KOHHRAN LEH ZU - ISUAN ENGTINNGE A TIH ANG?

Tunlai chu Zoramah zu huat a hluar hle mai, zu huat hmel fe fe pawh an tam hle. Kohhran thenkhat phei chuan zu zuar te an thunun a. Kohhran pakhat phei chuan a zuar lo thlengin an thunun hial a. Aizawla kohhran pakhat chuan an veng chhunga dan lova tun hma atanga zu lo zuar thin an enliam laiin sorkarin dan a siam thar hmanga zuar erawh an do thung a. A hmatawngah ram dang Kristianten a do anga do lo tih hrechiangtu pastor pension tawh a tang nghe nghe.

Tuna kan kalpui dan hrim hrim hi chu Muslim sakhaw hruaitu firfiak hote kal duh dan nen a inang hle. In awih loh chuan Muscat, Oman-a khawsa Pu Zuia khu zu zawt ula, chiang takin a lo hrilh thei ang che u.

Zu kan do dan a diklo tih avang hian zu hi a tha emaw fak tur tihna a ni chuang hlek lova. Mizo te hi zu in thiamlo hnam hrang hrangte zingah kan tel ve avangin zu in phalrai ang zawng phei chuan sorkar emaw kohhran hian policy neih chi a ni lovang. Zu in thiam berte zingah mi pahnih chauh han sawi ta ila - kan Chief Minister leh Pu M.Lalmanzuala. Anni lo pawh hi zu in thin zu an in avanga an mawhphurhna hlah lo leh tibuai lo tam tak an awm ngei ang. Entawn tlak ber zawk chu kan Lalpa Isua Krista kha a ni. Vawiin chu Isua zu in lam te I han ngaihtuah ho dawn teh ang.

Mizoram kohhran te hian Kohhran dintu leh a lu ber Isua Krista nun hi uluk deuhva en chuan mak tih tur deuh deuh kan nei ang. Sual neilo khan zu a in a. Zu a in mai pawh nilovin zu a in thin a ni tih ama sawi ngei atangin a lang. Ruih lam erawh a ti ngai lova, zu bawihah a indah reng reng lo bawk tih a nun atangin kan hre thei awm e. Amaherawhchu, kan Lalpa Isua kha Juda tlangval Juda culture zawm a nih angin zu in mi a ni ve tlat.

Number 6:1-5 kan en chuan heti hian a inziak a – "Tin, LALPAN Mosia a bia a, 'Israela thlahte hnenah sawi la, an hnenah, ‘mipa emaw, hmeichhia emaw pawhin eng emaw thutiam bik, LALPA tana inpekna Nazarit thutiam a tiam lai chuan, uain leh zu a nghei tur a ni; uaiin thur pawh, zu thur pawh a in tur a ni lo va, grep tui pawh a inin grep rah a tharlam pawh, pho vuai pawh a ei tur a ni hek lo. A intihhran chhung zawng chuan grep hruia mi a mu pawh, a pil pawh a ei tur a ni lo. Intihhranna thu a tiam chhung zawng chuan a lu pawh meh hauh loh tur a ni...”

Nazarit thutiam tiamtu zinga langsar zual chu Samsona leh Zawlnei Samuela te an ni a. Lal Isua unaupa (cousin) Baptistu Johana pawh kha a nu pum chhunga a awm lain a pa, puithiam Zakaria hnenah, “...uain leh zu reng reng a in lovang...” vantirhkohin a lo ti tawh a ni. Pathian tan inserhhrang an nihna angin Nazarit thutiam tiamtu te khan zu an in lova, Dr.Manmohan Singh-a te angin an sam pawh an zuah a ni. Sikh ho lu meh loh culture hi Bible ah a tel ve leh tlat bawk!

