ZU, MLTP LEH MLPC ACT

MLTP Act kha Mizoramin dan a neih tawh zawnga dan thalo ber pawl a ni ngei ang. A thatloh mai bakah a diklo nasa em em a. A tum chu lo tha pawh ni se, zirchiang chuan mimal zalenna a rahbeh nasatzia te kha an hre thei ang. Dan mit atanga en phei chuan India rama dan kan neih chungnung zawk nena inkalh te pawh a awm a ni.

A fuhlohzia leh a fuhlohzia tih kan hriat pawha tih ngaihna kan hriatlohzia entirna pakhat chauh, kan hriatsa, han sawi ta ila. April 21, 2014 zana Chief Minister leh a nupuiin Fosters beer bur langa an thu lai leh chu beer an in lai nia lang thlalak a lo darh khan a hmutute zingah dan leh thupek kengkawhtute pawh an tel ngei a.

13th December 2013, Oath of Office

MLTP Act in a khap bur kha, khami zana chaw eia sawmtuten police hnena an sawi anga beer/zu an lo in tirlo a nih pawhin, Chief Minister khan a hmaah zalen takin a chhawptir thiang lo tih MLTP Act en chuan a chiang a. Chu aia phuartu lian zawk chu India ram danpui Schedule 3 part 5 tlawhchhana “…I will faithfully and conscientiously discharge my duties…” tia Chief Minister in hming ziak thlapa thu a tiamna kha a ni ang. A thutiam kha a lo theihnghilh a nih pawhin a khat tawka Excise ho ten beer an man reng tih a ngaihtuah chuan danin a khap thil lo phalrai a diklohzia a hrechiang hle tura ngaih a ni. Chu chu Chief Minister khan a hria a, a chhawptute pawhin an hria. Tin, a lawina Zarkawt Presbyterian Kohhran leh Mizoram Presbyterian Kohhran hotute pawhin an hrechiang hle. Mahse, kan Chief Minister kha accountability a nei a ni tih hrilhnawn tum tumah an awm lo niin a lang.

Dan kan hria a, a bawhchhetu leh dan bawhchhiatna ngaizamtu pawh kan hria. Mahse, "zawhte hi tunge thi awrhtir ang" tih ang maiin Pu Lalthanhawla a nih chuan patling pui pui, Upa te, Pastor te hial pawhin a diklohna hmachhawAustralia atanga rawn inla fing, inla dik leh fel inti em em mihring kha. Sim rawh” tiin FIR thehluttu chu a bei chiam a. A telvena tur a nih loh thu leh a lo inthiarfihlim a that zawk thu hrilh a ni a. A ti zui ta lo. Thupha chawi tumna emaw a chhungten FIR thehluttu chhungte hnena ngaihdam dil tumna pawh a awm ta chuang lo niin a lang. Thil diklo tih dik tumna chu thil diklo zawk ang maiin chhuah a ni ta hlauh a nih kha. Engvanga khatia boruak awm ta hluai nge a nih kan tih chuan a chhanna chu MLTP Act thalo tak vang a ni kan ti lo thei lovang.
n tir turin an tawngchhuak ngamlo a nih kha. Khami chungchangah khan Police lam phei chu an fakawm loh hle. MLTP Act kha lo nei lo ta ila, Pu Hawla zu in emaw a inlai thlalak emaw kha buaipui tham a tling lovang.  Zu a in duh a nih pawhin a zalenna a ni a, mahse dan a bawhchhiat chuan a zalenna a hmangsual tihna a ni. Chulai chu mi tam takin kan hrethiam lova, chhuichiang tur leh dan anga rorel a nih theih nana hma la tura police te ngen an nih khan Minister fanu pakhat phei chu facebook lamah a tuan vat a. A lo khawsak tawhna Melbourne-a a hmelhriatten group an siam Highlander-ah, “

MLPC Act ah chuang kai ta ila. Excise & Narcotics department (END) hotuten August thlaa an duan zawh, an department Minister hova an zir nawn, chumi hnua Law & Judicial department-in an lo zirchian ve leh kha Excise hotuten an sawi dan chuan, "Chhun zan zawmin [k]an buaipui a, state dangah pawh hei aia tha hi a awm bik chuang lo ang. A tha tawkah [k]an ngai" a ni.

MLPC Act kan hman turah hian zu zawrh lam chauh ni lovin 'Prohibition leh Control' a nih tel dawn avangin a kalpui dan a danglam bik dawn hle niin an sawi a. Zu zawrhna dawr-ah CCTV dah tura ruahmanna te pawh a awm a ni awm e.

