Mizo nupui pawh nei lo hian Mizo nationalism chungchang hi ka lo sawi ve ngawt thin a, thinlungah pianna hnam rilru a thih miau loh avangin zawi zawia kan hnam nekchepna awm thei leh awm mek thil te hi a sawichhuah loh theih thin si loh a. Kan rawn auchhuahpui ve leh ngawt thin a nih hi.
“Greater Mizoram” tih thupui ang chi hi tun dinhmunah chuan buaipui thei turin kan tlin lovin ka hmu a. A chhan pakhat pawh Mizoram chhunga cheng Zo hnahthlak ngei ngei te hi kan inlungrual tawk loh em vang a ni. 2006 khan Lawngtlaia pastor pakhatin YMA leh YLA tih tawngkam vang ringawt pawha inkhawih mai theihna a lenzia min hrilh ka la hria. Tawngkhat hmang inkarah pawh English ho leh Scot ho thenkhat ang maiin kan rilru a hrang hle tih a hriattheih. Saiha district ah phei chuan tawng hrang lehzual Mara tawng hman vangin rilru pawh a inanglo lehzual ngei ang. Mara tawng hi “Mizo” tawng kan tih mai nen hian danglam viau angin ka lo ngai a. Mahse, high school-a ka thianpa pakhat history Assistant Professor chuan research a tihnaah kan tawng bul inanna a tam thu min hrilh a. Kan inhlat tehchiamlo ni awm tak a ni. Amaherawhchu, hnam khat anga khawsak ho kan thiam tawklo viauin a lang lawi si a. Tan lakna tur a tam hle.
Hman deuh khan Dr.H.T.Sangliana’n, “Kan Hnam Hming ‘Mizo’ leh kan ‘chi’ te hi” tih thupui hmangin article a ziak a – “Vawiin ni thlengin, kan zingah, “MIZO” tih kan hnam hming atana kan pawm ta hi, a awmzia enge ni tihah leh, Mizo chu kan ‘hnam’ hrang hrang, Sailo, Pawi, Hmar, Paihte, Ralte, etc, min pawt khawmtu mai chauh a ni, tih ang rengtea chiang lo kan la awm nuaih niin a lang.
A mawl thei ang berin han sawi ila. Tunhmain Lusei/Lushai tiin kan chhehvel hnamten min hre thin a. Mahse, kan hranghlui thil chhut chiang lehzualtuten, ‘Lusei tih hian min phuar pumkhat zo tawk love, kan zinga chi hrang hrangte in angkhat leh intiat tlang veka min phuar khawm turin, kan hming atan “MIZO” tih i hmang tawh zawk ang u’ an tih tak avanga kan hnam hmingah MIZO hmang ta kan ni.
Kan ramhi tlangram leh thengthaw tawk, ‘ZO’ tawka kan hriat avangin tha kan ti tlang a, ‘MIZO’ tih chu kan ram chhunga awm zawng zawngte min huam vektu koh hming atan kan lo pawm ta a ni. Tichuan Mizo hi kan hnam hming lo ni tain, tun hma a kan hnam tia kan lo sawi thin Sailo, Pawi, Lakher(Mara),Paihte, Hmar, Ralte, etc te chu kan “CHI” tiin kan lo sawi ta zawk a ni. Mizoah hian Mizoram chhunga cheng zawng zawngte kan leng vek tur a ni a. A leng veloa in ngai leh ni ve lova in ngaite chu an chawh thlawnin an buai thlawn mai dawn a ni. Chutiang bawkin, a inti Mizo apiang kan Mizo anga, a inti Mizo lo apiang an te telh telh mai dawn a ni”
Dr.Sangliana hi Hmar hnam a ni tih kan hre theuh awm e. A sawi tum hi a chiang reng a, mahse Mizo tiha tel ve lova inngaite an “chawh thlawn” mai anga a sawi lai tak hi, a tawngkam a fuh chiah lo bawk a, thenkhatin an lo la na hle. Mara tlangval pakhat phei chuan na angreng takin a rawn chhang let a, “chawh” nih a pawi tihloh zawk zia ang zawng khan a rawn ziak tain ka hria. Kan chibing nihna te hian “Mizo” hnam anga lungrual thap thap tur hian nasa takin min la daidang niin a lang. A tam zawk lahin a tlem zawkte kuangkuah kan thiam tawk lo fo bawk thin nen. Kan ram pawna kan “unaute” phei chu kan tawngkam mawi lem lo takah te hian kan thinlunga kan pawm zan lohzia a langin ka lo hre thin.
Mizo hnam leh nationalism chungchang hrim hrim ngaihtuah hona chu Zotalk tv program-a kan mithiam rualte titi kha a tha hle. Youtube ah en theihin a awm leh nghal a, (http://bit.ly/1qXJSi0) a bengvarthlakin a tangkai hlein ka lo hria.
