India ram dan leh thupek kenkawh hna thawktu Indian Police Service officer te training na hmunpui Sardar Vallabhbhai Patel National Police Academy thiltum bulpui heti hian a inziak a: “The primary purpose of the Academy is to prepare leaders for the Indian Police, who will lead/command the force with courage, uprightness, dedication and a strong sense of service to the people.”
Dikna, huaisenna, inpekna leh mipui rawngbawlna thinlung nghet taka an hnuaia police te kaihhruai tura IPS officer te buatsaihna hmunpui ah hian an thupui ber pakhat chu khawvel inthlak danglam chak tak mila police ten hna an thawh theihnana officer te buatsaih a ni bawk a. Ministry of Home Affairs, Govt of India aiawhin National Police Academy Director Pi Aruna Bahuguna, IPS leh Australian Research Council Centre of Excellence in Policing and Security, Brisbane, Australia (CEPS) Director Dr.Melissa Bull te chuan July 28, 2014 khan Griffith University ah IPS officer te training program neihna tur inremna an ziak a. July 30, 2014 khan Mid Career Training Program Phase III tanna turin Charles Sturt University Faculty of Arts Acting Executive Dean, Assoc Prof.Tracey Green chu inremna ziahfel pui a ni a. Training program hi kar 6 a ni a. Kar 4 NPA ah, kar 2 dang Australia ram hmun hrang hranga neih a ni.
Sept 04 - Oct 17, 2014 chhunga neih MCTP Phase III ah hian Mizo pa pahnih Pu John Neihlaia leh Pu Joseph Lalchhuana pawh an tel a. Oct 5 khan Australia rawn lutin Brisbane ah hun an hmang hmasa a, Sydney an rawn pan kawngah Coffs Harbour zan khat riakin an tlawh a. Oct 11, 2014 khan Sydney rawn thleng thlain tunkar tawp lamah Australia khawpui Canberra ah ni hnih vel hun an hmang bawk ang.
Facebook kaltlanga an rawn kal tur kan lo hriatin kan Mizo IPS officer te chu kan be pawp a, an thlennaah kar hmasa inrinni zan khan kan fate nen kan Mizo mikhualte chu kan han hmu a. A tuk an hunawl neih chhun a nih avangin zinmite tlawh thin hmun thenkhat tlawhin kan chhuak hova. Chaw chhun ei turin Sydney chhak deuhva awm Pi Lawmzuali leh a pasal Ian Barrett-a ten min sawm a.
Pi Lawmzuali hi nurse a ni a. A pa chu Pu Zaluta, Treasury Square veng a ni. Mizo nu diktak, mikhual duat em em mai chi a ni a. A pasal sap pa gentleman tak mai Ian-a nen min lo dawngsawng hneh hle. Chaw ei pahin kan inkawm a, Pi Lawmi’n hmanlai chanchin a sawi a. Kan mikhualten an lo zawm thei bawk a. Treasury Square ram tha lai taka a nu leh paten inhmun an neih dan te leh khatih laia D.C. Barkataki-a’n kawng ana awm lo zawk tura a duh vanga rangva tel 3 peka a thlang deuh ram thlang tura a tih te leh a nu in DC ngenna hnial a, an thlan/pek tawh ram a sawhsawn loh tlat dan te min hrilh a. Kan hlim thlang hle. Kan nu leh pa te rual ho bulah mah ni se, naupang chhia ang lovin min kawm a. Hun tha tak kan hmang thei a ni.Chawhnu lama bazar hlek leh Sydney Opera House tihte tlawh kan duh avangin Pi Lawmi te inah chuan kan awm rei thei vak lova. Chaw ei khamah thla te kan han la sawk sawk a, Pi Lawmi’n an thenawm German pa Helmut-a hmanhmawh takin a han kova. Anin kan zavaia lanna turin thla min han laksak a. Kan inpeih fel veleh Pu Ian-a’n a Volkswagen Golf car in an veng hnaih ber rel station Morriset Train Station ah min va thlah a. Kan haw lam chu kan puar deuh bawk a, kan nu leh Pu Joseph Lalchhuana te chu an muthlu nasa hle. Pu John Neihlaia nen kan mutthluk ve lem loh avangin kawngtluan deuhthawin kan titi a. Kal chhung darkar 2 pawh reilo angin a hriat.
