"...WHEN THE GOVERNMENT FEARS THE PEOPLE, THERE IS LIBERTY..."

America khawmualpuia chengte inrelbawlnaa British lalpa King George III-a’n mipui zalenna nasa taka a rahbehna chuan "colonist' an tih ho chu a cho chhuak a. A hunlaia khawvela sipai chak ber British sipaite chu America khawmualpuia cheng revolutionary hote chuan an nun thapin zalenna sualin an bei a. An hneh a. Ram thar United States of America chu an din ta a ni.

USA dinna lungphumte chu mihring awmkhawm inrelbawlnaa leh rorelna nghet berte zinga mi niin an “hnampa” ten uluk taka an duan a ni a. Pathian hriatna thuk taka innghat an ni nghe nghe.

An danpui Constitution buaipuitu te zinga an rinpui ber Thomas Jefferson-a kha mihring zalenna leh sorkar thuneihna hmansual awmzia hrethiam a ni a. Mahni kea ding, ram inrelbawlthar an nih puanchhuahna Declaration of Independence tawngkamah hian rorelna innghahna lungphum nghet tak tak a awm a, a chhinchhiah tlak hle: “We hold these truths to be self-evident, that all men are created equal, that they are endowed by their Creator with certain unalienable Rights, that among these are Life, Liberty and the pursuit of Happiness - That to secure these rights, Governments are instituted among Men, deriving their just powers from the consent of the governed, That whenever any Form of Government becomes destructive of these ends, it is the Right of the People to alter or to abolish it, and to institute new Government, laying its foundation on such principles and organizing its powers in such form, as to them shall seem most likely to effect their Safety and Happiness.”

Mihring zawng zawng intluktlang veka siam kan nih hi sawifiah nawn ngailo thil chiang sa a ni tiin chiang takin an ziak a. Chu’ng mi intluktlang te chu anmahni Siamtuin lakhran theihloh dikna (rights) a pek thu a chuang leh a.  Chu’ng te chu: nunna, zalenna leh hlimna te a ni. Chu dikna chanvo pathum chu anmahni awptu British sorkar khan nasa taka a rahbeh sak avangin an inrelbawlna tharah chuan sorkar ngilnei leh mipuite dikna zahsak siam ngei turin a tir te atangin an fimkhurin an uluk hle a ni. Chu’ng dikna te chu humhim a nih tlat theih nan sorkar din a ni e, tiin an ziak a. Chu sorkar chu thuneihna tawpneilo nei nilovin a rorelsakate remtihna leh hriatpuina atanga chauha thuneihna nei tur a nih thu ziak meuhvin an dah a ni. Mipui diknate rapbeta an chunga inluling sorkar a lo inherchhuak a nih chuan chu sorkar chu herdanglam emaw nuaibo turin mipuiin dikna an nei a ni tiin an ziak tawp mai bawk a. Chutiang sorkar thalo nuaibo a nih hnuah sorkar thar din lehin, a tira mipui duhdan ang rilru pu sorkar chu din leh tur a ni. A thuneihna te pawh mipui remtihna leh hriatpuina zela hman tur niin chu sorkar chuan a tum ber chu mipui hlimna leh himna a ni tur a ni.

Sorkar emaw lal thuneihna hmansualnain mipuite dikna leh zalenna rahbehna nasa tak a thlen thei tih an hrechiang hle a. Ram thar, sorkar thar an siamah chuan an duhloh sorkar rorelna awm thei tur lakah a tir atangin an inveng nghal a tih theih ang. Chumi thurin avang chuan vawiin thleng pawhin ram zalen leh khua leh tui ten zalen taka an khawsak theihna ram an la ni ta reng a ni.

"When government fears the people, there is liberty. When the people fear the government, there is tyranny" tih thusawi hi Thomas Jefferson-a sawia ngaih a ni a. Jefferson-a khan Europe rama lalten mipui laka an thuneihna nasa taka an chelek thin te a hrechiang hle. Chutianga mipuiten an lalte an hlauh chuan an diknate palzut sak a ni nasa thin hle a. Mipui chu an zalen lova. Hlau reng rengin an khawsa thin a ni tih a hmuhchian avang leh roreltuten mipui an hlauh erawh chuan mipui an zalen a ni tih a hriat chian avangin he thu hi USA dintu tam zawkte ho khan an vawng tlat a ni.

Sorkarin mipui a hlauhin zalenna a awm a, mipuiin sorkar a hlauh erawh chuan sorkar awpbehna hrehawm leh rawng tak a awm a ni tih hi Jefferson-a thuvawn pakhat a ni.

