“BCM Pastor nupui sorkar hnathawk ban leh ban loh chungchangah Assembly 2016 Hnahthiala neih zawh takah chuan Pastor nupui 45 zingah 36 an inching fel tawh a, 9 an inching fel mek a, 4 an la inching fel thei rih lo a; inchin fel nan hian April ni 30 2016 thleng pawhsei leh a ni e” tiin Baptist kohhran upa Prof H Lalramnghinglova’n March 5 khan facebook ah a tarlang a. Assembly rorel palai 910 ten “(2008 leh 2015) Assembly rorel ang zela kalin bawhzui zel a ni” tiin a sawi bawk a.
He BCM 2008 Assembly Thurel 1.21 kalzel hi chanchinbu lamah pawh tarlan niin pastor nupui full time-a hnathawh phalloh chungchang hi “relfel duak” tawh angin Baptist kohhran headquarter-a thawktu pakhat chuan a sawi nghe nghe a ni.
Baptist kohhran hruaitute hian BCM chhungkuaa harsatna lian tak siamtu “Kum 2015 hnu lamah chuan Pastor/Minister nupuite chu Sawrkar hna leh hna dang Full Time a thawh phal a ni lo ang” tia 2008 Assembly-a an rel hi UPC NEI, North Mizoram District Conference-in “Tun atang chuan pastor lak thar tur reng reng an nupuite'n hna nghet an nei tur a ni lo” tia March 3-a a rel ang khan thlak se chawplehchilhin a buai zel tur a tawp nghal thei a. A lo kalsual tawh pawh tihdik dan kawng a zawn theih a ni. Presbyterian kohhran pawhin hetiang deuh tho hian hman kumah an lo rel tawh a, UPC NEI te ang bawkin harsatna awm thei an sukiang a ni.
Kohhran dang tih dan entawn nih an duh loh pawhin Mission Vengthlang Baptist kohhran lamin Assembly-a siamthat a nih theihnana Assembly Executive Committee-a an thlen kha committee kaihruaitute khan agenda dang ang bawkin Assembly ah pu lutin sawihona hawng se 2015 Assembly ah khan rel fel a ni daih tawh bawk ang.
“Kum 2015 1st April atang chuan sawrkar hna leh hnadang full time a thawk nupuia nei te chu Pastor hna atan lak theih a ni lovang” tiin Mission vengthlanga Baptist kohhran lamin rawtna an siam a. Mahse, BCM President kalchhuak ta Rev C Ngurhnema leh General Secretary kalchhuak ta Rev H Lianngaia ten hnawl tha an tih zawk avangin Assembly ah ngaihtuah a ni ta lo a ni.
Hnahthiala Baptist kohhran rorelna sang bera palai 910 ten Mizoram Baptist Kohhran rawngbawlna leh inrelbawlna chungchang hrang hrang an ngaihtuah zingah pastor nupui chungchang hi ngaihtuah tel a ni a. Kohhran thuchhuakin a tarlan dan chuan “Pastor/Minister nupui full time-a hnathawk neite chungchang a Assembly 2008 thu bawhzuina thu kal zel report leh hmalak mek dan – April 2016 chhunga inchingfel tura tih chu pawm a ni” tih a ni.
2008 Assembly thurel, 2015 Assembly-a nemngheh thurel chungchangah hian a bawhzui dan chhiar theiha awm chin chauh en pawhin Mizoram Baptist Kohhran puipate pahnih chhuak ta te hian tihdanglam emaw tih tawp tumna awm ang ang te hi an tuipui lo tih chiang takin a lang a. Kohhran hi mi pahnih khat duhdana kal a ni lo tih hi hemi bikah chuan a dik a tih theihlohna turin document pawh engemawzat en theihin a awm a ni.
Rorelna kalsual tih hi hruaitute leh kohhran mi thahnemngai tak tak te’n an duh lo hle a. Mahse, Rev C Ngurhnema leh Rev H Lianngaia te kaihhruaina hnuaia BCM rorelna en chuan a kalsual nasa hle tih hi hai rual a ni lo thung.
Pastor nupui hnathawh phalloh tih hi a chhan ber nia kohhran hruaituten an sawi leh Rev C Ngurhnema’n 2007-a he agenda a pawmpui leh putluh ang chuan “Sawt zawk leh tangkai zawka rawng kan bawl theih nan, Bialtu Pastor chuan a thawhna hmunah a nupui a hruai ngei tur a ni” tih a ni a. Rev LB Khawpuimawia hi Rahsiveng bialtu pastor a nih chhung zawng khan a nupui, sawrkar hna full time-a thawk chu a bial enkawlnaah a hruai a. Assembly thurelin a tum ber hi a nupuiin sawrkar hna a thawh lai zawng pawhin a hlenchhuak a ni. Mahse, chutichung chuan a nupui hnathawk lai chu bantir turin tihluih a ni ta tho va. Nawrna nasa tak hnuaia an awm avangin bang turin thutlukna an siam ta a. Tichuan, BCM hotuten Serkawnah BCM Communications Director turin an ruat a ni. A nupui hian a hnathawh bang miah lo pawh ni se, a pasal hnathawhnaah awm chhunzawmin a pasal chu a rawngbawlnaah a zui zel dawn tihna a ni.
