STRENGTHEN MY FAITH IN YOU

Lord, I know you bless my life,
The way You do I don't think I deserve;
I know You will guide throughout this strife,
So here I am, I come to serve.
Lord, I know I need a heart
A heart of love that understands
Because You said right from the start
That love for all was Your demand

Strengthen my faith in You
Let me remember the price You paid
The blood of the Lamb has cleared my debt
I'll doubt no more when you strengthen my faith in You

Lord, I know in fellowships
Of different kinds we have today;
You want to open partnerships,
That stretch our vision through Your way.
Give me the strength to do my best,
Empower me to tell Your story
To all who scorn and laugh and test
That they might come to know Your glory

Lord, You know
Sometimes my faith is shaken
If ever I doubt again
Assure me that You've broken
The curse that seems to win
And the bondage of my sin
Renew my strength
And strengthen my faith in You

LAKLUH LEH HMANRAL

March 17 khan Finance Minister Pu Lalsawta'n Assembly House ah chhiah chungchang heti hian a sawi a - "Chhiah kan lâk ṭhin hrang hrangte pawh tihpun chhoh hret hret a ngaih dawn bakah, chhiah ni lo, thil dang aṭanga kan lak luhte pawh tihpun zel a ngai dawn a ni."

Sorkarin mipui tan hna a thawh dawn hian mipui vekin sum kan thawhkhawm a ngai tih chu kan hre theuh a. Mizoram bikah chuan chu sum thawhkhawm te chu tun hma atanga kan inrelbawldan avangin a tlem em em a. A nihna takah chuan tun ang renga kal hi thil tha ber a ni lo a ni. Mizoram sorkar kalphung leh inrelbawldan zir thin PRISM zirchianna hrang hrangte en hian chhiah lut a tam tawk lo ang maia sorkar hotuten an sawi hi 100%-a dik niin a lang thei lo. Sum mamawhna te hi a awm reng dawn a, a hmanral lam hi kan buaina leh ngaihtuah tur zawk niin a lang.

PRISM bawkin a sawi thin chu sorkar sum mipui sum tul lova kalral tur cheng vaibelchhe 1600 lai an ven tawh thu a ni a. General Body Meeting vawi 11-na Vanapa Hall-a PRISM in a neih pawh khan he thu hi an President Pu Vanlalruata'n a sawi leh a ni. Tin, "Mipui Manifesto" an siamah khan sorkar-in tul lova sum a hman mekna tihtawp theih engemawzat an ziakchhuak a. Mahse sorkar hian an ngaihtuah lutuk lo niin a lang.

Chhiah hi Pharoa hunlai atang tawh khan mipui hamthatnan ni silova mipui tana harsatna thlentu, phurritah a chhuak ta fova. A khawntu leh a khawna te inkar a thatloh viau phei chuan tharum thawhna leh revolution indona hial te pawh a lo thlen tawh a ni.

Mihring thinlungah duhamna te, zelthelna te, hmasialna leh midang eihek duhnate a awm avang leh chu ze thalo tak tak te chu thunun a nih loh fo avang te hian thuneihna chelhtuten thuneihna hmanga mipui hnen atanga sum an sawr chhuahin Pu Sawta'n "tihpun chhoh hret hret" a tih hi saptawnga slippery slope an tih ang a ni ber a. Mihring duhamna hian tawp chin a neih loh avangin, hret hret hi tam takah a chhuak fo a ni. A nihna takah chuan kan sorkar hi, eng party sorkar pawh nise, kan lakluh atanga 100% pawh chhiahah pe ila, a indaih ngai lovang.

Lakluh (revenue) hi kan harsatna a ni lova, hmanral (spending) hi kan buaina zawk chu a ni a. Chumi pawma hrethiam, inrenchem chunga hmasawnna kalpui leh rorel thiam sorkar chu Zoram hian kan mamawh takzet a ni. 