Zu hi Bible hunlaiah pawh a thatlohna tam tak an hre ngei a ni tih Bible kan chhiar chuan kan hre thei ang. Lalpa tana inserh hrang duh Nazarit mite en hian zu in loh hi Pathianin a thil duh ni pawhin a lang. (Pastor leh upa leh rawnbawltute zu in lo a that nachhan)

Baptistu Johana pawh a chhia leh tha hriatna a hman theih hma daih atangin chunglam zawkin zu in lo turin a serh hrang a. Zu in loh hi thatna tam tak a awm a ni ngei ang. Rev.Dr.Billy Graham-a te US President hlui George W.Bush-a te paw’n zu in loh an thlang a. Zu an inloh avanga rual an pawlohna reng reng hriat a ni lo. George Bush-a phei chuan a zu nghei kha duhthlanna a siam zinga la pawimawh ber pawlah a ngai hial a ni. A lehkhabu “Decision” ah khan a decision No.1 ah a zu nghei a tarlang nghe nghe. Pakhatnaa a dah chhan pawh zu a nghei kha a hnu zela a nun hriltu a nih thu a sawi hial a ni.

Zu hi fak tur emaw dem tur emaw sawimawi tur emaw sawichhiat tur a nih leh nih loh chu thuhran lo ni ta se. Kohhran lu ber Lal Isua nun atang hian zu hi I han en lawk dawn teh ang.

Luka 7:33, 34 ah khan Baptistu Johana zu in ngaihloh thu heti hian Lal Isua’n a sawi a, “Baptistu Johana chu...uain pawh a in lova.” A sawi zelnaah, “Mihring Fapa a lo kal a, a eiin a in a, nangnin, ‘En teh u, chaw heh mi, uain heh mi, chhiahkhawntute leh mi sualte thian saw!’ in ti si a” tiin zu a in thin ngei thu a rawn sawilang a. Lal Isua khan zu a in thin kha chapo pui emaw uannan a sawi lova. A rawn sawina background tak hi chu farisai hote’n amah chirhthehnana a zu in an sawisel thu a ni a. Congress party lamin an pute rorel dan diklo sawiseltute nasa taka, a chhe thei ang bera chhuah an tum thin ang hi a ni ber ang chu. Thudik hrula dawt leh tawngkam chhe taka mi va beihzui hi mi hnaisailo te tihdan a lo ni awm e.

Lal Isua khan zu a in thin a, a in thin chu hriain farisai hote khan amah beihnan “zu in” ti mai nilovin “zu heh” tiin an lo sawi darh chiam tih kan hmu thei ang. An puhna hrang hrang phei chu a chhe hle. Zu hi Lal Isua khan a haw lova, a do bawk lova. Chuvang chuan Zoram kohhrante hian kan Lalpa hnung zuia kan zu huat leh do hi kan tihtawp a tul.

Tlawmngai pawl lian ber YMA thiltum leh dinchhana inziak - “Kristian nun dan tha ngaihsan” tih hi Kristianna dintu Isua Krista nun atanga kan tan dawn chuan zu heh leh zu ruih nilo nunphung ti buailova zu in hi kan ngaihsan a ngai dawnin a lang.

Isua’n zu rui lova zu a in thin chuan Kohhrante leh YMA hian zu khap lam nilo zu in leh zu ruih loh 

lama ke pen turin mawhphurhna lian tak kan nei.

Tun hnai khan Kohhran thenkhatin an kohhran rorelna kaltlangin zu zuar leh zu in theihna permit nei te an chungthu an rel sak a. Sawi tak ang khan kohhran pakhat phei chuan a zu zuar lo chenin an thunun a. A thawhlawm te pawh dawn loh tur hialin an rel a ni awm e!

Zu hi a thalo thei hle a, a hnathawh hi a huatthlalaawm hle tih chu mi zawng zawngin kan pawm a rinawm. A zu heh ber paw’n!

Amaherawhchu, kan entawn tur ber Lal Isua’n zu hi a lo in thin chuan kan do thiang lovang. Amah anga zu kan in thiam hlawl lo a nih chuan entawn tur tha tak tak an awm reng tho mai. 

Zu in duh chuan in se, insum erawh a Pathian Thu a ni tih hria se. A Fapa thisena a lei, khawvel lak ata a koh hran he Krista taksa hi chuan buaipui tur dang I buaipui ang u. Zu phei chu Lal Isua’n, “Pathian Rama a thar” (Marka 14:25) a in leh tur a la sawi ta deuh deuh zawk a nih hi. Mizoram Kohhran te leh YMA ten kan do em em hi vanah Isua’n a la in dawn a. He leia lo do chi a ni lo.