KHEHPUAM LEH MIZORAM

Mizoramah hian, a pawimawh dan indawtin, sorkar leh khawtlang tana ngaih pawimawh ber tur han chhawpchhuak dawn ta ila tanna ber tur hriat a har duh khawp ang.

Kohhran thlirna atang chuan zu hi a ni mai thei a. Chu pawh chu kohhran hruaitu thenkhatten awmze neia sawihona awm thei tura an rilru an hawn tlat loh avangin rahchhuah nei tura sawihona hi a awm thei lo a ni ber mai. Sorkarin MLPC Bill a pass dawna duhlohna lantir mimal leh kohhran te khan an duhlohna lai leh an duhloh chhan mumal tak an rawn sawi dawn emaw ka lo ti a. Mahse, an ti tlat lo. “Zu zuar sorkar kan duh lo” ti ang zawnga in au khumna ang chi ah khan an tawp a ni deuh ber. MLTP dan thatlohzia leh awmzia a neih lohzia te, kenkawh (implement) a theih miah loh dan te pawh an hre deuh vek chungin MLTP dan chu kan thatpui angin an sawi lui tlat a. Home Minister-in kohhran an rawn dawn loh thu a han sawi pawh kha, sorkar ngaihtuahna atang chuan thil awmlo a ni miah lo. Amaherawhchu, sawi chhuah kher loh turah lo dah ta zawk se sorkar tan chuan zu chungchang hi buaipui a awlsam zawk ngei ang. Zu chungchangah hi chuan Presbyterian leh Baptist Kohhran hruaitute ngaihtuahna hi a buaithlak hle, Lal Isua nun leh Bible zirtirna nen a inmil bawk si lo.

Kan tlawmngai pawl YMA hruaitute hi, “Enge kan rama buaipui ngai ber?” tiin zawt ta ila, sorkar tih ngei ngei zawk tur tih mumala awm si lo a tam em avang hian sawi ber tur pawh an hriat a rinawm loh. An buaipui tam tak te hi dan mit atanga en chuan tih theihna an nei miah lova. A thenah phei chuan dan an bawhchhe hial zawk a ni. Amaherawhchu dan kengkawhtu tur ber zawkin hma a lak thin si loh emaw a tih tak tak thin si loh chuan, “ram leh hnam” rilrua han chet mai hi YMA lam tan chuan thil remchang tak niin a lang. Dan erawh an zawm thinloh chuan anmahni tan a thalo thei a. An hmalakna awmze nei lovin a chhuak thei a ni. An ngaihthlak duh chuan dan lam hria, Mizo hnam rilru pu tha tak thurawn an tangkaipuiin a rinawm.

CYMA hruaitute hi sorkar hnathawk an nih chuan hruaitu nihna atangin inhnukdawk vek se a that laiin an hmalakna thenkhat ngaihpawimawh atana tha a awm nual. Chu’ng zinga mi pakhat chu damdawi ruihhlo chungchang hi a ni.

Tunlaiin kan ramah mihring nunna tichhe vek thei ruihhlo hlauhawm tak siamna damdawi hmanga hausak thut pawisa lo an tam hle niin a lang. Kan mihausa chhungkua te, dan leh thupek kengkawh tura mi rawih te leh politics lama mi challang te pawh hi a inhnamhnawih nasa zingah an tel tih kan hretlang awm e.

Nikum August 10 khan Pu Lalrintluanga Sailo, General Secretary, MNF chuan "Pseudoephedrine-a sumdawnga hausa Aizawl veng hrang hrang - Zarkawt, Electric Veng, Bara Bazar leh hmun dangtea in hmun leh in dinglai cheng maktaduai tam taka leitu hian Health minister (Lalrinliana Sailo) fapa drug licence hmangin ruihhlo a tawlh ṭhin tih hmuhchhuah a ni” tiin MNF headquarter Hnam Runah a sawi a.

MNF Vigilance department hotute sawi danin, Pu Lalrinliana Sailo fapa Jacob Lalrinpuia hminga damdawi zawrhna licence hi Zokhawthara hman a ni. (A kil khawp mai!)

Pu Rinliana chuan a insawifiahnaah a pa-in kum 1945 atanga damdawi zawrhna licence a neih tawh thu leh damdawi zuar thin an nih thu a sawi a. A fapa hminga damdawi zawrhna licence an nei chhunzawm chu inthiam lohna an neih loh thu a sawi bawk a ni.