Sum hmaralna leh leiba inzawmna chungchang phei chu Pu Lalsawta department enkawl Planning Department Secretary Dr C Vanlalramsanga hian Prof Lianzela kaihhruaina hnuaiah research thupuiah meuh neiin PhD a zir zova, Mizoram sorkar hian leiba tih tlem tih te, sum inrenchem tih te hi a duh tak tak chuan mithiam hman tangkai tur a nei lo a ni lo. Tin, hman deuhvah khan Lengzem editor Pu Vanneihtluanga pawhin Grik ho sorkar inrelbawldan hriatthiam awl takin kan inzirnan a ziak tawh bawk a ni.

Hriat angin kan ramah hian tuna kan hman democracy hi kan la hmang thiam lo em em a, politics-a senior ber bera kan neih kan Chief Minister meuh te pawh hian political philosophy tha an hriatthiam tawk loh avang leh economic philosophy tha phei chu an man loh em avangin kan ram inrelbawlna hi a kal bai nasa hle a ni.

A pawimawh berah chuan ram hruaitute hian ngaihdan fel an neih a ngai a. A tlachawp, ar khawthim dai nilo uluk taka zir hnua a tha ber nia an hriat dana ram hruai hi an ti meuh lo niin a lang. A chhan pakhat chu sorkar tur chuan thlantlin nih a ngai a, thlantlin nih dawn chuan mipui tihlawm a lo ngai leh a. Mihring zia hi a thatchhiain a lo chhe khawp a, a nem lai zel kan pan avang hian chumi rilru hrefuha mipui bawl thiam chu kum rei tak an lal thei thin reng a ni, kan hman mek mipui sorkar democracy ah hian.

Sum leh pai chungchangah hian eng ang rilru puin nge sorkar hian rorel se tha ber ang? A chhanna chu sorkar bul intanna anga an lo sawi thin chhungkua atang hian a zirchhuah theih awm e.

Nula leh tlangval chu an innei a, nupaah insiamin chhungkua an din a. An chhungkaw enkawlnan an eizawnna atanga an hlawh chu an chhinchhiah a. An chhungkaw mamawh ngei ngei thil thenkhat an chhut a; an fate school fee te, kawlphetha man te, tui man te, lirthei enkawlna leh tuialhthei leina man te, gas man te etc. Chu’ng zawng zawng chu an lakluh nen a inmil nge mil lo tih hre reng chungin an hisap a. An senso tur thenkhat enin an tlin dawn lova an hriat chuan an in hrek deuh a. A tul dan azirin an sum sen thinna thenkhat pawh an titawp bawk a. TV thar tha chi a rawn chhuah paw’n an it ve viau na a, an sum neihin a tlin hrih loh avangin an hmanlai chu an hmang chhunzawm mai a. Sawma pakhat leh tul dang hrang hrang an dah hran zawhah an khawl theih chin an dah hrang leh a. Chutiang chuan an hlawh lak leh thleng inren takin an khawsa ta thin a. An lakluh aia an hmanral a tam zawk zeuh chang a awm thin a, mahse a rulh lehna tur lamin an chhut chhuak lawk vek thin a ni. A tlangpui thuin an sum lakluh aia tam an hmangral ngai lova. Lak luh aia hmanral a tam zawk chuan leiba neih a intan dawn tih an hriat avangin leiba neia awm ai chuan nasa takin an inhrek zawk thin a ni.

Chhungkaw inrelbawl dan hi chi hrang hrang a awm thei anga. A pawimawh ber zawk nia lang chu leiba phur zawh loh delha awm lo tura sum leh pai enkawl a ni ang. Duhthusamah chuan leiba nei lova sum khawl neih hial a ni zawk. Chumi tur chuan sum lakluh zat aiin sum hmanral dan dik a pawimawh hle.

Lakluh mila khawsa lo hi khawvelah tam tak an awm a. Chu’ng hote chuan leiba tam tak an nei thin a, an inven that loh phei chuan an nun a chhe vek thei thin a ni.

Sorkar unit bul ber hi chhungkua a nih a, sum leh paia chhungkaw inrelbawldan kan han sawi ang – lakluh aia tamlo sum hmanral – hi leiba neihlohna leh hahdamna pakhat a nih chuan sorkar hian ram a enkawlnaah hian a lakluh lam aiin a hmanral lam hi a ngaihtuah ber zawk tur niin a lang. Chu ngaihdan chu mimal leh chhungkuaah a dik kan tiha kan pawm chuan sorkar inrelbawlnaah pawh kan pawm dan tur ni awm tak a ni.