“Mizo” tih hi a insawhnghet tha thawkhatin a lang a, a aia huapzo tawngkam kan duhtlan zawk te a awm a nih loh chuan “Mizo” hnam zawng zawng te hian pawmtlang thei vek ila kan hlawkpui ber tur niin a lang. Chumi hnam hming hnuaiah chuan a hnambil ten tha kan tih angin kan hnambil thil te kan vawng thei reng tho anga. Mahatma Gandhi-a thlirna ang deuh khan “Mizo” hnam pangpar huan mawi tak angin kan awm theih a beisei awm.
Tunlaiin kan ramah hnam rilru a sosang nasa hlein a lang, facebook vela mi tam tak sawi atangin. A tipuaktu pakhat pawh Pu R.Romawia’n Mizoram sorkar quota-a Chakma leh hnamdang zirlai ten technical lam zirna seat an hmuh chungchangah, "Chakma-te hi Mizoram mi an nih leh nih lohna leh, tribal an nih leh nih lohna kan hmu zo lo. Chakma-te STEE category-a dah an ni hi dan lo a nihna kan hre lo," tia a sawi vang pakhat a ni awm e. A sawina chhan pawh MZP ten Mizoram quota-a Chakma leh hnamdang zirlai te seat pek tawh sut leh tura sorkar an nawr vang a ni.
1992 khan Pi Kiran Bedi-i’n Mizoram quota-a Lady Hardinge College, Delhi-a a fanu MBBS zirna tura admission a hmuh sak a, a insawithiamna pawh tuna Pu Romawia sawi ang deuh tho hian dan ang thlapa thil tih a nih thu a sawi a nih kha.
Chu aia dan pel thui zawk ka hriat chu Mizoram quota-a Assam-a MBBS zir a awm, tun hma deuh tawhah thil thleng. India khua leh tui ni lo a ni hial mai thei lehnghal. Mahse, Pi Kiran Bedi fanu MBBS zirzo ta lo ang lovin tha takin a zir zova, damlo tihdam hna te a thawh zui tak avangin a thaa ngaih theih te pawh a ni mai thei.
Kan fanu te hi Australia-ah an pian avangin an hming tawpah Mizo hnam diktak “Pachuau” awm mah se, India ram khua leh tui an ni lova. Dan ah chuan Mizoram tribal leh indigeneous an ni lo. Pawl 12 an zawh hnuah, remchang lak tumin Mizoram quota MBBS emaw engineering seat rawn beisei ve ta ila, thil dik lo a ni ang. An entitle loh thil a nih vangin. Pi Kiran Bedi-i khan Mizoram quota kha keini tribal (indigeneous) ho tana India ram sorkarin a buatsaih a ni tih hre tura ngaih a ni a. Mahse, a fanu tribal leh indigeneous nilo tan khan a hmuhsak a. Danah a dik theihna lai tur a hmu a nih pawhin a diklohna lai a lian zawk hle ang.
Chakma te leh hnam dang Mizorama chengte hi kan mihringpuite an nihna ang leh Kristianna in min phut anga kan dawngsawng tur a nih lai hian kan Mizo hnam tana pawi theiah chuan chiang takin ramri kan kham tur a ni ang. Pawi deuh chu tuna MZP ten indigeneous chungchang an rawn pholan hnuah pawh sorkar department hotu lu ber Pu R.Romawia’n chhanna mumal a pe thei tlat lo hi a ni. Buai nuai an cho tih chiang takin an sawi tawh hnu pawha thu chiang leh mumal sawi thei lo khawpa politics in a tihbuai hruaitu te hian kan hnam tana ramri kham a tulzia a tilang hlein ka lo hmu.
MNF te hi an tlak hnu khan thumum nei hlei theilo khawpin an mawng an sawhna a. An thuchhuah siam thin hlawkthlak lohzia hretu kan nih hlawm ka ring. Mahse, kar hmasaa “Congress party lakah YMA a tawlhthluk hlau” (http://www.vanglaini.org/tualchhung/24942) tih an sawi erawh kha chu ngaihtuahzui tlak deuh a ni. CYMA hruaituten dan tlawhchhan pawh nilova, buaina leh harsatna lian tak thlen thei “Chakma chhiarpui” neih an tum kha a mawlmang viau naa, an duhna rilru chu a hriatthiampui awm hlein ka lo hria. Vanduaithlak chu, an hruaituten hma la tura sorkar an ring kha a ni.
Chakma te hi pawng huat tur an nih loh laiin kan hnam tana thalo khawpin dinhmun kan pe hi chu thil tha niin a lang lo. IAS officer pakhat ka hriat chuan kan politician te hian hma an la duh lo niin a sawi a. “Chakma Minister hnuiah chuan Principal Secretary ka ni duh miah lo Zoramah hian” a ti tawp bawk a ni. Thenkhat chuan a lutuk an ti mai thei a, mahse khawilai emawa ramri kan kham ngamloh chuan kan tlawm duai duai chu a nih ber hi.
