HUMAN RIGHTS LEH MIZORAM BAPTIST KOHHRAN

Khawvel pum huapa Baptist kohhran intelkhawm Baptist World Alliance (BWA) General Council Meeting July 6-12, 2014-a neihah khan Mizoram Baptist Kohhran aiawhin General Secretary Rev. H. Lianngaia a kal a. Chuta thurel lansar zual zinga mi BCM website-a tarlan te chu he'ng te hi an ni:

“1. Myanmar (Burma) intihduhdahna a lo tawp a, sakhaw zalenna a lo awm theih nana hma lak (Violence and Religious Liberty in Myanmar)

2. Khawvel hmun tina eirukna a lo reh theih nana hma lak(Resolution on Corruption).

3. Ukraine rama Russia duh leh duh lo kara buaina a lo reh theih nana hma lak.

4. America rama refugee tlan khawmte America sorkarin tha taka a lo enkawl theih nana palai hna thawh.

5. Turkey rama Kohhran hruaitute leh ringtu mimirte ringtu tha leh nghet, thih thlenga rinawm ni zel tura fuih thar lehna leh chak taka hma an lak theih nana hma lakpui”.

Engvangin nge Baptist kohhran ten PRISM buaipui corruption te, Pi Aung San Suu Kyi-i buaipui Burma rama mipui zalenna te, khawvel sawrkar lian buaipui Ukraine ram buaina te, UNHCR buaipui refugee te hi buaipui berah a neih kan tih chuan a chhanna chu hei hi a ni - He khawvela "Pathian ram a lo zauva, a lo ngheh a, a lo lan fiah deuh deuh theih nan" leh “Lal Isua, Remna Lal hi hmun tina Lal leh Chhandamtu a nihna puan chhuah a nih theih nan”  Krista taksa kohhranin, Lal Isua'n a takin a rinna a nunpui ang khan, a taka chet a tula kan hriat vang a ni.

Adama leh Evi sualnain a nghawng chu Pathian remruatna fel tak mai a tichhia kha a ni a. A tira Pathianin tha a tih em em kha a lo chhe zo ta vek a, engkim siamthar lehna phei chu Lal Isuan Lalram a rawn din thar leh hunah kan hmu dawn chauh a ni.

Sual hnathawh zinga pawi ber chu Pathian leh mihring inzawmna tihchaha a awm kha a ni a. Remruattu fel Pathianin thing anchhedawng kraws-a mihring leh Pathian inzawm leh theihna tur min buatsaihsak lo phei se chuan hringfate hian beisei tur kan nei lovang.

Sual hnathawh nghawng thalo em em dang leh chu Pathianin a duh taka amah anga a siam mihringten Ama hnen atanga kan dawn, Pathian anna nasa taka kan hloh leh kan in bawhchhiatsak tawnna hi a ni. Mihring hi zalen taka Pathian chibai buk leh amah pawl tura siam kan ni a. Chu zalenna chu Pathian hnen atanga kan neih a ni. Amah chibai buk duhloh zalenna pawh tiamin. Zalen taka Pathian chibai buk theihna tur daltu lian tak ni thin chu rorelna hi a ni a. Kohhran rorelna phei chu, history enin, mihring leh Pathian inkara tlazep lian ber a ni fo.

England rama Pathian chibai buktu thenkhata chuan an ram rorelna hnuaiah zalen takin Pathian chibai buk theiin an in hre lova. An pi leh pute atanga an ram chu chhuahsanin tuifinriat ral lehlamah awmhmun an zu khuar a. Vawiin thlengin, chu zalen taka Pathian chibai buk theihna khawvel siam duhna chu, America ram ropui tidanglam em em tu a ni. Zalen taka miin Pathian chibai a buk duhlohna pawh zau taka phal a ni bawk.

Kentucky state-a Rowan County clerk Kim Davis-i'n neih inang te "inneih certificate" ama hming ziaka a pek chhuah duhlohna chhan kha a rinna kalha a hriat vang a ni a. Supreme Court in a theih ti mah se, Supreme Court aia sang zawk lei leh van Pathianin a remruat ang nilo lo pawmpui kha Kristiante rinna nen inkalh tlata a hriat avangin Supreme Court judgement ang a zawm lova, US District Judge David Bunnings-a chuan a tantir ta hial a nih kha.

Immanuel Baptist Church, Pine Bluff, Arkansas leh Beech Street First Baptist Church, Gurdon, Texarkana pastor lo ni tawh thin, Arkansas Baptist State Convention President pawh lo ni tawh, Arkansas state Governor hlui, US President nih tum Mike Huckabee-a chuan a facebook status ah Sep 9 khan heti hian a ziak a:

“Today, I was proud to stand with Kim Davis as she was released from jail. Kim Davis should have never been locked-up for being a Christian and for following her conscience and the law...I refuse to sit silently as our Constitution is torched and the courts violate our fundamental rights...This shredding of the most fundamental civil rights of our citizens cannot stand. As president, I will fight for, and protect, the religious liberty of every American.”

Mimal leh Pathian inkar hi a thuk em avang leh sorkar inrawlh theihna tur nia an hriat loh avangin America ram din tirh khan an ram hruaituten an Danpuiah sakhaw zalenna ziakin an Danpui siambelh hmasak berah an lo humhalh tlat a. Hemi vang hian America rama Kristiante khuan sorkar in rinna chungchangah leh sakhuana thila a “kuang lo a nawr” nia an hriat chuan nghet takin an ding thin a ni.