Mizoram sum leh pai dinhmun chau tak mai hi tuna Congress sorkar chauh mawhphurtu a ni lo nain term hnihna hmang mek sorkar chuan an sorkar chhung hian engemaw chen chu chingfel thei tawh tura ngaih an ni a. Kan sorkar hotu berten rulh lehna tur mumal ngaihtuahna tel lova tîm hauh lova sum eng zat pawh an pûk zel tur thu Assembly House-a an han sawi te kha ngaihtuah chuan sorkar tha leh sum enkawl thiam kan mamawh zia a hriat theih awm e. Sum an pukna chhan tura an sawi lah chu ram hmangaiha inchhal zawng zawng te tawngkam angin “ram leh hnam tana ṭha turah chuan” tih a ni a. Hetianga kal hi arkhawthim dai an sawi dik tak chu a ni.

Sorkarin chhiah a lâk ṭhin hrang hrangte hi “tihpun chhoh hret hret” a ngai dawn angin Finance Minister hian a sawi a, mahse sorkar sum sen tih tlem hret hret hi thil ngai zawk chu a ni. CVJAC hote leh sorkar thu inchai pakhat lifetime vehicle tax kum 15 chhung atana chhiah lak phei hi chu kan ramah lirthei a daih rei loh em avangin thil tihawm a ni lova, anmahni ngei pawhin kum 5 hnuah an lirthei an thlak chuan kum 5 te la se a awm zawk ang. Indian Constitution 7^th Schedule in state thuneihna hnuaia lirthei chhiah khawn hi a dah avangin sorkar laipui khuan vawi khata kum 15 chhung atan lifetime vehicle tax la turin “thuchhuah” an siam thei lova, chutiang thuchhuah awm reng reng chu hmuh a ni lo bawk a ni.

Chhungkua a ni emaw pawl a ni emaw sumdawnna a ni emaw sorkar pawh nise, sum leh pai hman danah lakluh aia tam hman a, a rulh lehnana mahni thawhchhuah nilo mi pawisa tham sak hi a dik lova, Indian Constitution Schedule 3 para 5-na tlawhchhana sorkarna chelhtuten chhia an chham hian hetiang thil diklo hi ti lo turin a phuar bawk a ni.

Kan state sum neihin a sen a kawhna kha a rei leh tawh a, tunah chuan a sen duk a kawk tawh hial zawk ang. Sorkar hian about turn a tih loh chuan kan hma lam hi a eng vak lova. Tawngtai vaka tha thei chi pawh a ni lo.

CONGRESS SORKAR LEH AMOSA 5:24

Exodus bung 1-na kan chhiar chuan Josefa lal hun tawp hnua Pharoa'n Hebrai mite laka ro a rel dan kan hmu a. Tuna democracy kan neih hlutzia kan hrethiam thei awm e. Aigupta lalin a duh chu tihin a awm a. A thu chu dan a ni. Hebrai naupang mipa piang thah tura thu a pek chuan thah tur an ni a, court-a khin buai theih a ni lo.

Hun kal zelah ram hrang hranga hnam hra...ng hrang ten inrelbawlna kan neih te kan her danglam hret hret a. A tawpah a tha bera kan hriat mipui rorelnain kan inenkawl ta a. Mahse, hman dik loh chuan a la kalsual nasa thei hle a ni. A hmang dik leh hmang tha ber pawl chu USA te, UK te, Australia te, Canada te leh khawthlang ram hote hi an ni kan ti thei awm e. Singapore te, Hongkong te pawhin an hmang tha fu. British hovin July 1, 1997-a China sorkar hnena Hongkong an hlan let dawn khan sapho rilrua lang lian ber pakhat chu Hongkong inrelbawlnaa rule of law chhunzawm a ni a. Mi pakhat emaw mi tlemte thil tithei lalna leh thuneihna nilo dan lalna leh rorelna hi democracy hmang tha ho chuan an ngaihpawimawh berte zinga mi a ni. Dan berin ro a rel chuan dikna a lal a, Amosa 5:24-a kan hmuh ang hi a takin a thleng thei thin a ni.