A sawizelnaah MNF leh eptu party dang ten damdawi ruihhlo tawlhruknaa inhnamhnawiha an puhna chu politics thila amah mimal an beihna niin a sawi a. Thu diklo hulhual a nih thu a sawi nghe nghe. Damdawi thalo tawlhruk chu thlahte thlenga tawrh theih nia a ngaih avanga a haw berte zinga mi a nih thu te pawh a sawi hial a nih kha.

Health Services Joint Director Lalsawma’n thuthar lakhawmtute hnenah, "Drugs licence nei tur hian danah educational qualification ngai a inziak lo a, kum zat pawh a inziak lo," tiin a sawi a. Dan anga Pu RinlianDamdawi lam thiamna nei lovin drug licence an neih theih loh tawpna tur dan a awm lo," tiin a sawi a ni. Pu Lalsawma’n a sawi zelnaah damdawi lama thiamna nei lo pawh, sorkarin rintlaka a ngaih chu damdawi zawrhna licence an pe thova, pharmacist erawhin an enpui tur a nih thu a sawi.

Aizawl Police te leh Electric Veng YMA ten an man

a fapa Jacob Lalrinpuia'n damdawi zawrhna licence a neih theih lohna tur a awm loh thu sawiin, "

Kan Health Minister hluiin a fapa hminga damdawi zawrhna licence lo awm hi a hriatpui ngei a, chu licence chu damdawi tawlhru ten an hmang nia a lan hnuah pawh inthiamlohna a neih loh thu a sawi kha a mak angreng hle.. A fapa hminga damdawi zawrhna licence diklo taka lo hmangtu ten an chhungkaw hming an tichhe vek thei tih a hriat pawha a fihlimzia a sawi baka inthiamlohna a neih loh thu a sawi daih khan zawhna a siam tam ta zawk hlein a lang.

Hmansuala pawi thui thei deuh damdawi zawrhna licence chungchangah Pu Lalsawma’n sorkar duhsak zawng tupawhin licence an nei thei a tih han hriat phei kha chuan hmang sual duhte tan kawng a inhawnzau zia a hriat theih awm e. Pu Rinliana hi, ama insawi anga, damdawi thalo hmanga sum siamnaah hian a fihlim vek a nih pawhin a fapa hian enge a hriat tih zawhna hi chhanlohvin a la awm reng niin a lang.

Inhnamhnawiha rinhlelh vanga thuneituten an man Rampanmawia’n December 2011 atanga pseudoephedrine a buaipui thin thu a sawi khan Excise Commissioner hlui Pu Lalbiakmawia Khiangte khan thu tlinga a pawm loh thu a heti hian a sawi a, “thil a sawi kual a sawi kual a, thu tlingah kan pawm lo”. A hnu zela thil kal dan chu kan hre vek awm e. A tawi zawngin sawi ta ila, a zuzi a ni ber mai.

Australian Federal Police in $525 million hu crystal meth an man a veng lai

Australia ramah pawh hian khehpuam ruihhlo pseudoephedrine atanga siam “ice” an tih mai crystal methamphetamine hi an buaipui nasa hle a. The Daily Telegraph chanchinbu in a tarlan dan chuan New South Wales state ah ringawt pawh Sept 1, 2013 atanga Aug 28, 2014 chhungin ice ruihhlo siamna laboratory 100 lai police ten an man chhuak a. (Hemi link ah hian report kimchang a chhiar theih - http://bit.ly/1lti2Zj) A khat tawk hian khehpuam ang chi hi an man zeuh zeuh bawk a. Tum khat an man phei chu a rawn kalna an han chhui khan India ram an chhui thleng daih mai. Mizo kutchhuak pawh a lo awm ve nual lovang tih a sawitheih loh.

He damdawi hi ruihhlo hlauhawm berte zinga mi a ni a. Durtlang damdawi ina ruihhlo ngai enkawltute zinga mi Dr.Lalchhanhima Ralte sawi dan phei chuan khehpuam atang siam methamphetamine ruihhlo ngai te hi enkawlna (damdawi) a awmlo a ti hial a ni. http://bit.ly/1sUFi19

Kan sorkar chak tak hian he damdawi hlauhawm tak hi nasa taka a do a tul, YMA zawk tih tir lovin. Home leh Excise Minister in man ngamloh a neih loh thu a sawi tawh bawk a, Health Minister pawhin he ruihhlo hlauhawm hi thalai te nun leh hriselna nasa takin a tichhe thei a ni tih hrenawnin buaipui tur No.1 zingah dah se a tha hle ang. A nih loh chuan chhungkaw tam tak leh anmahni chhungkua ngei pawhin an tawh vanduaina ang kha kan ram hian a hmachhawn thar leh thei dawnin a lang.