MIZOTE KAN HARHCHHUAH A NGAI

 

India ram khua leh tui nih theihna dan siamthat tumna Citizenship Amendment Bill hi tun thlasik Parliament inkhawm neih turah hian kan MP ten dan thar ni tura pawm an tum tih Mizo mipui te hian kan hria em aw? He Bill hi Act a nih chuan Bangladesh atanga Mizoram rawn lut ru Chakma zawng zawng te hi danin a ngaidam vek dawn a, Mizorama kum 6 an lo awm tlin tawh chuan India ram khua leh tui nihna an nei thei vek dawn bawk a ni. Chakma foreigner kan tih zawng zawng te hi foreigner ni tawh lovin India ram khua leh tui an ni vek tawh anga, Scheduled Tribe nihna dan ang thlapin an nei vek dawn bawk a ni. He dan siamthat tumna hi nasa taka kan ram leh hnam nghawng thei tur a ni a, Mizo mipuite hian thalo kan ti a nih chuan tun hi ngaihdan sawihona hun mai pawh ni tawhlo, a cheta chet hun a ni e.

 

Citizenship Amendment Bill hi nikum July 19 khan Home Minister Pu Rajnath Singh-a'n Lok Sabha-ah a pu lut a. MP thenkhat rawtna avangin pass tura ruahman vek tawh kha chiang zawka zir a nih theih nan Home Minister-in Joint Parliamentary Committee hnena thlen turin a ti leh ta zawk a. Lok Sabha website-a a lan dan chuan Parliament thlasik inkhawm (winter session) kar hmasa bera report thehlut tura tih a ni. Rajya Sabha ah pawh he rawtna pawm a ni a, Chairman atan Uttar Pradesh MP Dr.Satyapal Singh-a chu August 23, 2016 atang khan ruat a ni.

 

He Joint Parliamentary Committee ah hian Lok Sabha MP 20 leh Rajya Sabha MP 10 an awm a. Amendment Bill zirchianga report thehlut tura tih an nih angin hna an thawk nghal a. Thutkhawm pawh vawi 7 lai neiin, study tour pawh vawi 2 an nei a ni. Assam-a study tour neih an tum erawh an thulh. A lan dan chuan tunah hian hna an thawk zo tawh a, report pawh an peih tawha ngaih a ni. Chumi report hmang chuan Parliament ah sawihova MP te pawm tura putluh a ni ang. 

 

Mizo lal te leh politics lama harh hmasa ram hruaitute khan British hovin India rama ro an rel tawp lama an buaipui ber chu Mizote awm zel dan tur a ni a. Kan hruaitu hmasate khan Chakma chungchang hi, an hun lai khan ngaihmawh tham a nih lutuk loh avang te’n, ngaihmawhah an lo nei lo. Mizo hnam hmalam tur thlira an thutkhawm reng reng khan Chakma chungchang hi an rel ngai meuh lo nia hriat a ni a. India ram zalen dawn tep August 14, 1947-a Superintendent LL Peters-a hova Mizo mipui aiawh te’n Mizo hnam hmalam tur an ngaihtuah pawh khan Chakma chungchang hi rel tel a ni lo a ni.

 

Constituent Assembly-in a din Advisory Committee hnuaia Sub-Committee pakhat “Bardoloi Committee” tia hriat kha Mizo te hmalam tur min rel pui tura India sorkar leh Assam sorkar aiawhtu a ni a. Assam rama tlang mite hmakhua ngaihtuahin Committee member te khan hna an thawk nasa hle. India ramin zalenna a neih hma deuh April 16, 1947 khan Aizawl ah pawh rawn kalin, Assam state chhunga Hills District danga an tih ang bawkin, Lushai Hills aiawh tur member pahnih Pu Ch Saprawnga leh Pu Khawtinkhuma te Committee ah an rawn telh a. Ni hnih chhung Mizo mipuite duhdan ngaithlain Aizawlah hun an hmang a, Mizo mipui aiawh hrang hrangte’n Mizo te duh leh mamawh nia an hriatte chu Committee hnena an thlen a. Thil tam tak an sawiho pui a, amaherawhchu Chakma chungchang kha tu pawl mahin Bardoloi Committee hmaah khan an sawilan hriat a ni lo a ni. Thla 4 hnuah India ram a zalen a, Mizo te pawh India ramah kan bet a. Chakma chungchang kha ngaihtuah loh in a awm zui ni berin a lang.