'KALA HRE ZEL CHE
EVM tichingpen duh khopa rinom lo CM, Tenom lutuk!
EVM Support CPU hmanga intihtlin chwpna,
Corruption azoga tenom ber hi a puak chhuak don.
Dik lo taka ram hruai i la tumlui hi i mualpho pui dawn.
EVM suasam dan thlalak nen lam puanzar a ni don.
I thiltih hre vektu,
Phantom'

tia December 11, 2013-a Chief Minister hnena SMS thawn kha kan la hre theuh anga. A thawntu Pu K Chhawnthuama khan Pu Lal Thanhawla hnena a thawn bak mipui chhiar turin a thehdarh loh avangin hetia kan hriat theihna chhan hi Pu Lal Thanhawla te lam atanga puanzar a nih vang a ni a. Chief Minister-in a thawntu zawng tura police te a ngen/hrilh khan hriat theuh angin an zawng hmu nghal thuai a ni tih kan hria a. Mizorama lal berin thu a pek chuan law enforcement lamin rang takin an tih tur an ti a. Amaherawhchu, June 4, 2014-a Mizoram lal ber dan bawhchhiatna chungchanga Mizoram police te hnena an tih tur ti tura ngenna erawh chu awihawmlo khawpin IPS senior officer te meuh pawhin an pehhel thung a ni.

Tunlaia minister lar ber chu Transport leh Supply lam enkawltu Pu John Rotluangliana a ni a. Buhfai chungchangah MNF thalai hruaitu Pu Lalrindika Chhangte ten bang turin an ti a. Ration card chungchangah PRISM GS Pu RL Liantluanga te pawhin Chief Minister hnena ban turin an ngen a ni. Minister nihna atanga bang ta hi tam tak an lo awm tawh a. Mahse a tlangpuiin "bang rawh se!" tia eptu lamin an tih vanga bang hi an ni ngai lem lo. Danin loh theihloha a hrut vang emaw a hrut dawn vanga bang te an ni hlawm.

Transport Minister hian ban a tum loh thu leh a aim-in-life ang maia minister nihna Chief Minister-in a ban tir te a nih loh chuan nih chhunzawm a tum thu a sawi a. Frank taka a rilru diktak kan minister-in a sawi hi lehlamah chuan a fakawm angreng. Mahse, Transport Minister hian a ngaihtuah tel loh chu dan chunga leng a ni lo tih leh ban mai nilovin tantir theih a ni tih hi a ni.

Nikum Oct 1-3 inkara buatsaih Anthurium Festival-ah khan Zoram Today correspondent ten hmuh an beisei miahloh an zu hmu a, mak an ti hle. An thil hmuh chu chhun pachanga thupna leh thup tumna awm miah lova ualau taka dan bawhchhiatna a ni a. A mak an tih em em na chu dan bawhchhetute zingah khan sorkar hnathawk mai bakah an dan bawhchhiat ngei siamtute zinga mi a tel ve vang a ni.

Mizoram Liquor Prohibition Act kha in en chuan Sec 42 (2)-ah chuan licence/permit nei lova "liquor" in khap a ni a. Sub section (3)-ah phei chuan vantlang hmuna "liquor" in khap tlat a ni. He'ng dan bawhchhiate hremna hi Sec 43 (2)-ah a chuang a. Thla 1 chhung lungin tantir theih an ni a. Kum 2 thlenga pawhsei theih a ni. Rs.1000 aia tlemlo Rs.5000 thleng chawi theih a ni a. Chu bakah vantlang ekin te thianfai tura hrem theih an ni bawk.

He dan hi pawng ngam ngawt chi a ni lova, Sec 40-naah phei chuan "every offence punishable under this Act shall be cognizable" tih a inziak a. A awmzia chu MLPC dan bawhchhiatna reng reng hi police in magistrate phalna lak ngai lova man nghal theih tihna a ni.

