Sikul tan hun sawn hma chungchang hi sorkar lam atanga sawi hmasa bertu hian a nghawng tur tam tak a ngaihtuah ngei chu a rinawm a. A ngaihtuah kim vek lo a nih pawhin sawi a hlawh hle ang tih a hrechiang ngei ang. Sorkar hian tih an tum anga an ti ta vek lo a nih pawhin Zoram pumpui titi chu a luah ta hrim hrim a. Hei aia buaipuiawm lian zawk ram leiba vaibelchhe sangnga chuang kan neih te hi kan sorkar hian chinfel dan tur mipui sawihovah te han chhawpchhuak ta zawk se chuan kan hlawkpui zawk ngei a rinawm.
Sikul tan hma leh tan tlai thatna leh thatlohna chungchang hi ngaihtuahnaah a la luh loh hrim hrim avang hian a tha emaw thalo ti turin rilru ka lo la seng ngai miah lova. Ka hre dik lo mai thei a, kan sorkar hian kum 5 chhung khan, “A kum 6-naah sikul tan hma tur kan ti ang,” tiin rilruah an lo pai ka ring chiah lo.
Hemi chungchangah hian sorkar hotu lam thusawi chhiar theiha awm chu Parliamentary Secretary Joseph Lalhimpuia thusawi te hi a ni deuh berin a lang a. Tun hnai khan Lunglei Congress Bhavan-ah zirna chungchang hetiang hian a sawi niin Pu Vanneihthanga Vanchhawng, LPS reporter chuan a sawi a: “Sorkarin education siam tha tura hma a lak naah hian kan nunphung thenkhat mil tur ringawta education hi kalpui chi a ni lova, education kalphung mil tur hian mipuite kan insiamrem a tul zawk a, kan mut hun leh thawh hun te, kan ei leh in leh kan thil tih dan thenkhat thlak danglam a tul a nih pawhin i thlak danglam ngam ang u.”
Report dangah chuan hemi zulzui tho hian, a tawpna tawngkam dang deuhvin, “…school education ruahmanna mil in kan mut hun leh thawh hunte, kan ei leh in (hun)te pawh mipui in kan thlak ve tur a ni” tiin ziah a ni a.
Mi pakhat chauh lovin kan sorkar hotu thusawi hi an report avangin kan khawsak phung kan thlak tur anga a sawi leh sawi loh hi hriat a har ang reng a. A thusawi lai video emaw voice record emaw thusawi ziaka dah a awm loh chuan eng ang chiahin nge tawngkam hman a nih hi hriat a har viau. Eng pawh chu ni tase, Parl.Secy-in a sawi awmzia chu kan hrethiam awm e. Sorkarin zirna kalphung tha tawk lo nia a hriat tihdanglam a tum a. Ram pum a nghawng dawn vangin mipui hnenah thil awmzia han hrilhfiah a tum a. Mipui rilru hmin loh pawhin tih tlang tho an tum a ni ber mai.
Sikul tan hma leh ban hma tangkaina tur hi a awm thei ngei ang, a thatlohna leh buaithlakna tur pawh a awm teuh tih kan hria. Chulam chu ka sawi tum a ni lova. Mipui laka sorkar rilru lam leh hmalakna an kalpui (tum) dan zawk hi a ni ngaihtuah chian ngaia ka lo hriat zawk chu.
Sikul kal hun chungchangah hian sorkar hotute zingah Education Parl Secy chauh lo pawh hian an ngaihdan te an sawi ka ring a. Tun atan chuan ani thusawi hi sorkar sawiah ngaiin lo en bik ta ila. “Kan nunphung thenkhat mil tur ringawta education hi kalpui chi a ni lo” tih leh “education kalphung mil tura” kan insiamrem a “tul” zawk thu a sawi hi thil nihphung letling hlauh niin ka hmu. Kan nunphung leh khawsak dan inherrem a tul tih hi chu khawvel changkang zelah kan tih ngei ngei ngai a ni tih kan hre vek anga. “Education kalphung” mil tura in her danglam tih erawh hi chu a awmzia chiah hriat a har hle. Parl.Secy hian, sawi ang khan midangin an report-naah chuan, “…kan mut hun leh thawh hunte, kan ei leh in (hun)te pawh mipui in kan thlak ve tur a ni…” tiin a sawi a. Kalphung chhe mek ni lo, sorkarin policy thar a siam mil tur ringawta mipui khawsak phung kan thlak ve tura ngaihna emaw kan khawsak phung thlak danglam “ngam” a tul anga ngaihdan an nei leh chumi ngaihdan hmanga kalphung her danglam lawih an tum hi mipui rilru leh duhdan zahlohna niin ka ngai. Sorkar hian mi zawng zawng ngaihdan a lak vek zel a tul loh laiin tuna a tihdan hi chu mipui rorelna democracy lungphum innghahna leh nihphung a kalh hle a ni. (A thuhrimah kan zing thawh hun leh zan mut hun min hrilh tur hian Congress sorkar hi engtik lai khan nge thuneihna kan lo pek reng reng?)