Nov 20 khan Pu R.Lalzirliana’n Assembly House ah he zu khapna leh khuahkhirhna dan thar chipchiar chu hman theih tura pawmpui turin a pharh a. Hengte hi chanchinbu lam atanga kan lo hriat a ni:

1) Kum 21 chinin zu lei theihna licence an nei thei ang. Mi pakhatin thla khatah zu ûm ruk (750ml) a lei thei ang. Beer leh wine (650 ml.) erawh ûm 10 a lei thei ang.

2) Miin zu rui chungin lirthei a khalh tih finfiah a nih chuan, DTO-in Motor Vehicles Act, 1988 leh Central Motor Vehicles Rules, 1989 hmangin a hrem thei ang.

3) Zu rui mante chu hremna hrang hrang an hmachhawn theih dawn a. Lungin tan leh pawisa chawi bakah zu ruia an khawsak chuan vantlang hmun, bazar leh a chhehvel, vantlang inthiarna, damdawi-in leh a chhehvel, vantlang luikawr, tar in leh hnucham chawmna ah te an pui thin dawn bawk a ni.

4) A duh duhin zu an zawrh phal a ni dawn lo a, Pathianni leh national holiday-te chu zu zawrh phalloh ni ah puan a ni ang. Excise commissioner-in tul a tih chuan zu zawrh phalloh ni a puang thei bawk dawn a ni.

5) Nuai 100 nei hnenah zu zuarte hnena zu pechhawng tur warehouse neih theihna pek an ni anga. Zu siamna hmun nei duhin Excise Superintendent hnenah dilna thehluh theih a ni ang a, an hmun neihte endik a nih hnuah Excise Commissioner-in licence a pe thei ang a. An hmun neih dan azir bawkin a pe lo thei bawk ang.

Sorkarin MLTP Act a hlip kha thil tha tak a nih laiin a thlakna MLPC Act hi en chian chuan, END hotute’n an huphurh chhan kan hrethiam awm e. Mizoten kan mu tan nia lang chu dan kenkawhna lai tak hi a ni.

MLTP Act kha a kenkawh (implement) theih miah loh a. A chhan chu mihring khawsak dan chipchiar ber thleng khuahkhirh a tum vang a ni. MLTP Act Chapter III, Prohibitions and Penalties No.7/b ah khan heti hian a inziak a:  “No person shall…consume liquor except on a prescription of a registered medical practitioner, or on a permit granted under the provisions of this Act…” I thiante nen, tumah tibuai lovin, tuma hmuh lovah Fosters beer lo in ta la. Eng anga midang pawisawilo pawh ni ula, kan dan khan zu hrim hrim a khap bur avangin dan bawhchhia I ni ta reng reng. Kha dan vek khan Chapter III, Section 58A-ah zu kaihhnawiha dan bawhchhiatna reng reng chu chawplehchilha man nghal theih (cognizable offence) dan bawhchhiatna ah a puang vek lehnghal a.

Police te hnathawh dan tur vawngtu Criminal Code of Procedure Sec 154 lah chuan chutiang cognizable offence reng rengah chuan action la ngei ngei turin police te a phut bawk si a. Kan zu khap burna dan kha a lo turu hle a ni. Amaherawhchu, chuti chung pawh chuan ukil te, MLA te, officer te leh mi challang tak takin zu an in reng thu ualau takin khawi khawiah emaw sawi a ni fova. Open secret a ni ber mai e. Police leh Excise lam te pawhin zu an rui thin tih tlanghriat a ni a. A chianna em em chu kumin kum tir khan Parliamentary Secretary pakhatin Police leh Excise ho te chu uniform ha chunga zu ruih a dikloh pawh ni lo, a mawiloh thu a sawi a nih kha! (http://www.vanglaini.org/tualchhung/13214)

Kan sorkar hi dan kenkawhna lamah a chak loh avangin he dan thar hi hlawhtling tur chuan sorkar hnathawk nilo, thlatlin hruaitute hian dan laltir berna nen tih tak takna nen an beih a ngai ang. Chutiang a nih loh a, tih tak takna a awm loh chuan eng anga dan tha pawh nei ila, awmzia a nei chuang lovang. Sorkar hotupa berin enchhin a nih tur thu te a lo sawi bawk nen, MLTP Act ang chi-ah bawk kan lut leh ang tih a hlauhawm hle a ni. 

CHAWIMAWNA, AWARD LEH MISSION HNA

Zarkawt Local Council in Mizoram Chief Minister ni rei leh zing ber an veng chhung mi a nihnaa Pu Lalthanhawla an chawimawi khan, a nau Pu Lalthanzara pawh chawimawi tel ve law law phu in an hria a. An unauva an chawimawi kha kan hre theuh awm e. Zarkawt Local Council hotute zinga pakhatin a sawi dan chuan Pu Hawla an chawimawi chhan hi politics lama a tih that leh tih chhiat lam ai mahin Mizoram record a chuang reng tawh tur Mizoram Chief Minister hei leh chen ni thei an veng pa a nih vang a ni. 

