BCM PRESIDENT HLUI PAHNIH TE NENA INBIAK LEH PASTOR NUPUITE

A khat tawk hian kan fate hi an pi leh pu te bulah an riak zeuh zeuh thin a. Kar hmasa zirtawp zan pawh khan kan fanu naupang zawk chuan a pi leh pute bula riah a ngen a. Kan riah tir a. A tukah, chawhmeh bazar haw pahin ka lam e ka ti a. A chhun/chawhnu mu a lo la harh lova. Ka nghak deuh hlek a. Nghah pahin, ka phone ka top-up that lai a ni bawk a, kan pastor te leh an nupuite chungchang hi chhungte leh nelzawng mai bakah kan kohhran President lo ni tawh ve ve te ka han zawt chiang teh ang ka ti a. Pa Chema leh Pa China te ka bia a. A bengvarthlak hlein ka hria.

Min duhsaktu te ve ve an nih vangin ka ngaihdan leh hmuh dan te tlang takin ka sawi ngam a. Tin, zawhna ka zawh duh te pawh ka zawt nual a. Anni pawhin tha takin min lo hrilhfiah a.

Pa Chema hian 2008 Assembly Thurel 1.21 hi a thlawp tih mi ka atangin ka lo hria a. Tin, Pa China'n a thlawp lo tih pawh ka lo hre bawk a. An ngaihdan leh dinna hi tawmpuitu leh tawmpuilo tu te kan awm nual anga; ngaihdan inperhsan hlauh kan nih pawhin a pawimawh ber chu hmelma kan nilo tih kan inhriat hi niin ka hria. Tin, ngaihdan a inanloh pawh hian Pathian rawng kan bawlho thei a, tuna kan thu ngaihtuah ho hi rinna thu a ni lo lehnghal a, inhmuhkhawloh phahna tur awmin kei ka lo hre lo.

Pa Chema hnena ka sawi chu, "2008 Assembly Thurel khan kan constitution a kalh tlat mai" tih a ni a. Pastor thenkhat chu nise thinrim sen tunin min hau nghal a nih loh paw'n ka thusawi min ngaihthlaksak zui duh lovang tih tih ka ring. Mahse, tha takin constitution kalha thu kan rel nia ka hriatna lai min zawt let a. Keiin Assembly thurel tawh Assembly hnuaia rorelna dangin a tidanglam thei lovang tia kan constitution-a inziak chu ka sawilang a.
Kan inbiakna atanga ka hmuhchhuah pakhat chu pastor nupui te hnathawh chungchangah, kohhrana thawk an nih loh chuan, an hnathawh leh thawh lohah thu kan nei lo tih BCM hruaituten an pawm tih hi a ni.

2008 Assembly-a "Kum 2015 hnu lamah chuan Pastor/Minister nupuite chu Sorkar hna leh hnadang fulltime a thawh phal a ni lovang" tia kan rel kha a nihna anga bawhzui theihloh a ni tih kan kohhran hruaitute hian an lo pawm tawh reng zawk a lo ni a. Kar hmasa lama kan kohhran President leh General Secretary nilaite nena kan inbiaknaah pawh helai tak hi chu an pawm tih ka hria. An pawm avanga 2014 Pastoral Committee-in pastor nupui nilo a pastor zawk hna atanga chawl tura ti ta pawh kha an ni awm e.

Chulai tak chu kan kohhran hruaitute'n an tih fuh zan loh a ni ta a ni. 2008 Assembly Thurel kha binding tur a ni nain, a lo theih miah loh a. A chhan chu sawi fo tawh angin, pastor nupuite hnathawh leh thawhloh ah thuneihna BCM in kan nei tlat lo. An sorkar hna bantir chungchangah phei chuan. An zalenna hi kan constitution leh India constitution in a humhalh tlat a ni a. 2014 Assembly-a Aizawl West ABC in "BCM Assembly-in Kohhran hmasawnna atan Kum 2001-2013 chhunga Resolution a lo siam tawh zawng zawngte tihhlawhtlin a nih ngei theih nan Headquarters-in hma la se. A tul a nih chuan Committee hranpate siamin Budget-ah pawh dah nise" ti a thu an thehluh  sawiho a nih tuma "General Secretary in thil awmdan" a sawifiah khan Assembly  palai rualin uluk takin an ngaithla a. "Sawiho a ni a, tuna tihhlawhtlin loh anga langte hi thenkhat hmalak mek leh bawhzui laite a awm bawk , thenkhat chu tihhlawhtlin theih lohte pawh a awm niin a lang" tiin thu tihtawp a ni.

Assembly hian tihhlawhtlin theih loh thu a rel thei tih hi General Secretary ngei pawhin a hria a. 2008 Assembly Thurel 1.21 sub number 3-na kha "tihhlawhtlin theih lohte" zinga tel a ni tih BCM constitution bung 3-na leh Indian constitution Article 19 (1) (g) leh All India Services (Conduct) Rules, 1968 leh a pawimawh berah chuan kan rinna leh zirtirna innghahna ber Pathian lehkhabu thianghlim atangin kan hmu thei.

