SORKAR DIKLO LEH MIPUI MAWHPHURHNA

2008 MLA inthlan lai vel atang khan Mizoram politics leh sorkar inrelbawlna hi chik deuh zawkin ka ngaihtuah tan ve chauh a. Tun hma atangin Congress lamah hian kan chhungte leh lam hnai deuhte an awm hlawm avangin Congress lam hi engemaw chenah rilruin ka awn deuh chuan ka hria a. 2008 atang khan, MNF sorkar khan ro an rel felloh em avang te pawh a ni anga, Congress lamtang rilru deuh reuh chuan Zoram politics leh sorkar inrelbawlna hi theih ang angin ka lo ngaihven ve thin a ni.

Tum khat chu kan kohhrana pastor pension pakhat bulah Pu Hawla’n eirukna a zung chawpa phoro a tum thu a sawi te kha tih tum tak tak tan lo chuan sawi mai mai chi ni a ka hriat loh thu leh Pu Hawla khan a sawi anga tih a tum tak tak ni a ka rin thu te ka sawi a. Pu Chhawnthuama’n EVM tihchingpen thu a sawi ai khan Pu Hawla’n corruption phoro a sawi kha ka ring zawk daih a ni. Ram rorelnaa boruak thar thleng tura ka rin avangin 2008 khan ka beiseina a sang hle.

Congress sorkar chuan kum 5 a han hmang zova, a term lehpek a han chuangkai chiah chu ka rilru a inthlak chiang hle mai! Rilru inthlak chhan pawh MNF emaw eptu party dang tha tih tak em em vang nilovin Pu Lalthanhawla kaihhruai sorkar hian awmze nei tak tak tura ro a rel loh vang leh ram hmelma lian ber pakhat – corruption – a do loh vang a ni. Sawi ang khan 2008 atang khan Congress party hi rilruin ka lo thlawp ve viau a. Mahse, an party leh sorkar kaihruaitute an duhtui lo em a. Awmze nei tak tak turin ro an rel thei lo ni berin ka hmu. MNF sorkar term hnihna kha a nawi viau a. Congress sorkar term hnihna hi a ropui zawk chuang miah lo. Mipui rilru han thawi dam tur zawnga tawngkam hman an tumin a lang thin bawk si lova.

Congress sorkar hi fakna lai tur a awm miahlo a ni lova, fak lohna leh sawisel ngei ngeina lai tur anmahniin an insiam lian thin lutuk hian an tih that te pawh a thaichhe vek thin a ni. An tihdikloh leh tih felloh te lah chu dan mitin a en liam mai mai theih loh thil te a ni nual bawk si a. Chutiang chanchin thalo te chuan kilometre 9200-a hlaa awm pawh hi min lo nghawng ve thin a, awm hle hle thei lovin min siam thin a ni ber mai.

Sorkar hi, eng party pawh nise, an hmalakna buktling tawklo a awm hrim hrim tih hi thudik awmsa a ni a. Tihdikloh emaw tih tur tihloh vanga sawiselna pawh a awm ngei ngei tur a ni. Policy emaw kalphung tha leh thalo a awm lai hian dik leh diklo te pawh a awm bawk a. Amaherawhchu, chu’ng sorkar kalphung leh policy te chu a dik emaw diklo tih hriat nghal mai theihloh thil te a nih thin avangin tawngkam leh mipui rim thiam politician te chuan thudiklo leh dawt hmang te pawh hian rei tak tak dinhmun sang an chelh thei thin a ni. Tin, thuneihna engtin tin emaw an sawhngheh thiam phei chuan an lamtang lo tana hlauhawm takah an inchhuah thei a, sorkar duhloh zawng pawh sawi ngam loh khawpa inawpbehna boruak hrehawm khawtlangah kan insiam thei tak tak a ni. Chutiang dinhmun chu khawvel hian vawi tam a lo tawng tawh a, kan ramah pawh hian a thleng mek a ni tih chik taka en chuan a hmuh theih.

Mizoramah chuan Congress President leh Chief Minister ni bawk Pu Lalthanhawla hian thuneihna a inpe nasa thiam hle a. Indira Gandhi, a hoten an hlauh ang mai khan MLA junior deuh te phei chuan a hlauh hian an hlau em em a ni. (Inzah hi chu a hriatthiamawm. In hlauh emaw inhlauh tir erawh hi chu a Pathian Thu lo hle!)

MNF President leh Chief Minister hlui Pu Zoramthanga hi a mizia hrim hrimah pa nelawm a nih vang hian Chief Minister a nih chhung khan rorelna tha tak kan hmu lo nain, han haw hluah hluah sawi tur hi an tam lovin a lang. Rammua vangvat kai a nihna Zoramin a zah laiin kum 10 chhung roreltu hna a thawh atanga teh chuan ngaihsan a hlawh lo hle. ZNP President phei chuan a nuai 800 chuang neih hi mipui hmaa a sawifiah theih loh chuan rorel tlak tawh lovah a ngaih thu a sawi hial a ni. An kaihhruai sorkar term hnihna a zawh dawn hnaihah phei kha chuan chuap cancer damlo thaw hlei thei lo ang maiin a kal tawk tawk a nih ber mai kha. 2008-a sorkar thar a piang kha, kan mamawh chhanna tak tak ni zo lo mah se, nachhawkna paracetamol angin engemaw chen kan na min chhawk a. A lehpekah erawh chuan zaipui kan mamawh dawn niin a lang. Kan sorkar hian hniam lam a pan zel phei chuan 2018 hma pawhin inthlanthat ngai khawpin boruak a chhe lovang tih a sawi theih loh.