Tin, “Bialtu Pastor ten an thawhna hmunah an nupuite an hruailoh avangin rawngbawlna kawngah harsatna leh fel lohna tam tak a awm thin a. Hetiang harsatna sut kian nan hian Pastoral Committee chuan a hnuaia mi ang hian inkaihhruaina a siam a ni” tia Rev C Ngurhnema’n 2007-a Pastoral Coordinator a nih laia agenda duan a pawmpui khan Assembly-a put luh tura duan a ni a. Put luh a ni a, pawm pawh a ni ta bawk a. Mahse, data rintlak tlawhchhana sawiho a ni lo.
“Biala nupui hruai loh” tih hi a chhan bul ber niin Rev H Lianngaia’n a hranpain a sawi bawk a. Chumi ruala chuan “pastor quarterly report form kum 2012-2013 atanga a lan dan chuan kum 1 chhunga Biala ni 300 awm tling lo te hi Sorkar hna/hna dang full time-a thawktute ni loin mi dang 2 an ni, a dang zawng chu reasonable cause neite an ni” tiin a sawi tel bawk a ni.
General Secretary kal chuak ta chhinchhiah dan chuan 2012 leh 2013 chhung khan sawrkar hnathawk nupui nei pastor te hi biala nupui hruai theilo an awm lova. “Phalna neia Biala Nupui hruai lo hi kan awm meuh lo, mahse hruai lo chu kan awm; (hna hran nei emaw nei lo emaw)” tiin pastor rual zingah a tarlang bawk a ni.
Chuti a nih si chuan 2008 Assembly thurel-in a sawi “harsatna leh fel lohna tam tak a awm thin” tih hi rel a nih atanga kum 5 hnuah ziak meuhva BCM General Secretary kalchhuak ta-in a tarlan dan chuan sawrkar hnathawk te atanga harsatna awm a ni lo tihna a ni a. “Sorkar hna/Hna dang full time-a thawk nupui nei thenkhat hi chu transfer leh Biala hruai loh case-ah chuan harsatna sawi lo, Committee rel anga kal mai in awm tih hi kan inhriatpui” a ti hial zawk a ni.
Sawi ang khan Rev LB Khawpuimawia te leh pastor dang te chu Assembly in a rel chhan ber an nupui te bial an enkawlnaah an hruai reng chung pawhin an nupuite hnathawh phal a ni ta chuang lova, anmahni pastor te chu ban ni hial zawk tura ultimatum nen kohhran hruaituten an nawr tlut tlut ta zawk a ni.
Tunah hian BCM-a thawk pastor pali chu he Assembly thurel anga an nupuiten an hnathawh an bansan tur thu kohhran hruaitute an hrilh theih loh avangin pastor hna thawk lo turin an chungthu rel a ni a. BCM website-in a tarlan dan chuan “hetiang hian an posting siam fel a ni ta a, April 2016 chhungin an post an zawm ang” tih a ni:
1. Rev Samuel Lalremsanga – Evan.Teacher, Baptist Mission School, Tuichawng.
2. Rev PC Vanlalmuana – Evan.Teacher, Baptist Mission School, Marpara
3. Rev. Lalremsiama Fanai – Evan.Teacher, Hermon Comp.H/S-Nghalimlui
4. Rev. John Lalrinawma – Evan.Teacher, Baptist High School, Putlungasih
Pastor te hi missionary hna thawk tura “post” an ni thin a. Mahse, tuna he’ng pastor pali te hi an pastor nihna anga mission field-a thawk lo turin kohhran hruaituten an rel a, hetianga rel hi Mizoram kohhran history-a thil thleng hmasa ber a ni awm e. (Pastor an nih tawh si loh chuan pastor hlawh la lovin ordained minister ni chungin Evan.Teacher hlawh an la tawh dawn ni awm tak a ni)
Prof H Lalramnghinglova’n he harsatna chinfel mek anga a sawi leh “rel fel duak” tawh anga midangin an sawi hi a la fel lo nasa hle zawk a ni.
BCM General Secretary kalchhuak ta Rev H Lianngaia’n May 30, 2013 khan corruption chungchanga kohhran aiawha thuchhuah a siamah heti hian a ziak a: “Thuneituten anmahni duhzawng leh hlawkna tura an thuneihna dik lo taka an hmang hi corruption a ni bawk. Heng thil te hi Mizoram Baptist Kohhran chuan tha a ti lova; Kohhran mite tih atan thil bawlhhlawh a ni.”
Kohhran mite tih atana thil bawlhhlawh hi kohhrana thuneitute hian an ti ni berin a lang.