Tin, Sec 36-naah hian "Any private person or group of persons may arrest or cause to be arrested any person who commits a non-bailable and cognizable offence under this Act, and, without unnecessary delay, shall make over or cause to be made over any person so arrested to the Excise & Narcotics officer or Police Officer..." tih a chuang a. He dan bung leh changin a sawi ber chu thianzaho emaw mimal pawhin MLPC dan bawhchhiate hi manin police emaw excise hnenah an hlan thei tih a ni.

Transport Minister hian a enkawl department hnuaia thil kal fel chiah lo thenkhat te hi danin a phut angin a chingfel tur a ni a, a theih loh chuan inthiarfihlim mai se tia thlir tu PRISM te, MNF thalaite hian inthiarfihlim tak tak tura an duh chuan (CVJAC hruaitute te pawh an tel tawh mai thei a ni tunah chuan!) a dan bawhchhiat MLPC Act tlawhchhan hian Aizawl Police Station Officer-in-Charge hnena FIR thehlut se, Indian Penal Code Sec 154-in cognizable offence thila man ngei ngei tura police te a tih angin Transport Minister hi an man nghal a ngai ang. MLPC Act Sec 36-na tlawhchhanin PRISM emaw MNF thalaite hian Transport Minister hi a office ah kalin, a banah kaiin police awm remchang MLPC Act bawhchhiate man thei chin hnenah an hlan thei a, laklawh takzet a nih loh chuan police station-a hlan nghal tur tih a ni.

A awmzia ber chu kan ramah hian dan zawm lehzual tura kan beisei chauh nilo dan kengkawh zawk tur te hian dan an pawisak loh a, danin a man ve thei lo anga an khawsak chuan Pharoa hunlai te, Lal Heroda hunlai te nen khan kan la inang reng tihna a ni. Democracy ah chuan dan a lal tur a ni a, chu dan chuan duhsak bik a nei tur a nilo. Pu Hawla’n “ti r’u” a tih avanga che vat vat thei police te hian an service innghahna ber zawk dan vang hian an tih tur an ti thin tur a ni. Kan politician dan siamtu te hian an dan siam ngei an zawm tur a ni a, an bawhchhiat chuan a man an pe ngam bawk tur a ni.
Tin, kan pressure group leh eptu pawl te pawhin mawhphurhna chelh reng tlak tawh lova an ngaiha bang tura minister an duh tak tak a nih chuan duh loh pawha ban ngei ngei na tur dan tlawhchhan tur awmsa te hi an hmang thei a. Transport Minister-in kum 30 chuang a lo tum ngar ngar hi minute 30 chhungin thiah vek theih a ni.

Pu T Saikunga ang nilo, neutral judge, rinawm taka dan apply duh, jurist rintlak hmaa thlen a nih phei chuan danin ro a lo rel thei mai thei a ni, public prosecutor a tih tur dik ti duh an awm phei chuan. Dan rorelna ah zalenna a awm a, thil a fel thin. Dan zahlohna leh bawhchhiatnaah rorel a fel thei lova, Congress sorkar changvawn Amosa 5:24 phei chu thlen dik ngaihna a awm lo a ni.

MIPUI RORELNA SAWRKAR HI KAN HMANG THA EM? KAN HMANG DIK EM?

April ni 30 khan MNF President Pu Zoramthanga'n Phainuam khuaa vantlang inkhawmnaah an party in Mizoram intodelh theih dan tur an ngaih pawimawh ber thu leh an sawrkar chuan kut hnathawktute hlawhtlin ngei theihna tura suma ṭanpuina pek an tum thu a sawi a. Vanglaini-in a tarlan danin, "Chawa Mizoram intodelh theih nan leileta siam theih ram zau tak laih zau hna kan thawk leh dawn a, kut hnathawktute tan Rs.3,00,000 aia tlem lo sorkarin ṭanpuina sum leh pai a pe dawn. Sumte hi NLUP sum anga kal pah sem vel mai mai tur a ni ve lo," tiin a sawi a.

