INTELLECTUALLY DISHONEST

ZORAM TODAY chanchinbuah Mizoram University Political Science department Asst Professor C. Lallianchhunga'n Health Minister bang ta chungchang leh a kaihhnawih a sawi heti hian tarlan a ni a -

“Pu Lal Thanzara hi bâng lo mah se, amah an puhna hi amah beitute tan pawha bawhzui hlei theih loh, Election Commission of India pawhin ngaihdan a lo siam ngheh tawhna chungchang a ni a, chumi awmzia chu risk sang tak lain Pu Lal Thanzara hian mipui court hmachhawn a thlang zawk tihna a ni. Kum 2006-a Naveen Jindal-a kha Member of Parliament ni chunga hlawkna dang office pawimawh chelha puh a ni a, nihna pawimawh tam tak an tarlan zingah Vice President (Jindal Steel and Power Limited) leh Director (Jindal Power Limited) a tel a; hemi chungchangah hian Election Commission chuan hengmimal company-te hi sawrkar hnuaia awm an nih loh avangin ngaihtuah theih a ni lo, a lo ti daih tawh a.

"Office of Profit chungchang hi Supreme Court-in kum 1971 khan Shivamurthy Swami vs Agadi Sanganna Andanappa case-ah thutlukna a lo siam tawh a, private company hi Office of Profit hian a huam lo a ni âwm e. Tin, Election Commission hian ama thuin Office of Profit chungchang hi a ngaihtuah ngai lo va, India President-in India Danpui Article 102 (1-a) anga hêkna a dawn Article 103 hmanga a ngaihtuah dawnin Election Commission hi MP te chungchangah a râwn thin a; MLA te chungchang pawh Article 191 (1-a) hmanga hêkna Governor-in a dawn chu article 192 hmanga thutlukna a siam hmain Election Commission rawtna a ngaichang thin a, Election Commission rawtna ang hian India President leh State Governor te hian thutlukna an siam thin a ni.

“Hengte vang hian Office of Profit chungchanga Pu Lal Thanzara beihna hi amah beitute tan pawh bawhzui hleih theih loh a nihna lai a awm chungin Pu Lal Thanzara chuan mipui court lamah he buaina hi a rawn theh chhuak a; opposition party-te’n nge amah leh a awmna party-in hlawkna tel ber dawn tih pawh kan hre thuai ang. Awlsam taka Council of Minister leh MLA atanga Pu Lal Thanzara bâng hi Opposition party leh a bàn nana hmalatu mi thahnemngaite hian hlawhtlinnaah an ngai a nih chuan an ring sual viau maithei bawk a ni.”

Political Science professor hian "office of profit" leh "conflict of interest" hi a hriatpawlh emaw hretthiamlo niin a lang. A chhan chu Section 9A, Representation of the People Act, 1951 ah khan chiang takin inthlanaa candidate-in sorkar-a supply emaw contract a neih chuan, chu contract a neih chhung chu disqualify a ni ang tih a chuang a. Mizoram Legislative Assembly-in zawhna chhanna a buatsaih leh Social Welfare Department in RTI hmanga zawhna a chhanna lehkha en chuan Pu Lal Thanzara hian 2013 inthlan mai pawh nilo, 2008 inthlan ah daih tawh khan he dan hi a lo bawhchhe tawh a. Chuvang chuan 2008 atang khan automatic-in disqualify nghal tur zawk a ni tih kan hre thei ang.

Hemi dan chungchangah hian Supreme Court of India in "Election Commission Of India vs Bajrang Bahadur Singh And Ors on 9 April, 2015"  indiankanoon.org/doc/35127537 ah khan chiang deuhvin a ngaihtuah a. Vawi hnih lai ka chhiar a, MZU professor hian chhiar ve se thil nihdan chiang takin a hre theiin ka ring.

"Office of profit" chungchang nilovin "conflict of interest" a nihna chiang takin Supreme Court hian heti hian a sawi - The purpose of Section 9A as repeatedly held by this Court is to maintain the purity of the legislature and to avoid conflict of personal interest and duty of the legislators.

Kan "intellectual" ten mipui hnenah thudik an puan duh loh emaw thudiklo an puan hian ka ngaihdan chuan "intellectually dishonest" an ni.