A hnu deuhvah India rama missionary rilru pu Kristian intelkhawm pawl Evangelical Fellowship of India (EFI) chuan Pu Lalthanhawla chu chawimawina ropui tak mai Lifetime Achievement Award a hlan bawk a. EFI in he chawimawina a hlan chhan hi missionary leh Kristian langsar zualte chanchin internet-a tarlang thin pakhat Missionaries Of The World, Chennai, Tamil Nadu, chuan heti hian a ziak a: “The Evangelical Fellowship of India (EFI) has conferred a Lifetime Achievement Award on Mizoram Chief Minister Lal Thanhawla in recognition of his dedication to the service of Christian mission works on November 07, 2014”

Pu Hawla hi faklo tu tam tak an awm a. An fakloh chhan pawh chhan dik (valid) tak tak a ni hlawm. Amaherawhchu Mizoram history-a hmun pawimawh tak a chan reng tawhna tur pakhat a awm a. Chu chu amah ngaisangtu leh ngaisanglotu ten an pawm loh theih loh Zoramin remna leh muanna kan neih theihnana hmanrua a nihna hi. Kan hnam history ah a chuang ve reng tawh dawn a, thangthar thil chik zawk ten rambuai chanchin leh Peace Accord te an rawn zir hunah Pu Hawla hming hi an lam tel zel tawh dawn a ni. Chulai chu, a ropui leh ropui loh lam thuhran ni se, a chhinchhiahtlak avangin Pu Hawla telna hi kan ngaihthah thei lovang. Amaherawhchu, Congress party in “lalthutthleng” kian anga ropui taka an sawi erawh hi chu side A chauh a nih vangin thudik kim (full facts) anga sawi theih niin a lang lo. Kan ngaihdan chu engpawh ni ta se, Zoramin remna leh muanna kan neih theihnan hmanruaah a tang a ni tih hi kan pawm tur niin a lang. A sawi uar deuh chuan Pathianin hmanruaah a hmang te pawh an ti thei ang.

Zarkawt Local Council in an vengpa Pu Hawla (leh a unaupa) an chawimawi khan Chief Minister ni rei ber a nihna zawnah veng rilruin an lawmpui a, chawimawi tlakah an ngai hial a. Peace Accord kan neih theihnana a thil tih kha thupui berah nei ta zawk se an chawimawina kha a chhinchhiah tlak lehzual ang.

EFI in Pu Hawla chawimawina a hlan khan Kristian mission (Chanchin Tha hrilhdarh) hnaa a inpekna vang niin ziahlan a ni a. Kan Chief Minister hian politics lama sulhnu a neih bakah hian Chanchin Tha thehdarhna lamah kawng hrang hrangin tha a lo thawh tawh tih EFI award atang hian kan ring thei ang. Award pek chhan hi amah tak missionary hna thawka penchhuak a nih loh avangin sum leh pai leh kawng danga a lo tel vena a nih a rinawm bawk a. Mission hna kal zelna tur hian inpe te an pawimawh em em a, a penchhuak te kal zel na turin sum leh pai a pawimawh hle bawk a ni. Sum leh pai lamah Pu Hawla hi a lo tang te a nih chuan Pathianin a inpekna a hman ngei a rinawm. Hman deuh pawh khan Mission Foundation Movement, Bawngkawn, Aizawl, missionary training zo pakhat chawmtu neilo chu Pu Hawla hian a chawm a. Missionary hna thawk duh, chawmtu neilo tan chuan thil lawmawm tak a ni ang.

Mission hna kan tih hi kohhran hrang hrangin kan pawm dan a inang lo hle. A then chuan thil tha tih hrim hrimah an ngai a. Kohhranin Pathian hminga rawngbawlna kan thawh tawh phawt chu mission hnaa ngai te pawh an awm. Mihringpui te dinhmun chawikanna hnathawh pawh mission hnaa ngai tam tak an awm a. A dikna chen a awm laiin Bible kan en chuan mission hna kan tih hi a dang hle.  Matthaia 28:18-20 a Lal Isua thusawi hi Thupek Ropui (The Great Commission) tih niin evangelical Kristian te chuan mission rawngbawl hna kan thawh chhan bulpui berah kan pawm a ni.

“Tichuan, Isua chu an hnenah a lo kal a, anniho chu a bia a, “Lei leh vana thuneihna zawng zawng ka hnenah pek a ni tawh. Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang,” a ti a.

He hna hi tualchhung kohhran program ang nilovin Isua chhandamna, a la hre ngai miahlo ten an lo chan theih nana hna thawh a ni. A danglam bik em em a. Pathian Ram a lo thlen theihna tura hnathawh awm chhun a nih avangin chu hna thawka pen chhuak te chu Kohhran pawhin kan ngaipawimawh hle a ni.