Pu John-a leh Pu Joseph-a te hi dan leh thupek kenkawhna lama tawnhriat ngah tak an ni ve ve a. Mizo society tan mai nilo, an hnathawhna hmuna mite tan mi tangkai tak tak an ni.
Sapram police te hnathawh dan leh felfai zawk leh hlawk zawka mipui rawngbawl hna an thawh dan te an rawn hmuhpui a. Sapram police te hi a tlangpuiin an efficient viau. A chhan bulpui pakhat nia lang chu an hna chak taka an thawh theihnan dan hlui leh chak tawklo te an tihchak vang a ni. Tun hmaa khawtlangin harsatna a tawh thin mila dan siam te chu kum 30/40 hnuah a lo rintlak reng tawh lova, chuvang chuan anni paw’n a tul dan azirin an dan awmze nei (relevant) lutuk tawh lo te an tidanglam hlawm a ni.
Tlaiah kan mikhualte chu Sydney Harbour Bridge leh Sydney Opera House te kan tlawhpui a. Ni tlak hma deuh khua la en lai siin kan thleng phei hman a. Boruak a nuam bawk nen, han hawi thawven vel a nuam hle.Chaw ei hmain an hotel thlenna lamah inphihfai turin kan let hova. Zing dar 9 atanga chhuak tan kan nih avangin room nuam taka han hahchawlh chu a nuam duh hle. Kan ti nek nek a, chaw ei tura kan chhuah meuh chuan dar 10 a lo pel duai tawh a. China Town ah kalin Korean restaurant ah kan chawl a. Duhzawng kan han lam sap sap a, Pu John-a chuan octopus ei chhin a duh a. Octopus note leh bawngsa chhum kan lam sak a. A han ei vel chu tui a tih ai mahin a octopus ei hmasak ber a nih avangin nuam a tih hmel hle. Kan ei puar peng pawng tihah kan in thlah fel a. Anni an hotel lamah an phei a, keini Central rel station ah puar ulin, mutchhuak angreng tak siin kan phei a. In kan thlen chuan zanlai a lo pelfel tawh a.
Sydney ah hian Mizo tlawhtu kan nei ve leh zeuh zeuh thin a. Min rawn tlawh ve chang hian heta Mizo lo awm ten kan remchan danin lo dawnsawn kan phur ve thei hle. Tin, Canberra leh Melbourne lamah te phei chuan awm nghet pawh an thahnem zawk a. Chhan engvang pawha rawn zin tum te chuan facebook kaltlang te hian min rawn be pawp thei thin ula, awlsam zawka in rawn cham chhung lo ruahmanpui theih dan te pawh kan nei thei ang.
Canberra ah hian Pu K.C.Lalvunga fanu Pi Zami te chhungkua an awm a. Ani hi Canberra mai ni lo, Australia hmun hrang hranga Mizote hmakhua ngai tak leh a theih phawt chuan, Pi Lawmi te ang thova, mi lo tanpui hreh lo a ni.
Pu John-a leh Pu Joseph-a te zankhat riahna khua Coffs Harbour ah pawh hian Pu Bualhranga fanu Dr.Zoremchhingi te chhungkua an awm bawk a. Anni pawh mi inhawng leh inphal tak an ni a. Tul thila be pawp duh tan chuan Pi Zami te, Pi Lawmi te leh Dr.Chhingtei te hi an inhawng em em a ni.
Mizote hi kan inzarpharh ve zel a. Kan hnam min phuartu hi kan ram pawnah pawh a lo nghet hle. Chumi rual chuan, Australia miten khawvel inher danglam mila an dan hlui neih te an tuaithar (update) zel ang hian keini pawhin kan hawiher te, kan ngaihdan te leh kan duhdan te kan tuaithar a tul. Hmasawn tur chuan min bukrittu kan thlauhthlak ngam a, ram danga hnam dang ten hma an lo sawn bik dan kan en ngam a tul hle a ni.