US Declaration of Independence ziaktu Thomas Jefferson-a pawh khan kha document pawimawh tak a ziah khan mihring dikna chanvo te hi Siamtu Pathian hnen atanga kan dawn a ni tih chiang takin heti hian a ziak a: “We hold these truths to be self-evident, that all men are created equal, that they are endowed by their Creator with certain unalienable Rights”

Judge Andrew Napolitano-a chuan mihring zalenna leh dikna chanvo te hi Pathian anpuia siam mihring ten phuara awm lo Pathian hnen atanga kan dawn a nih avangin chu’ng dikna (rights) te chu dan hmang lo chuan inrahbehsak emaw inbawhchhiat sak theih a ni lo tiin a lo sawi bawk a ni.

India ramah pawh Dr.Ambedkar-a kaihhruainaah he sakhaw zalenna hi fundamental right a ni tih Danpui duangtu te khan an pawm thlap a. Danpui Bung 15-na leh 25-naah chiang taka dah a ni. Fundamental right dang pakhat leh chu Bung 19-naah heti hian kan hmu a:

“(1) All citizens shall have the right (a) to freedom of speech and expression; (b) to assemble peaceably and without arms;...(g) to practise any profession, or to carry on any occupation, trade or business”

Heng human right, fundamental right ni bawk, te hi a tlangpuiin ram khatah chauh nilovin khawvel pumpuia pawm a ni. Universal Declaration of Human Rights hi khawvel pumpuia sorkar leh thuneitu pawl reng rengin an tlawhchhan a ni fo. Baptist World Alliance, Mizoram Baptist Kohhran pawh a telna, pawh hian a ngaipawimawh hle. A chhan chu Pathianin human rights hi a ngaihpawimawh vang a ni.

July 2014-a BCM General Secretary Rev H Lianngaia’n Mizoram Baptist Kohhran aiawha khawvel Baptist intelkhawm rorelna sanga BWA Constitution a zu pawmpui ah khan BWA objective pakhat heti hian a inziak a - “To act as an agency of reconciliation seeking peace for all persons, and uphold the claims of fundamental human rights, including full religious liberty.”

BCM Constitution Bung 3 naah, “mihring dikna (Fundamental Rights) humhalh leh

sakhaw zalênna vawnhim tlat te, mihring nun pumpui changkânna tûra thawh te, Pathian

thilsiam humhalh te, mipui rilru leh ngaihtuahna tichangkâng tûra zirtîr te, inthliar bîkna awm lo leh hlâwkna ngawt ûm lova khawtlâng thatna leh hmasâwnna tûra thawh” tiin Mizoram Baptist Kohhran chuan chiang takin a thiltum (Objective) a lo ziak a. He Constitution hi Mizoram Baptist Kohhran chuan Pathian rawng a bawlnaah leh ro a relna innghahnan a hmang mek a ni.

Zoramin a hriat angin Mizoram Baptist Kohhran chhungah 2008-a rorelna sang berin a lo rel vangin harsatna lian tak, kohhran buaina lian tak siam thei leh siam mek a awm a. He buaina hi rinna leh rawngbawlna emaw doctrine lam thila harsatna nilovin rorelna kal fuh lo thil liau liau a ni.

Kohhran rawngbawlna a lo chak zawk nana Baptist pastor ten bial an enkawlnaa an nupuite an hruai ngei theih hi, kohhran dang pawhin tha an tih dan a ni vek ang tih chu kan pawm tlang awm e. A tihhlawhtlinna tura rel tel an nupui te sorkar hna leh hna dang full time-a “thawh phal an ni lovang” tih kha a tirah agenda duangtute leh a pu lut tute leh a pawmtu ten an ngaihtuah kim lova. BCM Constitution, BWA Constitution, Universal Declaration of Human Rights leh Indian Constitution kalh a lo ni reng a. Tin, chu’ng zawng zawng ai pawha a kalh chian zawk chu Pathianin mihring dikna chanvo a pek hi a ni.

Pi Vanramchhuangi’n a rawn sawichhuah khan BCM hotute leh kohhran hruaitute zingah ngai hua tam tak an awm a. Thenkhat phei chuan Pathian rawngbawlnaah mihringin dikna kan sawi thiang lo tiin Krista pasal tha ni tura kan inpeknaah Pathianin kan dikna min humhalh sak tlat a ni tih an hmuthiam lova. Nasa taka mihring dikna bawhchhiatnaah hian Kohhran hi a thiamlo lian ber pawl a ni hial awm e, history kan en chuan.

Pu Buanga leh Sap Upa kohhran din, khawvel huapa Chanchin Tha rawngbawl hna thawk tura Pathianin a thlante zingah pawh tel, kawng hrang hranga Mizo hnam kaihruai tura mi rintlak hrualchhuaktu kohhran Mizoram Baptist Kohhran hi Pathianin a siam mihring te hnena a pek human right pawisa lo leh inkaihhruaina dan pawh bawhchhiat pawi ti lo leadership in a kaihhruai kan phal tur a ni lo. Hemi kawng zawh tur hian Mizoram Baptist Kohhran hi din a ni lova, Pathianin min kohna pawh a ni lo a ni.

BCM Puipate leh 2008 Assembly Thurel 1.21 bawhzuinaa mawhphurhna chang zawng zawng ten Pathian leh kohhrante hmaah mawhphurhna lian tak an nei. Chu chu rorelna dika rorel a ni. Pathian duhloh zawnga kohhran kaihruaitu te hian Pathian ropuina an thlen lova, Setana duhzawng – inpumkhatlohna – an thlen zawk a ni.

Zoramah Pathian kohhran tiphel phawk khawpa harsatna kan tawk fo tawh a. Pathian pawisalo inkaihhruaina (ungodly leadership) hian Pathian kohhranah hmun a chang tur a ni lo.