Pu Lalthanhawla hian a hun tam zawk a hmanlohna lam – mission hna – hi a pawimawhzia a hria tih a thusawi atangin kan hre thei awm e.  Amaherawhchu, a rilru leh ngaihtuahna senna pui ber a ni lo tih pawh a lang chiang hle. Chief Minister PIO Pu Lalramliana Chawngte-in EFI award hlanna program-a Pu Hawla thusawi DIPR website-ah heti hian a tarlang a: “…Pathian ringtute hi tun hnaiah khawvel thlang lam ramah te nasa taka Kristianna a tlakhniam avangin missionary tam thei ang ber kan tirhchhuah pawimawh a tih thu uar takin a sawi bawk a ni.”

Khawthlang ramah Kristianna leh sakhuana hrim hrim a tlahniam nasa hle a. Australia ramah pawh hian an nu leh pa te Kristian ni si, anmahni pawh an nulat tlangval thlenga Kristian inti, mahse sakhuana leh Pathian hawisan hlauh an tam hle. An Prime Minister hlui pakhat Julia Gillard-i pawh a tleirawl laiin Baptist kohhran thalai pawlah a kul ataiin a tel thin a. Mahse, a hnuah chuan Pathian ringlovah a inchhal daih. Amaherawchu, sap ho hi kum za tam Kristianna in a lo chiah tawh an nih avangin Bible zirtirna leh values te hi an hnam nunphungah a bet tlat a. An khawtlang leh sorkar rorelnaah pawh thui tak a tel tlat a ni. 

An rilru puthmang hrim hrimah chuan a tlangpuiin mimal zalenna an dah sang a, mi khawsak danah an inrawlh tehchiam lo. An ram a hausa tlangpui a. Hna an thawk nasa bawk a, sum leh pai pawh an ngah tlangpui. Khawvel ram dang tlawh kual nuam an ti a, mahse chennan tak tak chuan an ram hi a nawm em avangin ram dang an ngai lem lo. Mipa leh mipa, hmeichhia leh hmeichhia inkawp an awm nawk a, an sorkar neih azirin chutiangte inneih theih dan te pawh an siam hial. Bible in a phalloh nupa inkar nilova mipat hmeichhiatna hman pawh mimal zalenna thila an ngaih avangin a tlangpuiin an pawisa lem lo. Tin, innei lova nupa anga khawsa dun pawh an thahnem. Kristian te erawh chuan an pawm lo hle thung. An nun a zalen a, an pi leh pu ten Bible zirtirna avanga khawtlang nuam an lo siam chu nuam an ti a. An hlut bawk a. Nunphung dang leh khawsak dan dang han tih thar tula hriatna a lian lo hle. Khawvel tehnaah chuan an thlen chin bak hi a awm lo a tih theih hial ang.

Chutiang hnam te zingah chuan keini hnam hnufual zawk te hi sakhuana thilah tlemte kan awm ve a. Sakhuana thil ni lem lovah erawh chuan a sang tel kan awm ve tawh thung. Pu Hawla tu te pahnih pawh khawvela Mizo ten kan ram ngaihsan ber USA leh a ram thenawm Canada ah an awm a. Tuna kan han sawi ang sap ho khawsak dan pawh hi an hrechiang ang, an ngaihven zawng a nih chuan.

Hnam leh hnam inlaichinnaah hian hnam hnufual zawk te hian a insawhnghet tawh zawk te hi kan chung en loh theihloh na chin a awm a.  A te zawk nihna rilru atang chuan tlukpui ni miah lo bula ngampa taka thil han tih hi thil awllo tak a ni, Zokhaw mite khawpuia mi neinung te bula an tlangnel lo thin ang hian.

Sap ho hian Mizote hi mission hna thawhpui atana an rin tawh chu an ring thei hle a. Amaherawhchu, anmahni aia hnam hnuaihnung fe zawk te hi Pathian Thu leh nun dan han hrilhlet tur chuan min beisei lem lo niin a lang. Pathianin a hnam anga min kohna a nih a rinawm loh bawk. A chhan chu an zinga rawngbawl turin an khawsak anga khawsak a tul a, kan mizia leh kohhran sum leh pai neih hian a tlin lo.

Hman kum khan Mizoram Chief Minister bawkin missionary nuai 1 tirh chhuah a sawi a. Lengzem chanchinbuah chipchiar takin missionary chutiang zat han tirhchhuah a harsat dan an rawn ziak a. A theihlohzia te pawh kan ti thei ang. Tunah kan Chief Minister in sap ho zinga missionary hna thawk turin a tam thei ang ber kan in tirhchhuah pawimawh a tih thu a sawi kan hre leh a. An thahnemngaihna chu a tha reng a, mahse kan pu te hian thil thleng miahlo tur an sawi a ni. Luka 18:27 tlawhchhana sawimam tum pawhin Pathian ruahmanna a nih loh avangin a theihna aiin a theihlohna a lian zawk ang.

