Pu H.C.Vanlalruata, Press Trust of India (PTI) Principal Correspondent leh Chief of Bureau, PTI Aizawl Bureau ni mek leh Vanglaini chanchinbua regular columnist ni bawk hi ka awmna atangin km 9000 dawn laia hlaah awm mah se, issue pawimawh tak tak zawhna remchang February 2014 khan ka nei thei a. A chhanna te a bengvar thlak hle.
Q: Pu Ruat, hun min pek avangin ka lawm e. PTI ah Principal correspondent i ni tih ka lo hria a, Mizoramah hian press mite zalenna (freedom of the press) hi a awm thain i hria em?
A: India ram hi khawvela Press zalenna berte zing ami niin ka hria a. Mahse, zalenna famkim hi chu a awm theilo a ni awm e. Mizoramah hian pawl thenkhat leh political party thenkhatin press mite zalenna an rapbet fo thin. Rambuai lai khan MNF te khan an ngaihdan nilo ziakte chu kut hial an lo thlak tawh thin a. Sorkar lam pawhin press mi tam tak an thuziah avangin tanin-ah an khung tawh. "Aw Thar' chanchinbu-a ka thawh (College ka kal laia thawk tan ka nia, newspaper a ka thawhna hmasa ber a ni) lai pawhin kan editor Pu Ngurchhina (L) chu an man zing ang reng a, kei pawh vawi 2 chu min ko.
Rambuai hnu-ah pawh hian political party thenkhat chu an thikthu a la chhe viau. Rambuai laia MNF an thikthu a chhia ang khan a bik takin Congress party hi remna awm hnu-ah an thikthu a chhia. Eptu-a an awm laia chanchinbumi an vau te, kut an thlakte leh thil dang an tih a awm nual.
Q: Senhri chanchinbu kha kan lo hriat danin sorkar hnathawk eirute puanzarna a ni a. Editor i nih chhunga Senhri-in hma a lak chhinchhiah tlak deuh te min hrilh thei em?
A: Nia. Senhri kartin chhuak kha Mizorama 'investigative journalism' a taka kalpuitu hmasa ber a ni a. Kan khawih hnem khawp mai. A langsar zualte chu -
1. Serlui 'B' Hydel Project (He thil hi SENHRI-in a ziah hnu-ah a hna hi tihtawp vek a, hluihlawn zui a ni.)
2. Social Welfare-a nau chaw tha (nutrition) tih chingpen chungchang (hetah hian chhui chian a nih hnu-ah hnathawk an in suspend nual).
3. Mizorama hnamdang sumdawngte'n income tax awlrukna atana Mizo nena tangruala thil an tih dan.
4. Land Revenue and Settlement department-a Land Settlement Certificate (LSC) lem (a tana ram awmlo) an hralh dan. Hei pawh hi chhui chian a ni a, officer tiamin official thahnem tak suspend an ni.
5. Magistrate pakhatin judgement order siamna atana thubuai neite hnen atanga thamna a lak dan. Hei hi ACB te'n chhui zuiin court thlengin an kal.
6. Sports Minister-in US-a World Cup enna atana sorkar pawisa Rs 10 lakh a hman thu. A dang pawh a awm nual mai. Kan sawi seng mai lovang.
Q: Mizoram sorkar hrang hrang te news correspondent/journalist anga i lo hrawn tawh naah khawi sorkar kha nge langtlang bera i hriat? enge a chhan?
A: Chuti zawng chuan ka lo ngaihtuah ngai lem lova. Official Secrets Act-in ro a rellai kha chuan file leh sorkar lehkha pawimawh kha a ruka kan ruk chhuah vek a ngai a. RTI Act awm hnu pawh hian ni 30 min nghah tir an tum ve hrim hrim thovin a lang a. Mipui kan thangharh telh telh a, kan langtlang telh telh ni mai chauhvin ka hria.
Q: Mizote chanchin thehdarh kawngah 'facebook' te a lo awm tawh avangin kan pen chak tawh khawp a, enge chanchinthar thehdarhtuten an mawhphurhna lian ber nia i hriat?
A: Nia, tunah hi chuan Facebook etc a account nei tawh phawt chu reporter kan ni ta vek mai a nih hi. Chanchinthar thehdarhtute hi chuan mipui hnena thudik hriattir hi an mawhphurhna a ni a. Dawt an hrilh thiang lova, an ngaihdan an tilang thiang heklo. 'ABC of Journalism' an tih thin chu Accuracy, Balanced leh Clarity a ni tlat. Chhuah tur chin leh chin loh thliar thiam hi an mawhphurhna lian tak a ni a. Hetah hi chuan 'public interest a ni em?' tih hi tehfungah hmang i la a fuh tlangpui.
Q: Mizoram sum leiba cheng vbc 5000 chuang hi ngaihpawimawh chi niin i hria em?
A: Ngaih pawimawh ai mahin ngaihmawh em em tur a ni a. Chutih rualin hei hi chu pung chho ve zel tur a nihna lai a awm a. Ama'rawhchu kan Plan kaltlang emaw-a sum kan puk (market borrowing etc) reng rengah infrastructure ngaih pawimawh a, a rulh lehna tur thawk chhuak thei zawnga ruahmanna fel tak siam a tul a ni.
