zawk awm e.
Baptist kohhran hruaitute ngaihdanah chuan Ruatfela Nuin dan a rawn changchawi hi kohhran huang chhunga kan invoke ngai lem loh thil a ni a. Pathianin a kohhrante min awmpui tlata hriatna avangin he khawvel dan hian min tibuaiin mi tam takin kan ngai lem lo.
BCM Assembly 2008 Thurel No.1.21 in "Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal a ni lo ang..." vang hian pastor nupui te emaw Ruatfela Nu emaw pastor nupui sorkar hnathawk hotuten emaw court ah kalpui ta se, Indian Constitution Article 19 (1) (g) "All citizens shall have the right...to practise any profession, or to carry on any occupation, trade or business" tih leh BCM Constitution Bung 3-a Mizoram Baptist Kohhran Thiltumte zinga mi "mihring dikna (Fundamental Rights) humhalh" a kalh a.
Rorelna sang berin rorelna kaihhruaitu danpui a kalh chuan chu rorelna chu bawhzui theihloh leh void a ni.
Khawvel rorelnaah chuan "unconstitutional" tia sawi thin a ni a. Chief Minister sms duhdaklo thawn a nih khan Information Technology Act, 2000 Section 66A-na hmanga a thawntu man a ni a. Democracy innghahna bulpui ber ber te - zalen taka miin a ngaihdan a sawi theihna - a kalh avangin Supreme Court in March 24, 2015 khan "unconstitutional" tiin a paih thla a ni.
Kan kohhran pawhin BCM Assembly 2008 thurel No.1.21, sub number 3 hi kan dan a kalh avangin bawhzui emaw kalpui theih a ni lo tih kan pawm a ngai. Kan pawm loh chuan Constitution in awmzia a nei lo a ni ang a, Bible-a inziaklo dan mihringin tha nia kan hriat kan siam hmangin harsatna pumpelh theih kan indelh tir tihna a ni ang.
"Pathian ram he khawvêla a lo zau zêla, a lo ngheha, a lo lan fiah
deuh deuh theih nân Mizoram Baptist Kohhran inkaihhruaina atân he Constitution leh Rules" hi siam a nih chuan chumi ang chuan kan inkaihruai tur a ni ang.

BCM PASTOR TE LEH AN NUPUITE CHUNGCHANG - 1

2008 BCM Assembly thurel No.1.21 ah heti hian a inziak a:
"Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal a ni lo ang a. Kohhranin Pastor/Minister nupui service mamawh tak takna a nei a nih chuan, a mamawhtu Department chuan Pastoral Committee-ah a dil thei ang a, Pastoral Committee chuan a thutlukna chu Executive Committee ah a thlen ang."
2015 hnu lamah pastor nupui te full time-a hna thawh phalloh tih thu a ni.
Nov 2014 Pastoral Committee in "an nupuite sawrkar hna leh hna dang full time a thawkte an bantir theilo a nih chuan anmahni zawk chu chawl tura ngaih an ni" tiin 2008 Assembly thurel "tum dan" a belh hi 2008-a Assembly thurel ang a nih si loh chuan Pastoral Committee in Assembly thurel a ti danglam tihna a ni em? Pastoral Committee hian Assembly thurel tihdanglam theihna thuneihna a nei em?