SCHOOL EDUCATION DEPTT (LEH SORKAR) HOTUTE THUSAWI BIHCHIANNA

Kar hmasaa Vanglainiin School Education department hotute CSS hnuaia Hindi zirtirtute hlawh chungchang a zawh khan, hriat theuh angin, hlawh pek an nih loh chhan hrang hrang an lo hrilh a. School Education “hotute” thusawi hi sorkar thuchhuak anga ngaih a nih avangin ngaihven a hlawh hle. Zawhna zawhbelh pawh engemawzat a piang a. Hindi zirtirtute hlawh lak theihloh chhan sorkarin a sawi hi I han bihchiang dawn chhin teh ang.

1) “CSS hnuaia Hindi teacher 1,305-te chu high school leh middle school-a thawkte niin…hlawh an lak loh chin chu thla nga a ni.”

Hindi zirtirtu 1305 ten hlawh an lak theihloh chhung hi a ruaitu department hotute hian thla nga tiin an sawi a. Mahse, hlawh la thei lo zirtirtute chuan thla nga nilovin thla sarih a nih thu vawi engemawzat facebook ah te an au chhuahpui thung. District pakhata zirtirtute chu May ni 7 khan Jan-Feb hlawh an account ah dah a ni a, mahse ₹1500 in a kimlo. ₹500 hi association hruaituten automatic in an la a, sorkar atanga kimlo chu ₹1000 a ni. Facebook hmangtu hrang hrang te comment han tarlang lawk ila: 

“April thla atanga tun thlengin an la la lo.february thla khan 1000 theuh in an pe kimlo bawk” (Empy Infimate). Ani lo pawh hian thla sarih a nih thu hi an sawi nual a ni.

“nupui fanau chawmna a tan a hmang tan chuan buaithlak ve duh got ang le..” (Zama Royte). Sorkar hotuten Hindi zirtirtute rumna hi an hriat loh a hlauhawm hle.

“Inmawhchhiat vak vak tur pawh a ni lo, a posttu pawh hi eng motive-in nge a post a hriat loh, tuna kan minister leh P/S te hian an thiehtawp tak meuhmeuh an chhuah tih hriatpui a, deuhsawh vak vak loh a tha. Hindi zirtirtu lak dan a bilh atanga tho lo tam tak a awm...........A hria-in sawi se dar kar 3 sawi tur an nei ang. ......” (Fanai Laltansanga) 

Pu Laltansanga School Education hotute thusawi bihchianna a lo comment-na a ni a. A post tu motive hi a duh tak tak chuan a zawt thei a. Mahse, a zawt lem lo niin a lang. Sorkar hotuten an "theihtawp tak meuh meuh" an chhuah a tih hi uluk taka enin a dikna a tlemin a lang. Hindi zirtirtute lak dan hi tuna kan thupui ber a ni lova, buaipui ber zawk chu Congress sorkarin an vote pawh a duh em em Hindi zirtirtu 1305 te hlawh thla sarih pek tawh loh chungchang hi a ni.

A tam zawk chuan thla tam hlawh pekloh chungchangah hian sorkar insawithiamna hi an pawm lo niin a lang a. Nupui fanau chawmte phei chu an mangang takzet a ni tih an thusawi (comment) atangin a hriat theih awm e. An manganna hi thinrimnaah a chang mek niin a lang bawk a. A chhan lian tak nia lang pakhat pawh hetia an thawhhlawh an lak theihloh laia sorkarin NLUP sum sem a nih thu an hriat leh thin vang a ni. 

Mizoram Rural Bank-a thawk pakhat “Tetea Fanchun” chuan heti hian facebook ah a comment a, “Ofis a thawk ngei in midang hlawh nlup ah kan divert fo tiin min hrilh... Hlawh lo thei lo awm teuh mahse, nlup lak chuan kan duhtawk hlawm mai..kan inhmangaih tawn dan hi a bial a zim tlat..” Ani lo pawh hian hetiang hi sawi theih an nei nual a ni awm e. Dawt hmanga scheme buatsaih NLUP hi he'ng zirtirtute hlawh atanga pawhpen ang deuhva sawi hi a dik leh dik loh NLUP Nodal Minister hian a sawichian a tha mai thei. 

