REPUBLIC VENG JAC LEH DAN

"Republic Veng Joint Action Committee chuan Pu Sangliansiama te chhungkua that mangtu Laltlanchhuaha chu khaihlum ni ngei rawh se an ti. Laltlanchhuaha hi Republic veng khua leh tui nihna an hlip a, a thiin emaw a damin emaw Republic veng leilungah a lo let leh tawh tur a ni lo an ti" tiin Dingdi chanchinbu editor Pu Lalhmachhuana Tochhawng chuan Dingdi facebook group ah a ziak a. Republic Veng hruaituten Pu Siama te chhungkua chunga chhiatna rapthlak tak thleng chungchang an ngaihtuah khan an rilru tur chu kan hriatthiampui theuh awm e. Kan khawtlanga thil duhawmloh tak tak lo thleng ta te hi engtia hmachhawn tur nge tih uluk deuhva kan ngaihtuah a pawimawh hle, a bikin dan mit atanga kan thlir thiam a pawimawh zual awm e.

Mizote kan behna ram India dan hian Republic Veng JAC ten tualthattu hrem an duh dan ang capital punishment hi misual hremnan a phal a. India Penal Code (IPC) Section 302 ah hetiang hian ziaka dah a ni:

"Punishment for murder.—Whoever commits murder shall be punished with death, or 1[imprisonment for life], and shall also be liable to fine."

Amaherawhchu, he tualthattute hremna dan hi hman mai mai loh tur tiin Supreme Court chuan 2008 khan a rel a. Tualthahna thleng zen zen lo (“rarest of rare”) ah capital punishment hmang hian tualthatte hrem theih an nih thu a sawi a ni.

Chu'ng "rarest of rare" case thenkhat te chu han tarlang ta ila:

1) Low-caste mi emaw religious minority mite thah an nih a, khawtlang thinrimna lian tak a chhuah in.

2) Inneihna man (dowry) thuhlaa a hmeichhia thah a nihin.

3) Mi pakhat mai nilo thah an nihin. Entirnan, chhungkaw khata mi te a thah an nihin.

4) Nupui dang neih duh vanga mahni nupui thahin.

5) Naupang (child) thah a nihin.

6) Hmeichhe tanpuitu neilo, mahni invenghim zo lo ("helpless woman”) thah a nihin.

7) Kum lama upa emaw rualbanlo thah an nihin.

8) Inhmelhriat thain a mihriat that tak chu a thahin.

9) Mipui rawngbawlnaa inhmang mipuiin an ngainat politics thil avanga thah a nihin.

He’ng bakah hian India ram laka indona puangtute hi capital punishment hmanga hrem theih an ni a. Mumbai-a Taj Hotel beitute zinga mi Pakistan terrorist Ajmal Kasab kha India ram dotu/beitua puh niin 2012 khan khaihlum a ni.

Chulo lehah chuan, evidence diklo pek avanga thiamlohna neilo thiamloh chantira tihhlum a nihin evidence diklo petu chu khaihlum theih a ni bawk.

Pi Zokhumi thattu pawh hi Supreme Court in capital punishment hmanga hrem theih a tih zingah a tel ngeiin a lang.

Pu Siama te chhungkaw thattu phei chu IPC Sec 302 hmanga hrem a nihlohna chhan tur hi a ukil ten an sawithiam a ngai khawp ang.

Roreltu hriathlawh Pu KL Liana pawhin January 10 khan he tualthahna chungchangah heti hian a facebook status a ziak a:

“...Nizanah Republic lamah Zoram khawvel thil thlenga rapthlak ber pawl thawm kan han hre zui leh nghal a, thinlung hi a ngui nghuai mai zawng a nih hi. Hetiang ema mi nunrawng leh mi nunna engahmah ngai lotute hi chung lam leh danin an phu tawk hremna a la pe ngei ang, kei chuan khatianga chhung khat thah mang pawh pawi ti lotute kha chu dan anga khaihlum an phu hian ka hria, Kristian ram intia thil thlengah chuan a van rapthlakin a van zahthlak ve aw.”