BCM PUIPATE NENA INBIAK THU

Mizoram Baptist Kohhran rorelna sang ber Assembly chuan 2008 khan “sawt zawk leh tangkai zawka rawng kan bawl theih nan, Bialtu Pastor chuan a thawhna hmunah a nupui a hruai ngei tur a ni” tiin ro a rel a.
Hlawh neia hun puma Pathian rawngbawl tura serh hran Pastor te chauh nilo Baptist kohhran pumpuiin kan Lalpa Isua Krista hnungzui leh Thupek Ropui min pek tihlawhtling tura kan ngaihtuahna, tha , sum, hun leh tawngtaina kan seng hi Baptist kohhran chuan kan danglamnaah kan chhiar thin a. Kan thupuiah pawh “Chanchin Tha Mi Tin Tan” kan ti a ni. Khawvelah hian Kristian pawl hmingpu he rilru pu lemlo an awm teuh avangin Mizoram Baptist Kohhran te chuan tam lo mah ila, kan Lalpa Thupek Ropui vawngtute zinga mi nia kan inhriat avangin Pathian Thlarau Thianghlim hruainaa kalah kan inngai a ni. Tlinlohna tam tak awm mah se, kan theology a dika kan hriat avangin min cho tu a ni fo. (Baptist chauh lo pawh evangelical Kristian kan awm tih erawh kan pawm)
Chu mission oriented rawngbawlna tichak tura kan Kohhran upate leh pastor ten min kaihhruainaah pastor nupui bik te hian dinhmun pawimawh tak an chelh a ni tih kan hriat avangin an pasalte rawngbawlnaah thuk zawkin tel se tih chu kan duhdan a ni a. A pawimawh hle. Pastor rawngbawlna pawimawh tak mai – counselling – ah phei chuan pastor in nula emaw hmeichhia a mala kawm a rem loh thin avangin a nupui a tangkai mai nilovin a tel ve ngei ngei a tulna a awm zawk a ni. Baptist minister leh khawvel huapa thuhriltu langsar Rev.Dr.Billy Graham-a phei chuan amah chauhvin pindan khar hnanah a nupui tih loh chu hmeichhe dang reng reng awmpuilo turin a intiam hial a ni. US President candidate Hillary Clinton-i nena tum khat an in hmuh pawhin restaurant ah a ualau thei ang berin an thu dun.
Pastor nupui ten an pasal te an tawiawm zel a pawimawhzia hi kan sawi tawklo fo zawk a ni.
Harsatna awm ta erawh chu “hruai ngei” tura ro kan rel tak lai hi a ni ta a ni.
“Sawrkar hna leh hna dang Full Time a thawh phal a ni lo ang” tiin Assembly in 2008 khan ro a lo rel a. Kan Assembly hian a “tul apiang” a ngaihtuah theih laiin kan danpui ber – BCM Constitution- kalha a rel dawn chuan chu Constitution chu a siam that phawt a ngai a. A nih loh chuan thurel awmze neilo (valid lo) tihna a ni ang, thil tum tha tak pawh ni se. A nih loh chuan Constitution in awmzia a neilo tihna a ni ang.
BCM Consitution Bung 3-na “MIZORAM BAPTIST KOHHRAN TIHTUMTE (OBJECTIVES)” kan en chuan heti hian a inziak:
“Bible zirtîrna leh Thlarau Thianghlim hruaina ngaichâng zêlin Mizoram Baptist Kohhran chuan a hnuaia târlante hi Pathian ram a lo zau va, a lo ngheh a, a lo lan fiah deuh deuh theih nân tihpuitlin a tum a ni:-
5) Khawtlâng nun siamthat leh tih hmasâwn : Mi zawng zawng tâna inremna kawng zawn te, mihring dikna (Fundamental Rights) humhalh leh sakhaw zalênna vawnhim tlat te, mihring nun pumpui changkânna tûra thawh te, Pathian thilsiam humhalh te, mipui rilru leh ngaihtuahna tichangkâng tûra zirtîr te, inthliar bîkna awm lo leh hlâwkna ngawt ûm lova khawtlang thatna leh hmasâwnna tûra thawh.”
Mihring dikna human right hi India ram constitution pawhin a humhalh a ni a, BCM pawhin a pawimawhna hriain kan humhalh a ni. Chumi dan kalh chuan ro rel a theih lova. Kan thahnemngaih vanga kan lo rel palh a nih chuan kan hriatchhuah rualin chu rorel thiat thei tur thuneitu in a tih dik tur a ni ang.
He thilah hian July 14 khan kan kohhran puipate pahnih Rev.C.Ngurhnema leh Rev.H.Lianngaia te telephone in ka han bia a. In hawng takin thil kan sawi theiin ka hria. An ngaihdan leh hriatthiam dan a diklo nia ka hriat ka hrilh a. Annin Kohhran thlirna zawn atanga thil awmdan nia an hriat min hrilh bawk a. Puitling takin kan inbe thei a, a lawmawm hle.
Kan hotute hnena ka sawi ber chu Kohhran hian kan rorelnaah keimahni Constitution kan kalh a remlo a ni tih leh khawvela kan awmna ram India ram constitution kalh a ro kan relin legal issue a tling thei a ni tih a ni.
Chumi tifiah tur chuan email ka thawn a. Zawhna pawh ka zawh tur thu ka hrilh a. Anni pawhin chutianga tih chu rem tiin an chhan theih ang lo chhan min tiam a. Ka lawm hle.
Email kan inthawn hi Kohhran mipui interest a nih vangin chutianga kohhran mipui interest chin chu remchangah rawn la pho chhuah ka tum a. Pathianin kan zavaiin min tanpui anga, BCM hian Chanchin Tha Mi Tin Tan tia ke kan pen naah chak zawka kan kal theih ngei ka beisei. Ka tawngtaina pawh a ni.