Indopui 2-na laia UK Prime Minister Winston Churchill khan an ram rorelna inpui House of Commons ah November 11, 1947 khan sorkar chungchang heti hian a sawi a - "Many forms of Government have been tried, and will be tried in this world of sin and woe. No one pretends that democracy is perfect or all-wise. Indeed it has been said that democracy is the worst form of Government except for all those other forms that have been tried from time to time..."

Pu Churchill-a sawi ber chu he khawvelah hian sawrkar rorelna chi hrang hrang en chhin a lo nih tawh thin dan te leh tuna kan hman lar tak ber mipui rorelna kan tih democracy hi famkim a nih reng reng loh thu te a ni a. Tin, mipui rorelna chu sawrkar rorelna zawnga a chhe ber, mahse sawrkar rorelna chi dang zawng aia la tha zawk nia sawi a nih thin thu a tarlang bawk a ni.

Europe ram history kan en chuan lalten thuneihna tawp neia an duh dana ro an rel hunlai hun thim tak tak kan hmu thei a. Zalenna neilo leh rahbeha awm mipuiten zalenna an sual chhuah dan te pawh ngaihnawm tak tak chhiar tur a awm. Lemchanthiam leh director Mel Gibson-a channa Braveheart kha thil thleng tak tak tlawhchhan a ni a, hmanlai England lal rawng tak maiin Scotland mipui te laka lalna leh thuneihna a lan tir dan a hriat thiam a lang a. Kha lo pawh kha history lehkhabuah lalte hunlaia a rorel dan chanchin chhiar tur tam tak a awm a ni.

An duh chen chen rorel tura tharum leh sipai thachakna hmanga lalna inpe te leh an lal zel theihnana in sawhnghette sawrkar rorelna hnuai nilo, zalen taka mipuiin tha an tih ber rorel tura an thlan theihna sawrkar rorelna kalphung democracy leh a kentel tam tak te hi sap vun ngo ho hian a man sang tak an lo pe a. A tichhuaktute phei khu chuan an hlutin, a aia tha dang a awm chuang lo tih an hriat avangin hmansual a nih lohna turin an thlantlin hruaitute leh an rorel dan te hi an chik thin hle.

Mizote pawh lalte rorelna hnuaia kan awm laiin zirna leh thiamnaa sang zawk khawtlang leh ram hruaitu fel tak tak an rawn chhuak a. Lalte rorelna fel tawklo an tih lai te pawh an rawn haichhuak a, ngaihtuahna zau zawk neiin mipui rorelna India ramin sap ho hnen atanga an zir chhoh mek chu kan ramah an rawn senglut a. Hmakhawsang atanga Mizote inrelbawlna - lalte rorelna - chu hman leh tawh ngai loh turin 1954 khan Assam Lushai Hills District (Acquisition of Chief's Rights) Act hmanga tihtawp a lo ni ta a ni.

1954 kum kha lalte thuneihna tlemte la awm chhun tihtawp a nih kum niin mipui thlantlin roreltute sawrkarna intan kumah a chhiar theih laiin mipui rorelna hlimthla kan hriat tan tak chu a hma daih a ni a. April 6, 1946 khan politics lama harh hmasaten Mizo political party hmasa ber Lushai Commoners Union an din a. Mizo Union tia thlak a ni a, tuna Congress party ni ta hmahruaitu party hi a ni. Assam hnuaia kan awm laiin April 25, 1952 khan Lushai Hills District Council din a ni a. Mizo Union kaihhruaina hnuaiah November 25, 1952 khan lalte rorelna hnawl a lo ni tawh zawk a ni.

History kan chhiar chuan Mizo Union pian hnua lal ban duhna politics a alh chak zia kan hria a. Hmasang atanga Mizoten inrelbawl dan kan neih chu kan la zir chianloh mipui rorelna (democracy) in kan thlak ta thut a. Vai ram politics ze thalo lai tam tak kan la lut tel a. 1946 atang khan Zoram politics leh sawrkar rorelna hi a la kal ngil tak tak lo a ni ber mai. Mizo zinga sumdawnna leh politics lama mi hmasa Pu Pachhunga tupa, Speaker pawh lo ni tawh thin Pu Rokamlova chuan Mizoramah hian party politics hi “phakarna”-in kan tan a ti hial a ni.