Pu Hawla sorkar hi MLA zat en chuan a nghet khawp mai a. Mipui tam zawk hian ring tawk lo viau mah ila, vote of no confidence ang phei chu Monica Lewinsky case ang chi te a thleng emaw Pu Chhawna’n Pu Hawla a puhna finfiah a ni te a nih ngawt loh chuan awmzia a nei thei lo hrim hrim ang. Chief Minister berin diklo taka thil a tih pawhin an MLA ten vote thlak chu sawi loh, a diklohna chiang takah te pawh an sawisel ngam lo.

Sawi tawh ang khan sorkar hian tihdikloh a nei lo thei lova. Pawimawh chu theih tawp chhuahin dik taka ro rel a tum tur a ni. Chu chu danin a phut bawk avang leh chutiang ang taka ro rel tura thu an tiam vangin moral responsibility chauh ni lovin constitutional responsibility an nei tel a ni.

Sorkar hi a tih diklohah amah leh amah a inkhak dawnloh avangin mipui lam atangin kan auchhuah fo a ngai thin a ni. Entirnan, August 22, 2013-a sorkarin MPSC Regulation 3(f) hmanga doctor 35 a lak chungchang kha han en ta ila. Junior Doctors' Association of Mizoram (JDAM) te khan Gauhati High Court, Aizawl Bench ah khan diklohna hailanna leh dikna tundinnan sorkar kha khing lo ta se khatih hunlaia Health Minister Pu Lalrinliana Sailo leh sorkar officer te khan diklo taka thil tih kha an siamtha dawn miah lo tihna a ni. Tuna Health Minister Pu Lalthanzara pawh hian a ngai khan a kaltir zel a nih kha.

Court-a thlen a nih atanga thla khat pawh a ral hmain Court chuan September 17, 2013 khan hriattirna a chhuah nghal a; Mizoram sorkar leh doctor 35 lak tharte chu insawifiah turin a ti a nih kha. Ka lo ngaihven zui vek lova, hriat chinah Pu Rinliana emaw doctor 35 lak tharte emaw Health Secretary emawin diklova hna lak a nih kha tuma’n an sawi lo niin a lang.

Ukil Michael Zothankhuma leh a thawhpuiten court hmaah an han chai ta tak tak a, court in uluk taka a ngaihtuah hnuin "22.8.2013-a medical officer 35 lakna order tihchhuahah hian langtlanga thil tih a awm lo a, sorkarin dik lo takin thil a ti a ni" tiin sorkar tih dikloh chiang takin a sawi ta a ni. Court in a sawi zelnaah Indian Constitution Art 14 leh 16-na bawhchhiatna a nih thu a tarlang a. Dan kalha doctor lak tawhte chu hlawh leh hamthatna dang pawh pek loh tur an ni awm e. Court thuchhuak vekah hian mak ve mai mai chu doctor 35-ten hlawh an lo lak tawhte rul turin a ti lo tlat thung.

Khatih hunlaia Health Minister Pu Rinliana leh Health Secretary te khan India ram danpui meuh bawhchhiaa thil tihna kha an hriatpui nge hriatpui lo chu ka hre lova. Amaherawhchu, mawhphurtu chu an awm ngei a ni. Tuna Health Minister Pu Patea mawh a ni ti dawn ila, khatih hun lai khan Health Minister a la ni lova. A lo inrawlh ve te a nih ngawt loh chuan a fihlim tura ngaih a ni. A lang mawiah tal banna te han thehlut vel ni se thil awmlo a ni lovang.

Minister ni tura thu an tiam hian India ram danpui Schedule 3 paragraph 5 tlawhchhanin hetiang hian an hming sign hnan thlapin Zoram mipui hmaah an au lauh lauh vek a: “I, …, do swear in the name of God/solemnly affirm that I will bear true faith and allegiance to the Constitution of India as by law established, that I will uphold the sovereignty and integrity of India, that I will faithfully and conscientiously discharge my duties as a Minister for the State of Mizoram and that I will do right to all manner of people in accordance with the Constitution and the law without fear or favour, affection or ill-will.”

Dan an bawhchhe miau a, an bawhchhiat chianzia pawh High Court in ziak thlapin a dah tawh paw’n, “Ka tih dikloh min man chhuak tlat mai, ban ngei ngei a tul” tih nachang hria Minister/Ex-Minister/MLA kan nei lova. MLA/Minister nihna chelh turin a tling tawh lo tih nachang hria, “I banna rawn thehluh rawh le” ti thei Chief Minister kan nei bawk si lova. A lu ber atanga a dikloh tlat avang hian an zavai hian hnawl vek a hun tawh zawk a ni. Khehpuam kaihhnawiha man Congress hotu bang ta Pu Rozara'n an party aiawha Congress sorkar mark 90% a han pe ngawt te kha I la hriat chuan kan sorkar hian Zoram mipui te hi "bawl" theihah min ngai a, mi mawl awmkhawm bum mai mai theihah min ngai chu a ni ber. Mipui te hian ram hruaitu ni tlaklo, an thutiam pawh vawng zo lo ho te hi I hnawl ang u.