Hindi zirtirtu thla sarih hlawh la tawhlo te thinrimna tizualtu tur nia lang leh bawk chu an sorkar hotute tawngkam leh an khawsazia te hi a ni. Facebook hmang thin chuan an hmu thei ang. Education Minister puitu Parliamentary Secretary Joseph Lalhimpuia phei chu a social media activity ah hian Hindi zirtirtute (leh SSA zirtirtute) manganna han chhawk zangkhai tur a awm tehchiamin a lang lo. Thla sarih hlawh la tawhlo tan chuan anmahni enkawltu tur te awm awl der der lai nia lang te hi thil hmuh ninawm mai a ni thei ang. Sorkar hotu mawhphurhna reilo te vuan tura kan chhawr te hian an social media thuziak leh thlalak pholan te hi nei leh neilo te inkarah harsatna a siam thei a ni tih hriaiin an fimkhur a tha hle. 

Politician te facebook hman dan sawi takah chuan hmannia Chakma leh Mizo issue a alhchhuah lai vel khan cabinet minister Pu Zodintluanga chuan Zonet Zoram Kalsiam host tu Pu Lalnuntawma Fanai facebook wall-ah a facebook thian Lunglei MZP hruaitute zinga mi K.Lalremruata (Lal Tuaitea Khiangte) zawhna, "Chuan Indigenous chu in in hrilhfiah ta em..." tih chu heti hian a chhang a, " Lal Lal Tuaitea Khiangte indigeneous chu hrilhfiah ngai an awm lo a, Supreme Court of India in a hrilhfiah dan hi fimkhur tak in kan thlirhomzawk mai ani....." Cabinet minister hian a comment hi fiamthu ah a ngai a. Mahse, fiamthu na chi a ni lo tih leh Constitution Schedule 3 part 5 tlawhchhana a thutiam nen a inmillo tih a hre lo niin a lang.  He a thusawi (comment) hi hmun danga pholan leh sawiho a nihin Oct 15 khan heti hian a status-ah a ziak a, "...I hriat mai mai ah Lal Tuaitea Khiangte te etc te nen hian FB hi hun awl kan neih chang a, kan infiamna, a tak a, inhmu thei lo, rilru tih zangkhai nan a, hmang kan ni ti hi lomhre phawt la". 

Sorkar hotu ni tura mipuiin kan thlante hi mimal nun (private life) neilo khawpa kan chhawr buai tur a nih loh laiin Pu Hawla'n, "...tupawh hi kan accountable a ni tih hriat reng a ṭul a ni" a tih ngaihtuah phei chuan Cabinet minister ni phak phei chu an tawngkam (ziak, chhut leh sawi) an fimkhur em em tur a ni ang. President Obama te, PM Modi-a te hian kan hman ang facebook hi an hmang ve thova. Keini hovin fiamthu thawhnan leh awmze nei tak taka kan lo hmang thinlo hi world class changkanglo ni hian ka lo in hre thin a. Kan Congress MLA langsar te pawh hi world class changkanglo zinga an tel lohnan an Personal/Private Secretary fel tak tak te hian professionalism standard sang tak nen social media hi han hman tir tak tak se, kan kang awt mai ang. 

2) “An hlawh tur Central-ah bawhzui reng ni mah se, vanduai a kal tluang a, Central lama official-te'n thil tihsual an nei thin niin an sawi”

He “vanduaina” tih teh ngawt hi a ngaihna hriat a har hle. LPS producer Pu Vanneihthanga Vanchhawng-in October 25-a khan facebook Special Report group-ah heti hian a post a, a chiang deuh zawk awm e:

“School Education Dept. hotute hnen atanga thudawn danin, CSS Hindi teacher hlawh chungchangah hian sawrkar laipui dawr a nih hnuah a kal vanduai hle niin an sawi a, Sanction Order tihfel vek tawh anga ngaih chu HRD-a a khawihtu berin School Education Dept nilo, Hindi zirna hmun dang file dang nen a chawhpawlh palh a, hei hi Education Minister leh MP leh Official te nen bawhzuia chinfel a nih leh hnuah RBI ah an thunna ID hmuh a ni lo leh a, hei hi enchian a nih leh hnuah a thunna 'Head' diklo ah thun a ni tih hmuhchhuah a nih leh a, henghi theih ang anga tihfel a nih hnuin tunhnai khan thawn theih tura tihfel a ni ta niin an sawi.”

Hei hi thil awmdan a nih chuan Hindi chawilar tum Prime Minister hnenah hian State anga kan lungawilohna leh a tul anga inquiry hial din tura zu ngen chi ni te paw'n a lang.

3) “Central lamin CSS Hindi teacher-te hlawh tur a rawn pek tur hi cheng vbc. 25.78 a ni a; chu chu Central lamin Mizoram account-ah thun tawha an insawi laiin, Mizoram Finance hotute'n an la hmu si lo niin an sawi”

Ministry of HRD Under Secretary Sanjay Singh-a sawi dan chuan Ministry of Human Resource lam atanga an tih tur ang an ti fel vek tawh a. Sum lam pawh a sanction order thla khat kalta khan tih fel niin, Mizoram sorkar Education Department Secretary hnenah a copy pawh pek a nih tawh thu a sawi. Mizoram account-a thun tawh Mizoram Finance hotutute’n an la hmu lo anga sawi hi ani pawhin a lo hrethiam bik lo niin a lang.