Sawi tawh ang khan America ram dintute khan mipui awpbehna hrehawm tak chiang taka an paihthlak avangin mipui zalenna an dah pawimawh em em a. Chu zalenna chu Siamtu’n mihringte chanvo a pek a ni tih an vawng tlat bawk a. Chu ngaihdan chu Natural Law an tih atanga ngaihdan lo kal a ni. Natural Law chuan Pathian hi phuartu awmlo mi zalen a nih angin a mi siam hringfate pawh hian Ama anpui angin zalenna kan nei a. Kan zalenna neih chu min chhuhsak turin kan phalna leh hriatpuina tel lovin midangin emaw pawlin emaw sorkarin emaw thuneihna a nei lo tih a ni. Tulna avanga thuneihna kan pek te pawh kan hriatpuina leh remtihna chauhva thuneihna kawl an nih avangin uluk takin an hmang tur a ni a. An hmangsual thiang lo tih a ni.

Khawvelah hian mihring inrelbawlna sorkar chi hrang hrang a lo awm tawh a. Hriat theuh angin Mizote paw’n tuna kan hman ang chi, vote hmanga roreltu tur thlan chhuah ang kan hman hma chuan kan hnam inrelbawlnaah lalten ro an rel a. (Upa thenkhat chutiang lalte rorelna hre pha an la dam nual.) Selam khaw lal Bengkhuaia’n Alexandrapur-a thingpui huan enkawltu John Winchester-a lu an tan saka, a fanu Mary Winchester-i (Zoluti) an lak atang khan kan Mizo history chu a dang ta vek a ni. Sorkar inrelbawlna kalphung dang hmang sap hovin min rawn awp a. A tawi zawngin sawi ta ila; India ramah min rin lut a, 1947-a India ram an chhuahsanin inrelbawlna an hnutchhiah mipui rorelna – democracy – chu kan pu te hovin min hmanpui zui ta a. Lal ban an ni a. Mizo Union a ding a. Vawiin hi kan thleng ta a ni.

Vawiina Mizoten inenkawlnana kan hman hi mingo hovin an chunga lal hrawt thin lal nunrawng tak tak te laka thisen tam tak senga an sualchhuah a ni a. A tichhuaktute ho khu chuan an hmang thain an hmang tangkai viau. Mingo ho zingah pawh British ho leh an thlahte ho hian an hmang tha lehzual emaw tih turin khawvela democracy chak tha ram chu UK, USA, Canada, Australia, New Zealand te an ni hlawm.

April 21, 2014. Aizawl

Mizo te hian vai ho ai pawhin mipui rorelna hi kan la hmelhriat lo lehzualin a lang a. Mipui te hian kan dikna leh chanvo te hi kan hre lo hle a tih theih. Entirna pakhat chauh han sawilang ta ila, kan ramah chuan Kohhranin taima taka tawngtaina nena a buaipui peih loh – zu leh a kaihhnawih – chu sorkar thuneihna hmangin khapna dan a nawr chhuak a. Kum 20 dawn kan hlawhchhampui a. Mi tam takin an chhiatpui bawk a. Chu zu khapna dan tlawhchhanin mipuite chu kan zalenna leh kan chanvo rahbeh leh palzut sak kan ni a. (Zu in lo pawh Vairengte gate ah kan zanlai kan muhil tha lai min tih harh vek thin hi) Chutih laiin thuneihna changtu (a chanvo  ni miah lo) Chief Minister Lalthanhawla chu an thiante inah danin a khap zu nen chuan zalen takin an khawsa lai thla a rawn lang a.  Chu thlalak ina a lantir – dan bawhchhiatna – chhuichianga dan anga ro rel a nih theihnana hma la tura ngenna phei chu awihawmloh khawpin a kalkual a ni. Chutah tak chuan a nia mipui zalenna rahbeha a awm nasatzia a lan chian em em chu. Europe rama lalten dan chunga lenga an inchhal leh chu dinhmun tinghet tura sorkar leh sipai tha chakna hmanga mipui te a vaubeh ang maiin vawiin niah chuan Mizoramah hian kan sorkar hotu ber hi patlingpui pui paw’n an hlau ta. Hetiang dinhmun kan thleng ta hi thil pawi tak mai a ni a. Mipuiin kan dikna chanvo kan hloh a, hlauhnain kan khat ti ila sawi uarna hlek phei chu a ni ang.

Pathian hian A Fapa Isua Kristaah zalenna min pe a, kan Mizo khawtlangah lal kan ban fel tawh a. Vawiina kan chunga roreltu thuneihna tawplo nei anga mipuiten kan ngai hi Pathian Thu nen pawh a inmil lova, a duangchhuaktute mipui rorelna kalpui dan tur an tih nen pawh a inmil lo a ni.

Sorkarin mipui a hlauhin zalenna a awm a, mipuiin sorkar a hlauh erawh chuan sorkar awpbehna hrehawm leh rawng tak a awm a ni tia Thomas Jefferson-a’n a lo sawi hi a dik a nih chuan hnam zahawm leh zalen nge nih kan duh roreltu thalo leh thildiklo titu pawh dem ngam lo khawpa rahbeha awm tih hi I inzawt nawn leh teh ang u.