A kalh chian em em na chhan pawh hemi chungchangah hian sorkar hian zirtirtu hlun leh zirna field-a thawk te thurawn awmze nei a dawng lo a ni lova. Kalpui dan tura thurawn finthlak tak tak pawh an dawng ngei a ni. Mahse, “education kalphung” nia an sawi chu zawm ngei ngei turin tihtlang an tum ta thova. Anti-incumbency factor chi tuh hi pawi an ti lo a nih chuan politician mak tak an ni ang.
Helam atanga thlirna hi han zep ta lawk ila. Australia hi khawvela ram hausa berte zinga mi a ni a. Infiamna lam te, zirna lam te, research lam te leh thiamna hrang hrangah world record hawlh phain a khua leh tuite a enkawl tha a ni tih chu chhinchhiah vek a ni. 1915 atang khan khawvela lawmman ropui Noble Prize pawh 15 lai dawngtu a nei tawh a. Chu’ng dawngtute chu zirna lama a vawrtawp thleng te an ni. India khua leh tui leh India mi hi Noble Prize dawng 8 kan awm, Mother Teresa chhiar telin.
Australia ram hlawhtlinna leh hausakna bulah chuan an zirna kalpui dan hi a en loh theih loh ang. 1788-a Captain Cook-a’n Kumpinu sorkar tan he ram zau tak a hauh khan Australia ram hi ram palaileng ang vek a la ni ber a. Inkalpawhna kawng pawh awm mumal lo, a ram neitu hnam aboriginal hoten kangaroo leh ramsa dang kapa an tuallenna ram zau tak a ni ringawt mai. Mingo ho an rawn luh khan engmah lo atanga bul tan ang an ni. 1901 ah ram pum sorkar an nei ve chauh a. Mipui rorelna lungphum innghahna erawh an vawng tha hle. England ram thiamna leh hriatna leh tih dan tha te chu an “copy-paste” tawp a, kar lovah khawvel hriatin ram leh hnam ngelnghet tak an din thei a ni.
Kan chenna Sydney khawpui awmna state New South Wales (NSW) leh Melbourne khawpui awmna state Victoria (VIC) a sikul tan hun hi rilruah a rawn lang mai mai a. Australia-a state dang te nen pawh a inang viau. NSW ah hian a tlangpuiin zing dar 9 atang tlai dar 3 hi sikul kal hun chhung a ni a. Amaherawhchu, sikul hotuten an mamawh dan azirin darkar chanve vela tlai emaw hma deuhvin sikul tan hun hi an her danglam nual a. An tan hma chuan an bang hma a, an tan tlai chuan an bang tlai mai. Mahse zing dar 9 bawr vela tan deuh vek an ni. Chumi tan hun ang chu tun hma atanga sikul dintu ten mipui nawlpui khawsak phung nena inmil tura an siam a ni a. An tihtirh lai leh tun hun hi in ang tawhlo viau mah se tha an la ti a ni ang, thlak tumna a awm lo. Thlak tum ta se, policy thenkhat an tihdanglam dan enin, mipui an rawn nasa hle anga. A tawpah thutlukna siamin an thlak dawn a nih paw’n, vawilehkhata ti thut lovin hun engemaw chen notice an pe ngei ang. Chutiang chu mipui rorelna kalphung niin a lang a, a hrisel viau. Kum kha leh chen zing dar 9 bawrah sikul an lo tan tawh a. An chhiatpui lem lo. Sawi ang khan an fate chutianga sikul tantir chuan khawvela a berte zinga mi ah an in vawrh thei tho mai.
Baptist Higher Secondary School, Lunglei -a zirtirtu Dr.K.L.Biakchungnunga’n hemi chungchanga a sawi hi sorkar hian a diklo a tih theih loh chuan thil awmzia dik tak ni zawkin a lang: “Mizorama sikul kai hun sawn hmâ tih hi MLPC Act boruak chhilhna tura fing taka ruahman a nih loh vêk pawhin, a chhilhtu tha tak chu a ni hrim hrimin ka hria.”
Inthlan hmaa an sawi that ngam loh, inthlan hnua pawr taka an sawi zu khapna dan chungchang hi sorkar hian a kalpui felloh em avangin sawiselna boruak vai kiannan sikul tan hun chungchang hi a tha hle. MZP lamin an lo tuipui sa bawk si a.
US President Jimmy Carter-a Office of Management and Budget Director T. Bert Lance-a’n thufing angreng tak a sawi hi kan Zoram sorkar hian uluk takin lo ngaihtuah se, thil kalsual tur tam tak a veng theiin ka ring: "If it ain't broke, don't fix it. That's the trouble with government: Fixing things that aren't broken and not fixing things that are broken."