Q: AAP te hmalakna hi enge i hmuh dan? Mizoramah an boruak ang hi kan mamawh vein I hria em?
A: AAP te tih ang chi hi Mizoramah ti ve tura mi tak tak pen chhuak tur kan mamawh ngawt mai.
Q: MLTP Act dan bawhchhia te kan hrem theih laia PC Act dan bawhchhia te hrem an nih hleih theih lohna chhan ber hi enge nia i hriat?
A: Pakhatnaah chuan MLTP Act bawhchhia hi kan sorkar hotu lal ber ber zingah pawh an awm a, bawhchhe zan tin pawh an awm ngei ang, mahse hrem an tawk lem lo. Man chhuah pawh an ni lo. Chutihlaiin miretheite chu tanina lenglo khawp man an ni deuh reng. Lengpui Airport-a zin hawte bungrua endik a nih ngailoh atang hian a chiang mai awm e.
PC Act chungchang hi chu a dan a dang. Eirukna hi saphovin 'white collared crime' an lo ti mathlawn lovin lehkhathiam, sorkar hnathawk leh sorkara mawhphurhna pawimawh tak chelhte dan bawhchhiatna a ni ber a. Lehkhathiam, dan kalphung hria-in thiam theihtawpa an thup eirukna man chhuaha court-a thiamloh chantirna khawpa 'evidence' neih hi a harsa em em a. Chubakah politician thiltitheite hi chu mitin hlauh an ni a, thiltih tak tak a harsa thin a nih hi. A then phei chuan an hotute chhan na'n buaina hial siamah vau an lo ching ve bawk nen.
Q: YMA in dan bawhchhiaa hma a lakna tam tak hi an demawm i ti nge sorkar lam a chaklo em a, dem hleih theih pawh an ni lo i ti?
A: He thil hi a inbuktawk khawp maia; a chang chuan sorkar leh YMA hi an inlawm tawn nite pawh hian a lang thei fo mai.
Q: MPF te hmalakna hi enge i hmuh dan?
A: MPF hi Kohhran din a ni a, dik taka sawi chuan Presbyterian Kohhran-in kohhran tenau zawk thenkhat leh tlawmngai pawl lian deuh deuh thlung khawma an din a ni. Ka ngaihdan hi article hmangin ka ziak tawh a. India ram hi Democracy ram, secular sorkar a ni a; chumi rama state pakhat chu kan ni a. Democracy ramah chuan inthlan hi a pawimawh em em a, Democracy leh secular ram invuah India rama state pakhat Mizoram chhunga sakhaw pakhat inthlan chungchanga heti khawpa a inrawlh thuk hi a dik theiin ka hrelo. A dika kan hria a nih chuan Hindu ram din tum pawl Sangh Parivar an tih mai - RSS, VHP etc. te hian inthlan dan turah thuchhuah siam mai duhtawk lovin a takin inrawlh ta se kan pawm ve a ngai ngei ang.
Chuvangin engkima Kohhran inrawlh tumna hi tha ka ti lova, dik ka ti hek lo. A thuhrimin kum tam tak chhung chu Election Commission khuan inthlanna felfai ber state tiin min fak tawh a. Chumi piahlam kal chu a tul ka ti hranpa lova. MPF 'diktat' zawng zawng hi a tullo mai ni lovin mipui rorelna (democracy) thuthlung kalh a tam khawpin ka hria. An kuanglo an nawr a, an inrawlh lohna turah an inrawlhah ka ngai hmiah mai a ni. Election Commission in election model code of cunduct a siam duhkhawp lova MPF-in tihtur leh tihloh tur a siam belh teuh hi tul ka ti lo bawk.
Q: Thangtharte hian kan khawtlangah mawhphurhna laa tan la turin eng tiang zawnga ke pen nge tula i hriat?
A: Kei teh lul hi thangtharte kawhhmuh tur chuan ka tling tawklo khawp ang. Kan hlui tawh a, saptawng takin kan fate pawhin min hmu 'outdate' tawh. Chuti chung chung chuan kan ram tichhe bertu eirukna, hlemhletna ti te-a kan sawi corruption hi kan do tlat a, kan tireh theilo a nih pawha a zual pui tal kan tihtlem loh chuan kan ram leh khawtlang hmabak hi a thim khawp ang. A thiam thiam, a thluak tha tha dinchanna ni lo sawipuitu tha nei leh thuneitute hnaih apiang dinchanna ram chu ram ropui a ni theilo. Remchanna inang tlang (equal opportunity) awmna ram, dan rorelna hnuaia inkaihhruaina fel tak nei thei turin thangtharte'n tha thawh se tih hi ka duh ber a ni. Chumi hlen tur chuan sorkar dodal a tul thei a, politician, thuneihna pumhmawm duhte leh sorkar miliante do a tul thei. Engpawh huama kan beih loh chuan Mizo hnam hi a ding chhuak ngai lovang.