Sawi tawh ang khan kan kohhran hruaitute'n a bikin pastor nupui sorkar hnathawk te hi ban tir theihna emaw an pasalten bang tura thupek pek theihna an nei lo tih kan pawm a, chuvang chuan he 2008 Assembly Thurel hi tihhlawhtlin theih a nilo a ni. Pastor nupuiten an pasalte an biala an tawiawm zel kan duh tak zet a nih chuan an nupuite hnathawklo te zawng zawng pawh hi kan ngaihtuah tel tur a ni ang. Sorkar hnathawk deuh te chauh kan thlurbing hi a dik chiah lo deuh chu a ni. Kan pastor te'n sorkar hna thawk chung pawha Pathian rawng a bawl theih thu te an lo sawi fo tawh bawk si a.

Pastoral Committee meeting 2014-a neih khan he Assembly Thurel pawimawh tak hi a bawhzui a. Chumi chinah chuan a tihtur dik tak a ti. Amaherawhchu, "an nupuite sawrkar hna leh hna dang full time a thawkte an bantir theilo a nih chuan anmahni zawk chu chawl tura ngaih an ni" tia a rel kha Pastoral Committee in a rel miah loh tur a ni. A chhan chu -

1) Pastor ten an nupuite hnathawh chungah dan hnuaia thuneihna an nei lo. An sawipui thei a. An ngen thei. Mahse Pastoral Committee in "bantir" tura a phut hi thil theih loh a ni. Mipa lu chu hmeichhia a ni tih Bible chang hi helaiah hian a hman theih loh a ni. Nupa inthenna emaw court-a nupa inkhinna a thleng thei.

2) Kan thuneihna ni miah lo hmanga pastor nupuite bang tura kan tih, an ban loh avanga pastor te zawk chawl tura ngaih a ni tih hi a rilru chhiat thlak a. A rawng bawk a. A Kristian lo hle bawk. Phuba lakna rilru atanga chhuak pawh a ang. (Hemi rorelna hi MJA OB ten PRISM thuhla chhuah hrih lo tura thu an rel bur nen khan a inang hlein ka lo hria.)

Kohhran hruaitute'n an sawi pakhat "Assembly thu zawmlo" tih hi helaiah hian kan hmang dawn a nih chuan Assembly thu zawmlo pastor zawng zawng chungthu kan ngaihtuah a ngai ang. 2014 Assembly-a Phawngpui ABC in "BCM hian zuk leh hmuam do kawngah tun aia nasa zawkni hma la se" tia agenda a put luh khan Assembly in rem a ti a. Thu a titlu a. "A tul dan angin Social Concern Department-in hma lo la se" tia thu dah a ni. Kha Assembly thurel kha kan bawhzui tha em tih te hi Pastoral Committee meeting ah ngaihtuah a ni ngai nge ka hre lova. Tihhlawhtlin tumna lian tak awmin a lang lo. Middle Age hunlaia kohhran thuneihna hmangsualin a hrem duh zawng a vai anga invai dawn chuan pastor sahdah hmuam te, pastor tuibur hmuam te, pastor vaihlo zu te hi kan hmuchhuak nual thei a ni. Chu'ng pastor te chu "Assembly thu zawm lo" tiin "Ni 30 chhunga in sim loh chuan chawl tura ngaih in ni" tiin lehkha pe ta ila, a lutuk kan tih vek ka ring.

In chik dawn tak tak chuan kan constitution in pastor te tih tur a tarlan zinga mi "Pastor chu counsellor a ni a, counselling mamawh te rawn theih turin a inhawng ang a, a tul angin counselling a pe thin ang" tih te, "Pastor chu Evangelist a ni a, Pathian thuchah tha takin a puang chhuak thin tur a ni" tih te hi a tilo an awm thei. Lo ti lo ta se, an tih loh avang emaw an tih that tawk loh vang emawin  an chungthu Pastoral Committee in a rel angem? A chhanna chu in hre vekin ka ring.  

Kan han sawi tum ber chu dan kan hriat thiam dan hi ennawn a ngai a ni tih a ni.

Pa China ngaihdan chuan Bible tih lohvah chuan BCM constitution hmangin ro kan rel tur a ni a. Pa Chema ngaihdan pawh a ni tho. A hrilhfiah danah kan buai chuan a hrilhfiah turin General Secretary nilo, President nilo, Pastoral Committee nilo, Assembly Executive Committee a chet a ngai tihna a ni ang.

Assembly Executive Committee tih tur BCM Constitution a sawi chu "Constitution leh Rules-a thu hrilhfiah ngai a awm chuan a hrilhfiah ang" tih a ni.

Kan puipate leh puipa lo ni tawh te ngaihdan hi a pawimawh khawp tih kan hria. Amaherawhchu, rorelnaah, "enge constitution in sawi?" tih hi kan dah pawimawh zawk tur a ni ang. Chumi hre tur chuan Bible leh BCM constitution zirchiang, Thlarau Thianghlimin an rilru a kaihhruai an tha ang.

2008 Assembly Thurel 1.21 sub number 3 kha "tihlawhtlin" theih pawh lo ni ta reng se, a hnua Pastoral Committee in ro hran a rel khan BCM Constitution in a sawi "[Assembly] thu tihtluk chu Assembly hnuaia rorelna dangin a tidanglam thei lovang" tih a lo awm reng tawh zawk avangin kan constitution chiang takin kan kalh a ni. "Pastor zawk chawl tura ngaih a ni" tih kha thutling lo a nih chu.

General Secretary hian Assembly Executive Committee meeting kovin hemi chungchang hi ngaihtuah ni se, BCM laka rinawmna rilrua kan ngaihtuah duh a nih chuan a chunga kan sawi ang khian hrilhfiah a ni ang.