Democracy thatlohna chu thiam bik em em pawh nei lo, mahse peih ve hrim hrim leh mipui ngainat theih tura an lawmzawng han sawi mai thiamten thuneihna an chan theih thinna lai hi a ni a. Dan ang thlapa mipui vote hmanga thuneihna ber an chan tawh chuan rorelna fawng vuantute an ni tawh thin si a; ram leh mipui tan a tha nge tha lo, danin a phal nge phal lo tih pawh hrethiam lo khawpa mawl leh inzir peihlo hruaitute hi kan thlang tling fo reng a ni. Mak ve deuh chu ram tana thawh em em neilo politician te hi anmahni leh an lam hnai te chu an lal chhung hian an lo in din fel  hman deuh vek zel! (Sawrkar pawisa an eiru tihna nilovin an dinhmun kha anmahni hamthatnan an hmang nasa tihna a ni. Inthlan leha an affidavit-a an neih rosum pung leh an enkawl ber kan ram economy tha thei si lo atang hian a hriatthiam theih awm e.)

2007 khan ram hmangaiha inchhal party chu mipuiin kan ning lutuk a, a lehlamah mi rethei tam takin hnawl an harsat cheng nuai 1 lo tawktarh pawl an inzuar a. Kan ram hmelma lian ber corruption lah chu khawvela do nasa ber tur angin an rawn inchhal a. Dan ang thlapin democracy kalphungin kan han thlang tling a, mahse 2016 a thlen meuh chuan an zia dik tak ah thup zo ta bik lova. kan phun ta sup sup a nih ber mai hi!

Pachhunga University College  Mizoram University-a Political Science zirtirtu Asst.Professor C.Lallianchhunga sawi Scroll correspondent M.Rajshekhar-a tarlan dan chuan Congress party-in cheng nuai khat tawktarha policy a duan NLUP hi mipui tihlawmna leh vote zawnna policy a ni a (“It is a populist policy implemented by the Congress to catch votes”). Phakarna atanga politics kan tan a nih chuan inbumna in kan chhunzawm ta zel a nih ber chu. Pu Vanneihtluanga phei chuan party dang te pawhin “NLUP duplicate an siam sup sup” a ti hial a ni. Sawrkarna chang tur hian he mipui rorelna kalphungah hi chuan mipui tam zawkin an thlan nih a ngai si a, chumi tur atan hrim hrim chuan kan politician te hian an theihtawpin dawt pawh hmangin, a rem rem an sawi a ni ber. Sawrkar rorelna awm chhan hi kawng hrang hranga rorelna dik (justice) a awm theihna tur a nih si chuan tuna kan political party neihten mipui rorelna leh vote hmanga thuneihna an chan theihnana anmahni pawisa pawh nilo, mipui pawisa veka kan vote lei an tum hi thil tenawm tak a ni.

Party hrang hrang ten mipui vote hmanga sawrkar rorelna chan tuma min han dawi leh thin hi thil nihdan phung tur renga kan ngai a nih chuan kan ram hian he mipui rorelna (democracy) hi kan chhiatpui hle tihna a ni anga, kan ram leh hnam hian hma a sawn tak tak thei ngai lovang. Tun dinhmunah hian Mizoramin leiba cheng vaibelchhe tam tak a nei a, sum hman tur pawh kan nei tlem hle. Khawsak a harsa a, mirethei leh hmelhriat nei ve lo te tan phei chuan kan Zotlang ram nuam hi chhawrpial run a iang tawh miah lo a ni.

Tun hma chuan lalten ro an rel a, a famkim lo nain Mizo hnam hian leiba kan nei ngai lo. Kan intodelh a, tu hnen atang mahin mamawh kan dil ngai lo a ni. Kum zabi 21-naah UK leh ram changkang dangte neih ang democracy tho kan neih hi kan hman dikloh nasat em avangin sum leh paia intodelh lo, hnam dang te chawmhlawmah kan in chhuah ta ringawt a nih hi. Kan dinhmun hi a tha miah lova. Haider aiin a nihna pawma siamthat hna thawh a tul hle zawk awm e.