 

Tlangmi hnam hnufual kan nihna kha India ram hruaitute khan an hmuchiang a, 1950 khan Dr. BR Ambedkar-a te’n India rama hnam hnufual (tribal) ho humhalhna tura hma an lakna kalzelah Constitution Article 342(1)-na hmangin sorkar laipuiin The Constitution (Scheduled Tribes) Order, 1950 chu a tichhuak a, hnam hnufual hlawm hrang hrang te chu Scheduled Tribe nihna dan hmanga pek kan lo ni ta a ni. Tun hmaa kan la nih ngai loh nihna thar Scheduled Tribe nihna chu India ram danpui meuh hmanga nemngheh a ni a. India sorkar hruaitu hmasa te hmathlir thuina kha Mizo te tana thil lawmawm tak a ni. Amaherawhchu, Mizo mipui ten kan ngaihtuah ngai loh pakhat a awm a. Kha Order chhuah ruala “mikhual” tia kan lo sawi thin Chakma te pawh kan tlukpui Scheduled Tribe nihna ang chiah pek an ni kha a ni. Chakma te hi Mizoram leilung fa ni lo mah se, leilung fa Mizo te nen India sorkar dan hnuaiah chuan intluk chiaha dah kan ni.

 

Kha Order tihchhuah lai khan Assam State ah kan la awm a. Assam Governor chu Indian Freedom Fighter, Karachi khuaa piang Jairamdas Daulatram (27 May, 1950 – 14 May, 1956 ) a ni. A hma chiahin Sri Prakasha (16 February, 1949 – 26 May, 1950) chu Governor a ni a. Ronald Francis (30 December, 1948 – 15 February, 1949) leh Sir Akbar Hydari (4 May, 1947 – 28 December, 1948) te pawh rei lo te te Assam ah Governor an ni. Order tihchhuah ni Sept 6, 1950-a Assam Chief Minister chu Pu Bishnu Ram Medhi (9 Aug 1950- 27 Dec 1957) a ni a. Ani hi Chief Minister Pu Gopinath Bordoloi (11 Feb 1946 - 6 Aug 1950) dawt chiaha CM a ni. 1950-a India ram President chu Dr Rajendra Prasad a ni a. 1950-a Prime Minister chu hriat theuh angin Pandit Jawaharlal Nehru a ni.

Hun kal tawha thil awm dan kan zir chuan kha’ng ram hruaitute khan an theihtawpin keini hnam hnufual zawk te hmakhua min ngaihsak a tih loh theih loh a, kan Mizo hruaitu hmasa te pawh khan an theih tawkin Mizo hnam hmalam tur ngaihtuahin a tha ber nia an hriat kawngah min hruai an tum a ni tih kan pawm tlang thei ang. Amaherawhchu, India ram hruaitute leh Mizo hruaitute khan Mizo mipui te kha Chakma chungchang min lo sawipui ta se Arunachal Pradesh mipuiin Chakma te nena intluka awm an duhloh bur ang hian 1950 ah khan Scheduled Tribe-a telh kha kan duh bik kherlo mai thei a ni.  