A tukah heti hian a ziak leh bawk:

“Republic Veng thil thlengah mitthite Zoram mipuiin kan khawngaih a, kan lainat a, kan tuarpui a, hrehawm kan ti, rapthlak kan ti em em a, khatiang thil kha thleng leh tawh lo se kan duh. Chutihrual chuan a thattu kha kan dem a, ka hre sual a nih loh chuan a pa phei chuan keiman ka sat hlum nghal dawn tiin a fapa kha sah hlum a tum a, mahse an dangbet ni awm tak a ni, a nu leh pa, chhungte tan pawh a hrehawmin a zahthlak ngei ang tih pawh hriatthiampui an ngai ve tho mai. Danin tualthattu chungah ro a la rel ngei ang, kan Police fel tak tak leh thiam takte hian finfiahna tha tak nen case an siamsak ang a, keini mipuite chu kan police-te chungah rinna nghat ila, a tibahlah tur zawngin tumah i khawsa lo hram ang u aw”

Tualthattute hremna dan lam chu a chiang turah lo dah ta ila, Pu Parzuala te rilru tur pawh kan dawn thiam awm e. Republic Veng JAC te thinrimin thuchhuah an siam hnuhnung lam erawh hi chu dan mit atanga thlirin ngaihtuah nawn leh ngai thil niin a lang. India ram danpui Constitution Article 19-na hian India ram khua leh tuite dikna chanvo heti hian a sawi a:

1. All citizens shall have the right
(d) to move freely throughout the territory of India;
(e) to reside and settle in any part of the territory of India; and
5. Nothing in sub clauses (d) and (e) of the said clause shall affect the operation of any existing law in so far as it imposes, or prevent the State from making any law imposing, reasonable restrictions on the exercise of any of the rights conferred by the said sub clauses either in the interests of the general public or for the protection of the interests of any Scheduled Tribe.

India khua leh tui te hi, misual dan bawhchhia nasa leh pawi la khawih miah lo thliar hrang lovin, India ram chhung khawi lai pawha kan zinkual leh in leh lo din thei tura dikna chanvo nei kan nih thu a ni ber mai.

Republic Veng JAC ten Pu Siama thattua puh hi an veng "khua leh tui nihna an hlip" tih an puang a. "Thiin emaw a damin emaw Republic veng leilungah a lo let leh tawh tur a ni lo" an ti bawk a. An rilru kan hriatthiampui lain zawhna awm ta chu:

1) Republic Veng JAC hian India ram khua leh tui nilai hi an veng chhung "khua leh tui" nihna hlip turin thuneihna an nei em? Kum 50 lungin tang ta se, putar chaklo tak niin a venghluiah let tumin ruahmanna siam ta se “lo let leh tawh tur a ni lo” tia thuchhuah hi dan hmaah a tling (valid) angem? Dan rorelna nge kan duh tak tak zawk an sawi thin 'mob rule'?

2) Court in Pu Siamate chhungkaw thattu hi thiamloh chantirin IPC Sec 302 hmangin hrem ta se, a chhungten a ruang zalhnan Republic Veng thlanmual beisei thei lo tura thuchhuah siam hi danin a phal em?

He’ng zawhna te hi Republic Veng JAC te leh mipuite rilru dawnpui loh lam nilovin kan khawtlangah hian remna leh muanna nena kan khawsak zel theihnan leh dan kan dah pawimawh a tulzia kan hriatnawn theihnan kan inzawt ni ta se, khawtlang hruaitu te pawhin dan pela che te kan huat ang bawkin dan pela chet hi a diklo a ni tih an pawm a, dan chhunga khawsak tlan kan zir theihnan a tihhmuhtu an nih zawk a pawimawh hle a ni.