4) “R Lalvena chuan, CSS Hindi teacher-te hlawh tur chu an ûm zui mek zel thu leh, Delhi Mizoram House-a resident commissioner pawh an ṭul anga lo buaipui tura an ngen thu a sawi a; pawisa chu hmuh thuai theih an inbeisei thu a sawi bawk.”

Vanglainiin he chanchinthar a ziahlan atangin ni tam a liam ta a. Pu Vena hian Hindi zirtirtu te hi thuthar hrilh theih a neih chuan an tan Chanchin Tha tluk a ni ang.

A tawp berah chuan Vanglaini palai lo kawmtu School Education hotute Pu H.Rohluna leh Pu Joseph Lalhimpuia te hian an hriatpui em? Hlawh pek theihloh chhan an sawi hi an hriatpuiin an pawmpui em? Thla sarih hlawh pe lova inchhawr ngawt chu a mawhphurtu an awm ngei ang. "Kan uiin ka homework a lo ei zo" tih ang chi chhuanlam hi hneawm tawh em em a, chhanna rintlak kan sorkar hotute hian an neih a pawimawh hle, mipui rin an beisei chuan.

SAPRAM ZIRNA LEH SCHOOL

Kan fanu upa zawk hi nakumah school a kal tan ve dawn a. A kalna tur pawh a nu duhthlan zawkah admission kan hmu thei hlauh a. A nau zawkin nakum atangin preschool a tan ve dawn bawk a. Chhungkuain kan inpuahchah ve nasa hle.

Kan awmna veng Mortdale hi Sydney khuaa a chhim lam Hurstville City Council hnuaia veng (suburb) 12 zinga veng pakhat a ni a. Mortdale vengah chuan sorkar school Mortdale Public School a awm a. Kan fanu hi, sorkar dan pangngai chuan, kan veng school-a kal tur a ni a. Mahse, kan veng thenawm school Oatley-West Public School ah kan dilna min ngaihtuah sak a, veng in ri-na bula kan awm vang te leh zirlai an neih tlem vang te pawh a ni mai thei, min lo pawmsak ve mial a. Nakum atanga kindergarten class kal tan turin a inpuahchah ve mek a ni. Nu leh pa tam tak ten in lo tawn vek tawh thil ni mah se, ti ve tan tur chhungkaw tan chuan chhungkaw program thar tur a ni dawn a. A phurawm ve hle.

Australia ram pumpuia an tihdan ang bawkin kan awmna state New South Wales-ah hian kalphung mumal deuh an nei a. Zirlaite hi zirnaah chauh ni lo, kawng tinrenga zirlai hlawhtling an nih theihna tur leh khawtlang tana mi tangkai an nih theihna turin enkawl dan an lo uluk khawp mai tih hi an kalphung hmuh chianin a hriat.

School kal tan tur ten thil chinchang an lo hriat lawk theihna tur orientation program vawi thum lai buatsaih a ni a. Kar hmasa thawhlehni khan a vawihnihna chu keipawh chawlh lain ka va tel ve a. Naupang enkawlna lama tan an lak nasatzia a takin ka hmuin ka hria.

Orientation program chu zing dar 10 ah kan tan a. Kan va thlen chuan zirlaite leh an nu leh pa te engemawzat an lo awm ve a. A hmasa bera an tih chu school kal tan tur theuh te leh class sang deuhva zawka zirlai pakhat inkawp tir an ni. Chu’ng zirlai te chu  “school buddy” an ti a. Kan fanu buddy pawh pawl 4 zirlai a ni. An hna ber chu school kal tantir te kawng hrang hranga lo kaihhruaia, lo tih tlangnel a ni. School kan thlen tirhin kan fanu buddy chuan a rawn zawng chhuak vat a. U zawkin nau zawk a kaihruai angin darkar khat vel school kalphung te leh classroom kalphung te kawhhmuhin an in hruaikual a. A rawn hlim haw hle.

Chumi hlan chuan school assistant principal pakhatin nu leh pa hote chu school hall lamah min ko khawm a. Nu leh pa te tana orientation min neih pui ve thung a. A bengvarthlakin a ngaihthatthlak hle.