 

Sawihona awm mang miah lovin India sorkar thuchhuak chuan Tribe List ah Chakma te nen ek saman-in min dah a. Dodal theih a ni a, kan dodal lova. Tih danglam theih a ni a, kan MP hmasa ber Pu Ch Saprawnga hunlai atanga tuna kan MP Pu CL Ruala hun thleng hian Mizoram mipui aiawh thlantlin hruaitute hian an buaipui hriat a la ni lo a ni. State sorkar kan lo neih tawhte pawhin. Tin, mipui pawhin kan la sawiho lo hrim hrim a ni. 2017-a kan sawi berte chu “Chakma-te hi Mizoram mi an nilo, indigenous an nilo, Category I ah an awm thei lo” tih te a ni a. Mahse, a nihna takah chuan 1950 Order ah khan Category I kan lo siamah hian an tel daih tawh zawk a, kum 67 hnua paih leh tum hi Constitution kan tidanglam dawn a nih loh chuan thil theih loh a ni. Tin, Scheduled Tribe an nihna hi Constitution siam thain lo paih pawh ni ta reng ila, Mizorama pianga seilian, an pute hunlai atanga awm tawh te phei chu Category I dan kan siam hmang hian kan hnawl a remlo lehzual a ni tih 2000-a Bhanu Choudhury vs State of Mizoram thubuai High Court in a remna kan en chuan a chiang viau mai. Ram leilungfa dik tak tih hi dan mitah chuan a pawimawh (relevant) ber lova, Scheduled Tribe nihna hian a tak takah chuan dikna chanvo a keng deuh vek zawk a ni. Chuvang chuan ram leilungfa tih chungchanga inhnialna atthlak angreng tak hi kan kalsan a, 1950 atanga Chakma-te ram leilungfate tluk chiaha siam an nih tawhna hi kan pawm a, inchhawr tawn zawnga khawsakho dan kan zawn tlan a pawimawh a ni. Mizo te tan khami kuma Scheduled Tribe-a puan an lo ni kha a pawi em em a, mahse kan tihsual kha a nawhreh theih tawh loh a ni. Siam danglam theih a ni a, mahse Chakma-te Scheduled Tribe atanga paih leh tur hian Mizote hian hma kan la la lova. Chutiang chuan hmalak tum pawh ni ila, tih theihloh tluk, thil har tak a ni ang. Dan mit atanga en hi chuan Mizoram mi leh sa diktak Chakma te phei hi chu Schedule Tribe nih phu tak te pawh an ni zawk awm e.

 

Chakma chungchangah hian tih theih a tam lutuk lova, tih theih nei lo erawh kan ni lo. 2017-a Mizo mipuiten tih theih kan neih chu Citizenship Amendment Bill hmanga Chakma ram dangmi sing tam tak India khua leh tui nih theihna tur dodal leh an nih theihlohna tura hmalak hi a ni. Parliament in he Bill hi a pawm chuan Chakma ramdangmi te hi India khua leh tui an ni thup anga, dan ang thlapin Mizoram mi leh sa an ni tawh dawn a ni. Kan MP ten kan aiawha an dodal a tul a, Mizoram sorkar pawhin a dodal a tul. Mizo mipui zawng zawngin he Bill hi tun anga pawm tur a nih chuan kan dodal a tul bawk a ni. Kan dodal anga, rawtna kan thlen anga, chumi chhungin The Foreigner Act hmangin Chakma foreigner kan finfiah theih zawng zawng thawn haw theih te hi thawn haw turin sorkar hotuten Brig Thenphunga leh Pi Indira-i te sorkar laia hmalakna ang khan hma an la thei a ni. Action kan la lo a nih chuan kan tu leh faten min la dem ang a, kan ramah hian Chakma leh Mizo te inkarah innghirnghona nasa tak a thleng ang. Hnam leh hnam inbeihna tak tak te pawh thleng thei a ni.