KG classroom. Projector hi khawi hmunah pawh hian an hmang nasa

School hotuten an ngaihpawimawh em em nia ka hriat chu school kal tantir te leh an nu leh pa ten he chhungkaw rahbi thar an zawh turah hian harsatna hrang hrang pawh lo awm se, an theih ang anga tanpui an inhuam hi a ni. Mihring kan inanloh avangin mi thenkhat tan chuan phone emaw hmaichhana inbiak hreh te a awm thei tih an hria a, fate chungchanga zirtirtute be duh te tan inthlahrung lovin kawng hrang hranga biakpawh theih reng an nih thu an sawi uar hle. Email hmang pawhin zirtirtute thil hrilh duh nei te tan hrilh theih reng an nih thu te an sawi bawk a ni.

School inenkawldan leh kalphung hriatthiamna turin NSW Department of Education and Communities (www.schoolatoz.nsw.edu.au) buatsaih video leh thil dang dang projector hmangin min entir a, assistant principal chuan a sawifiah tel bawk a. Education department website ah hian nu leh pa te leh zirlai te hriat tur thil pawimawh leh tangkai tak tak an dah a. An education department an inthlahdah lo tih a hriat hle.

Oatley-West Public School hi India ram independent kum 1947-a din a ni a. Sorkar school a nih angin sorkar regulation leh standard zawng zawng zawm tura ngaih a ni. School plan 2012-2014 tarlan danin school admission an neih theih zat chu 475 a ni a. Primary school a nih vangin KG atanga pawl 6 thleng a awm. Australia ah hian middle school a awm lem lova, pawl 6 thleng hi primary school a ni a, pawl 7 atang pawl 12 thleng hi high school a ni thung. Kan fanu kalna tur school ah hian zirtirtu 19 an awm a, support staff 5 awmin Assistant Principal pawh 4 an nei.

phullem inkhelhna

Nu leh pa te hi school enkawlnaah hian thui tak an inrawlh a. School Council tih te, Parents & Citizens tih te, School Club Music Council tih ah te hian nu leh pa ten an fate enkawlna kawngah nasa takin an tel a ni. Chubakah chuan parent assistance program te an ti a, classroom-ah te, library-ah te, canteen-ah te, uniform dawr-ah te leh school program bik Art and Craft show tihah te hian nu leh pa te leh vengchhung mi te an in volunteer nasa thin hle.

New South Wales ah hian sorkar school ah Pathian Thu zirtirna an nei a. Kan kohhran, Mortdale-Oatley Baptist Church-a kan thalai pastor pawh school chaplain a ni. Chubakah, kan assisant pastor leh kohhran mi dangte pawh Scripture Class la in rawngbawlna remchang takah an hmang. Sapramah hian Pathian hawisan an tam tawh hle a. Thlarau lam thil ngaihsak tawh lo pawh an thahnem hle. Chutiang a nih laia school lama Pathian Thu an lo zir theih tura ruahmanna a awm hi Kristian te chuan an hlut a. Pathian Thu zirtirtute chuan a tlangpuiin hlawh nei lovin an thawk hlawm. Full time-a thawk, kohhran khat emaw kohhran tangrualin hlawh an pek te pawh an awm bawk.

School naupangten pawnah lukhum an khum

Australia ramah hian sorkar school-a naupang zirna hi a hranpain fee a awm lova. Amaherawhchu, uniform te, zirlai mamawh pen leh pencil ilo te, extracurricular activity leh excursion ah te hian sum senna a sang hle. Tin, Voluntary School Contribution a awm bawk a. Sports leh educational program thenkhat tha zawka school in a kalpui theihnan zirlai pakhatah kum tirah $300 bawr a ni hlawm. Naupang uniform ah hian lukhum parh a tel a. Pawna an awm chuan lukhum an khum vek a ni.

school area-ah chuan hetiang
road sign hi a awm vek

School timing hi a tlangpuiin zing dar 9 atanga tlai dar 3 thleng a ni a. School hotuten an veng chhung mamawh dan azirin darkar chanve a hma emaw tlai ten an her rem bawk. Mahse, zing dar 9 bawra tan hi tun hma atanga an lo kalpui dan a ni. 

Kan fanu school kalna turah hian kohhrana kan thian thenkhat te pawhin an fate an kaltir ve hlawm a. Orientation-a kan va kal pawh chuan kan thiante fate thenkhat pawh kan hmu nual.

A chipchiara zirchiang duh tan New South Wales sorkar education department leh Oatley-West Public School website ah te hian helamah zirna an kalpui dan kimchang chhiar theihin a awm: www.dec.nsw.gov.au , www.schools.nsw.edu.au ,www.oatleywest-p.schools.nsw.edu.au

Sorkar school lo hi kohhran school engemawzat a awm a. Sydney-a kohhran school tha pawl tak pakhat Presbyterian Ladies College (www.plc.nsw.edu.au) anniversary lawmnaah Rev.Zosangliana Colney a rawn tel tumin a zarah kan chhungkua pawh kan han kal ve a. Sorkar school hi a tha viau a. Mahse, kohhran school chu a lo tha lehzual, fee erawh a sang hle.