 

Chakma te a pawngapuia huat emaw "haw vek rawh se" tih ang rilru put hi thil dik a ni lova. Mizo Kristian te tan phei chuan kan Pathian ngeiin thupek pawimawh ber dawttu a sawi mahni anga vengte hmangaih nen a inkalh bur a ni. Tin, kan Lalpa Isua’n tualthah nena intluka a sawi chu unau huat hi a ni a. Tualthah chu Thupek sawm zinga Lalpa Pathianin a phalloh a ni. Sap ho hun lai atang tawh khan Mizo lal te khan Chakma te hi kan rama chen an lo remti tawh a (Mizo nilo Mizoram mi-a pawmin), vawiina hnawhchhuah vek duh pawl a tak taka tawng te ang hian kan pi leh pute leh an lal te khan ngaihtuahna mawl leh sual an pu lo a ni. Amaherawhchu kan Mizo lalte leh a hnua rawn awptu Sap sipai lal te khan an khuahkhirh nasa hle thung. Chakma zawng zawng huaa Bangladesh-a thawn haw vek duhna rilru ang chi hi a Mizo lova, a Kristian lo bawk a ni.

 

Chakma chungchangah hian kum 67 laiin kan tlai tawh a. Mahse, mak deuh chu vawiin thleng hian awmze neia hmalakna hi Mizo te hian kan la nei chuang lo a ni. A boruak a rawn alh hian kan sawi deuh vek a, mahse a tiha tak tih hi a la awm meuh lo. MZP leh Mizo mipui thinrimna hi quota-ah chauh a tawp chuan kan buaina bul zawk – dan lova Chakma te Mizoram rawn luh chungchang - hi kan chingfel ngai lovang. Quota phei chu India sorkarin Mizo te tan nilo Mizoram mipui te tana min pek a ni a, a chang tam ber tur kan nih theih laiin mi zawng zawng tana “fair” lo zawnga dan kan lo insiam hi kan tan zawk hian a reiah a tha lova, court phei chuan a remti lo a ni tih kan hria. Chakma te hi kan nekchep nasat poh leh India sorkar leh khawvel hmaah thiam an chang anga, dan pel deuh reuhva kan beih nasat leh lutuk phei chuan ram te pawh hi kan chan duai thei a ni tih kan hriat a pawimawh awm e. Nupa inrem thei hlawllo hi inneia awm reng ai chuan inthen fel te pawh a tha zawk fova, Chakma te nen hian inremna kawng zawng lo zawnga kan pawr chuan inthathen hi a finthlak mai thei. 

 

Citizenship Amendment Bill hi Parliament-a an pharh a, an pawm chuan Mizorama Chakma foreigner tam tak awm ngeia kan hriatte hi kum khuaa India ram khua leh tui ni tawh tur leh state quota pawh min tawmpui zel tawh turin India ram danpuiin Scheduled Tribe nihna a pe ang a, 1950-a Mizo te Scheduled Tribe nihna ang chiah pek an nih laia Mizo mipuiten kan sawiho lo anga 2017 ah pawh he Bill-in a nghawng tur hi kan sawiho loh a India ram dan siamtu (kan Mizo MP te pawh telin) ten an pawm chuan "Chakma foreigner" thawn haw tur hi kan ramah an awm tawh lovang. India khua leh tui an ni vek tawh dawn a ni.

 

Central sorkarin he Bill a duan hi Chakma te huat vang nilovin Mizo te leh Mizoram mi leh sa dik tak Chakma-te tan pawh a thatloh theih dawn avangin Mizoram mipui zawng zawngin kan do a tul takzet a ni. Thla tam pawh a awm tawh lo. Kan MP te pahnih leh Mizoram sorkar hi hemi thuah chuan an demawm viau naa, tunah hi chuan in demna hun pawh kan nei tawh chiah lo a ni. Ram leh hnam tan thukhat vuaa tanrual a ngai tawh zawk a ni. Mizoram/India khua leh tui dik tak Chakma te pawh kan lama tang tura kan sawm a, duhthlanna kan siamtir an ngai. Chakma ramdang mi te India khua leh tui nih tir hi Mizo ten kan duhloh tlat avangin chutianga hmalakna chu anmahni tan pawh hian a thalo a ni tih kan hrilhhriat a ngai. Chakma foreigner leh foreigner lo zawng zawng hi Mizo zinga firfiak pawlten an phek huat mek a, Mizoram Chakma te hian Bangladesh Chakma te nen an inanglo a ni tih an auchhuahpui loh chuan an pianna rama awm siin nasa taka nekchep leh huat an hlawh tel thei a ni.

 

He Bill chungchanga rawtna thlen theih hun Joint Parliamentary Committee-in a siam (Sept 30, 2016) kha pel duai tawh mah se, Mizo mipuite hian kan duhna leh duhlohna hi India sorkar dan siamtute leh hotute khu kan hriattir ngei ngei a pawimawh. 1950 ah Mizo mipui min sawiho pui lovin Chakma-te Scheduled Tribe nihna kan hmuh rualin India sorkarin a lo pe tawh a, 2017 ah hian kan ngaihdan la lovin dan an siam kan remti thei lovang. He Bill hi NDA sorkar hmalakna lian tak a ni a, an chhuang viau mai thei. Mahse 2017 ah pass ngei ngei nachhan tur a awm chuang lova, min nghawng ve tlat avangin report lo peihfel vek tawh pawh nise kan sawiho leh phawt hi a ngai a ni. Mipui rorelnaa mipui ber remtihna tel lova mipui aiawh roreltuten ro an rel hi democracy kalphung kalh a ni a. Mizo mipuite hriatpuina leh remtihna tel lova he Bill pawm tum hi kan do tlat tur a ni ang.

 

Joint Parliamentary Committee-in sitting vawi 7 a neih khan thahnemngai pawl hrang hrang leh state sorkar aiawhte pawhin an ngaihdan leh rawtna te an thlen a. Rajasthan leh Gujarat state ah phei chuan he Committee hian a hmunah te kalin Bardoloi Committee-in a tih ang chiah khan public hearing mumal tak te pawh a nei a ni. Assam Chief Minister chuan Assam state-a public hearing nei turin Joint Parliamentary Committee hi nikum khan an state-a study tour nei turin a sawm a, amaherawhchu engemaw vangin an thulh. Arunachal Pradesh ah chuan all-party meeting-in June thla khan Chakma te khua leh tui nih tir theihna dan hi an dodal bur thu an puang a, Assam ah pawh an zirlai pawlin an duhloh thu an auchhuah pui nasa hle. Mizo mipuiten kan hriat loh in he dan siam danglam tumna hi a lo kal mup mup tawh a nih ber chu.

 

Engvanginnge Mizoram sorkar hotute, opposition MLA leh kan MP te pahnih hian he Bill hi vawiin thlengin Mizo mipui min la sawiho pui loh? He Bill hian nasa takin kan ram leh hnam a nghawng dawn tih kan hriat si chuan engatinge a zirchiang tura din Joint Parliamentary Committee hi Chakma area ah te pawh thil awmdan rawn zirchiang tura kan phut loh? Pu Nehru-a khan khan kan chhiatna tur kha a duh kher lovanga, chutiang bawkin Pu Modi-a pawh hian kan chhiatna tur hi a duh bik kher lovang. Amaherawhchu, India sorkar hmalakna hi kan ram leh hnam tan a himloh avangin kan remti lo a ni tih kan Prime Minister pawh hi chiang taka kan hriattir a ngai.

 

Engtinnge kan dinhmun hrechiang lovin central sorkar khuan kan chungchang a rel ngawt theih ang? Engvangin nge Mizo mipui te hian chutianga rorel hnan nih chu kan phal ang? Quota chungchanga Chakma te’n kan chanvo min chuhpui nia kan ngaih avanga law and order buaina thleng tawh leh thleng thei kan hria a; dan ang thlapin India ram khua leh tui, Scheduled Tribe nihna hi pek ni ta vek se kan buaina tur hi Saikhumphai let sawm vel a ni thei awm e!